‘Ngizokutjhumayela Njani?’

Ephasini mazombe, sineembonelo ezinengi zabazalwana nabodade abahlanganyela ngokuthembeka emsebenzini wokutjhumayela naphezu kobana baqalene neemraro ebudisi yepilo. Cabanga ngesibonelo sakaDalia, ohlala eVilnius, ehlokodorobha yeLithuania.

UDalia ngudade oseemnyakeni yama-35. Kusukela ekubelethweni, watshwenywa bulwelwe obuthinta ubuchopho (cerebral apoplexy). Ubulwelwe lobo bamenza wakhubazeka begodu wangakghona nokukhuluma kuhle. Ngebanga lalokho, malunga womndeni kwaphela akghona ukumuzwa kuhle nakhulumako. UDalia uhlala nonina, uGalina, omtlhogomelako. Nanyana ipilo kaDalia ibudisi begodu itlhuwisa, uhlala anombono omuhle. Kwenzeka njani lokhu?

UGalina uyahlathulula: “Ngo-1999, umzawami u-Apolonija weza azosivakatjhela. Satjheja bona u-Apolonija, ongomunye waboFakazi BakaJehova, uyazi kuhle iBhayibhili, begodu uDalia wathoma ukumbuza iimbuzo eemnengi. Kungasikade, kwathonywa isifundo seBhayibhili noDalia. Ngezinye iinkhathi, bengihlanganyela nabo nebafundako ngisize ekuhlathululeni ikulumo kaDalia. Ngatjheja bona koke egade akufunda bekumzuzisa kwamambala. Msinyana nami ngabawa isifundo seBhayibhili.”

Njengombana uDalia athoma ukuzwisisa amaqiniso weBhayibhili, kwaba nombuzo owodwa egade umtshwenya kanengi. Ekugcineni, wabuza u-Apolonija wathi: “Umuntu ofana nami—okhubazekileko—angakghona njani ukutjhumayela?” (Mat. 28:19, 20) U-Apolonija ngomoya ophasi waqinisekisa uDalia: “Ungasabi. UJehova uzokusiza.” Kwamambala, uJehova uyamsiza.

Alo-ke uDalia utjhumayela njani? Ngeendlela ezinengi. Abodade abamaKrestu bamsiza ukutlola iincwadi ezinomlayezo weBhayibhili. Kokuthoma, uDalia utjela abodade laba akucabangako. Bese batlola incwadi enemicabango yakhe. Godu uDalia ufakaza ngokuthumela iimlayezo ngofunjathwako. Ubujamo bezulu nebuvumako, amalunga webandla ayamthatha bona aphume ukuyokutjhumayeza abantu abahlangana nabo emaphageni wendawo nendleleni.

UDalia nonina baragela phambili bathuthuka ngokomoya. Bobabili bazinikela kuJehova begodu babhabhadiswa ngoNovemba 2004. NgoSeptemba 2008, kwathonywa isiqhema sabantu abakhuluma isiPolish eVilnius. Njengombana isiqhema leso besinetlhogeko yabarhuweleli boMbuso abangeziweko, uDalia nonina basijoyina. UDalia uthi: “Ngezinye iinyanga ngiyatshwenyeka nengingakayi ekonzweni. Kodwana ngemva kokuthandaza kuJehova ngakho, msinyana omunye uhlela ukukhamba nami ekonzweni.” Udadwethu othandekako uDalia uzizwa njani ngobujamo bakhe? Uthi: “Ubulwelwe burhwahlaphaze umzimbami, kodwana khenge burhwahlaphaze ingqondwami. Kuyangithabisa bona ngiyakghona ukutjela abanye ngoJehova!”