Ezivela Ebulungelweni Lethu

“Ngifunda Ukuwuthanda Ngokungeziweko Umsebenzi Wobu-Colporteur Qobe Langa”

NGO-1886, amakhophi alikhulu we-Millennial Dawn, Umqulu I, asuka eBible House e-Allegheny, ePennsylvania, e-U.S.A., ayiswa eChicago, e-Illinois. UCharles Taze Russell bekanethemba lokurhatjha umqulu omutjha lo eentolo ezithengisa iincwadi. Enye yeenkampani ezikulu e-United States esabalalisa iincwadi zekolo beyivumile ukuthatha i-Millennial Dawn ngaphasi kwesivumelwano sokobana izokubhadalela kwaphela lezo ezizokuthengwa. Kodwana ngemva kweemveke eembili, zoke iincwadi ezathunyelwako zabuyiselwa eBible House.

Kubikwa bona, umvangeli odumileko wabhebha ngobukhali nekabona i-Millennial Dawn irheliswe neencwadi zakhe esitolo. Akwatile, wathi nengabe i-Millennial Dawn ayikhutjhwa ematjhelfini wesitolweso, yena nabo boke abangani bakhe ababavangeli abadumileko bazozithatha zoke iincwadi zabo—nebhizinisi yabo—bayise kwenye indawo. Singakazimiseli, isitolo esithengisa iincwadi sayibuyisa ama-Dawn. Ukungezelela kilokho, bekufakwe imikhangiso kumaphephandaba. Kodwana abaphikisi baqinisekisa bona imikhangiso leyo ayigadangiswa. Ngalokho-ke incwadi etja le beyizokufika njani kubantu abafuna iqiniso?

Ama-colporteur, adlala indima eqathekileko. * Ngo-1881 i-Zion’s Watch Tower yenza isibawo sabatjhumayeli abayi-1 000 abazokurhatjha iincwadi zeBhayibhili isikhathi esizeleko. Ngitjho nanyana ama-colporteur bekamakhulu ambalwa kwaphela, arhatjha imbewu yeqiniso ngeencwadi ngitjho neendaweni ezikude. Ngo-1897, pheze iimqulu ye-Dawn esigidi besele isabalalisiwe, ubunengi bayo isabalaliswe ma-colporteur. Inengi lawo beliphila ngemadlana ebeliyifumana ngembadelo ye-Sithalasokulinda namtjhana seencwadi azikhanjisiweko.

Bekabobani ama-colporteur atjhisekako la? Amanye athoma asesematjha, amanye sele amadala. Amanengi bekangakatjhadi namtjhana atjhadile kodwana anganabantwana, begodu neemndeni eemnengi yangenela ikonzo le. Ama-colporteur avamileko bekasebenza ama-awara amanengi ngelanga, kukulapho ama-colporteur wesigiyani asebenza i-iri linye namtjhana amabili. Akusiwo woke umuntu obekanepilo namtjhana ubujamo obumvumela bona enze umsebenzi wama-colporteur. Kodwana emhlanganweni wesigodi wango-1906, labo ebebangakghona batjelwa bona akutlhogeki babe “ngabafunde khulu, namtjhana abanobukghwari obukhulu, namkha bakhulume njengeengilozi.”

Pheze kwenye nenye inarhakazi, abantu abavamileko bebenza umsebenzi orarako. Omunye walinganisa bona eemnyakeni elikhomba wakhambisa iincwadi ezi-15 000. Kodwana wathi, “Zange ngingenele umsebenzi  wama-colporteur bona ngibe mthengisi weencwadi, kunalokho, bona ngibe ngufakazi kaJehova noweqiniso lakhe.” Nanyana kukuphi lapho ama-colporteur bekaya khona, iimbewu yeqiniso beyiveza iimrabho begodu iinqhema zabaFundi beBhayibhili zathoma ukwanda.

