“Hloyani Imvubelo YabaFarisi”

UJesu wayelelisa abafundi bakhe: “Hloyani imvubelo yabaFarisi ngitjho ukuzenzisa kwabo.” (Luka 12:1) Ukulandisa okufanako kwamezwi kaJesu kwenza kukhanye bona bekalahla “ifundiso” yabaFarisi.—Mat. 16:12.

IBhayibhili ngezinye iinkhathi isebenzisa “imvubelo,” namtjhana isibiliso, njengetshwayo lokonakala. Akunakuzaza bona kokubili iimfundiso nendlela abaFarisi egade bacabanga ngayo beyinomphumela owonakalisako kubalaleli babo. Kubayini iimfundiso zabaFarisi beziyingozi?

1 AbaFarisi bebazikhakhazisa ngokobana balungile, begodu baqalela abantu abajayelekileko phasi.

Ukuzenza abalungilekokhu kuyavela komunye umfanekiso kaJesu. Wathi: ‘UmFarisi wajama yedwa ngeqadi wathandaza wathi: “Ngiyakuthandaza, Zimu, ngombana angisimarhamaru, angisigalajani, angihlobongi njengabanye abantu. Ngiyakuthokoza ngombana angisinjengomthelisi lo olapha. Ngizila ukudla amalanga amabili evekeni, ngikunikela kwetjhumi kwengikuzuzako.” Kodwana umthelisi wajamela kudanyana, wabe wabhalelwa nakuqala ezulwini. Wazibetha isifuba wathi: “Zimu, ngirhawukele, mina soni!”’—Luka 18:11-13.

UJesu wabuka ukuthobeka komthelisi, wathi: ‘Ngiyanitjela bona umthelisi wabuyela ekhaya alitjalelwe izono, ingasi umFarisi; ngombana loyo naloyo ozikhulisako, uzokwehliswa, loyo naloyo ozithobako uzaphakanyiswa.’ (Luka 18:14) Ngitjho nanyana abathelisi bebadume ngokungathembeki, uJesu wafuna ukusiza labo egade bamlalela hlangana nabo. Okunganani abathelisi ababili—uMatewu noZakewu—baba balandeli bakhe.

Kuthiwani nengabe sicabanga bona singcono kunabanye ngebanga lamakghono namtjhana amalungelo esiwanikelwe nguZimu nofana ngebanga leemtjhapho nokubogaboga kwabanye? Kufuze siyikhuphe msinyana iimcabango enjalo, ngombana iMitlolo ithi: “Ithando lihlala libekezela, ithando linomusa, alinamona, ithando alizigqaji, alizikhukhumezi. Aliziphathi ngendlela engafaneli, alisimarhamaru, alizirhubheli kwalo, alicasuki, alinamavundo. Alithokozi ngalokho okungakalungi, kodwana liyakuthabela okuliqiniso.”—1 Kor. 13:4-6.

Kufuze sibe nobujamo bomkhumbulo obufana nebompostoli uPowula. Ngemva kobana akhulume ngokobana “uKrestu Jesu weza ephasinapha ukuzophulusa izoni,” uPowula wangezelela: “Mina-ke ngisisoni esikhulu kizo zoke ezinye.”—1 Thi. 1:15.

Iimbuzo yokucabangisisa:

Ngiyalemuka bona ngisisoni nokobana ukuphuluswa kwami kusame emseni kaJehova ongakafaneli? Namtjhana ngiqala ikonzwami yokuthembeka yeemnyaka eemnengi, amalungelo enginawo ehlanganweni kaZimu, nofana, amakghono angokwemvelo njengesisekelo sokuzizwa ngimkhulu kunabanye?

2 AbaFarisi bebafuna ukukara abanye ngokubukisa ngokulunga kwabo. Bebafisa ukuvelela nokubizwa ngeziqu ezibadumisa ngokudluleleko.

