Ukunqotjhiswa Mumoya KaZimu Ngekhulu Lokuthoma Leemnyaka Nanamhlanjesi
Ukunqotjhiswa Mumoya KaZimu Ngekhulu Lokuthoma Leemnyaka Nanamhlanjesi
“Kusesengiwo umoya owenza koke lokhu.”—1 KOR. 12:11.
1. Ngimaphi amaphuzu esizowacabangela esifundwenesi?
IPENTEKOSI. Qala bona ibizweli lisikhumbuza izenzakalo ezithabisa kangangani! (IZe. 2:1-4) Ukukghuthulwa komoya ocwengileko esenzakalweneso sangekhulu lokuthoma kwatshwaya itjhentjho eliqakathekileko lokusebenzelana kwakaZimu neenceku zakhe. Esihlokweni esigadungileko, sifunde ngezinye iindlela umoya kaZimu owenza ngazo abathembekileko bekadeni bakghone ukuthwala izabelo ezibudisi nezinemininingwana eminengi. Kodwana khuyini umahluko hlangana kwendlela umoya kaZimu owasebenza ngayo ngeenkhathi zangaphambi kobuKrestu nendlela owasebenza ngayo ekhulwini lokuthoma leemnyaka? Begodu amaKrestu azuza njani ekusebenzeni komoya ocwengileko kaZimu namhlanjesi? Akhe sibone.
‘Qala! Incekukazi KaJehova!’
2. UMariya wawubona njani umphumela wokusebenza komoya ocwengileko?
2 UMariya bekakhona ekamurweni elikhulu eliphezulu eJerusalema nekukghuthulwa umoya ocwengileko egade uthenjisiwe. (IZe. 1:13, 14) Nokho, eemnyakeni engaphezu kwamatjhumi amathathu ngaphambi kobana kwenzeke isenzakalweso, besele abone umphumela wokusebenza komoya kaJehova ngeendlela ezitjhejekako. UJehova wadlulisela ukuphila kweNdodana yakhe kusuka ezulwini kuya ephasini, wenza uMariya obekaseseyintombi bona abe sidisi. Ebekakuthwele ‘bekwenziwe ngomoya ocwengileko.’—Mat. 1:20.
3, 4. UMariya wazizwa njani ngalokho uZimu ambawa bona akwenze, begodu singamlingisa njani?
3 Kubayini uMariya anikelwa ilungelo elingeze lamadanisekweli? Ngemva kobana ingilozi imhlathululele ngentando kaJehova ngaye, uMariya warhuwelela wathi: ‘Qala! Incekukazi kaJehova, akwenzeke kimi njengombana utjhwileko!’ (Luka 1:38) Ngokutjho njalo, uMariya wembula iimcabango yehliziyo leyo uZimu egade sele ayibonile. Ukusabela kwakhe msinyana kwatjengisa bona gade akulungele ukwamukela intando yakhe endabeni le. Akhenge abuze bona abantu emphakathini bebayokuqala njani ukuba sidisi kwakhe nofana bekuzobuthinta njani ubuhlobo bakhe nendoda egade azokutjhada nayo. Ngokuzibiza ngencekukazi ephasi kinazo zoke, uMariya watjengisa bona uthemba uJehova ngokupheleleko njengeKosi yakhe.
4 Ngezinye iinkhathi wakhe wazizwa uphelelwa mamandla ngebanga leentjhijilo nofana iimthwalo yefanelo ekonzweni kaZimu? Ngamunye wethu wenza kuhle ngokuzibuza: ‘Ngimthemba ngokupheleleko uJehova bona uzokwenza izinto ngokuvumelana nentando yakhe? Ngitjengisa umoya wetjiseko kwamambala?’ Qiniseka bona uZimu unikela umoya wakhe kilabo abamthemba ngehliziyo yoke begodu batjheje intando yobukhosi bakhe.—IZe. 5:32.
