“Siwaba Usifode”

Ngemva kwelanga lesibili lomhlangano wesigodi, uJosué, olilunga lomndeni weBethel eMexico, bekakhambakhamba abukela idorobha leQuerétaro. UJavier noMaru isibili esitjhadileko esiziimvakatjhi seColombia sabawa uJosué bona asifode. Ngombana yena nabangani bakhe ababoFakazi bebambethe kuhle begodu bafake neembeji zomhlangano, isibilesi sababuza bona babuya emnyanyeni wokuthola iziqu zefundo namtjhana kesinye isenzakalo esikhethekileko na. UJosué wahlathulula bona beze emhlanganweni waboFakazi BakaJehova begodu wasimema bona sibe khona ngoSondo.

Isibilesi sacabanga bona sizokuhlazeka nesingaya ngombana besinganazembatho ezifaneleko zesenzakalo esinjalo. Ngitjho nanyana kunjalo, uJosué wasinikela isimemo esinebizo lakhe neenomboro zomtato ze-ofisi legatja akhonza kilo.

Okwamangaza uJosué, ngemva kweenyanga ezine wadoselwa nguJavier umtato. Isibilesi saya emhlanganweni wesigodi begodu kwanje sifuna bona aboFakazi BakaJehova basivakatjhele eMexico City, lapho bebahlala khona ngesikhatheso. Msinyana kwathonywa isifundo seBhayibhili noJavier noMaru, bathoma nokuya emihlanganweni yebandla. Ngemva kweenyanga ezilitjhumi, baba barhuweleli. Ngitjho nanyana isibilesi sathuthela eToronto, eCanada, saragela phambili sikhula ngokomoya begodu sabhabhadiswa.

Ngokukhamba kwesikhathi, uJosué wamukela incwadi evela kuJavier imhlathululela bona watjhukunyiswa yini bona amukele iqiniso. “Ngaphambi kokuya emhlanganweni wesigodi, mina nomkami sakhuluma ngetlhogeko yethu yesinqophiso esingokomoya. Nesibona indlela enembethe ngayo, sacabanga bona kufuze bonyana benisemhlanganweni okhetheke khulu. Emhlanganweni wesigodi, sathatjiswa yindlela yethando nesitjengiswa iindawo zokuhlala, nokusizwa ekuvuleni iBhayibhili nendlela egade baziphethe ngayo abeze emhlanganweni. Kwabonakala kungatjho litho ukwembatha kwethu njengemvakatjhi.”

Qala bona abonakala aliqiniso kangangani amezwi ahlakaniphileko weKosi uSolomoni kuJosué! USolomoni watlola: “Tjala imbewu yakho ekuseni bekube sebusuku ungavumeli isandla sakho siphumule; ngombana awazi bona izokuphumelela kuphi, kungaba kulapha nofana lapha, nofana bona zombili zizokuba zihle ngokufanako.” (Mtj. 11:6) Ungatjala imbewu ngokusebenzisa amathuba wokutjela abanye ngomhlangano wesigodi ozako namtjhana ngekulumo yenengi? UJehova angakusebenzisa ukudosa labo abalambele nabomele isinqophiso esingokomoya, njengoJavier noMaru.—Isa. 55:1.

[Isithombe ekhasini 32]

Ngesinceleni kuya ngakwesokudla: U-Alejandro Voeguelin, uMaru Pineda, u-Alejandro Pineda, uJavier Pineda, noJosué Ramírez egatjeni leMexico