Uyayitjengisa Na Iphazimulo KaJehova?
Uyayitjengisa Na Iphazimulo KaJehova?
“Thina . . soke iphazimulo yeKosi ibonakala kithi njengesibonibonini.”—2 KOR. 3:18.
UNGAPHENDULA NJANI
Naphezu kokungapheleli kwethu singamphazimulisa njani uJehova?
Iimthandazo yethu nokuba khona eemhlanganweni yobuKrestu kungasisiza njani sitjengise iphazimulo kaZimu?
Khuyini engasisiza sihlale siphazimulisa uJehova?
1, 2. Kubayini kunengqondo ukulindela bona singakghona ukulingisa iimfanelo zakaJehova?
SOKE sifuze ababelethi bethu ngendlela ethileko. Ngalokho-ke, akurari ukuzwa umuntu othileko athi emsanyaneni: ‘Ufana noyihlo.’ Umntazinyana kungathiwa kuye, ‘Ungikhumbuza ummakho.’ Kanengi abantwana balingisa abakubona kubabelethi babo. Kodwana kuthiwani ngathi? Singamlingisa na uBabethu wezulwini, uJehova? Nanyana singakhange khesimbone, singazibona iimfanelo zakhe eziligugu ngokutaditjha iLizwi lakhe, ngokuqala akubumbileko nangokucabangisisa ngeMitlolo begodu khulukhulu ngamezwi nezenzo zeNdodana kaZimu, uJesu Krestu. (Jwa. 1:18; Rom. 1:20) Singakghona ukutjengisa iphazimulo kaJehova.
2 Ngaphambi kobana abumbe u-Adamu no-Efa, uZimu bekaqiniseka bona abantu gade bazokukghona ukwenza okuyintando yakhe ngabo, ukutjengisa iimfanelo zakhe nokumphazimulisa. (Funda uGenesisi 1:26, 27.) Ekuzinikeleni kwethu kokusaba uZimu, kufuze sitjengise iimfanelo zaLoyo owasibumbako. Nesenza njalo, siba nelungelo elibusisekileko lokutjengisa iphazimulo kaZimu kungakhathaliseki amasiko, ifundo nesizinda sobutjhaba bethu. Kubayini? Ngombana “uZimu uphatha boke abantu ngokulingana. Loyo omesabako, enze koke okulungileko wamukelekile kuye.”—IZe. 10:34, 35.
3. AmaKrestu angaba namaphi amazizo njengombana akhonza uJehova?
3 AmaKrestu azesiweko ayayitjengisa iphazimulo kaJehova. Kungebangelo umpostoli uPowula obelethwe ngomoya atlola: ‘Thina soke ubuso bethu obungakagutjuzeswa, sibonakalisa iphazimulo yeKosi njengesiboniboni, siyatjhugululwa bona sifuze umfanekiso wakhe, ngephazimulo edluleleko khulu.’ (2 Kor. 3:18) Umporofidi uMosisi nekehla eNtabeni iSinayi aphethe amatje atlolwe iiMthetho Elitjhumi, ubuso bakhe bakhupha imisebe ngombana gade akhuluma noJehova. (Eks. 34:29, 30) Nanyana amaKrestu angakhange abe nokuhlangabezanwe nakho okunjalo nobuso bawo bungakhenge bukhuphe imisebe, bafumana ithabo nebatjela abanye ngoJehova, iimfanelo zakhe nomnqopho wakhe okarisako ngesintu. Njengesiboniboni sesimbi esiphazimulako sekadeni, abazesiweko nabangani babo bephasini batjengisa iphazimulo kaJehova ekuphileni nekonzwenabo. (2 Kor. 4:1) Uyayitjengisa iphazimulo kaJehova ngokuziphatha ngendlela etjengisa ukumesaba nangekonzo yakho njengomrhuweleli woMbuso ophuma qobe?
SIFISA UKUTJENGISA IPHAZIMULO KAJEHOVA
4, 5. (a) NjengoPowula, khuyini esilwa nayo? (b) Isono sasithinta njani?
4 Njengeenceku zakaJehova, ngokuqinisekileko sifuna ukudumisa nokuphazimulisa uMbumbi wethu kikho koke esikwenzako. Nokho, kanengi esifisa ukukwenza akusingilokho esikwenzako. UPowula kwatlhogeka aqalane nomraro loyo mathupha. (Funda KwebeRoma 7:21-25.) Ahlathulula bona kubayini siqalene nepi leyo, uPowula watlola: “Boke abantu bonile bakude khulu nephazimulo kaZimu.” (Rom. 3:23) Liqiniso, ngebanga lelifa esalizuza ku-Adamu onesono, isintu saba ngaphasi kokulawula okunelunya ‘kweKosi Esisono.’—Rom. 5:12; 6:12.
