Ubupristi Bobukhosi Obuzokuzuzisa Soke Isintu

“Nina nisitjhaba esikhethiweko, nibapristi beKosi uZimu, nisitjhaba esicwengileko, nibabantu bakaZimu abakhethelwa imisebenzi yakaZimu.”—1 PIT. 2:9.

UNGAHLATHULULA?

Ubupristi bobukhosi bathenjiswa nini kokuthoma?

Isivumelwano esitjha sibuveza njani ubupristi bobukhosi?

Ngiziphi iinzuzo ezizokulethwa bupristi bobukhosi esintwini?

1. Kubayini ‘isidlo seKosi santambama’ godu sibizwa ngokobana Sikhumbuzo, begodu yini ihloso yaso?

EBUSUKU bangoNisan 14 ngomnyaka ka-33 C.E., uJesu Krestu nabapostoli bakhe abali-12 baba nePhasika yamaJuda kwamaswaphelo. Ngemva kokuqotha uJudasi Isikariyodi, uJesu wathoma isikhumbuzo esihlukileko, ngokukhamba kwesikhathi esabizwa ngokobana ‘sisidlo seKosi santambama.’ (1 Kor. 11:20) UJesu kabili wathi: “Kwenzeni lokhu, ze ningikhumbule.” Isenzakalwesi godu saziwa ngokobana Sikhumbuzo, isikhumbuzo sakaKrestu esigandelela ukufa kwakhe. (1 Kor. 11:24, 25) Ekulaleleni umyalo lo, aboFakazi BakaJehova ephasini loke baba neSikhumbuzo qobe mnyaka. Ngo-2012, uNisan 14 we-almanaga yeBhayibhili uzokuthoma nekutjhinga ilanga, ngeLesine, Apreli 5.

2. UJesu wathini ngeemfanekiselo azisebenzisako?

² Umfundi uLuka watjho ngamavesi amabili lokho uJesu akwenza nakutjho esenzakalweneso: “Yeke wathatha umgadango, wathokoza kuZimu, wawuhlephula wabanikela, wathi: ‘Lokhu kumzimba wami, onikelwe nina. Yenzani lokhu khona nizangikhumbula.’ Godu njalo-ke, kwathi ngemva kokugoma, wathatha ikapho wabanikela wathi: ‘Ikapho le sivumelwano esitjha sakaZimu eengazini zami ezaphalakela nina.’” (Luka 22:19, 20) Kungenzeka abapostoli bawazwisisa njani amezwi la?

3. Kungenzeka abapostoli bakuzwisisa njani okutjhiwo ziimfanekiselo?

³ NjengamaJuda, abapostoli bebanelwazi elaneleko ngemihlatjelo yeenlwana abapristi ebebayinikela  kuZimu etempelini eJerusalema. Iimnikelo enjalo beyenzelwa ukufumana ukwamukelwa nguJehova, begodu eemnengi beyisebenza njengetshwayo lokususa isono. (Lef. 1:4; 22:17-29) Ngalokho abapostoli bebangazwisisa bona uJesu nekathi umzimba neengazi zakhe ‘bezizokunikelwa begodu ziphalazwe ngebanga labo,’ bekatjho bona bekazokunikela ngokuphila kwakhe okupheleleko njengomhlatjelo. Bekuzokuba mhlatjelo oqakatheke khulu kunomhlatjelo weenlwana.

4. Bekatjho ukuthini uJesu nekathi: “Ikapho le sivumelwano esitjha eengazini zami”?

⁴ Kuthiwani ngamezwi kaJesu athi, “Ikapho le sivumelwano esitjha eengazini zami”? Abapostoli bebasazi isiporofido esimalungana nesivumelwano esitjha esitlolwe kuJeremiya 31:31-33. (Funda.) Amezwi kaJesu bekatjengisa bona bekaletha isivumelwano esitjha, esizokujamiselela isivumelwano soMthetho uJehova ebekasenze nama-Israyeli ngoMosisi. Kghani iimvumelwano eembilezi bezihlobana?

