Hlakanipha—Funa “Isinqophiso Esinekghono”

Ukuphila kwamadaniswa nokuthatha ikhambo ngomkhumbi. Nokho, ukuhlakanipha kwabantu kanengi kubonakala kulinganiselwe ekusizeni abantu bona baphumelele ekuphileni. Abanengi baphukelwa mkhumbi esiwuruwurwini samanzi wokuphila. (Rha. 107:23, 27) Kubayini isingathekiswesi sifaneleka?

Ekadeni, ukukhamba elwandle bekusitjhijilo esitlhoga bona ube nokuhlangabezanwe nakho. Bekulikghono ngokujayelekileko ebelifundwa bathayi ngeenkepe esele banesikhathi eside, mhlamunye njengokapteni. (IZe. 27:9-11) Imigwalo eemnengi yekadeni igandelela ukuqakatheka kwendima kakapteni ngokumveza amkhulu kunabanye. Bona bafike lapho baya khona, abakhamba elwandle bekutlhogeka bafunde ngeenkwekwezi, umoya nezinye izinto egade bazozibona endleleni. IBhayibhili ihlathulula abathayi ngeenkepe ‘njengabanekghono’ ibizo elingatjho “ukuhlakanipha.”—Eze. 27:8.

Ukuqalana neemraro yokuphila namhlanjesi kungabonakala kubudisi khulu njengokukhamba elwandle eenkhathini zekadeni. Yini engasisiza?

SINGASIFUMANA NJANI “ISINQOPHISO ESINEKGHONO”?

Sikhumbula isingathekiso sokobana ukuphila kufana nekhambo elwandle, asicabangeleni iqiniso leBhayibhileli: “Umuntu ohlakaniphileko uzokulalela amukele iinqophiso ezingeziweko, nomuntu ozwisisako nguye ozuza isinqophiso esinekghono.” (Iziy. 1:5, 6) Ibizo lesiHebheru elijamele “isinqophiso esinekghono” lingahlathulula izenzo zomlawuli womkhumbi wekadeni. Litjho ikghono lokudosa phambili.

Nanyana kutlhoga umzamo, singasifumana “isinqophiso esinekghono” begodu sifunde “ukuthaya” ngokuphumelelako elwandle elikuphila. Njengombana Iziyema zitjengisa, kufuze sivumele “ukuhlakanipha,” “ukuzwisisa,” ‘nelemuko’ kusebenze ndawonye. (Iziy. 1:2-6; 2:1-9) Begodu ngeze sivilaphele ukufuna isinqophiso sakaZimu ngombana ngitjho nomuntu omumbi angakghona ‘ukunqophisa’ ngeenhloso ezimbi.—Iziy. 12:5.

Ngalokho, kuqakathekile bona sibe bafundi abakhutheleko beLizwi lakaZimu. Ngesifundo esinjalo, singafumana ilwazi eliligugu ngoJehova nangaloyo ombonakalisa ngendlela engcono khulu, uJesu Krestu. (Jwa. 14:9) Sifumana isiluleko esihlakaniphileko emihlanganweni yobuKrestu. Ngaphezu kwalokho, singafunda kokuhlangabezanwe nakho kwabanye, kuhlanganise nokwababelethi bethu.—Iziy. 23:22.

LINDA BEGODU UHLELE

“Isinqophiso esinekghono” siqakatheke ngokukhethekileko nesizifumana emanzini ayalukako ngokomfanekiso. Ukuzaza ngegadango okufuze lithathwe ebujamweni obubudisi kungasilimaza, kube neemphumela ebuhlungu.—Jak. 1:5, 6.

 Kuyakarisa bona amezwi athi “isinqophiso esinekghono” godu aqalisele nepini. Siyafunda: “Ngesinqophiso esinekghono [“ngekambiso enekghono,” The Revised English Bible] uzokulwa ipi yakho, begodu ngobunengi babeluleki kunephuluso.”—Iziy. 20:18; 24:6.

