Uyalifumana Ithabo ‘Ekufakeni Isandla Ekusizeni Amakholwa’?

AMAKRESTU wokuthoma eFilipi bekaziwa ngokusekela kwawo ngomusa ukukhulekela kweqiniso. Encwadinakhe ephefumulelweko awatlolela yona, umpostoli uPowula wathi: “Ngiyambonga uZimu wami, ekunikhumbuleni kwami. Begodu njalo nangithandazako nginithandazela ngethabo, ngapha ningisize ngakhona emsebenzini wevangeli kusukela emathomeni kufikela khathesi.” (Fil. 1:3-5) UPowula usikhumbula kuhle isikhathi uLidiya nomndenakhe ababhabhadiswa ngaso begodu ngomusa wabawa uPowula nagade akhambisana nabo bona bahlale emzinakhe.—IZe. 16:14, 15.

Kungasikade, ibandla leFilipi eliqeda ukwakhiwa lathumela isizo kabili kuPowula nekasahleli iimveke ezinengi namakholwa akunye nawo eTesalonika, ekude pheze ngamakhilomitha ali-160. (Fil. 4:15, 16) Ngemva kweemnyaka embalwa,  abazalwana beFilipi nebeMakedoniya baqalene nobudisi ‘nokuba dududu,’ bezwa ngokutlhoga kwamaKrestu egade atjhutjhiswa eJerusalema begodu bafuna ukuwasiza. UPowula wakufakazela bona kwamambala lokhu ‘bekungaphezu kwamandlabo.’ Nanyana kunjalo watlola: “Asirabhela khulu bona nawo avunyelwe ukufaka isandla ekusizeni amakholwa eJudiya.”—2 Kor. 8:1-4; Rom. 15:26.

Eemnyakeni engaba litjhumi ngemva kobana abazalwana beFilipi bamukele ubuKrestu, bebasaragela phambili batjengisa umoya wokupha ofanako. Nesebazwile bona uPowula ubotjhiwe eRoma, bathumela u-Ephafrodithu owakhamba amakhilomitha ayi-1 287 enarheni nelwandle bona amsele izinto ebekazitlhoga. Ngokukhanyako, abazalwana beFilipi bebafuna ukutlhogomela uPowula ukwenzela bona ahlale aqinisa abazalwana begodu atjhumayela, ngitjho nanyana abotjhiwe.—Fil. 1:12-14; 2:25-30; 4:18.

Namhlanjesi, amaKrestu weqiniso akuqala njengokulilungelo ukusekela umsebenzi wokutjhumayela ngoMbuso nokwenza abafundi. (Mat. 28:19, 20) Athuthukisa iinkareko zoMbuso ngokunikela ngesikhathi, umzamo, nangemali. Ibhoksi elilandelako litjengisa ezinye iindlela ongahlanganyela ngazo ekusekeleni umsebenzi esiwunikelwe nguZimu lo.

[Ibhoksi emakhasini 22, 23]

IINDLELA ABANYE ABAKHETHA UKUNIKELA NGAZO

IMINIKELO YOMSEBENZI WEPHASI LOKE

Abanengi babekela eqadi imali ethileko bonyana bayifake ebhoksini elitlolwe bona “Umsebenzi Wephasi Loke.”

Qobe nyanga, amabandla athumela iminikelo le e-ofisini laboFakazi BakaJehova elikhonza iinarha zawo. Iminikelo yemali yokuzithandela ingathunyelwa ngokunqophileko ku-Watch Tower Bible and Tract Society of South Africa, Attention Accounting Office: Private Bag X2067, Krugersdorp, 1740, South Africa, namtjhana e-ofisini legatja laboFakazi BakaJehova elikhonza inarha yekhenu. (Iminikelo yokuzithandela ekukhulunywa ngayo ngenzasi nayo ingathunyelwa e-ofisini legatja laboFakazi BakaJehova elikhonza inarha yekhenu.) Amatjhege athunyelwa esiphandeni esingehla kufuze atlolelwe i-“Watch Tower Society.” Kunganikelwa nangejuwelari nezinye izinto eziligugu. Izinto ezinjalo kufuze zikhambisane nencwadi etjho ngokurhunyeziweko bona zimnikelo.

UKUNIKELA OKUHLELIWEKO

Ngaphezu kokunikela ngokunqophileko ngemali, kunezinye iindlela zokunikela ezizuzisa umsebenzi woMbuso ephasini loke. Lezi zibandakanya okulandelako:

Intjhorensi: I-Watch Tower Bible and Tract Society of South Africa ingabhaliswa njengendlalifa yepholisi yentjhorensi yokuphila namtjhana yomhlalaphasi nofana yomndende.

Ama-Akhawundi Webhanga: Ama-Akhawundi webhanga, ama-certificate of deposit, namtjhana ama-akhawundi womhlalaphasi angenziwa ithrasti namtjhana athunyelwe ku-Watch Tower Bible and Tract Society of South Africa, umnikazi nekahlongakalako, kuye ngemibandela yebhanga yendawo.

Amatjhere nama-Bond: Amatjhere nama-bond anganikelwa ku-Watch Tower Bible and Tract Society of South Africa njengesipho namtjhana i-Watch Tower Bible and Tract Society of South Africa ingatloliswa njengendlalifa ye-Transfer on Death.

Iindawo Nezindlu: Iindawo nezindlu zinganikelwa njengezipho ngokunqophileko namtjhana, nekuyindawo yokuhlala, kunganikelwa ngeenzuzo zayo kukulapho iragela phambili isebizweni lomninikazi nekasaphilako. Thintana ne-ofisi legatja lenarheni yangekhenu ngaphambi kokunikela ngendawo namtjhana indlu.

Iincwadi Zamafa Namathrasti: Indawo namtjhana imali inganikelwa ku-Watch Tower Bible and Tract Society of South Africa kusetjenziswa incwadi yelifa engokomthetho, namtjhana i-Watch Tower Bible and Tract Society of South Africa ingabhaliswa njengendlalifa esivumelwaneni sethrasti. Ithrasti ezuzisa ihlangano yezekolo ingaletha iinzuzo zomthelo ezithileko.

Ukufumana ukwaziswa okungeziweko, ungathintana ne-Accounting Office, kungaba ngokutlola incwadi namtjhana ngomrhala, esiphandeni esitlolwe ngenzasi, namtjhana uthinte i-ofisi legatja elikhonza inarha yekhenu.

Accounting Office

Watch Tower Bible and Tract Society of South Africa

Private Bag x2067

Krugersdorp

1740

South Africa

Umrhala: 011 761 1323