5. Ngimaphi amathemba isivumelwano soMthetho ebesiwanikela ama-Israyeli?

⁵ Iye, iinhloso zazo bezihlobene eduze. Nekaletha isivumelwano soMthetho, uJehova watjela isitjhaba bona: “Nenililalela ngokupheleleko ilizwi lami begodu kwamambala nibulunga isivumelwano sami, ngalokho nizokuba yipahlami ekhethekileko kizo zoke iintjhaba, ngombana loke iphasi lingelami. Begodu nina ngokwenu nizokuba mbuso wabapristi nesitjhaba esicwengileko kimi.” (Eks. 19:5, 6) Amezwi la bekazokutjho ukuthini kuma-Israyeli?

ISITHEMBISO SOBUPRISTI BOBUKHOSI

6. Isivumelwano soMthetho sathuthukisa siphi isithembiso?

⁶ Ama-Israyeli bekalizwisisa ibizo elithi “isivumelwano,” ngombana uJehova wenza iimvumelwano eziqakathekileko ezinjalo nabokhokho bawo uNuwa no-Abrahama. (Gen. 6:18; 9:8-17; 15:18; 17:1-9) Njengengcenye yesivumelwano asenza no-Abrahama, uJehova wathembisa: “Ngembewu yakho zoke iintjhaba zephasi ngokuqinisekileko zizozibusisa.” (Gen. 22:18) Isivumelwano soMthetho besithuthukisa isithembiswesi. Ngesisekelo saso, ama-Israyeli bekangaba ‘yipahla kaJehova ekhethekileko kizo zoke iintjhaba.’ Ngayiphi ihloso? Bona ‘abe mbuso wabapristi kuJehova.’

7. Bekatjho ukuthini amezwi athi ‘umbuso wabapristi’?

⁷ Ama-Israyeli bekajayelene namakhosi nabapristi, kodwana nguMelkhizedeki kwaphela owaba neenkhundla embilezi ngesikhathi sinye ngemvume evela kuJehova. (Gen. 14:18) UJehova kwanje wanikela isitjhabeso ithuba lokuveza ‘umbuso wabapristi.’ Njengombana imitlolo ephefumulelweko kwamva yatjengisa, lokho bekutjho ithuba lokwakha ubupristi bobukhosi, amakhosi godu azokuba bapristi.—1 Pit. 2:9.

8. Ngiziphi iinkonzo ebezenziwa mpristi okhethwe nguZimu?

⁸ Kuliqiniso, umsebenzi wekosi kubusa. Kodwana uyini umsebenzi wompristi? Incwadi yamaHebheru 5:1 iyahlathulula: ‘Ngiloyo naloyo umpristi omkhulu okhethwe hlangana nabantu ubekelwe bona abajamele kuZimu, ahlawulele izono zabo ngokunikela ngezipho nangemihlatjelo.’ Ngalokho umpristi okhethwe nguJehova ujamela abantu abanesono phambi kwakaZimu ngokubanikelela iimhlatjelo ehleliweko, ababawele Kuye. Ngendlela efanako, umpristi ujamele uJehova phambi kwabantu, ubanqophisa ngomthetho kaZimu. (Lef. 10:8-11; Mal. 2:7) Ngeendlelezi, umpristi okhethwe nguZimu usebenzela ukwenza abantu babuyisane Naye.

9. (a) Ama-Israyeli bekufuze enzeni bona afumane ithuba lokuba “mbuso wabapristi”? (b) Kubayini uJehova athomisa ubupristi hlangana no-Israyeli? (c) Khuyini okwakhandela ama-Israyeli ekwenzeni ‘umbuso wabapristi’ ngaphasi kwesivumelwano soMthetho?

