Ukwenzela UJehova Imihlatjelo Yomphefumulo Woke
Ukwenzela UJehova Imihlatjelo Yomphefumulo Woke
‘Koke enikwenzako kwenzeni ngomphefumulo woke, ingathi nenzela uJehova ingasi umuntu.’—KHOL. 3:23.
QALA BONA UNGAPHENDULA:
Singamdumisa njani uJehova eemsebenzinethu yaqobe langa?
Ngimiphi imihlatjelo esiyenzako ekukhulekeleni kwethu uZimu?
Singanikela njani ngezinto zethu eziphathekako kuJehova?
1-3. (a) Kghani ukufa kwakaJesu esigodweni sokuhlunguphazwa bekutjho bona uJehova akasafuni nanyana ngiliphi ihlobo lemihlatjelo evela kithi? Hlathulula. (b) Ngimuphi umbuzo ophakamako namhlanjesi malungana nemihlatjelo?
EKHULWINI lokuthoma leemnyaka C.E., uJehova wembulela abantu bakhe bona umnikelo wesihlengo kaJesu waphelisa uMthetho kaMosisi. (Khol. 2:13, 14) Yoke iimnikelo emhlatjelo egade yenziwa maJuda amakhulu weminyaka beyingasatlhogeki begodu ingasatjho litho. UMthetho besele uyidlalile indima yawo ‘njengomqophisi bekwafika uKrestu.’—Gal. 3:24.
2 Lokho akutjho bona amaKrestu awasanandaba nemihlatjelo. Kunalokho, umpostoli uPitrosi wakhuluma ngetlhogeko ‘yokunikela imihlatjelo engokomoya, eyamukelekako kuZimu ngoJesu Krestu.’ (1 Pit. 2:5) Ngaphezu kwalokho, umpostoli uPowula wakwenza kwakhanya bona ukuphila komKrestu ozinikeleko—kizo zoke iingcenye—kungafaneleka bona kuqalwe ngokobana “mnikelo.”—Rom. 12:1.
3 Ngalokho-ke, umKrestu wenzela uJehova umhlatjelo, kungaba ngokunikela ngezinto ezithileko kuye namtjhana ngokudela ezinto ezithileko ngebanga lakhe. Ngokwalokho esikwaziko ngeemfuneko ebezikhona kwa-Israyeli, singaqiniseka njani bona yoke imihlatjelo yethu namhlanjesi iyamukeleka kuJehova?
EKUPHILENI KWAQOBE LANGA
4. Ngikuphi ekufuze sikukhumbule ngemisebenzi esiyenza qobe langa?
4 Njengombana siragela phambili nokuphila kwaqobe langa, kungabonakala kubudisi ukuhlobanisa izinto esizenza qobe nokuzinikela kuJehova. Umsebenzi wangendlini, wesikolo, wokuziphilisa, ukuyokuthenga izinto, nokhunye okunjalo kungabonakala kungahlobani nezinto ezingokomoya. Nokho, nengabe unikele ukuphila kwakho kuJehova namtjhana uzimisele ukwenza njalo esikhathini esizako esiseduze, indlela owenza ngayo imisebenzi yangamalanga iqakathekile. SimaKrestu amawara ama-24 ngelanga. Iinkambisolawulo zoMtlolo kutlhogeka zisetjenziswe kizo zoke iingcenye zokuphila kwethu. Ngalokho, uPowula wasikhuthaza: ‘Koke enikwenzako kwenzeni ngomphefumulo woke, ingathi nenzela uJehova ingasi umuntu.’—Funda KwebeKolose 3:18-24.
5, 6. Ngikuphi ekufuze sikucabangele malungana nendlela esimbatha begodu siziphathe ngayo?
5 Izinto umKrestu azenza qobe langa azisiyingcenye yekonzo yakhe ecwengileko. Nokho, iqiniso lokobana uPowula usikhuthaza bona sisebenze ‘ngomphefumulo woke, ingathi senzela uJehova’ lisenza sicabange ngayo yoke ikambo yokuphila kwethu. Ngalokho singakusebenzisa njani lokhu kithi? Siziphatha begodu simbathe ngendlela efaneleko ngaso soke isikhathi? Namtjhana nesizibandakanya emisebenzini yaqobe langa, singaba neenhloni na ukuziveza bona siboFakazi BakaJehova, kungaba ngebanga lendlela esimbethe ngayo nofana esiziphatha ngayo? Sithemba bona lokho ngeze kwenzeka! Abantu bakaJehova ngeze bafuna ukwenza nanyana yini engaletha isihlamba ebizweni lakaZimu.—Isa. 43:10; 2 Kor. 6:3, 4, 9.
