UNathani—Umsekeli Othembekileko Wokukhulekela Okuhlwengileko

Akusilula ukukholisa indoda enamandla bona iindlela zayo zimbi begodu itlhoga ukuphenduka. Bewungaya na emntwini onjalo ngathana bewazi bona wabulala umuntu ngombana alinga ukuzenza muhle?

IKosi uDavidi yakwa-Israyeli wekadeni yaphinga noBhathisheba, waba sidisi. Ukufihla isono sabo, uDavidi wabulala indodakwakhe wathatha uBhathisheba waba mkakhe. Kwadlula iinyanga uDavidi aphila ukuphila okukabili, akunakuzaza bona waragela phambili nemisebenzakhe njengekosi. Kodwana uJehova khenge avumele izono zekosi zidlule zingabonakali. Wathumela umporofidi wakhe uNathani bona ayokuqalana noDavidi.

Lesi gade kusisabelo esibudisi. Zicabange usebujamweni bakaNathani. Ukuthembeka kuJehova nokunamathela ngokuqinileko eenkambiswenilawulo zakaZimu ngokunganakuzaza kwatjhukumisela uNathani bona akhumbuze uDavidi ngezono zakhe. Umporofidi lo bekazokwenza njani lokhu begodu akholise iKosi uDavidi bona itlhoga ukuphenduka?

UMFUNDISI ONEKGHONO

Kubayini ungathathi iimzuzu eembalwa ufunde 2 Samuweli 12:1-25? Zicabange unguNathani utjela uDavidi indaba le: “Bekunamadoda amabili okwenzeka abe semzini munye, enye injingile enye inokuncani. Enjingileko le gade inezimvu neenkomo ezinengi khulu; kodwana enokuncani beyinganalitho ngaphandle kwelamjana linye elisikazi, ebeyilithengile. Yalibulunga, lakhula kunye namadodanayo, ndawonye. Belidla isiqetjhana sakhe, lisela ngebhigirinakhe, lilala esifubeni sakhe, linjengendodakazi kuye. Ngemva kwesikhatjhana umuntu onjingileko wafikelwa sivakatjhi, kodwana akhenge athathe ezimvwini neenkomeni zakhe bona  alungiselele isivakatjhi ebesifike kuye. Ngalokho wathatha ilamjana elisikazi lendoda enokuncani leya walungisela umuntu ogade eze kuye.”—2 Sam. 12:1-4.

UDavidi—owakhe waba ngumalusi—kubonakala ngasuthi wakholwa bona indaba le yenzeka kwamambala. Esinye isazi sithi, “Mhlamunye uNathani bekajayele ukuya kuDavidi azokubawela abantu abalimeleko egade bangakghoni ukufumana isililiso ngenye indlela, begodu uDavidi wacabanga bona kusemahlombakhe ukusiza nje.” Ngitjho nanyana bekunjalo, bekutlhoga ukuthembeka kuZimu nesibindi ngoNathani ukukhuluma nekosi njengombana enza. Indaba kaNathani yamkwatisa uDavidi. Wababaza: “Njengombana uJehova aphila, umuntu owenza lokho ufanelwe kukufa!” Ngemva kwalokho kwalandela isaziso sakaNathani esiphorhozako: “Umuntu loyo nguwe!”—2 Sam. 12:5-7.

Cabanga bona uNathani kubayini athula umraro lo ngendlela le. Akusilula ngomuntu othinteke ngokwamazizo nomuntu othileko ukuqala ubujamo bakhe ngokutjhaphulukileko. Soke sitjhigamele ekubekeni amabanga wokuthethelela izenzo zethu ezisolisako. Kodwana umfanekiso kaNathani watjhukumisa uDavidi bona anyefule izenzo zakhe angakatjheji. Ikosi yabona ngokukhanyako bona ukuziphatha okuhlathululwe nguNathani bekukumbi khulu. Kukwaphela ngemva kobana uDavidi ngokwakhe azibone amlandu, uNathani athe umfanekiso lo uqaliselwe ekosini. Ngalokho uDavidi bekangabona ubukhulu besono sakhe. Lokhu kwalungisa ukucabanga kwakhe bona amukele ukusolwa. Walemuka bona kwamambala “udelele” uJehova ngokuziphatha kwakhe okumalungana noBhathisheba, begodu wamukela ukusolwa okumfaneleko.—2 Sam. 12:9-14; Rha. 51, umtlolo ophezulu.

