Siza Abantu ‘Bavuke Ebuthongweni’
Siza Abantu ‘Bavuke Ebuthongweni’
“Niyazi bona isikhathi sesifikile esifanele bona nivuke ngaso ebuthongweni. Ngombana isikhathi sokobana siphuluswe siseduze kunalesiya isikhathi esakholwa ngaso.”—ROM. 13:11.
UNGAHLATHULULA?
Kubayini kuqakathekile ngamaKrestu bona ahlale aphapheme ngokomoya?
Kubayini iinkhonzi eziphaphemeko kufuze zilalele begodu zitjheje?
Umusa unayiphi indima ekonzwenethu?
1, 2. Abantu abanengi batlhoga ukuphaphama ngamuphi umqondo?
QOBE mnyaka, kuhlongakala iinkulungwana zabantu ngebanga lokuyenda namtjhana ukulala batjhayela. Abanye baphelelwa msebenzi ngombana bavuka lada namtjhana bayalala emsebenzini. Kodwana ukuyenda ngokomoya kuneemphumela emimbi kwamanikelela kunalokho. Kungokuvumelana nomongo lo lapho iBhayibhili itjho khona ukobana: “Ubusisiwe loyo ongakalali ubuthongo.”—ISam. 16:14-16.
2 Njengombana ilanga lakaJehova elikhulu litjhidela, inengi esintwini lilele ngokomoya. Ngitjho nabanye abadosi phambili beSingabukrestu baqalisele emhlambinabo ngokobana ‘ziinkakaramba ezileleko.’ Khuyini ukulala ngokomoya? Kubayini kuqakathekile bona amaKrestu ahlale aphapheme? Singabasiza njani abanye bavuke ngokomoya?
KHUYINI UKULALA NGOKOMOYA?
3. Ungamhlathulula njani umuntu oleleko ngokomoya?
3 Abantu abaleleko ngokujayelekileko abenzi litho. Ngokuphambeneko, abaleleko ngokomoya bangaba majadu khulu—kodwana ingasi ngezinto ezingokomoya. Bangatinazela khulu ngamatshwenyeko wabo wokuphila kwangamalanga namtjhana ukufuna ithabo, idumo namtjhana uburego. Ngebanga lakho koke lokho, abazitshwenyi khulu ngokutlhogomela iintlhogo zabo ezingokomoya. Nokho, abantu abaphaphemeko ngokomoya, bayalemuka bona siphila ‘emihleni yokuphela,’ ngalokho bamajadu ekwenzeni intando kaZimu.—2 Pit. 3:3, 4; Luka 21:34-36.
4. Siqakatheke ngani isiluleko esithi: “Akukafaneli bona silale ubuthongo njengabanye”?
4 Funda 1 KwebeTesalonika 5:4-8. La umpostoli uPowula ukhuthaza amakholwa akunye nawo bona ‘angalali ubuthongo njengabanye.’ Bekatjho ukuthini? Enye indlela ‘esingalala’ ngayo kungatjheji iinkambisolawulo zakaJehova zokuziphatha. Enye indlela esingalala ngayo kungatjheji iqiniso lokobana isikhathi sakaJehova sokutjhabalalisa abangamhloniphiko sesitjhidele. Kufuze siqiniseke bona abantu abanjalo abangamhloniphiko uZimu abasenzi simukele iindlela nokucabanga kwabo.
5. Ngikuphi ukucabanga okulitshwayo lalabo abaleleko ngokomoya?
5 Abanye bacabanga bona akekho uZimu ozobenza baphendule ngezenzo zabo. (Rha. 53:1) Abanye bacabanga bona uZimu akanandaba nathi, ngalokho akusizi ngalitho ukuba kwethu nendaba naye. Godu abanye bacabanga bona ukuba malunga wesondo kuzobenza abangani bakaZimu. Boke abantwaba balele ngokomoya. Kutlhogeka bavuke. Singabasiza njani?
