Umlando Wokuphila

“Kunethabo Esandleni Sakho Sokudla Bekube Phakade”

Ilandiswa ngu-Lois Didur

Kukanengi kangangani ekuphileni kwakho utjho okunjengalokhu, ‘Ngifisa kwanga zange ngasenza isiquntwesi’? Nokho, ngemva kweemnyaka ema-50 ngisekonzweni yesikhathi esizeleko, abukho ubujamo obungathabisiko obuhlala isikhathi eside engingabucabanga obubangelwe kukuba sesandleni sakaJehova sokudla. Akhe ngikutjele bona kubayini.

Ngabelethwa ngo-1939 ngakhulela endaweni yemaphandleni i-Saskatchewan, eCanada, nginabodadwethu abane nomnakwethu munye. Ukuphila kweplasini yekakatwini bekuthabisa. Ngelinye ilanga, aboFakazi BakaJehova bafika ekhaya bakhuluma nobaba, ngababuza bona uZimu unebizo na. Basitjengisa ibizo elithi Jehova kuRhalani 83:18. Lokho kwangenza ngafuna ukwazi okungeziweko ngoZimu neLizwi lakhe.

Ngeemnyaka leyo, abantwana bemaplasini bebafunda esikolweni sinye lapho boke abantwana bebanga linye bebafundela ekumbeni yinye khona. Bebakhamba ngeempera namtjhana ngeenyawo amakhilomithara amanengi ukuya esikolweni. Iintlhogo zabotitjhere bezitlhogonyelwa mindeni esendaweni leyo. Ngomunye umnyaka, bekulithuba lababelethi bami ukuhlalisa utitjhere omutjha, uJohn Didur.

Ngingazi, isokanelo nalo belinekareko eLizwini lakaZimu. Ngakhe ngabuka ubukhomanisi nobusotjhalisti, ubaba egade amtjhisekeli wabo. UJohn ahleba waphendula wathi: “Akekho umuntu onelungelo lokubusa abanye. NguZimu kwaphela onelungelwelo.” Lokho kwarholela eengcocweni ezinengi ezikarisako.

Njengombana abelethwa ngo-1931, uJohn wezwa ngobudisi bepi. Nekuthoma iPi YeKorea ngo-1950, wabuza abafundisi abahlukahlukeneko ngokubandakanyeka kwabo epini. Boke bathi kulungile bona amaKrestu ahlanganyele epini. Kwamva wabuza aboFakazi BakaJehova umbuzo ofanako. Bamtjengisa ubujamo obuvumelana noMtlolo obathathwa maKrestu wokuthoma malungana nepi. UJohn  wabhabhadiswa ngo-1955. Ngomnyaka olandelako nami ngabhabhadiswa. Sobabili besazi bona sifuna ukukhonza uJehova ngokuphila namandlethu. (Rha. 37:3, 4) NgoJulayi 1957, mina noJohn satjhada.

Iimnyaka eemnengi ngelanga lethu lomtjhado, besisemhlanganweni. Besikuthabela ukuba hlangana kweenkulungwana zabanye abahlonipha umtjhado. Umhlangano wethu weentjhabatjhaba bewungo-1958. Sibahlanu sathatha ikhambo lokuya eNew York City ngekoloyi sisuka eSaskatchewan. Iveke yoke, besitjhayela emini, ubusuku ngabunye besilala etendeni. Cabanga bona sarareka kangangani umzalwana esahlangana naye eBethlehem, ePennsylvania, nekasimema bona siyokuhlala nomndenakhe ubusukobo! Ngebanga lomusakhe sakwazi ukufika eNew York City sihlwengile begodu sihlophisekile. Umhlangano omkhulukazi loyo wadzimelelisa kithi ithabo elikhulu lokukhonza uJehova! Njengombana umrhalani atlola, “kunethabo esandleni sakho sokudla bekube phakade.”—Rha. 16:11.