6 Akhe sihlolisise bona isifiso sokusebenza ‘ngomphefumulo woke ingathi senzela uJehova’ sizithinta njani iingcenye ezithileko zokuphila. Njengombana senza njalo, khumbula bona yoke iimhlatjelo ama-Israyeli egade ayenzela uJehova bekufuze ibe ngengcono khulu.—Eks. 23:19.
INDLELA UBUPHILO BAKHO OBUTHINTEKA NGAYO
7. Kubandakanyani ukuzinikela kobuKrestu?
7 Newuzinikela kuJehova, wenza isiquntweso ngaphandle kwemibandela, kghani akusinjalo? Eqinisweni wathi kinanyana ngiyiphi ingcenye yokuphila kwakho, uzokubeka uJehova qangi. (Funda KumaHebheru 10:7.) Leso bekusiqunto esihle. Ngaphandle kokuzaza newufuna ukwenza intando kaJehova endabeni ethileko begodu ulwela ukwenza ngokuvumelana nayo, iimphumela iba mihle khulu. (Isa. 48:17, 18) Abantu bakaZimu bacwengekile begodu bayathaba ngombana baveza iimfanelo zaLoyo obanqophisako.—Lef. 11:44; 1 Thi. 1:11.
8. Kuqakatheke ngani kithi ukobana uJehova waqala imihlatjelo yekadeni njengecwengekileko?
8 Iimhlatjelo ama-Israyeli ebekayenzela uJehova beyiqalwa njengecwengileko. (Lef. 6:25; 7:1) Ibizo lesiHebheru elitjhugululwe ngokobana “ukucwengeka” lidlulisela umqondo wokuhlukana, okukhethekileko, namtjhana ukucwengeka kuZimu. Bona iimnikelo yethu yamukeleke kuJehova, kufuze sizihlukanise begodu singasilaphazwa mthelela wephasi. Angeze sathanda nanyana ngiziphi zezinto uJehova azihloyako. (Funda 1 KaJwanisi 2:15-17.) Ngokukhanyako, lokhu kutjho bona kufuze sibalekele nanyana ngibuphi ubudlelwana namtjhana ukuzibandakanya okuzosisilaphaza ngokombono kaZimu. (Isa. 2:4; ISam. 18:4) Godu kutjho bona ngekhe sivumele amehlwethu aqale izinto ezingakahlwengeki, ezisilapheleko ngokokuziphatha namtjhana sizivumele bona sicabange ngezinto ezinjalo.—Khol. 3:5, 6.
9. Iqakatheke kangangani indlela umKrestu aphatha ngayo abanye, begodu kubayini?
9 UPowula wakhuthaza amakholwa akunye nawo: “Ningalibali kukwenza okuhle kwabanye nabelane, ngombana iminikelo enjalo uZimu uyayithabela.” (Heb. 13:16) Ngalokho ukulunga nokwenza okulungileko kwabanye njengekambo kuyinto uJehova ayiqala njengomnikelo owamukelekako. Ukukhathalela abanye ngethando litshwayo eliveza amaKrestu weqiniso.—Jwa. 13:34, 35; Khol. 1:10.
IIMHLATJELO EKUKHULEKELENI
10, 11. UJehova uyiqala njani ikonzo nokukhulekela kwethu kobuKrestu, begodu lokhu kufuze kusithinte njani?
10 Enye yeendlela ezisepepeneni thina maKrestu esenzela ngayo abanye izinto ezihle ‘kuvuma tjhatjhalazi ithemba lethu.’ Uyawasebenzisa woke amathuba ukunikela ubufakazi? UPowula wabiza umsebenzi wamaKrestu oqakathekileko lo ngokobana ‘ziinthelo esinikela ngazo ngebanga lakaJesu, silidumise ibizo lakhe [uZimu] ngemilomo yethu.’ (Heb. 10:23; 13:15; Hos. 14:2) Kunengi okungatjhiwo ngobungako nendlela esisebenzisa ngayo isikhathi sitjhumayela iindaba ezimnandi zoMbuso, godu iinkulumo ezinengi zoMhlangano Wekonzo zenzelwe ukutjhukumisa ukucabanga kwethu endabeni le. Nokho, ngokurhunyeziweko, njengombana ikonzo yethu yesimini nokufakaza kungakahlelwa ‘kumhlatjelo wokudumisa,’ ingcenye yokukhulekela kwethu, umhlatjelo lowo kufuze ube ngowezinga eliphezulu khulu esingawunikela. Njengombana ubujamo buhluka, ubungako besikhathi esisinikela simemezela iindaba ezimnandi kanengi butjengisa bona sizithabela kangangani izinto ezingokomoya.