KUFUZE SIHLALE SIPHAPHEME
6. Kubayini amaKrestu kufuze alwele ukuhlala aphapheme ngokomoya?
6 Bona sikwazi ukuvusa abanye, kufuze nathi siphaphame. Kubandakanyani lokho? ILizwi lakaZimu lihlobanisa ukulala okungokomfanekiso ‘nezenzo zobumnyama’—iimgidi eyaluzelako, ukudakwa, ubufebe, ukuziphatha okuliselelako, umbango, nomona. (Funda KwebeRoma 13:11-14.) Ukubalekela ukuziphatha okunjalo kungaba budisi. Ukuphaphama kuqakathekile. Umtjhayeli wekoloyi onganandaba nengozi yokulala atjhayela, ukhasela eziko. Qala bona kuqakatheke kangangani ngamaKrestu ukutjheja bona ukuyenda ngokomoya kungabulala!
7. Umbono ongakafaneli ngabantu ungasithinta njani?
7 Ngokwesibonelo, umKrestu angacabanga bona akekho esiminakhe osazozamukela iindaba ezimnandi. (Iziy. 6:10, 11) Angacabanga, ‘Nengabe akekho ozokusabela, kubayini kufuze ngisebenze budisi ukulinga ukufikelela namtjhana ukusiza abantu?’ Kuyavunywa, kungenzeka nje abanengi balele ngokomoya, kodwana ubujamo nomkhumbulwabo ungatjhuguluka. Abanye bayavuka basabele. Singabasiza nengabe thina sihlala siphapheme, njengalokha nesilinga iindlela ezitja zokutjhumayela umlayezo woMbuso ngendlela ekarako. Enye indlela yokuhlala siphapheme ibandakanya ukuzikhumbuza ukobana kubayini ikonzwethu iqakathekile.
KHUYINI OKWENZA IKONZWETHU IQAKATHEKE?
8. Kubayini ikonzwethu yobuKrestu iqakatheke khulu?
8 Khumbula bonyana kungakhathaliseki bona abantu basabela njani, ukutjhumayela kwethu kudumisa uJehova begodu kunengcenye ekuzalisekeni komnqophwakhe. Msinyana, abangazilaleliko iindaba ezimnandi bazokuqalana nesijeziso sokwahlulelwa. Indlela abantu abasabela ngayo ekutjhumayeleni kwethu izokuba sisekelo sokwahlulela. (2 Tes. 1:8, 9) Godu kungaba yiphoso ngomKrestu ukucabanga bona ukutjhumayela ngetjiseko akutlhogeki ngombana “olungileko nongakalungi, bazovuka kwabafileko.” (IZe. 24:15) ILizwi lakaZimu lisitjela bona abahlulelwe ‘njengeembuzi’ bazokuya ‘ekutjhatjalalisweni kwaphakade.’ Ukutjhumayela kwethu kuveza umusa kaZimu, kuvule indlela yokobana abantu batjhuguluke bafumane ‘ukuphila okungapheliko.’ (Mat. 25:32, 41, 46; Rom. 10:13-15) Nesingatjhumayeliko, abantu bazolifumana njani ithuba lokuzwa umlayezo ongaphulusa amaphilwabo?
9. Ukutjhumayela iindaba ezimnandi kukuzuzise njani wena nabanye?
9 Ukutjhumayela iindaba ezimnandi kuyasizuzisa nathi. (Funda 1 KuThimothi 4:16.) Awukafumani na bona ukukhuluma ngoJehova nethemba loMbuso kuqinisa ikholo nethando lakho ngoZimu? Akukakusizi bona uhlawulele iimfanelo zobuKrestu? Ukuzwakalisa ukuzinikela kwakho kuZimu ngokuhlanganyela ekonzweni akunamthelela ethabweni lakho na? Abanengi ababe nelungelo lokufundisa abanye iqiniso bafumene ithabo lokubona umoya kaZimu usiza abanjalo bathuthukise indlela yabo yokuphila.
YIBA NGOTJHEJAKO
10, 11. (a) UJesu noPowula batjengisa njani bona baphapheme begodu bayatjheja? (b) Tjengisa bona ukuphaphama nokutjheja kungayithuthukisa njani ikonzwethu.