UKUPHAYONA

Ngemva komnyaka, ngo-1959, besiphayona sihlala ekharavaneni eyindlwana phezu kombundu eSaskatchewan. Newulapho bewukwazi ukubona indawo emakhilomithara amanengi, begodu enye yendawo leyo bekuyisimethu.

Langelinye, kwafika incwadi ekarisako ivela e-ofisini legatja. Ngarhabela ngaphandle lapho uJohn bekalungisa itregere khona. Incwadi leyo beyisimema bona sibe maphayona akhethekileko eRed Lake, e-Ontario. Singazi bona indawo leyo ikuphi, msinyana sakhupha imebhe bona siyifumane.

Qala bona beyihluke kangangani kunekakatu! Saba nokuhlangabezwane nakho kokuhlala emahlathini amakhulu nemadorobheni amancani akhiwe eduze neemmayini zerhawuda. Njengombana sifuna indawo yokuhlala ngelanga lokuthoma, umntazinyana othileko wasizwa sicoca nomakhelwanakhe. Wagijimela ekhabo kunina, ngomusa owasinikela indawo yokulala ubusuku bunye. Umbhede bewusekamurweni elingaphasi elifeyila. Ngelanga elilandelako, safumana indawo, indlu yeengodo enganamaphayiphi nefenitjhara, kwaphela inembawula ebaselwa ngeenkuni. Sathenga izinto ezimbalwa esitolo esithengisa izinto ezisetjenzisiweko begodu msinyana sazizwa sanelisekile.

Bekunganabandla endaweni emakhilomithara ama-209. Iinsebenzi zemayini ezinengi bezivela eYurobhu, begodu bezisibawa bona sizifumanele iBhayibhili ngelimi lazo. Ngesikhatjhana, besele sineemfundo zeBhayibhili ezihle ezima-30. Ngeenyanga eentathu, kwathonywa ibandla elincani.

Indoda yomunye umfazi ebengimragela isifundo yafowunela umpristi wayo bona azokutjengisa ukobana lokho umkayo akufunda kithi kumamala. Nesihlangana naye, umpristi wathi hlangana kwezinye zezinto, kufuze sifundise ngoZiquntathu. Umfazi loyo weza neBhayibhili lamaKatolika wabawa umpristi bona asekele izinto azitjhoko. Wafuthela iBhayibhili ngale kwetafula, wathi akunalitho azolisekela. Njengombana akhamba, wakhuluma ngesi-Ukraine wathi kufuze basiqothe endlinabo begodu bangasasivumela sifunde nabo. Bekangalemuki bona uJohn uyasazi isi-Ukraine!

Msinyana ngemva kwalokho, sakhamba eRed Lake ngombana uJohn bekazokubandulwa bona abe mbonisi wesifunda. Esikhathini esingaba mnyaka ngemva kwalokho, uJohn nekanikela ikulumo yebhabhadiso emhlanganweni wesigodi, indoda leyo beyihlangana kwalabo aboyokubhabhadiswa! Indaba yompristi yayenza yathoma ukuzenzela irhubhululo eBhayibhilini.

 UKUBA MAJADU EMSEBENZINI WOKUBHODA

Emsebenzini wesifunda, sathabela ukuhlala neemndeni eemnengi ehlukahlukeneko. Satjhidelana khulu nalabo abahlanganyela imizi nokuphila nathi. Khesahlala ekamurweni ephezulu ebeyinganamtjhiso ebusika. Ngamasa, besizwa udade osele akhululile ananaba angena ekamurwenethu azokubasa umlilo esitofini esincani. Msinyana, bekabuya nebhada namanzi afuthumeleko khona sizokubhincela ilanga. Ngafunda okunengi eendleleni zakhe ezithulileko nezinomusa.

Umsebenzi wokubhoda wangisiza ngatjhidela eduze noJehova. Esinye isifunda e-Alberta besibandakanya idorobho elinemayini eFar North, ebekuhlala udade othileko kilo. Ihlangano kaJehova beyimqala njani udade obekakude nabanye lo? Qobe ngemva kweenyanga ezisithandathu, besiya lapho ngesiphaphamtjhini sihlale naye iveke yoke sisebenze naye ekonzweni sibambe neemhlangano naye, njengombana besenza ngebandla elisedorobheni elikhulu. Bekusikhumbuzo esikhuthazako sokobana uJehova uyitlhogomela ngethando enye nenye imvanakhe.