Abafundisi bebawanyefula ama-colporteur, bawabiza abathengisi beencwadi abangatjho litho. I-Watch Tower ka-1892 yathi: “Bambalwa [abawazi] njengabajameli bamambala beKosi, namtjhana abalemuka isithunzi iKosi esibona ekuthobekeni nekuzideleni kwawo.” Kwamambala, ipilo yama-colporteur beyingasi “njengokuba hlangana komhlana nembeleko,” njengombana omunye wawo akubeka. Amanyathelo aqinileko nemilelenjana bekuziindlela zokukhamba eziyihloko. Imali neyingafumaneki bulula, ama-colporteur bekarhweba iincwadi ngokudla. Ngemva kokusebenza ilanga loke esimini, abatjhumayeli abadiniweko kodwana abathabileko laba bebabuyela ematendeni nemakamurweni aqatjhiweko. Ngokukhamba kwesikhathi kwaba neKarana yama-Colporteur, umakhamba ngendlwana wokuzenzela, owabulunga isikhathi nemali enengi. *

Kusukela emhlanganweni wesigodi we-International Bible Students Association, eChicago ngo-1893, umhlangano wabandakanya namahlelo akhethekileko wama-colporteur. Amahlelo la bekabandakanya ukuhlanganyela okuhlangabezanwe nakho, iimphakamiso zeendlela zokutjhumayela, neenluleko ezisebenzako. UMnakweth’ uRussell khewakhuthaza abatjhumayeli abasebenza budisaba bona badle ukudla kwekuseni okumnandi, ngokukhamba kwesikhathi ekuseni basele irhalasi lebisi, begodu ngelanga elitjhisako, bafumane i-ice-cream soda.

Newafuna umuntu afuna umuntu angatjhumayela naye, ama-colporteur bekambatha iribhoni esarulana. Ama-colporteur asakhasako bekakhanjiswa nalawo anokuhlangabezanwe nakho. Ibandulo elinjalo belitlhogeka, ngombana elinye i-colporteur elitjha lithukiwe lakhambisa iincwadi ngokuthi, “Awuzifuni iincwadezi, kghani uyazifuna?” Ngokuthabisako, umninimuzi bekazifuna begodu ngokukhamba kwesikhathi waba ngudade.

Omunye umzalwana wazibuza, ‘Kghani ngibulunge ubujamo bami banje obumabothobotho bese nginikela i-$1,000 (U.S.) ngomnyaka emsebenzini, namtjhana kufuze ngibe yi-colporteur?’ Watjelwa bona, iKosi ingathabela nanyana ngikuphi kwakho, kodwana ukunikela isikhathi sakhe ngokunqophileko eKosini kuzomlethela iimbusiso ezingeziweko. UMary Hinds wabona umsebenzi wobu-colporteur “njengendlela engcono khulu yokwenza umsebenzi omuhle khulu kubantu abanengi.” Begodu u-Alberta Crosby oneenhloni wathi, “Ngifunda ukuwuthanda ngokungeziweko umsebenzi wobu-Colporteur qobe langa.”

Namhlanjesi, iinzukulwana ezinengi ezingokwenyama nezingokomoya zama-colporteur atjhisekako zisabambelele ngokuthembeka elifeni lazo elingokomoya. Nengabe azange khenibe ne-colporteur namtjhana iphayona emndenini wekhenu, kubayini ungathomi ukukwenza umukghwa womndenakho lokhu? Nawe uzokufunda ukuwuthanda ngokungeziweko qobe langa umsebenzi wokutjhumayela isikhathi esizeleko.

[Imitlolo yaphasi]

[Umkhangiso osekhasini 32]

Bekungatlhogeki babe “ngabafunde khulu, namtjhana abanobukghwari obukhulu, nofana bakhulume njengeengilozi”

[Isithombe ekhasini 31]

I-colporteur u-A. W. Osei eGhana, ngabo-1930

[Iinthombe ekhasini 32]

Phezulu: Ama-colporteur u-Edith Keen noGertrude Morris e-England, ngabo-1918; phasi UStanley Cossaboom noHenry Nonkes e-United States, banamabhoksi anganalitho ebekaneencwadi abazikhambisileko