10 Umuntu angenziwa abe nekareko eendabeni ezimnandi ngeendlela ezihlukahlukeneko. Ngalokho iinkhonzi ezimaKrestu kufuze zibe batjheji abaphaphemeko. UJesu usibonelo sethu. Njengombana bekaphelele, bekakghona ukubona ukukwata kwabaFarisi nanyana bathulile, ukutjhuguluka kwamambala komfazi osisoni, nomoya wokuzidela womhlolokazi. (Luka 7:37-50; 21:1-4) UJesu bekangasabela etlhogekweni engokomoya yomunye nomunye wabo. Nokho, inceku kaZimu akutlhogeki iphelele bona ibe mtjheji omuhle. Umpostoli uPowula ubufakazi balokho. Wenza itjumayelwakhe yakara iinqhema ezingafaniko nabantu abaneemkhumbulo engafaniko.—IZe. 17:22, 23, 34; 1 Kor. 9:19-23.
11 Ngokulwela ukuphaphama nokutjheja njengoJesu noPowula, singalemuka indlela engcono yokwenza labo esihlangana nabo babenekareko. Ngokwesibonelo, njengombana utjhidela ebantwini, qala amatshwayo atjengisa amasiko, iinkareko, namtjhana ubujamo bomndenabo. Mhlamunye ungatjheja lokho abakwenzako ngesikhatheso bese ubeka lobubodlhana ngakho njengombana uthomisa ingcoco.
12. Nesisekonzweni, kubayini kufuze siyelele malungana nesicoca ngakho?
12 Umtjheji ophaphemeko ulinga ukugegeda iinthikaziso. Nesisekonzweni, ukucoca nesikhamba naye kungakha. Nanyana kunjalo, kufuze sikhumbule bona umnqopho wokuhlanganyela ekonzweni yesimini kutjhumayeza abanye. (Mtj. 3:1, 7) Ngalokho kufuze siyelele bona ingcocwethu nesisuka kenye indlu siya kenye ayithikazisi ikonzwethu. Ukucoca ngamaphuzu esingathanda ukuwahlanganyela nabanekareko yindlelehle yokubulunga iimkhumbulwethu idzimelele emnqophwenethu. Godu, ngitjho nanyana ufunjathwako ngezinye iinkhathi angasisiza siphumelele ekonzwenethu, kufuze sithathe amagadango wokuqinisekisa bona ifowuni ayithikazisi ingcocwethu nomninimuzi.
TJENGISA IKAREKO YOMUNTU MATHUPHA
13, 14. (a) Singabona njani bona yini ekara umuntu? (b) Khuyini engavusa ikareko yabantu eentweni ezingokomoya?
13 Iinkhonzi eziphaphamileko zibalalelisisa kuhle ezihlangana nabo. Ngimiphi iimbuzo ongayibuza ukwenza othileko esiminenu aveze amazizwakhe? Kghani umuntu loyo utshwenyeke ngenani lamasondo, inturhu endaweni, namtjhana ukubhalelwa kwaborhulumende? Ungamenza na abe nekareko eentweni ezingokomoya ngokukhuluma ngomtlamo orarako wezinto eziphilako namtjhana ngokutjengisa bona isiluleko seBhayibhili silisizo kangangani? Pheze abantu bawo woke amasiko ngitjho nabanye abangakholelwako kuZimu, banekareko emthandazweni. Abanengi bayazibuza bona ukhona na olalela iimthandazo. Abanye bangakarwa mbuzo othi: UZimu ulalela yoke iimthandazo? Nengabe akusinjalo, khuyini okufuze siyenze bona uZimu asizwe?
14 Singafunda okunengi ngobukghwari bokuthomisa iingcoco ngokuqalisisa indlela abarhuweleli abanelemuko abenza ngayo. Tjheja indlela abakubalekela ngayo ukubonakala ngasuthi bahloma umninimuzi ngeembuzo namtjhana bangenela eendabeni zakhe zomuntu mathupha. Ilizwi nobuso babo butjengisa njani bona banekareko yokuzwisisa iimbono yomninimuzi?—Iziy. 15:13.