UPitrosi Wasizwa Mumoya Ocwengileko
5. Kungaziphi iindlela uPitrosi abona ngazo umoya ocwengileko usebenza ngaphambi kwePentekosi laka-33 C.E.?
5 NjengoMariya, umpostoli uPitrosi wazibonela mathupha ukusebenza komoya ocwengileko kaZimu ngaphambi kwePentekosi laka-33 C.E. UJesu wanikela yena nabanye abapostoli igunya lokuqotha amadimoni. (Mar. 3:14-16) Ngitjho nanyana iMitlolo inganikeli imininingwana eminengi, kubonakala ngasuthi uPitrosi walisebenzisa igunyelo. Godu amandla kaZimu enziwa abonakala lokha uJesu nekamema uPitrosi bona akhambe phezu kweLwandle leGaleliya amhlangabeze, begodu uPitrosi wenza njalo. (Funda uMatewu 14:25-29.) Ngokunganakuzaza, uPitrosi wathembela emoyeni ocwengileko bona umsize enze imisebenzi yamandla. Msinyana umoya loyo bewuzokusebenza kuPitrosi nakubafundi akunye nabo ngeendlela ezitja.
6. Umoya kaZimu wasiza uPitrosi bona enzeni hlangana nangemva kwePentekosi laka-33 C.E.?
6 NgoMnyanya wePentekosi laka-33 C.E., uPitrosi nabanye banikelwa amandla ngokusimangaliso wokukhuluma ngeenlimi ebezikhulunywa ziinkhambi ebezize eJerusalema. Ngemva kwalokho, uPitrosi wadosa phambili akhuluma nesiqubuthu. (IZe. 2:14-36) Kwamambala, indoda le ngezinye iinkhathi ebeyisaba namtjhana yenze izinto ngokuwalazela yanikelwa isibindi sokunikela ubufakazi naphezu kokusongelwa nokutjhutjhiswa. (IZe. 4:18-20, 31) Yamukela ilwazi ngokwambulelwa nguZimu. (IZe. 5:8, 9) Yanikelwa ngitjho namandla wokuvusa abahlongakeleko.—IZe. 9:40.
7. Ngiziphi iimfundiso zakaJesu ezakhanya kuPitrosi kwaphela ngemva kokuzeswa kwakhe?
7 Ngitjho nangaphambi kwePentekosi, uPitrosi wawazwisisa amaqiniso amanengi uJesu awafundisako. (Mat. 16:16, 17; Jwa. 6:68) Kodwana bekuneengcenye zeemfundiso zakaJesu ezingakhange zimkhanyele kuhle ngaphambi kwePentekosi. Ngokwesibonelo, uPitrosi bekangalemuki bona uKrestu bekazokuvuswa ngelanga lesithathu asibunjwa somoya; godu bekangazwisisi nokobana uMbuso bewuzokuba sezulwini. (Jwa. 20:6-10; IZe. 1:6) UPitrosi khenge ayizwisise indaba yokobana abantu bangaba ziimbunjwa zomoya babuse uMbusweni wezulwini. Kuthe nekabhabhadiswa ngomoya ocwengileko anikelwa nethemba lezulwini, kwaba kulapho azwisisa khona okutjhiwo ziimfundiso zakaJesu ngamaphuzu lawo.
8. Ngiliphi ilwazi elifunyanwa kokubili ngabazesiweko ‘nabezinye izimvu’?
8 Ngemva kobana abafundi bakaJesu bamukele umoya ocwengileko, bakghona ukuzwisisa iimfundiso abangakhange bazizwisise ngaphambili. Ngokuphefumulelwa, abatloli beMitlolo YamaKrestu YesiGirigi bambula—bona sizuze—amaqiniso ararako womnqopho kaJehova. (Efe. 3:8-11, 18) Namhlanjesi, kokubili abazeswe ngomoya nalabo ‘bezinye izimvu’ badla ndawonye ngokomoya, bazwisisa amaqiniso la afanako. (Jwa. 10:16) Uliqala njengeliqakathekileko na ilwazi nokuzwisisa iLizwi lakaZimu umoya ocwengileko olenza lifumaneke kuwe?