Sahlala sithintana nabanengi abasinikela indawo yokuhlala. Lokho kungikhumbuza esinye sezipho zokuthoma uJohn angipha sona—ibhoksi elimibalabala elizele amaphepha. Sakuthabela khulu ukuthintana nabangani ngokubatlolela iincwadi, sisebenzisa amaphepha anjalo. Nanje ngisaliqala njengeliligugu ibhokselo.

Nesisesifundeni eToronto, umzalwana oseBethel yeCanada wasifowunela asibuza bona singakucabangela na ukuzokukhonza eBethel. Bekayifuna nini ipendulo? “Kusasa nekungenzeka!” Wayifumana.

IKONZO YEBETHEL

Isabelo ngasinye sisibonise iingcenye ezihlukileko zethabo elifumaneka esandleni sakaJehova. Lokho kwaragela phambili nesiya eBethel ngo-1977. Ubudlelwana nabanye babazesiweko basenza sabona ingasi kwaphela ubuntu babo obungafaniko kodwana sabona nehlonipho edephileko abanayo ngeLizwi lakaZimu.

Indlela etja yokwenza izinto eBethel beyithabisa. Ngokwesibonelo, izambatho zethu besele zihlala ngelayini kunokuhlala epotimendeni, begodu besihlanganyela ebandleni linye. Ngaphandle kokusebenza esabelweni sami, ukukhambisa iinqhema ezivakatjhele eBethel bekuhlala kusisenzakalo esithabisako kimi. Bengihlathulula umsebenzi owenziwa eBethel, ngilalele iimbono yabanakwethu abavakatjhileko, ngiphendule neembuzwabo.

Iimnyaka yakhamba msinyana, ngo-1997, uJohn wamenywa bona aye eSikolweni Samalunga Wekomidi Yegatja ePatterson, eNew York. Ngemva kwalokho sabuzwa bona singakucabangela na ukuthuthela e-Ukraine. Sakhuthazwa bona sikucabangele kuhle nangomthandazo. Ekupheleni kobusukobo, besele sazi bona ipendulo yethu izokuba ngu-iye.

ELINYE ITJHUGULUKO—E-UKRAINE

Saya emhlanganweni weentjhabatjhaba omkhulu eSt. Petersburg, eRussia, ngo-1992, nogade use-Kiev, e-Ukraine, ngo-1993. Iimhlangano leyo yasenza sabathanda abanakwethu be-Eastern Europe. Indawethu yokuhlala etja eLviv, e-Ukraine, beyisesistezini sesibili sendlu edala. Amafesdiri bekaqale ngejardeni ebeyinetoni encani, umkukurumba omkhulu obomvu, neenkhukhukazi ezinamadzinyani. Bengizizwa ngasuthi ngiseplasini eSaskatchewan. Besilitjhumi nambili ebesihlala endlini leyo. Besidlula edorobheni ngamasa qobe langa ukuyosebenza eBethel.

Besizizwa njani ngokuba se-Ukraine? Bekusenza sithobeke ukuhlala hlangana nabanengi abaqalana  neenlingo, ukuvinjelwa, nokuvalelwa emajele. Nanyana kunjalo, babulunga ikholo labo liqinile. Nesibabukako, bebathi, “Besikwenzela uJehova.” Akhenge bazizwe ngasuthi bebahlobokiwe. Ngitjho nanje, newuthokoza othileko ngesenzo somusa angaphendula ngokuthi, “Thokoza uJehova,” alemuka bona umThombo wazo zoke izinto ezihle.