UMUSA NEKGHONO
15. Kubayini umusa kufuze ube litshwayo lemizamwethu yokutjhumayela?
15 Uyathanda ukuvuswa newukobukhulu ubuthongo? Abanengi abasabeli kuhle nebavuswe kungakalindeleki. Ngokujayelekileko banyula ukuvuswa ngendlela enesineke. Kungokufanako nangemizamo yokuvusa abantu ngokomoya. Ngokwesibonelo, nengabe othileko usabela ngobukhali, ngokujayelekileko ngiyiphi indlela engcono ekufuze sisabele ngayo? Ngomusa hlonipha amazizwakhe, umthokoze ngokungafihli indlela azizwa ngayo, bese ukhamba ngokuthula. (Iziy. 15:1; 17:14; 2 Thi. 2:24) Umusakho ungatjhukumisa umuntu onjalo bona asabele ngconywana isikhathi esizako nekakhanjelwa nguFakazi.
16, 17. Singakusebenzisa njani ukuhlakanipha ekonzwenethu?
16 Kezinye izenzakalo, ungakghona ukuhlula ukusabela okumbi. Othileko angathi, “Ngiyathokoza. Nginesondo lami” namtjhana, “Anginakareko,” kwaphela ngombana kubonakala kuyindlela ebulula khulu yokuqeda ingcoco. Kodwana ngekghono nokuphikelela ngomusa, ungakwazi ukubuza umbuzo okarisako ongavusa ikareko yomninimuzi eentweni ezingokomoya.—Funda KwebeKholose 4:6.
17 Ngezinye iinkhathi nesihlangana nabantu abacabanga bona bamajadu khulu bona bangalalela, kungcono ukuhlonipha ubujamo babo bese siyakhamba. Nokho, ngezinye iinkhathi ungalemuka bona ungakghona ukutjho okufitjhani nokunengqondo. Abanye abazalwana bayakghona ukuvula iBhayibhili, bafunde umtlolo otjhukumisa umkhumbulo, bese batjhiye umninikhaya nombuzo—koke lokho ngesikhathi esingaphasi komzuzu. Itjumayelwabo efitjhani yenze umninimuzi waba nekareko kangangobana wafumana bona akasimajadu khulu bona abe nengcoco efitjhani. Kubayini ungakulingi lokho ubujamo nebukuvumelako?
18. Singenzani bona siphumelele khudlwana ekufakazeni ngokungakahlelwa?
18 Nesihlangana nabantu emsebenzinethu yangamalanga, ngokujayeleko singavusa ikarekwabo eendabeni ezimnandi ngokulungiselela ukutjhumayela okungakahlelwa. Abanakwethu nabodade abanengi baphatha iincwadi ezithileko eenkhwanyeni zabo. Godu bangaba nomtlolo weBhayibhili othileko emkhumbulweni bona bawuhlanganyele nabanye nekuvela ithuba. Ungacoca nombonisi wekonzo namtjhana amaphayona webandla lenu ngendlela ongazilungiselela ngayo ukwenza lokho.
UKUVUSA IINHLOBO ZETHU NGESINEKE
19. Kubayini kungakafuzi silise ukwenza iimzamo yokusiza iinhlobo zethu?
19 Ngokwemvelo, singathanda ukusiza iinhlobo zethu zamukele iindaba ezimnandi. (Josh. 2:13; IZe. 10:24, 48; 16:31, 32) Nengabe umzamo wethu wokuthoma awamukelwa, lokho kungasenza singasabi netjiseko yokulinga godu. Singacabanga bona kuncani khulu esingakwenza namtjhana sikutjho okungatjhugulula umkhumbulwabo. Nanyana kunjalo, kunezenzakalo ezingenza ubuphilo namtjhana umbono wesihlobo sakho utjhuguluke. Namtjhana kungenzeka sewuthuthukile ekghonweni lakho lokuhlathulula iqiniso kangangobana nje ungaba nomphumela ohlukileko.