⁹ Ngalokho isivumelwano soMthetho sanikela ama-Israyeli ithuba lokuveza ubupristi  bobukhosi obuzokuzuzisa ‘zoke iintjhaba.’ Nokho ilungelo elikarisakweli belinombandela: “Nengabe ulalela ngokupheleleko ilizwi lami begodu ngokuqinisekileko ubulunge isivumelwano sami.” Kghani ama-Israyeli bekangalilalela ngokupheleleko ilizwi lakaJehova? Iye, ngezinga elithileko. Bekangakwenza lokhu ngokupheleleko? Awa. (Rom. 3:19, 20) Ngonobangela loyo, uJehova wenza kwaba nabapristi hlangana nama-Israyeli, abangakahlangani nananyana ngibuphi ubukhosi, bona banikele imihlatjelo yeenlwana malungana nezono ama-Israyeli ebekazozenza angakanqophi. (Lef. 4:1–6:7) Izonwezi bezihlanganisa nezabapristi ngokwabo. (Heb. 5:1-3; 8:3) UJehova bekayamukela iimhlatjelo enjalo, kodwana beyingakwazi ukuzihlawulela ngokupheleleko izono zalabo abayinikelako. Ubupristi ngaphasi kwesivumelwano soMthetho bebungakwazi ukwenza ngitjho nama-Israyeli athembekileko abuyisane noZimu. Umpostoli uPowula wayibeka nganasi ndlela: “Ngombana iingazi zeenkunzi neembuzi angekhe zazisusa izono zomuntu.” (Heb. 10:1-4) Ngonobangela wokuphula kwawo uMthetho, eqinisweni ama-Israyeli aba ngaphasi kokuthuweleliswa. (Gal. 3:10) Bekangeze alikhonza iphasi njengobupristi bobukhosi ebujamweni obunjalo.

10. Ngiyiphi ihloso eyazaliswa sivumelwano soMthetho?

¹⁰ Kghani isithembiso sakaJehova sokobana bebangenza ‘umbuso wabapristi’ besililize? Akusinjalo. Nengabe bebangalinga ngeqiniso ukulalela, bebangalifumana ithubeli—kodwana kungasi ngaphasi koMthetho. Kubayini? (Funda KwebeGalatiya 3:19-25.) Kilabo ebebalinga ngokuthembeka ukuwulalela, uMthetho bewunomthelela ekubulungeni ukukhulekela okucwengileko. Wenza amaJuda atjheja izono zawo netlhogeko yomhlatjelo ongaphezu kwalowo onganikelwa mpristi. Bewumfundisi obekangabarholela kuKrestu, namtjhana uMesiya, iziqu ezitjho “Ozesiweko.” Nokho, uMesiya nekafikako, bekazokuletha isivumelwano esitjha esabikezelwa nguJeremiya. Labo abamukela uKrestu bebamenywa bona babe yingcenye yesivumelwano esitjha begodu eqinisweni babe “mbuso wabapristi.” Khesibone bona lokho kwenzeka njani.

ISIVUMELWANO ESITJHA SIVEZA UBUPRISTI BOBUKHOSI

11. UJesu ube njani sisekelo sobupristi bobukhosi?

¹¹ Ngo-29 C.E., uMesiya wafika anguJesu weNazareda. Nekaneemnyaka engaba ma-30, waziletha ukozokwenza intando kaJehova ekhethekileko ngaye, atjengisa lokho ngokubhabhadiswa emanzini. UJehova wamamukela ‘njengeNdodana yakhe ethandekako,’ wamzesa, ingasi ngamafutha, kodwana ngomoya ocwengileko. (Mat. 3:13-17; IZe. 10:38) Ukuzesokho kwamenza uMpristi Ophakemeko wabakholwako bawo woke umndeni wesintu kwamenza neKosi yabo yangomuso. (Heb. 1:8, 9; 5:5, 6) Bekazokuba sisekelo sobupristi bobukhosi bamambala.

12. Umhlatjelo kaJesu wenza kwaba nekghonakalo yani?

¹² NjengomPristi Ophakemeko, ngimuphi umhlatjelo obewunganikelwa nguJesu ebewungagubuzesa ngokupheleleko isono abakholwako abasizuze njengelifa? Njengombana atjengisa nekajamisa iSikhumbuzo sokufa kwakhe, ukuphila kwakhe okupheleleko bekumhlatjelo. (Funda KumaHebheru 9:11, 12.) Kusukela ngesikhathi sokubhabhadiswa kwakhe ngo-29 C.E., uJesu njengomPristi Ophakemeko waqalana neenlingo begodu wabanduleka bekwafika isikhathi sokufa kwakhe. (Heb. 4:15; 5:7-10) Ngemva kokuvuswa kwakhe, wanyukela ezulwini bewanikela inani lomhlatjelo wakhe kuJehova ngokwakhe. (Heb. 9:24) Ngemva kwalokho, uJesu bekangabawa kuJehova abawela labo abatjengisa ikholo emhlatjelweni wakhe begodu abasize bakhonze uZimu banombono wokuphila okungapheliko. (Heb. 7:25)  Umhlatjelo wakhe godu waba siqinisekiso sesivumelwano esitjha.—Heb. 8:6; 9:15.

