Iimbuzo Evela Kubafundi

Ukuhlongakala kwabathembekileko bakaZimu ‘kuligugu njani emehlweni kaJehova’?

▪ Umrhalani ophefumulelweko wabhina: “Ukuhlongakala kwabathembekileko kuligugu emehlweni kaJehova.” (Rha. 116:15) Ukuphila komunye nomunye umkhulekeli kaJehova weqiniso kuligugu khulu kuye. Nokho, amezwi adzubhulwe kuRhalani 116 atjho okungaphezu kokuhlongakala komuntu munye kwaphela.

Nekunikelwa ikulumo yesilahlo somKrestu, akufaneleki ukusebenzisa iRhalani 116:15 emntwini ohlongakeleko, ngitjho nanyana ahlongakele ayinceku kaJehova ethembekileko. Kubayini? Ngombana amezwi womrhalani anehlathululo enabileko. Lokhu kutjho bona uZimu ngeze avumela soke isiqhema sabathembekileko bakhe sihlongakale ngombana usiqala njengesiligugu.—Qala iRhalani 72:14; 116:8.

IRhalani 116:15 lisiqinisekisa bona uJehova ngeze avumele iinceku zakhe ezithembekileko njengesiqhema zisuswe ngokupheleleko ephasini. Eqinisweni, umlando wethu wanamhlanjesi utjengisa ukukghodlhelela kwethu itjhutjhiso elikhulu, okunikela ubufakazi obukhanyako bokobana uZimu ngeze asivumele sitjhatjalaliswe.

Ngebanga lamandlakhe angeze alinganiswa nokungabhalelwa komnqophwakhe, uJehova ngeze asivumela sitjhatjalaliswe njengesiqhema. Nengabe uZimu bekangakuvumela lokho, bekuzokubonakala ngasuthi amanabakhe anamandla ukudlula yena—into engeze yenzeka! Umqopho kaJehova wokobana iphaseli lihlalwe babantu abathembekileko kuye bewungeze uzaliseke—begodu yinto engeze yenzeka leyo. (Isa. 45:18; 55:10, 11) Phela, ngitjho nokunikela ikonzo ecwengileko kuJehova bekuzokupheliswa ephasini nengabe akunabantu abazokusala bamkhulekela emacabazini wephasini wetempeli lakhe elikhulu elingokomoya! Bekungeze kube nesisekelo ‘sephasi elitjha’—umphakathi wabantu abalungileko abaphila eplanethini yethu ngaphasi ‘kwezulu elitjha.’ (ISam. 21:1) Ngalokho nokuBusa kwakaKrestu Kweemnyaka Eyikulungwana bekungeze kuzaliseke nekungasanaankhonzi ephasini.—ISam. 20:4, 5.

Isikhundla nedumo lakaZimu bekuzokunyazeka nekangavumela amanabakhe asuse boke abantu bakhe ephasini. Lokho bekuzosusa uJehova esikhundleni sakhe sokuba Mbusi Wendawo Yoke. Ngaphezu kwalokho, ngebanga lokuzihlonipha yena nebizo lakhe elicwengileko, uJehova ngeze avumele ukuhlongakala kwabathembekileko bakhe njengesiqhema. Begodu cabangela lokhu: Njengombana ‘kungekho ukungabi nabulungiswa’ kuZimu, ngeze abhalelwa kubulunga isiqhema sabantu egade simkhonza ngokuthembeka. (Dut. 32:4; Gen. 18:25) Ngaphezu kwalokho, ukuvumela ukutjhatjalaliswa kweenceku zakhe njengesiqhema kuphambene neLizwi lakaZimu nelithi: “UJehova ngeze abalahle abantu bakhe ngebanga lebizo lakhe elikhulu.” (1 Sam. 12:22) Kwamambala, “uJehova ngeze abalahla abantu bakhe, ngeze alitjhiye ilifa lakhe.”—Rha. 94:14.

Qala bona kududuza kangangani ukwazi bona abantu bakaJehova ngeze batjhatjalaliswa ephasini! Ngalokho, asihlale sithembekile kuZimu, sithembele esithembisweni sakhe esithi: “Nanyana ngisiphi isikhali esizokwenzelwa wena ngeze siphumelele, begodu nanyana ngiliphi ilimu elizojamelana nawe ekwahluleleni uzolikghala. Leli lilifa elizokuzuzwa ziinceku zakaJehova, begodu nokulunga kuvela kimi.”—Isa. 54:17.

[Umkhangiso osekhasini 22]

UZimu ngeze avumele bona abantu bakhe batjhatjalaliswe