Singafundani kilokhu? Umqopho womfundisi weBhayibhili kusiza abafundi bakhe bafikelele isiphetho esilungileko. UNathani bekamhlonipha uDavidi ngalokho waya kuye ngokuhlakanipha. UNathani bekazi bona ihliziyo kaDavidi iyakuthanda ukulunga nobulungisa. Ngomfanekiswakhe, umporofidi lo watjengisa iimfanelo zokuhlonipha uZimezi. Nathi singabasiza abantu bazwisise umbono kaJehova. Njani? Ngokukara amazizo wabo ngokulungileko, sikwenze lokho ngaphandle kokuzenza abangcono ngokokuziphatha namtjhana ngokomoya. IBhayibhili, ingasi umbono wethu mathupha, ligunya lethu malungana nokulungileko nokungakalungi.

Ngaphezu kwananyana yini enye, ukuthembeka kuZimu kwenza uNathani wakghona ukusola ikosi enamandla. (2 Sam. 12:1) Ukuthembeka okufanako kuzosinikela isibindi sokuzijamela ngokuqinileko iinkambisolawulo zakaJehova zokulunga.

UMTHUTHUKISI WOKUKHULEKELA OKUHLWENGILEKO

Kubonakala ngasuthi uNathani noDavidi bebabangani abakhulu, ngombana uDavidi wathiya enye yamadodanakhe ngokobana nguNathani. (1 Mil. 3:1, 5) Ukuvela kwakaNathani kokuthoma ekulandiseni kweBhayibhili bekanoDavidi. Bobabili bebamthanda uJehova. Kuqaleka ngathi ikosi beyikuthemba ukwahlulela kwakaNathani, ngombana yambulela umporofidi lo isifiso sayo sokwakhela uJehova itempeli. UDavidi wathi, “‘Qala, kwanje, ngihlala ngendlini yeemsedari kukulapho imbulungelo kaZimu weqiniso yona ihlala phakathi kwetende lamatjhila.’ UNathani wathi ekosini: ‘Koke okusehliziywenakho—khamba uyokwenza, ngombana uJehova unawe.’”—2 Sam. 7:2, 3.

Njengomkhulekeli kaJehova othembekileko, ngetjiseko uNathani wavumelana neplani kaDavidi yokwakha indawo yokuthoma ezinzileko yokukhulekela okuhlwengileko ephasini. Nokho, esenzakalweneso, kubonakala kwanga uNathani waveza amazizo wakhe kunokukhuluma ebizweni lakaJehova. Ngobusukobo, uZimu wayala umporofidi wakhe bona ase umlayezo ohlukileko ekosini: UDavidi ngeze amakhele uJehova itempeli. Umuntu ozokwenza lokho kuzokuba ngomunye wamadodana kaDavidi. Godu uNathani wazisa bona uZimu bekenza isivumelwano noDavidi ngomnqopho wokobana ubukhosi bakhe ‘buzokuqina bekube nini nanini.’—2 Sam. 7:4-16.

Intando kaZimu beyingavumelani nokwahlulela kwakaNathani malungana nokwakhiwa kwetempeli. Nokho, ngaphandle kokunghonghoyila umporofidi othobekileko lo wavumelana nomnqopho kaJehova begodu wabambisana nawo. Qala bona sibonelo esihle kangangani sokulandelwa nekwenzeka uZimu asilungise ngendlela ethileko! Imisebenzi  uNathani ayenza ngokulandelako njengomporofidi itjengisa bona akhenge alahlekelwe mumusa kaZimu. Eqinisweni, kubonakala kwanga uJehova waphefumulela uNathani, kunye noGadi umboni wemibono, bona banqophise uDavidi ukobana ahlele ababhini aba-4 000 ebebazokukhonza etempelini.—1 Mil. 23:1-5; 2 Mil. 29:25.