UPowula, ‘Wangenwa Mumoya Ocwengileko’
9. Yini uPowula akghona ukuyenza ngomoya ocwengileko?
9 Isikhathi esingaba mnyaka ngemva kwePentekosi laka-33 C.E., kunomunye umuntu owamukela isipho sakaZimu somoya ocwengileko. BekunguSawula, owaziwa ngokobana nguPowula. Umoya wasebenza kuye ngendlela esizuzisako namhlanjesi. Umpostoli uPowula waphefumulelwa bona atlole iincwadi ezi-14 zeBhayibhili. Njengombana kwenzeka kuPitrosi, umoya kaZimu wenza uPowula wazwisisa begodu watlola ngokukhanyako ngethemba lezulwini lokungafi nokungonakali. Ngomoya ocwengileko, uPowula wapholisa abagulako, wakhupha amadimoni, wavusa ngitjho nabafileko! Nokho, amandla awafumana ngomoya ocwengileko bekanomnqopho oqakatheke ngokungeziweko, loyo iinceku zakaZimu eziwuthabelako namhlanjesi, nanyana ingasi ngokusimangaliso.
10. Umoya ocwengileko waba namuphi umthelela ekghonweni lakaPowula lokukhuluma?
10 UPowula, ‘owangenwa mumoya ocwengileko,’ wakhuluma ngesibindi ngokujamelene nomuntu owenza imilingo. Qala bona lokho kwaba nomthelela ongangani kumphathi oyihloko weSayipurasi ogade alalele yoke ingcoco leyo! Umphathi loyo wamukela iqiniso, njengombana ‘akarwa kwamambala yifundiso ngoJehova.’ (IZe. 13:4-12) Ngokukhanyako, uPowula bekakwazi kuhle ukuqakatheka komoya kaZimu ocwengileko nekuziwa ekukhulumeni iqiniso. (Mat. 10:20) Ngokukhamba kwesikhathi wabawa ibandla le-Efesu bona limbawele bona anikelwe “amezwi angiwo.”—Efe. 6:18-20.
11. UPowula wanqotjhiswa njani mumoya kaZimu?
11 Umoya ocwengileko khenge wenze uPowula akhulume kwaphela, kodwana ngezinye iinkhathi, bewumkhandela bona akhulume eendaweni ezithileko. Njengombana athatha amakhambo weenthunywa zevangeli, uPowula wanqotjhiswa mumoya kaZimu. (IZe. 13:2; funda IZenzo 16:6-10.) UJehova usanqophisa umsebenzi wokutjhumayela ngomoya ocwengileko. NjengoPowula zoke iinceku zakaJehova ezilalelako zilwela ukumemezela iqiniso ngesibindi nangetjiseko. Ngitjho nanyana isinqophiso sakaZimu singabonakali ngokusepepeneneni namhlanjesi njengombana besibonakala ngesikhathi sakaPowula, singaqiniseka bonyana uJehova usebenzisa umoyakhe ocwengileko ukuqinisekisa bona abafanelekako bayalizwa iqiniso.—Jwa. 6:44.
‘Izipho Ezihlukahlukeneko’
12-14. Kghani umoya kaZimu usebenza ngendlela efanako kizo zoke iinceku zakhe? Hlathulula.