Njengomhleli wepi, senza kuhle ngokucabanga ngezinto ezingaba yingozi engokomoyeni lethu. (Iziy. 22:3) Ngokwesibonelo, kungatlhogeka ukhethe bona uyawamukela na umsebenzi omutjha namtjhana isikhundla emsebenzini. Uzokucabangela umrholo, nesikhathi ozosikhamba uya namtjhana ubuya emsebenzini, nezinye izinto. Nokho, kunamanye amaphuzu okufuze uwakhumbule: Kghani umsebenzi loyo uzokuvumelana neenkambisolawulo zeBhayibhili? Ama-awara engizowasebenza, njengokusebenza amatjhifu ayoyithinta njani iimsebenzi yami yobuKrestu?—Luka 14:28-30.

ULoretta, omunye waboFakazi BakaJehova, bekasebenza kuhle, ekampanini epaka ukudla. Ikampani leyo neyithuthako, uLoretta wathenjiswa isikhundla esiphakemeko endawenetja leyo begodu abaphathi bekampani bathi kuye: “Leli lithuba elingafunyanwa nginanyana ngubani begodu sesifumene nokobana likhona iWolo LoMbuso eduze.” Kodwana uLoretta bekafuna ukwenza ukuphila kwakhe kube lula bona akghone ukukhonza uMbumbi ngokuzeleko. Wabona bonyana umsebenzi omutjha uzomupha isikhathi esincani bona enze iimsebenzi yobuKrestu. Ngalokho wasula emsebenzini, nanyana umphathi wekampani amtjela ngemsitheleni bona bekakuphela kwesisebenzi abangafuni sibalahlekele. ULoretta, sekakhonze iimnyaka engaba ma-20, njengephayona lesikhathi esizeleko, uyaqiniseka bona iimphumela emihle ayifumanako beyihlobene ngokunqophileko nokuhlela kwakhe ‘ngesinqophiso esingekghono,’ ngokuvumelana nesiluleko esifumaneka eLizwini lakaZimu. Waqinisa ubuhlobo bakhe noJehova begodu waba nelungelo lokusiza abanengana bona bamukele iqiniso leBhayibhili.

Ngokuqinisekile, “isinqophiso esinekghono” siyatlhogeka emndenini. Ukukhulisa abantwana msebenzi othatha isikhathi eside begodu ukukhetha okwenziwako eentweni ezingokomoya nezingokwenyama kungaba nomthelela engomusweni lawo woke umndeni. (Iziy. 22:6) Ngokwesibonelo, ababelethi abamaKrestu bangazibuza: ‘Ngeengcoco nangesibonelo sethu, siyabafundisa na abantwabethu iinkambisolawulo ezingokomoya ezizobasiza bona benze ngokuhlakanipha nesele bakhulile? Kghani indlelethu yokuphila iyabasiza bazi indlela yokwaneliseka ngokwenza ukuphila kwabo kube lula nokudzimelela ekonzweni yobuKrestu?’—1 Thi. 6:6-10, 18, 19.

Ipumelelo yamambala ayiquntwa zizinto namtjhana iimnqopho kanengi iphasi elilwela ukuyifikelela. IKosi uSolomoni yakuzwisisa lokhu. Yaphefumulelwa bona itlole: “Kuzobakhambela kuhle labo abesaba uZimu weqiniso, ngombana gade bamsaba.” (Mtj. 8:12) Ngokuqinisekileko, lokho kufakazela bona kukuhlakanipha ukufuna “isinqophiso esinekghono” esisekelwe begodu sivumelane neLizwi lakaZimu.—2 Thi. 3:16, 17.

[Isithombe ekhasini 30]

Ukugandelela indimabo, abokapteni kanengi bebavezwa babakhulu kunabanye abathayi ngeenkepe.

[Umthombo]

Su concessione del Ministero per i Beni e le Attività Culturali. Akukavunyelwa ukwenza umfanekiso wesithombesi ngananyana ngiyiphi indlela.