11 AmaKrestu asebenzisa isikhathi sawo qobe ekukhulekeleni awodwa namtjhana njengesiqhema. UJehova ufuna senze njalo. Kuliqiniso bona asikakateleleki ukubulunga ukuphumula kweSabatha namtjhana ukuthatha amakhambo waqobe ukuya emgidingweni eJerusalema. Nokho, iimthetho yekadeni leyo inayo imifuziselo ekuphileni kobuKrestu. UZimu usalindele bona silise emisebenzi efileko qobe langa khona sizokutaditjha iLizwi lakhe, sithandaze, begodu siye emihlanganweni yobuKrestu. Godu iinhloko zeemndeni yamaKrestu zidosa phambili ekurageni ukukhulekela komndeni namalunga weemndenazo. (1 Tes. 5:17; Heb. 10:24, 25) Malungana neemsebenzi yethu engokomoya, senza kuhle ngokuzibuza bona, ‘Ngingayithuthukisa na indlela engikhulekela ngayo?’
12. (a) Ukunikelwa kwepepho ekukhulekeleni kwekadeni kungafaniswa nani namhlanjesi? (b) Ukufanisokhu kufuze kuyithinte njani iimthandazwethu?
12 IKosi uDavidi yabhinela uJehova: “Kwanga umthandazwami ungalungiswa njengepepho phambi kwakho.” (Rha. 141:2) Kwesikhatjhana cabanga ngemithandazo yakho—bona uthandaza kanengi kangangani begodu isezingeni elinjani. Incwadi yeSambulo ifanisa ‘iimthandazo yabacwengileko’ nepepho ngombana iimthandazo eyamukelekako iya kuJehova njengephunga elimnandi elithabisako. (ISam. 5:8) Ngeenkhathi zakwa-Israyeli wekadeni, ipepho ebekunikelwa ngayo qobe e-aldara lakaJehova bekufuze yenziwe ngokutjheja nangokunembileko. UJehova gade ayamukela kwaphela nekayinikela ngokuvumelana neenqophiso azibekileko. (Eks. 30:34-37; Lef. 10:1, 2) Nengabe iimthandazwethu esuka ehliziyweni siyenza ngendlela efanako, singaqiniseka bona iyamukeleka kuJehova.
UKUPHA NOKWAMUKELA
13, 14. (a) Ngiyiphi ikonzo u-Ephafrodithu nebandla leFilipi abayenzela uPowula, begodu wazizwa njani ngayo? (b) Singasilandela njani isibonelo saka-Ephafrodithu nebeFilipi?
13 Ukunikela ngokweemali okwenzelwa ukusekela umsebenzi wephasi loke kungafaniswa nomhlatjelo, kungakhathaliseki bona sinikela okunengi namtjhana okuncani. (Mar. 12:41-44) Ngekhulu lokuthoma C.E., ibandla leFilipi lathumela u-Ephafrodithu eRoma bona ayokutlhogomela iintlhogo zakaPowula ezingokwenyama. Isithunywesi esivela eFilipi kubonakala kwanga sakhamba nesipho esiyimali esivela ebandleni. Lokho gade kungasingokokuthoma beFilipi babonisa umoya wokupha kuPowula. Ngomusa wabo bebahlose ukutjhaphulula uPowula ekutshwenyekeni ngokweemali khona azokunikela isikhathi esingeziweko ekonzweni. UPowula wasiqala njani isiphwesi? Wasibiza ngokobana ‘sinjengomhlatjelo onephunga elinuka kamnandi kuZimu, umnikelo omukelekako nothokozisako.’ (Funda KwebeFilipi 4:15-19.) Kwamambala uPowula bekazithabela izipho ibandla leFilipi ebelimnikela zona, ngokufanako noJehova.
14 Ngokufanako nanamhlanjesi, uJehova uyithokozela ngokudephileko iminikelo esiyinikelela umsebenzi wephasi loke. Ngaphezu kwalokho, wathembisa bona nesibeka iinkareko zoMbuso qangi ekuphileni kwethu, uzokutlhogomela iintlhogo zethu zoke, ezingokomoya nezingokwenyama.—Mat. 6:33; Luka 6:38.
TJENGISA UKUTHOKOZELA KWAKHO
15. Ngiziphi ezinye zezinto othokoza uJehova ngebanga lazo?
15 Kungathatha isikhathi eside ukubala iinzathu ezinengi esinazo zokuthokoza uJehova. Akusiliqiniso na bona qobe langa kufuze simthokoze ngesipho sokuphila? Usinikela koke esikutlhogako bona sizitlhogomele—ukudla, izembatho, indawo yokuhlala, nomoya esiwuphefumulako. Ngaphezu kwalokho, ikholo lethu, elisekelwe elwazini elinembileko, lisinikela ithemba. Kuyafaneleka bona sikhonze uJehova sinikele nemihlatjelo yokumdumisa, ngebanga lalokho angikho nalokho asenzela khona.—Funda ISambulo 4:11.