13. Ngimaphi amathemba ebekafunyanwa ngilabo abamenyelwe esivumelwaneni esitjha?

¹³ Labo abamenywa esivumelwaneni esitjha godu bekufuze bazeswe ngomoya ocwengileko. (2 Kor. 1:21) AmaJuda athembekileko nabeentjhaba babandakanywa. (Efe. 3:5, 6) Ngimaphi amathemba ebekafunyanwa ngilaba abasesivumelwaneni esitjha? Bebazokufumana ukulitjalelwa kwamambala kwezono zabo. UJehova wathembisa: “Ngizobalibalela imitjhapho, nezono zabo ngeze ngisazikhumbula.” (Jer. 31:34) Izono zabo nasezisulwe ngokomthetho, bebazokuba sebujamweni bokuba ‘mbuso wabapristi.’ Akhuluma namaKrestu azesiweko, uPitrosi watlola: “Kodwana nina nisitjhaba esikhethiweko, nibapristi beKosi uZimu, nisitjhaba esicwengileko, nibabantu bakaZimu abakhethelwa ukwazisa imisebenzi emihle yakaZimu. Nguye owanikhupha ebumnyameni waningenisa ekukhanyeni kwakhe okumangazako.” (1 Pit. 2:9) UPitrosi la udzubhula amezwi kaJehova ebekawanqophise ku-Israyeli nekaletha uMthetho begodu uwasebenzisa kumaKrestu asesivumelwaneni esitjha.—Eks. 19:5, 6.

UBUPRISTI BOBUKHOSI BUZUZISA SOKE ISINTU

14. Ubupristi bobukhosi buzokukhonza kuphi?

¹⁴ Labo abasesivumelwaneni esitjha bayokukhonza kuphi? Ephasini, njengesiqhema bazokukhonza njengabapristi, bajamela uJehova ebantwini ‘ngokwazisa iimsebenzi Yakhe emihle’ nangokunikela ngokudla okungomoya. (Mat. 24:45; 1 Pit. 2:4, 5) Ngemva kokufa nokuvuswa kwabo, bazokukhonza noKrestu ezulwini kokubili njengamakhosi nabapristi, benza ngokuzeleko imisebenzi yeenkhundla eembilezi. (Luka 2:29; 1 Pit. 1:3-5; ISam. 1:6) Ukuqinisekisa lokhu, embonweni umpostoli uJwanisi wabona iimbunjwa zomoya ezinengi hlanu kwesihlalo sobukhosi sakaJehova ezulwini. ‘Erhubweni elitjha’ eziliqalisele ‘eMvaneni,’ zabhina zathi: ‘Wahlengela uZimu abantu ngeengazi zakho, bavela kiyo yoke imindeni, neenlimi, nemakorweni, neentjhabeni. Wabenza umbuso, baba bapristi bokulotjha uZimu wethu, bayolibusa iphasi.’ (ISam. 5:8-10) Embonweni wamva, uJwanisi wathi ababusaba: “Bayoba bapristi bakaZimu noKrestu, bayobusa naye iminyaka eyikulungwana.”  (ISam. 20:6) Bakunye noKrestu, bazokwenza ubupristi bobukhosi obuzokuzuzisa soke isintu.

15, 16. Ngiziphi iinzuzo ezizokulethwa bupristi bobukhosi esintwini?

