Kwamambala, Ngiwo Umagazini Ofundwako!

Siwenze kabutjha umagazini ofundwako bona ukare khudlwana begodu ube lisizo ekufundeni kwakho iqiniso leLizwi lakaJehova eliligugu.—Rha. 1:2; 119:97.

Eminyakeni emine edlulileko sathoma ukugadangisa abomagazini ababili be-Sithalasokulinda, omunye waba ngowomphakathi omunye waba ngowethu soke—aboFakazi BakaJehova neemfundo zethu zeBhayibhili ezithuthukako.

Malungana nomagazini ofundwako, isikhonzi esele sikhonze uJehova isikhathi eside satlola: “Muhle begodu uthinta ihliziyo—leyo yindlela engazizwa ngayo nge-Sithalasokulinda sokuthoma esifundwa ebandleni. Ilimi laso elidephileko ngokomoya namezwaso bekakhuluma ngokunqophileko nehliziywami. Siyathokoza khulu ngelungiselelo elihleli elitjha.” Omunye umzalwana watlola: “Ngiqala phambili ekusebenziseni ama-awara amanengi ngitaditjha umagazini lo begodu ngisebenzisa i-Reference Bible yami.” Sithemba bona nawe uzizwa ngendlela efanako.

Njengombana wazi, ISithalasokulinda besolo sigadangiswa kusukela ngo-1879, nanyana kungakhenge kube lula ukusigadangisa ngaso soke isikhathi, kodwana ngomoya nangesibusiso sakaJehova kwenzeka. (Zak. 4:6) Hlangana neemnyaka eli-133 le, kube namatjhuguluko amanengi esigubuzesweni sakamagazini lo. Ngo-2012, umagazini ofundwako ngamunye esigubuzesweni uzokuba nomgwalo otjengisa abantu batjhumayela, usikhumbuza ngokuthunywa kwethu nguZimu okumalungana nokunikela ubufakazi obupheleleko ngoMbuso kaJehova. (IZe. 28:23) Ngaphakathi kwesigubuzeso, ekhasini-2, uzokufumana isithombe lapho umgwalo usekelwe khona, kunye nehlathululo efitjhani yokobana kwenzekani begodu kuphi. Njengombana umnyaka uragela phambili, lokhu kuzosikhumbuza soke bona abantu bakaJehova batjhumayela iindaba ezimnandi ‘ephasini loke.’—Mat. 24:14.

Ngimaphi amanye amatjhuguluko enziwe kumagazini lo? Ibhoksi lokubuyekeza selibekwe ekuthomeni kwesifundo ngasinye. Lokho kuzokutjengisa amaphuzu aveleleko okufuze uwaqale njengombana ufunda begodu utaditjha isihloko. Kuliqiniso, abaragi beSifundo se-Sithalasokulinda bazokuragela phambili basebenzisa iimbuzo le ukubuyekeza ekupheleni kwesifundo. Uzokutjheja bona imikhawulo yenziwe banzi kancani nokobana iinomboro zeengaba namakhasi zibonakala khudlwana.

Njengombana kuhlathululwe kumagazini wenyanga le, kungezelelwe isihloko esitjha esithi, “Ezivela Ebulungelweni Lethu,” ukutjengisa ituthuko eqakathekileko emlandweni waboFakazi BakaJehova wanamhlanjesi. Godu, okuhlangabezanwe nakho kuzanande kuvela ngaphasi kwesihloko esithi “Bazinikela Ngokuzithandela.” Sizokuhlathulula ngokukhanyako ithabo nokwaneliseka abanakwethu nabodadwethu abalifumene ngokukhonza lapho kunetlhogeko ekulu yabarhuweleli boMbuso.

Kwanga ungasithabela khulu isikhathi osisebenzisa ekutaditjheni iLizwi lakaZimu ngesizo lakamagazini lo.

Abagadangisi

[Isithombe ekhasini 3]

1879

[Isithombe ekhasini 3]

1895

[Isithombe ekhasini 3]

1931

[Isithombe ekhasini 3]

1950

[Isithombe ekhasini 3]

1974

[Isithombe ekhasini 3]

2008