12 Kghani ukulandisa kweembusiso zakaJehova ebandleni labazesiweko langekhulu lokuthoma leemnyaka kunikela isikhuthazo esiqakathekileko eencekwini zakaZimu ezizinikeleko namhlanjesi? Akubuzwa! Khumbula amezwi kaPowula awatlolela ibandla leKorinte malungana nezipho ezimangalisako zomoya ngesikhathi sakhe: ‘Kukhona imihlobo eyahlukeneko yeemphiwo, kodwana ibe ngezakamoya munye. Kukhona iinkhundla ezinengi zokusebenzela iKosi, kodwana ibe kulotjhwa uZimu oyedwa. Zahlukene iimphiwo okusetjenzwa ngazo, kodwana yinye iKosi ebapha boke amandla wokwenza umsebenzi loyo abawenzako. Kusesengiwo umoya owenza koke lokhu, ubapha boke ngamunye iimphiwo ezahlukeneko, ngokwentando yakamoya.’ (1 Kor. 12:4-6, 11) Kwamambala, umoya ocwengileko ungasebenza ngeendlela ezihlukahlukeneko eencekwini zakaZimu ngebanga lomnqopho othileko. Liqiniso, umoya ocwengileko uyafumaneka kokubili ‘emhlambini omncani’ kaKrestu ‘nakwezinye izimvu’ zakhe. (Luka 12:32; Jwa. 10:16) Nanyana kunjalo, awuhlali usebenza ngendlela efanako elungwini ngalinye lebandla.
13 Ngokwesibonelo, abadala babekwa ngomoya ocwengileko. (IZe. 20:28) Kodwana akusibo boke abazeswe ngomoya abakhonza njengababonisi ebandleni. Singaphetha ngokuthini-ke kilokhu? Ngokobana umoya kaZimu usebenza ngeendlela ezihlukahlukeneko emalungwini webandla.
14 Umoya ofaka kwabazesiweko ‘umoya wokufunyanwa,’ namtjhana umqondo wokuba madodana, mumoya ofanako nalowo uJehova avusa ngawo iNdodana yakhe okukuphela kwayo, ayivusela ekuphileni kwezulwini okunganakufa. (Funda kwebeRoma 8:11, 15.) Mumoya ofanako nalawo uJehova awusebenzisa ekubumbeni indawo yoke. (Gen. 1:1-3) Ngomoya ocwengileko ofanako lo, uJehova wasiza uBhezaleli bona afanelekele umsebenzi okhethekileko etabarnakele, wanikela uSamsoni amandla wokwenza imisebenzi etlhoga amandla ararako, begodu wenza uPitrosi wakhamba phezu kwamanzi. Ngalokho, singahlangahlanganisi ukuba nomoya kaZimu nokuzeswa ngawo, ukuzeswa ngawo kumane kungenye yeendlela ezikhethekileko zokusebenza komoya. Ukuzeswa ngomoya kusame ekukhetheni kwakaZimu.
15. Ukubhabhadisa ngomoya kuzokuragela phambili bekube phakade? Hlathulula.
15 Amandla acwengileko kaZimu asebenzako bekasolo asebenza ngeendlela ezihlukahlukeneko eencekwini zakhe ezithembekileko kusukela zathoma ukuba khona, eqinisweni, eemnyakeni engaba ziinkulungwana ngaphambi kobana ukuzeswa ngomoya kuthome. NgePentekosi laka-33 C.E., ukusebenza okutjhokho kwathoma, kodwana ngekhe kurage bekube phakade. Ukubhabhadiswa ngomoya kuzokuphela, kodwana umoya ocwengileko uzokuragela phambili usebenza ebantwini bakaZimu bona benze intando yakhe bekube phakade.