¹⁵ Ngiziphi iinzuzo aba-144,000 abazozilethela labo abasephasini? ISambulo isahluko 21 sibaveza njengedorobho elikhulu lezulwini, iJerusalema Elitjha, elibizwa ngokobana ‘ngumakoti weMvana.’ (ISam. 21:9) Amavesi-2 kuya ku-4 athi: “Ngabona umuzi ocwengileko, iJerusalema elitjha, lehla livela kuZimu ezulwini, lilungisiwe ngobuthakgha njengomlobokazi azithakghele indoda yakwakhe. Ngezwa ilizwi elikhulu livela esihlalweni sobukhosi lithi: ‘Indlu ecwengileko yakaZimu seyihlangana nabantu. Uyohlala nabo babe sitjhaba sakhe, uZimu isibili uyohlala nabo abe nguZimu wabo. Uzobesula zoke iinyembezi emehlweni wabo. Ukufa angekhe kusaba khona, nokulila nobuhlungu ngekhe kusaba khona, ngombana izinto zokuthoma zidlulile.’” Qala bona ziimbusiso ezihle kangangani! Ukuqedwa kokufa kuzokususa abonobangela abayihloko beenyembezi, ukulila, nobuhlungu. Kuzokutjho ukuphakamisela abantu abathembekileko ekupheleleni, ukubenza babuyisane noZimu ngokupheleleko.

¹⁶ Sihlathulula ngokunabileko iimbusiso ubupristi bobukhosobu obuzoziletha, ISambulo 22:1, 2 sithi: “Ingilozi yangitjengisa umlambo wamanzi wokuphila, aphazima njengerhalasi, uvela esihlalweni sobukhosi bakaZimu neMvana. Ubhubhudlha hlangana nendlela edabula ngemzini [iJerusalema Elitjha]. Mahlangothi womabili womlambo kwamila umuthi wokuphila othela iinthelo katjhumi nambili ngonyaka, kanye ngenyanga; amakari wawo angowokwelapha iintjhaba.” Ngamalungiselelo angokomfanekiso la, “iintjhaba,” namtjhana iinqhema zomndeni wesintu, zizokulatjhwa ngokupheleleko ekungaphelelini ezikuzuze ku-Adamu njengelifa. Kwamambala, ‘izinto zokuthoma zizabe zidlulile.’

UBUPRISTI BOBUKHOSI BUQEDELELA UMSEBENZI WABO

17. Ubupristi bobukhosi buzokufezani?

¹⁷ Ekupheleni kweminyaka eyi-1 000 yekonzo ezuzisako, ubupristi bobukhosi buzabe buphakamisele iinkhonzi zabo ekupheleleni kobuntu. NjengomPristi Ophakemeko neKosi, uKrestu uzokuletha umndeni obuyiselwe ngokupheleleko kuJehova. (Funda yoku-1 KwebeKorinte 15:22-26.) Ubupristi bobukhosi buzabe buyifeze ngokuzeleko ihloso yawo.

18. Ngemva kobana ubupristi bobukhosi bufeze indima yomsebenzi wawo, uJehova uzobasebenzisa njani abakhambisani bakaKrestu?

¹⁸ Ngemva kwalokho, uJehova uzobasebenzisa njani abangani bakaKrestu abanelungelo eliphakemekweli? Ngokuya kweSambulo 22:5, “bayobusa naye umbuso wafuthi.” Bazokubusa abobani? IBhayibhili alitjho. Kodwana izinga lokuphila abanakho nokuhlangabezanwenakho abakufumana ekusizeni iphasi labangakapheleli kuzobahlomisela bona badlale indima eqakathekileko ehlosweni kaJehova yaphakade.

19. Labo abazobe baseSikhumbuzweni bazokukhunjuzwa ngani?

¹⁹ Nesihlangana bona sikhumbule ukufa kwakaJesu ngoLesine, Apreli 5, 2012, iimfundiso zeBhayibhilezi zizabe ziseengqondweni zethu. Isali encani yamaKrestu azesiweko esesesephasini izokudla iimfanekiselo zoburotho obunganasibiliso newayini elibomvu, ukutjengisa bona banengcenye esivumelwaneni esitjha. Iimfanekiswezi zomhlatjelo kaKrestu zizowakhumbuza ngamalungelo wawo amakhulu nangeemthwalo yefanelo ehlosweni kaZimu yaphakade. Kwangathi soke singaba khona ngokuthokoza okudephileko ngelungiselelo lakaJehova uZimu ngobupristi bobukhosi obuzokuzuzisa soke isintu.

[Iimbuzo Yesifundo]

[Isithombe ekhasini 29]

Ubupristi bobukhosi buzokuletha iinzuzo zaphakade esintwini