5 Khuyini isono? Singinanyana yini ephambene nobuntu, iindlela, iinkambisolawulo nentando kaJehova. Isono sonakalisa ubuhlobo bomuntu noZimu. Isono sisibangela bona sikhuthe itshwayo, ngitjho njengombana umdubuli womswibela angadubula kodwana akhuthe into ayinqophileko. Singona ngokunqophileko namtjhana singakanqophi. (Num. 15:27-31) Isono singene ngokudephileko ebantwini begodu sibangela isiqabo hlangana nabo noMbumbabo. (Rha. 51:5; Isa. 59:2; Khol. 1:21) Ngalokho, abantu abanengi baphila ngendlela ebahlukanisa ngokupheleleko noJehova, yeke balahlekelwa lithuba elikarisako lokutjengisa iphazimulo kaZimu. Akunakuzaza bona isono kurholophala okuphethe abantu.
6. Nanyana sinesono, singamphazimulisa njani uZimu?
6 Naphezu kobujamo bethu besono, uJehova uziveze ‘anguZimu opha ithemba.’ (Rom. 15:13) Ulungiselele indlela yokuqeda isono—umhlatjelo wesihlengo sakaJesu Krestu. Ngokutjengisa ikholo emhlatjelweni loyo, ‘asisabuswa sisono’ kodwana siba sebujamweni bokutjengisa iphazimulo kaJehova. (Rom. 5:19; 6:6; Jwa. 3:16) Ukubulunga ubuhlobobu noZimu kusenza siqiniseke bona uJehova uzosibusisa gadesi nesikhathini esizako ngokuphila okupheleleko okungapheliko. Nanyana sinesono, qala bona kusibusiso kangangani uZimu nekasiqala njengabantu abatjengisa iphazimulo yakhe!
UKUTJENGISA IPHAZIMULO KAZIMU
7. Yini okufuze siyivume ngathi bona sitjengise iphazimulo kaZimu?
7 Bona siyibonakalise ngokufaneleko iphazimulo kaZimu, kufuze sivume ngokuthembeka bona sibabantu abanesono. (2 Mil. 6:36) Kufuze sibuvume ubuthakathaka bethu bese silwela ukubulawula bona sithuthukele ezingeni lokumphazimulisa ngokuzeleko uZimu. Ngokwesibonelo, nengabe siwele esonweni esihlazisako sokubukela iinthombe zomseme ezisilapheleko kufuze sivume bona sitlhoga isizo elingokomoya begodu silifune. (Jak. 5:14, 15) Leli kuzokuba ligadango lokuthoma esingalithatha ekulweleni ukuphila ngendlela ephazimulisa uZimu ngokuzeleko. Njengabakhulekeli bakaJehova, kufuze siragele phambili sizihlola sibone bonyana siphila ngokuvumelana neenkambisolawulo zakhe zokulunga na. (Iziy. 28:18; 1 Kor. 10:12) Kungakhathaliseki bona sibuthaka kuphi namtjhana sitjhigamele kangangani esonweni, kufuze siragele phambili silwisana nabo ukwenzela bona sikwazi ukutjengisa iphazimulo kaZimu.
8. Nanyana singakapheleli, khuyini okufuze siyenze?
8 UJesu ukuphela komuntu owakhe waphila begodu wafa angakabhalelwa kuthabisa uZimu nokutjengisa iphazimulo Yakhe. Ngokungafani noJesu, asikapheleli kodwana singakghona begodu kufuze silwele ukulingisa isibonelo sakhe. (1 Pit. 2:21) UJehova uyawubona umzamo netuthuko esiyenzako begodu uyawubusisa umzamo wethu wetjiseko wokumphazimulisa.
9. IBhayibhili lidlala yiphi indima ekuphileni kwamaKrestu afisa ukuphila ngokuvumelana neemfuneko zakaZimu?
9 Ukukhanya kweLizwi lakaJehova elitloliweko kungasitjengisa lapho okufuze sithuthuke khona. Kuqakathekile bona sitaditjhe iMitlolo ngokudephileko begodu sicabangisise ngayo. (Rha. 1:1-3) Ukufunda iMitlolo qobe langa kuzosisiza sithuthuke. (Funda KaJakobosi 1:22-25.) Ilwazi leBhayibhili lisisekelo sekholo lethu begodu liyindlela yokuqinisa ukuzimisela kwethu ukubalekela isono esikhulu begodu sithabise uJehova.—Rha. 119:11, 47, 48.