20. Kubayini ilemuko liqakathekile nesikhuluma neenhlobo?
20 Kufuze sikubalekele ukungabi nandaba namazizo weenhlobo zethu. (Rom. 2:4) Akukafaneli na sikhulume nazo ngomusa njengombana senza kilabo esihlangana nabo emsebenzini wokutjhumayela? Khuluma ngomoya ophasi nangehlonipho. Ngaphandle kokuzwakala ngasuthi uyazitjhumayeza, nikela ubufakazi bendlela iqiniso elikuzuzise ngayo. (Efe. 4:23, 24) Kwenze kukhanye ukobana uJehova ukunothise njani ukuphila kwakho, ‘ngokukufundisa lokho okukuzuzisako.’ (Isa. 48:17) Iinhlobo zakho azisibone kuwe isibonelo sokuphila kobuKrestu.
21, 22. Landisa okuhlangabezanwe nakho okutjengisa ukuqakatheka kokuphikelela ngeemzamo yokusiza iinhlobo ngokomoya.
21 Mvanje, omunye udade watlola: “Bengisolo ngilinga ukufakaza kibodadwethu nakubanakwethu aba-13 ngekulumo nangokuziphatha kwami. Umnyaka bewungapheli ngikakatloleli omunye nomunye wabo incwadi. Kodwana iimnyaka ema-30, bengikuphela kwakaFakazi emndenini.”
22 Udade lo uragela phambili: “Langelinye, ngafowunela omunye wabodadwethu ohlala endaweni ekude ngamakhulu wamakhilomitha. Wangitjela bona ubawe umfundisi wakhe bona afunde naye iBhayibhili, kodwa azange afunde naye. Nengithi ngingakuthabela ukumsiza, wathi: ‘Akunamraro, kodwana ngiyakutjela nje: Ngeze ngibe ngomunye waboFakazi BakaJehova.’ Ngemva kokumthumela incwadi ethi Khuyini Kwamambala Okufundiswa YiBhayibhili?, ngamfowunela ngemva kwamalanga ambalwa. Kodwana bekangakayivuli incwadi. Emaswapheleni ngambawa bona eze nencwadakhe, begodu iimzuzu eli-15 efowunini, besifunda sicoce ngeminye yeemtlolo edzubhuliweko. Ngemva kokumfowunela kambadlwana, wafuna sifunde iimzuzu engaphezu kwe-15. Yeke wathoma ukungifowunela bona sifunde, ngezinye iinkhathi bekafowuna ngaphambi kobana ngivuke ekuseni begodu ngezinye iinkhathi kabili ngelanga. Ngomnyaka olandelako, wabhabhadiswa, begodu ngomnyaka olandela loyo wathoma ukuphayona.”
23. Kubayini kungakafuzi sidinwe ekulingeni ukuvusa abantu ekulaleni okungokomoya?
23 Ukusiza abantu bona baphaphame ekulaleni ngokomoya likghono begodu kutlhoga iimzamo ephikelelako. Nokho, abantu abathobekileko basasabela emzamwenethu yokubavusa. Isilinganiso sabantu abangaphezu kwe-20 000 bayabhabhadiswa njengaboFakazi BakaJehova qobe nyanga. Asikhumbuleni isiluleko sakaPowula asitlolela umzalwana wangekhulu lokuthoma u-Akhipho esithi: “Tjheja ukuqeda umsebenzi wakho owawunikelwa yiKosi.” (Khol. 4:17) Isihloko esilandelako sizosisiza soke sithokozele lokho okutjhiwo kutjhumayela sinombono orhabako.
[Iimbuzo Yesifundo]
[Ibhoksi elisekhasini 13]
INDLELA YOKUHLALA UPHAPHEME
▪ Hlala umajadu ekwenzeni intando kaZimu
▪ Balekela iimsebenzi yobumnyama
▪ Yelela ingozi yokuyenda ngokomoya
▪ Bulunga umbono omuhle ngabantu besimini yenu
▪ Linga iindlela ezitja zokutjhumayela kwabanye
▪ Khumbula ukuqakatheka kwekonzo yakho