UMVIKELI WOBUKHOSI

UNathani bekalemuka bona uSolomoni uzokulandela uDavidi olupheleko njengekosi. Ngalokho uNathani wathatha igadango msinyana lokha u-Adonija afuna ukuthatha ngekani isihlalo sobukhosi amalanga kaDavidi nekanciphako. Godu ukuhlakanipha nokuthembeka kwabonakala ezenzweni zakaNathani. Wathoma wakhuthaza uBhathisheba bona akhumbuze uDavidi ngesifungo egade asenzile sokwenza indodana yabo uSolomoni ibe yikosi. Ngemva kwalokho, uNathani ngokwakhe wangena phambi kwekosi ayokubuza bona nguDavidi na obekagunyaze u-Adonija bona amlandele njengekosi. Itjheja bona ubujamo bumbi kangangani, ikosi esele iluphele yayala uNathani nezinye iinceku ezithembekileko bona zizese uSolomoni begodu zimemezele bona uyikosi. Iqhinga laka-Adonija lokuketula umbuso labhalelwa.—1 Kho. 1:5-53.

ISAZIMLANDO ESITHOBEKILEKO

UNathani noGadi kuthiwa ngibo abatlola u-1 Samuweli izahluko 25 kuya 31 kuhlanganise nayo yoke incwadi yesi-2 Samuweli. Malungana neemlando ephefumulelweko etlolwe eencwadinezo kuthiwa: “Malungana neendaba zakaDavidi ikosi, zokuthoma nezamaswaphela, zitlolwe hlangana kwamezwi kaSamuweli umboni wemibono nahlangana kwamezwi kaNathani umporofidi nahlangana kwamezwi kaGadi umboni wemibono.” (1 Mil. 29:29) UNathani godu uhlotjaniswa nokutlola kokulandisa okumalungana ‘neendaba zakaSolomoni.’ (2 Mil. 9:29) Pheze lokhu kutjho bona uNathani waragela phambili amajadu eendabeni zesigodlweni ngitjho nangemva kokufa kwakaDavidi.

Okunengi esikwaziko ngoNathani kungenzeka kwatlolwa mporofidi lo ngokwakhe. Nokho, ukuthula kwakhe eendabeni ezithileko kusitjela okunengi ngaye. Kubonakala ngasuthi uNathani bekasisazimlando esithobekileko. Bekangasimarhamaru afuna ukuzakhela ibizo. Ngokwesinye isihlathululimezwi seBhayibhili, wavela emlandweni ophefumulelweko “ngaphandle kwesethulo nomlando womndenakhe.” Asazi litho ngabokhokho bakaNathani namtjhana ipilwakhe yomuntu mathupha.

WATJHUKUNYISWA KUTHEMBEKA KUJEHOVA

Ekulandiseni okumbalwa kwakaNathani esinikelwa khona eMitlolweni, kuyakhanya bona bekathobekile kodwana amvikeli onetjiseko welungiselelo lakaZimu. UJehova uZimu wamnikela iimthwalo ebudisi. Cabangisisa ngeemfanelo zakaNathani, ezinjengokuthembeka kuZimu nokuzithokozela ngokudephileko iimfuneko zakaZimu. Lwela ukulingisa iimfanelo ezinjalo.

Pheze ngeze wabizwa bona uyokusola ikosi ephingileko namtjhana ukutjhaphisa amano wokuketula umbuso. Nokho, ngesizo lakaZimu ungathembeka kuZimu begodu uphakamise iinkambisolawulo zakhe zokulunga. Nawe ungaba nesibindi, kodwana uhlakaniphe, ube mfundisi weqiniso nomthuthukisi wokukhulekela okuhlwengileko.

[Isithombe ekhasini 25]

Njengomvikeli wobukhosi, uNathani ngokuhlakanipha wakhuluma noBhathisheba