Ezivela Ebulungelweni Lethu

“Yangifakela Amehlo”

Umtjhumayeli wesikhathi esizeleko uCharlotte White nekafika eLouisville, eKentucky, e-U.S.A., ageda ipotimende enamavili, abantu abanengi bamtjheja.

BEKUNGOMNYAKA ka-1908, begodu uDade  White ngokuqinisekileko wadosa amehlwabantu bendawo ngento etja—iKoloyana yeDawn. Uyabika, “Yabangela abantu bona bakhulume, begodu yangifakela amehlo.”

AbaFundi BeBhayibhili, njengombana aboFakazi BakaJehova bebabizwa njalo, babona itlhogeko yokuhlanganyela amaqiniso aligugu abawafunde ngokutaditjha iMitlolo ngokuzimisela. Abanengi bazuza ilwazi leBhayibhili ngerhelo leencwadi ezinesihloko esithi Millennial Dawn (kwamva godu zabizwa ngokobana Studies in the Scriptures). AmaKrestu egade azimisele begodu angakghona ukukhamba amabanga amade—emadorobheni, emizini, nemaphandleni—akhambisa ezahlathululwa ngokobana, “Iincwadi Ezilisizo ZabaFundi BeBhayibhili” kwabanye abafundi abanetjiseko.

Ngo-1908, uDade White nabanye abarhuweleli boMbuso abatjhisekako bebakhambisa isede yeemqulu esithandathu egubuzeswe ngetjhila nge-$1,65 (U.S.). Kunokunikela umninimuzi iincwadi msinyana, bebathatha ama-oda bese babuyela lada—ngokujayelekileko ngelanga lokurhola—ukubalethela zona bese bamukele imadlana yokuhlangabezana neendleko zokugadangisa. Omunye umphikisi wanghonghoyila ngokobana abantu banikela ngemali encani kangangani nebafumana iincwadezi!

UMalinda Keefer ukhumbula athatha ama-oda weencwadi ezimakhulu amabili kuya kwamathathu ngeveke. Kodwana ikareko ekulu eyatjengiswa kuma-Dawn yaletha isitjhijilo. Phela, umqulu wesithandathu uwodwa bewunamakhasi ama-740! ISithalasokulinda,  savuma bona iincwadi ezimatjhumi amahlanu bezikala amakhilogremu ali-18, obekwenza ukuzidiliva kube “budisi khulu,” khulukhulu ngabodade.

Ukurarulula isitjhijilo sokukhanjiswa kwe-Dawn, uMzalwana uJames Cole wenza ikoloyana enamavili amabili esongekako ebekungabotjhelelwa kiyo ipotimende ngeenkrufu. Njengombana bekungasatlhogeki athwale amabhoksi abudisi azele iincwadi, umenzi wekoloyana ngokwakhe wathi: “Angisaphuli amahlombami.” Wethula ithulusu elitjheli elathatjelwa balaleli emhlanganweni wesigodi wabaFundi BeBhayibhili wango-1908, eCincinnati, e-Ohio. Eenkunubhweni ezisemaphethelweni wesimbi ebuthabalala ngayinye bekutlolwe amezwi athi Dawn-Mobile, njengombana umthwalo wayo ngokuyihloko bekumiqulu ye-Millennial Dawn. Ngokuphrakthiza okuncani, ukukhambisa ipotimende ezele iincwadi kwaba yinto elula, engenziwa ngesandla sinye. Ubude bayo bebungenziwa bufanelane nomuntu oyikhambisako, begodu amavili wayo bekakghona ukukhamba neendleleni zemaphandleni. Ngemva kokukhamba ilanga loke ekonzweni, amavili weraba bekangasongwa ngeqadi kwepotimende nekubuyelwa ekhaya ngeenyawo namtjhana ngekoloyi.

Abodade abasekonzweni yesikhathi esizeleko bebafumana iKoloyana YeDawn simahla. Ngale kwalokho beyibiza $2,50 (U.S.). UDade Keefer, osesithombeni lo, waba sikghwari sokusebenzisa iKoloyana YeDawn kangangobana bekakwazi ukudosa ipotimende ezele iincwadi ngesandla sinye begodu ngesinye aphathe esinye isikhwama seencwadi. Ngebanga lokufumana abantu abanengi abanekareko kelinye idorobha elinemayini, ePennsylvania, e-U.S.A., ngokujayelekileko bekathatha amakhambo amathathu namtjhana amane ayama ibhulorho ngelanga lokudiliva.

Ngekupheleni kwabo-1980 umtjhayeli wesiphaphamtjhini watlama ipotimende enamavili esele ijayeleke khulu namhlanjesi emadokelweni weemphaphamtjhini neendleleni zemadorobheni ezitinazelako. Kodwana eemnyakeni engaba likhulu edlulileko, abaFundi BeBhayibhili abatjhisekako pheze bathabela ukubukelwa njengombana bageda iinKoloyana zabo ze-Dawn nebaya namtjhana babuya ekurhatjheni imbewu eligugu yeqiniso leBhayibhili.

[Umkhangiso osekhasini 32]

UDade Keefer ngokujayelekileko bekathatha amakhambo amathathu namtjhana amane ayama ibhulorho ngelanga lokudiliva

[Umkhangiso osekhasini 32]

Yararulula isitjhijilo sokukhanjiswa kwe-Dawn