10. Umthandazo ungasisiza njani bona sikhonze uJehova ngokuzeleko?
10 Bona sitjengise iphazimulo kaZimu, godu kufuze ‘sithandaze ngeenkhathi zoke.’ (Rom. 12:12) Singakghona begodu kufuze sithandazele bona uJehova asisize simkhonze ngendlela ayamukelayo. Bona senze lokho, singambawa ngokufaneleko bona asiphe umoya ocwengileko, ikholo elingeziweko, amandla wokujamelana neenlingo nekghono ‘lokuphatha ilizwi lakaZimu ngokutjhejisisa.’ (2 Thi. 2:15; Mat. 6:13; Luka 11:13; 17:5) Njengombana umntwana athembela kuyise, nathi kufuze sithembele kuBabethu wezulwini, uJehova. Nesimbawa bona asisize simkhonze ngokuzeleko, singaqiniseka bona uzokwenza njalo. Singathomi sibe namazizo wokobana siyamtshwenya! Kunalokho, asimdumiseni ngomthandazo, simthokoze, sifune isinqophiso sakhe khulukhulu nesilingwako, simbawe asisize simkhonze ngeendlela eziphazimulisa ibizo lakhe elicwengileko.—Rha. 86:12; Jak. 1:5-7.
11. Iimhlangano yebandla isisiza njani bona sitjengise iphazimulo kaZimu?
11 UZimu waphathisa “inceku ethembekileko nehlakaniphileko” bona itlhogomele izimvu zakhe eziligugu. (Mat. 24:45-47; Rha. 100:3) Isigaba senceku sinekareko endleleni amakholwa akunye naso atjengisa ngayo iphazimulo kaJehova. Ubuntu bethu njengeenkhonzi ezimaKrestu bulungiswa emihlanganweni yethu, ngitjho njengombana singabawa umuntu othungako bona asilungisele izambatho zethu bona siqaleke ngcono. (Heb. 10:24, 25) Yeke asifikeni ngesikhathi, ngombana nesihlala sifika lada, siphundwa okunganani ngokhunye ‘kokulungiswa’ okungokomoya okutlhoga ukuthuthukisa ukuqaleka kwethu njengeenceku zakaJehova.
ASILINGISENI UZIMU
12. Singamlingisa njani uZimu?
12 Nesizakutjengisa iphazimulo kaJehova, ‘kufanele bona sibe njengaye.’ (Efe. 5:1) Indlela esingamlingisa ngayo uJehova kukuba neembono yakhe ngezinto. Ukulwela ukuphila ngenye indlela kuyamhlazisa begodu kuyasilimaza. Njengombana iphasi elisibhodileko lingaphasi kokulawulwa ngomumbi uSathana uDeveli, kufuze sisebenze budisi sihloye lokho uJehova akuhloyako begodu sibe nethando elidephileko ngezinto azithandako. (Rha. 97:10; 1 Jwa. 5:19) Kufuze sibe nekholo elisuka ehliziyweni lokobana indlela efaneleko yokukhonza uZimu kukwenzela zoke izinto iphazimulo yakhe.—Funda 1 KwebeKorinte 10:31.
13. Kubayini kufuze sihloye isono, begodu lokhu kuzositjhukumisela bona senzeni?
13 UJehova uyasihloya isono, begodu nathi kufuze sisihloye. Kwamambala, kufuze sigegede ukwenza okumbi ngendlela esingakghona ngayo begodu singafuni ukubona bona kusele kancani kangangani sifike kikho ngaphandle kobana sihlulwe sisono. Ngokwesibonelo, kufuze sitjheje ukuhlubuka, isono esingasenza singakufanelekeli ukuphazimulisa uZimu. (Dut. 13:6-9) Ngalokho, asingazihlanganisi neenhlubuki nananyana ngubani othi umzalwana kodwana ahlazisa uZimu. Lokhu kufuze kusebenze ngitjho nanyana alilunga lomndeni. (1 Kor. 5:11) Asizuzi ngokulinga ukuphikisana neenhlubuki namtjhana nalabo abanyefula ihlangano kaJehova. Eqinisweni, kuyingozi engokomoya begodu akukafaneli sihlole ukwaziswa kwabo, kungakhathaliseki bona kutlolwe phasi namtjhana kufumaneka ku-Internet.—Funda u-Isaya 5:20; Matewu 7:6.
14. Nesisebenzela ukutjengisa iphazimulo kaZimu, ngiyiphi ifanelo ekufuze ivelele kithi, begodu kubayini?
14 Ukutjengisa ithando yindlela eveleleko yokobana silingise uBabethu wezulwini. Kwamambala, njengaye kufuze sibe nethando. (1 Jwa. 4:16-19) Eqinisweni, ithando esinalo phakathi kwethu lisiveza njengabafundi bakaJesu neenceku zakaJehova. (Jwa. 13:34, 35) Nanyana ukungapheleli esakuzuza ngelifa kungasiphazamisa ngezinye iinkhathi, kufuze singakutjheji begodu sitjengise ithando ngaso soke isikhathi. Ukuhlawulela ithando nezinye iimfanelo zokusaba uZimu kuzosikhandela ekwenzeni izinto ezingakalungi nesono.—2 Pit. 1:5-7.