E-Ukraine, abanengi bakhamba ngeenyawo ukuya esifundweni, ngalokho banesikhathi sokucoca nokukhuthazana. Ikhambo lingathatha i-iri linye namtjhana amanengi. Kunamabandla angaphezu kwama-50 e-Lviv, ama-21 wawo asebenzisa ithungelelwano elikhulu lamaWolo WoMbuso. NgaboSondarha, kukarisa kwamambala ukubona abanakwethu abanengi beza esifundweni.

Msinyana saziswa sitjhaphulukile nesinabanakwethu nabodadwethu, abanomusa netjisakalo yokutlhogomela abanye. Baba nesineke khulu nengiba nomraro wokuzwisisa ilimi. Amehlwabo ngokujayekileko atjengisa amazizo njengamezwabo.

Isibonelo sokuthembana kwamambala hlangana nabanakwethu senzeka hlangana nomhlangano weentjhabatjhaba e-Kiev ngo-2003. Besisandukuphuma esitetjhini esingaphasi komhlaba esitinazelako umntazinyana othileko nekeza kithi athi, “Ngilahlekile. Angimboni ugogwami.” Umntazinyana lo bekabone iimbeji zethu, wazi ukobana siboFakazi. Bekanesibindi begodu azange alile. Ikosikazi yombonisi wesifunda egade inathi ngomusa yathatha umntazinyana lo yamusa emnyangweni wokuLahlekileko Kwabuye Kwafumaneka etatawini lomhlangano. Msinyana umntazinyana lo wahlanganiswa nogogwakhe. Ngathinteka khulu ngokusithemba okukarisako umntazinyana lo akutjengisako, ngitjho nesiqubuthwini seenkulungwana zabantu.

Abazalwana abavela eenarheni ezinengi beza e-Ukraine ngo-Meyi 2001 nekunikezelwa imakhiwo yegatja lethu emitjha. Ngemva kwekulumo ekhethekileko etatawini ngoSondarha ekuseni, abazalwana abanengi bakhamba ngeenyawo ukuyokubona iBethel etja. Engakubona mhlokho ngeze ngakulibala! Ngathinteka khulu ukubona abazalwanaba, ebebathulile begodu bahlophisekile. Kwadephisa ukuthokozela kwami ithabo elifumaneka ngokukhonza uZimu.

ITJHENTJHO ELIKHULU

Ngokudanisako, ngo-2004, kwafumaneka bona uJohn unekankere. Saya eCanada bona ayokulatjhwa. Ihlandla lokuthoma lokulatjhwa ngamakhemikhali (chemotherapy) lapheze laba ngaphezu kwamandlakhe, wahlala iimveke endaweni yabagula khulu. Ngokuthabisako, waphaphama. Ngitjho nanyana bekubudisi khulu ukukhuluma, amehlwakhe bekahlala atjengisa ukuthokoza kibo boke abamvatjhelako.

Zange alulame, begodu wahlongakala ngesiruthwana somnyaka loyo. Ngazizwa ngasuthi ingcenye ekulu yami ayisekho. Mina noJohn sakuthabela khulu ukukhonza uJehova ndawonye. Bengizokwenzani? Ngakhetha ukubuyela e-Ukraine. Bengilibuka khulu ithando lomndeni weBethel nebandla ebengihlanganyela kilo lapho.

Khenge kube nesikhathi esazisola ngaso ngeenqunto esizenzileko. Sibe nokuphila okuthabisako, nobudlelwana obuhle khulu. Ngiyazi bona kusesekunengi ekufuze ngikufunde ngobuhle bakaJehova, begodu nginethemba lokuragela phambili ekonzwenakhe bekube phakade ngombana kwamambala ngifumene ‘ithabo esandleni sakaJehova sokudla.’

[Umkhangiso osekhasini 6]

“Khenge kube nesikhathi esazisola ngaso ngeenqunto esizenzileko”

[Isithombe ekhasini 3]

Nengitjhada noJohn

[Isithombe ekhasini 4]

Nengiliphayona elikhethekileko eRed Lake, e-Ontario

[Isithombe ekhasini 5]

NginoJohn e-Ukraine, ngo-2002