16. Kufuze sisabele njani emhlatjelweni kaKrestu wesihlengo?
16 Njengombana sibone esihlokweni esigadungileko, isipho esiligugu ngokukhethekileko uZimu asiphe abantu mhlatjelo kaKrestu osihlengo. Leli litshwayo lakaZimu eliveleleko lokusitjengisa bona uyasithanda. (1 Jwa. 4:10) Ngiyiphi indlela efaneleko yokusabela kilokho? UPowula wamemezela: “Sibuswa lithando lakaKrestu, ngombana uyasikhanyela umbono lo bona oyedwa nguye owafela boke; . . . wafela boke, ze kuthi labo abaphilako bangaziphileli bona, kodwana baphilele yena owabafelako wabe wavuswa ngebanga labo.” (2 Kor. 5:14, 15) Eqinisweni, uPowula bekathi nengabe siyawuthokozela umusa kaZimu ongakasifaneli, sizokusebenzisa amaphilo wethu ukudumisa Yena neNdodanakhe. Ithando lethu nokuthokozela kwethu uZimu noKrestu silitjengisa ngezenzo zethu zokulalela nesifiso sethu sokutjhumayela nokwenza abafundi.—1 Thi. 2:3, 4; 1 Jwa. 5:3.
17, 18. Ngiziphi ezinye iindlela abanye abandise ngazo umhlatjelo wabo wokudumisa uJehova? Nikela isibonelo.
17 Kungakghoneka ngawe na ukuthuthukisa umhlatjelo wokudumisa owunikela kuZimu? Ngemva kokucabangisisa ngakho koke okuhle uJehova abenzele khona, abanengi batjhukumiseleke bona bahlele isikhathi neemsebenzi yabo ukwandisa indlela abahlanganyela ngayo emsebenzini wokutjhumayela ngoMbuso namtjhana eminye iimsebenzi engokwezulwini. Abanye bakghone ukuba maphayona wesigiyani inyanga yinye namtjhana iinyanga ezithileko umnyaka ngamunye, kuthi abanye bakghone ukungenela ikonzo yamaphayona wesikhathi esizeleko. Abanye bangenela amajima wokwakha woMbuso. Qala bona lezi ziindlela ezihle kangangani zokutjengisa ukuthokoza! Nezenziwa ngehloso ehle—ukutjengisa ukuthokoza—izenzo zekonzo ecwengekilekwezi ziyamukeleka kuZimu.
18 AmaKrestu amanengi azizwe anesibopho sokuthokoza uJehova begodu atjhukunyiswa ngiso. Omunye wawo nguMorena. Wafuna iimpendulo zemibuzo yakhe engokomoya ebuKatolikeni, okulisondo akhulela kilo, nefilosofini ye-Asia. Kodwana zange afumane iimpendulo ezanelisako. Ukoma kwakhe okungokomoya kwaneliswa kwaphela nekathoma ukufunda iBhayibhili naboFakazi BakaJehova. UMorena wathokoza khulu ngeempendulo ezivela eMitlolweni zayo yoke iimbuzo yakhe nangokuzinza ezikulethe ekuphileni kwakhe kangangobana wafuna ukuthokoza uJehova ngokusebenzisa woke amandlakhe ekonzwenakhe. Wathoma ukuba liphayona lesigiyana iinkhathi ezinengi ngemva kokubhabhadiswa kwakhe, msinyana ubujamo bakhe nebumvumelako waba liphayona lesikhathi esizeleko. Lokho kwenzeka eemnyakeni ema-30 edlulileko, begodu uMorena usesesekonzweni yesikhathi esizeleko.
19. Kungenzeka njani ngawe bona wandise iimhlatjelo yakho kuJehova?
19 Liqiniso, kuneenkhozi zakaJehova ezinengi ubujamo bazo obungazivumeli bona zikhonze njengamaphayona wesikhathi esizeleko. Nanyana ngikuphi ongakwenza ekonzweni kaJehova, soke singanikela imihlatjelo engokomoya eyamukelekako kuye. Ekuziphatheni kwethu, kutlhogeka silalele iinkambisolawulo ezilungileko ngokutjheja, sikhumbule bona sijamela uJehova ngaso soke isikhathi. Ngekholo, sibeka loke ithemba lethu ekuzalisekeni kweenhloso zakaZimu. Ngemisebenzi emihle, sisiza ekurhatjheni iindaba ezimnandi. Ngokusuka eenhliziyweni zethu nangokuthokozela koke uJehova asenzele khona, asirageleni phambili senzela uJehova iminikelo yomphefumulo woke.
[Iimbuzo Yesifundo]
[Umkhangiso osekhasini 25]
Ubuhle bakaJehova buyakutjhukumisa bona uthuthukise umhlatjelo wakho wokudumisa?
[Isithombe ekhasini 23]
Uyalisebenzisa loke ithuba olifumanako ukunikela ubufakazi?