15. Ithando libuthinta njani ubuhlobo bethu nabanye?
15 Ithando lisenza sifune ukwenzela abantu izinto ezihle. (Rom. 13:8-10) Ngokwesibonelo, ukuthanda abalingani bethu kuzokwenza umbhede womtjhado uhlwengeke. Ithando ngabadala, likhambisana nehlonipho ngomsebenzabo, lizosisiza bona silalele begodu sizithobe esinqophisweni sabo. Abantwana abathanda ababelethi babo bayabalalela begodu abakhulumi kumbi ngabo. Nesithanda abantu esikunye nabo, angekhe sibaqale njengabantu abaphasi namtjhana sikhulume nabo ngokudelela. (Jak. 3:9) Abadala abathanda izimvu zakaZimu bazoziphatha ngethando.—IZe. 20:28, 29.
16. Ukutjengisa ithando kuzosisiza njani ekonzwenethu?
16 Ifanelo yethando kufuze godu ivelele ekonzwenethu. Ngebanga lethando elidephileko ngoJehova, ngeze sizivumele sibogabogiswe kungasinaki namtjhana kusabela kumbi kwabaninimuzi abathileko. Kunalokho, sizokuragela phambili sitjhumayela iindaba ezimnandi. Ithando lizosenza silungiselele kuhle begodu sizimisele ukuphumelela ekonzweni. Nesithanda uZimu nabomakhelwana bethu kwamambala, angeze siqale umsebenzi wokutjhumayela ngoMbuso njengomthwalo. Kunalokho, sizowuqala njengelungelo elikhulu begodu sizowenza ngethabo.—Mat. 10:7.
HLALANI NIPHAZIMULISA UJEHOVA
17. Njengombana isono sisikhandela bona sitjengise iphazimulo kaZimu, kufuze senzeni?
17 Iphasi alilemuki bona isono siyinto ekulu kangangani, kodwana thina siyazi. Lokhu kusenza sitjheje itlhogeko yokulwa nokutjhigamela kwesono sethu. Ukutjheja bona sinesono kusenza sibandule isazela sethu esizositjhukumisela bona senze okufaneleko lokha nekuthoma ukwakheka isifiso sokona engqondweni nenhliziyweni yethu. (Rom. 7:22, 23) Kuliqiniso, singaba buthaka, kodwana uZimu angasiqinisa bona senze okulungileko kinanyana ngibuphi ubujamo.—2 Kor. 12:10.
18, 19. (a) Yini esenza sikghone ukuphumelela ekulweni namandla womoya omumbi? (b) Khuyini okufuze sizimisele ukuyenza?
18 Bona siphazimulise uJehova, kufuze silwe namandla womoya omumbi. Isembatho sethu esingokomoya uZimu asiphe sona sisenza sikghone ukwenza lokhu ngokuphumelelako. (Efe. 6:11-13) USathana akalahli itewu emzamwenakhe yokumuka uJehova iphazimulo efanele Yena kwaphela. UDeveli uragela phambili enza iimzamo yokutjhabalalisa ubuhlobo bethu noJehova. Kodwana qala ubuhlungu abuzwako thina neengidi zamanye amadoda, abafazi nabantwana nesibulunga ukuthembeka kwethu kuZimu begodu simphazimulise ngitjho nanyana singakapheleli! Ngalokho, asirageleni phambili sidumisa uJehova, njengembunjwa zezulwini ezababaza: “Ufanele wena Kosi yethu, Zimu wethu, ukwamukela ubukhosi, nedumo, namandla, ngombana nguwe owabumba koke, ngentando yakho wakwenza bona kube khona kuphile.”—ISam. 4:11.
19 Kwanga singazimisela ukuhlala siphazimulisa uJehova, nanyana kungavelani. Uthaba kwamambala ngokobana abantu abanengi abathembekileko benza koke okusemandlenabo ukumlingisa nokutjengisa iphazimulo yakhe. (Iziy. 27:11) Kwanga amazizo wethu angaba njengewakaDavidi, owabhina: “Jehova Zimami, ngiyakudumisa ngayo yoke inhliziyo yami, Ngizoliphakamisa ibizo lakho bekube ngokungapheliko.” (Rha. 86:12) Qala bona sililulukela kangangani ilanga lapho sizokubonakalisa khona ngokupheleleko iphazimulo kaJehova begodu sikghone ukumdumisa ngokungapheliko! Lokhu kuzokuba ngokuhlangazanwe nakho okuthabisako kwabantu abalalelako. Kghani uyayitjengisa iphazimulo kaJehova uZimu nje, unethemba lokwenza njalo ngokungapheliko?
[Iimbuzo Yesifundo]
[Iinthombe ekhasini 27]
Uyamphazimulisa uJehova ngeendlelezi?