16. Khuyini okwenziwa ziinceku zakaZimu ngesizo lomoyakhe namhlanjesi?
16 Khuyini ngokukhethekileko eyenzekako nje ephasini ngesizo lomoya kaJehova ocwengileko? ISambulo 22:17 siyaphendula: “Umoya ocwengileko nomlobokazi bathi: ‘Yiza!’ Nozwako lokhu akatjho athi: ‘Yiza!’ Nowomileko akeze; othandako akathathe amanzi wokuphila ngesihle.” Atjhukunyiswa mumoya kaZimu, amaKrestu namhlanjesi adlulisela isimemo sakaJehova esinikela ukuphila ‘kinanyana ngubani othanda’ ukwamukela amanzi wokuphila. AmaKrestu azesiweko adosa phambili ekwenzeni lokho. Nokho, nabezinye izimvu bayahlanganyela ekudluliseni isimemwesi. Zombili iingabezi zibambisana nomoya ocwengileko ofanako ekwenzeni umsebenzi lo. Iingaba eembilezo zatjengisa ukuzinikela kwazo kuJehova ngokubhabhadiswa “ebizweni lakaBaba, neNdodana, nomoya ocwengileko.” (Mat. 28:19) Godu boke bavumela ukusebenza komoya kaZimu emaphilweni wabo, bawuvumela bona uveze isithelo sawo kibo. (Gal. 5:22, 23) Njengabazesiweko, ezinye izimvu zivumela umoya kaZimu uzisize. Ngesizo lawo, zenza koke okusemandlenazo ukuhlangabezana neemfuneko zakaJehova ezicwengileko.—2 Kor. 7:1; ISam. 7:9, 14.
Ragela Phambili Ubawa Umoya Ocwengileko
17. Singanikela njani ubufakazi bokobana sinomoya kaZimu?
17 Ngalokho kungakhathaliseki bona ithemba lakho oliphiwe nguZimu ngelokuphila ngokungapheliko ezulwini namtjhana ephasini, uJehova angakunikela “amandla amakhulu” bona ubulunge ukuthembeka begodu ufumane umvuzo. (2 Kor. 4:7) Ukuragela kwakho phambili utjhumayela iindaba ezimnandi zoMbuso kungakuhlekisa ngabantu. Kodwana khumbula bona ‘ubusisiwe nebakuthukako ngebanga lakaKrestu. Lokho kubonisa bona umoya wephazimulo, umoya wakaZimu unawe.’—1 Pit. 4:14.
18, 19. UJehova uzokusiza njani ngomoyakhe ocwengileko, begodu uzimisele ukwenzani endabeni le?
18 Umoya ocwengileko usisipho sakaZimu sasimahla kibo boke abawufuna ngokuthembeka. Ungathuthukisa ingasi kwaphela amakghono wakho kodwana nesifiso sakho sokwenza okungcono khulu ekonzwenakhe. “NguZimu osebenza njalo kini ukunenza bona nikgone ukuthanda nokwenza lokho afuna bona nikwenze.” Isipho esiligugu somoya ocwengileko, sikhambisana nemizamwethu yetjiseko ‘yokubamba ilizwi lokuphila,’ sizosenza bona ‘sirage sisebenze ngokwesaba, nokuqhaqhazela, ukuphelelisa iphuluso yethu.’—Fil. 2:12, 13, 16.
19 Ngalokho, ngokuthembela ngokuqinileko emoyeni kaZimu, yenza zoke izabelo ngayo yoke ihliziyo yakho, kwenze ngekghono lokho okwabelweko begodu ubawe uJehova bona akusize. (Jak. 1:5) Uzokunikela okutlhogako bona uzwisise iLizwi lakhe, uqalane neemraro yokuphila, begodu utjhumayele iindaba ezimnandi. “Bawani nizaphiwa, funani nizafumana, kokodani nizavulelwa,” begodu lokhu kuhlanganisa nokwamukela umoya ocwengileko. (Luka 11:9, 13) Ngokuqinisekileko, ragela phambili urabhele uJehova bona akusize ube njengabantu bekholo—bekadeni nabanamhlanjesi—abanqotjhiswa mumoya kaZimu ocwengileko.
Ungahlathulula?
• NjengoMariya, ngimuphi umoya esingawutjengisa ozosilethela iimbusiso?
• UPowula wanqotjhiswa mumoya kaZimu ngamuphi umqondo?
• Iinceku zakaZimu zinqotjhiswa njani mumoya kaZimu namhlanjesi?
[Iimbuzo Yesifundo]
[Isithombe ekhasini 24]
Umoya kaZimu wenza uPowula wahlula umthelela womoya omumbi
[Isithombe ekhasini 26]
Namhlanjesi, umoya ocwengileko uyafumaneka bona usize amaKrestu, kungakhathaliseki bona analiphi ithemba