 Kodwana uJesu wayelelisa: “Benza zoke izinto khona bazabonwa babantu. Qalani imikhala eneendimana zemitlolo kibo abayibophe eenhloko zabo nemikhonweni yabo, qalani bona mikhulu kangangani! Begodu yelelani bona amatjharha weemphuraphura zabo made kangangani! Bathanda iindawo ezinganeno eminyanyeni neenhlalo eziphambili ngemasinagogeni. Bathanda ukulotjhiswa nehlonipho eendaweni okuthengiselwa kizo babizwe ‘Mfundisi.’” (Matewu 23:5-7) Indlelabo yokucabanga ihlukile kweyakaJesu. Nanyana bekayiNdodana kaZimu epheleleko, bekathobekile. Indoda ethileko neyimbiza ngokobana ‘ulungile,’ uJesu wathi: “Ungibizelani bona ngilungile na? Akakho noyedwa olungileko, ngaphandle koZimu yedwa tere.” (Markosi 10:18) Kesinye isenzakalo, uJesu wahlamba iinyawo zabafundi bakhe, ngalokho abekela abalandeli bakhe isibonelo sokuthobeka.—Jwanisi 13:1-15.

UmKrestu weqiniso kufuze akhonze amakholwa akunye nawo. (Gal. 5:13) Lokhu kutlhogeka ngokukhethekileko kilabo abafuna ukufanelekela ukuba babonisi ebandleni. Kuyafaneleka ‘ukulangaza ukuba mbonisi’ kodwana umnqopho lo kufuze utjhukunyiswe sifiso sokusiza abanye. “Umsebenzi” lo awusisikhundla sokuvelela namtjhana samandla. Labo abakhonza njengababonisi kufuze ‘bazithobe emoyeni,’ njengoJesu.—1 Thi. 3:1, 6; Mat. 11:29.

Iimbuzo yokucabangisisa:

Kghani ngitjhigamele ekuthandeni abazalwana abaneemthwalo yefanelo ebandleni, mhlamunye ngombana nginethemba lokufumana ukuvelela namtjhana amalungelo angeziweko? Kghani ngitjhigamele ekudzimeleleni ngokuyihloko eengcenyeni zekonzo kaZimu ezibonakala ziletha ukutjhejwa nofana ukubukwa? Kwamambala, ngilinga ukuba muhle phambi kwabanye?

3 Amasiko neemthetho yabaFarisi kwenza uMthetho waba mthwalo obudisi ebantwini abajayelekileko.

 UMthetho KaMosisi wanikela loke ihlelo lendlela ama-Israyeli ebekufuze akhulekele ngayo uJehova. Nokho, akhange kunikelwe iimniningwana emncani. Ngokwesibonelo, uMthetho bewukhandela ukusebenza ngeSabatha, kodwana khenge uhlathulule ngokukhanyako bona ngikuphi ukusebenza okufuze kwenziwe nokungafuzi kwenziwe. (Eks. 20:10) AbaFarisi bafuna ukuzalisa lokho ebebakuqala njengeemniningwana etjhodako ngokungezelela iimthetho, iinhlathululo, namasiko. Ngitjho nanyana uJesu angazange ayitjheje iimthetho yabaFarisi engazwakaliko, wawulandela uMthetho kaMosisi. (Mat. 5:17, 18; 23:23) Wabona ngale kwencwadi yoMthetho. UJesu wabona umoya ngemva koMthetho netlhogeko nomusa nesirhawu. Bekacabangela ngitjho nalokha abalandeli bakhe bamdanisa. Ngokwesibonelo, nanyana akhuthaza abapostoli bakhe abathathu bona bahlale baphapheme ngobusuku bokubotjhwa kwakhe, balala ngokubuyelelweko. Nokho, ngesirhawu waphawula: “Umoya uyavuma, kodwana inyama ibuthakathaka.”—Mar. 14:34-42.

Iimbuzo yokucabangisisa:

Kghani ngifuna ukubeka iimthetho eqinileko engazwisiseki namtjhana ukutjhentjha iimbonwami ibe mthetho? Ngiyacabangela kilokho ekungikulindele kwabanye?

Cabangisisa ngomahluko hlangana kweemfundiso zakaJesu nezabaFarisi. Uyazibona iindlela ongathuthukisa kizo? Nengabe kunjalo, kubayini ungazimiseli ukwenza njalo?

[Isithombe ekhasini 28]

AbaFarisi bebambatha amakasana amumethe iimtlolo.—Mat. 23:2, 5

[Iinthombe ekhasini 29]

Ngokungafani nabaFarisi abazikhakhazisako, abadala abathobekileko abamaKrestu bakhonza abanye

[Isithombe ekhasini 30]

NjengoJesu, uyakucabangela lokho okulindele kwabanye?