Bazinikela Ngokuzithandela​—E-Ecuador

UMZALWANA osesemutjha e-Italy bekangaphasi kwegandelelo. Bekasand’ukuqeda esikolweni samabanga aphakamileko aphumelele ngamalengiso eklasini lakhe, begodu kwanje iinhlobo nabotitjhere bakhe bebamkhuthaza bona alwele ukufumana ifundo ephezulu. Nokho, eemnyakeni ethileko ngaphambili, uBruno bekazinikele kuJehova, athembise ukubeka intando kaZimu qangi ekuphileni kwakhe. Wenza siphi isiqunto? Uyahlathulula: “Ngatjela uJehova ngomthandazo bona ngizokuphila ngokuvumelana nokuzinikela kwami begodu ngizombeka qangi. Kodwana ngokuthembeka ngangezelela emthandazwenami bona angikufuni ukuphila okungathabisiko, kodwana ngifuna okumajadujadu okuzele ngeemsebenzi ehlukahlukeneko ekonzwenakhe.”

 Ngemva kweemnyaka embalwa, uBruno waya e-Ecuador, eSewula ye-Amerika. Uthi: “UJehova waphendula iimthandazwami ngaphezu kwalokho ebengikulindele.” Angakalindeli, nekafika e-Ecuador, wahlangana nabanye abanengi abatjha abakhulileko nabo abathuthela lapho bona bakhonze uJehova ngokuzeleko.

ABANTU ABATJHA ‘ABAVIVINYA UJEHOVA’

Njengezinye iinkulungwana zabantu abatjha ephasini mazombe, uBruno wamukela isimemo sakaJehova esithi: “Ngibawa, bona ningivivinye, . . . bonyana angeze na nganivulela amasango weenkhukhula zezulwini begodu eqinisweni ngikghuthulele phezu kwenu isibusiso.” (Mal. 3:10) Zitjhukunyiswa lithando ngoZimu, zakhetha ‘ukuvivinya uJehova’ ngokunikela ngokuzithandela ngesikhathi sazo, amandla, nangezinto zazo eziphathekako bona zisekele iinkareko zabo enarheni lapho kunetlhogeko ekulu yabarhuweleli boMbuso.

Msinyana ngemva kobana iinsebenzi zokuzithandelezi zifika esabelweni sazo esitjha, zazibonela mathupha bona ‘isivuno sikhulu, kodwana iinsebenzi zilibinzana.’ (Mat. 9:37) Isibonelo, uJaqueline ovela eGermany ngetjiseko watlolela igatja le-Ecuador: “Sengikhonze e-Ecuador iimnyaka engaphezudlwana kweembili, begodu sengineemfundo zeBhayibhili ezi-13, ezi-4 zazo ziba khona qobe emihlanganweni. Akuthabisi lokho?” UChantal ovela eCanada uthi: “Ngo-2008, ngathuthela endaweni ye-Ecuador emagega nelwandle lapho bekunebandla elilodwa kwaphela.  Kwanje kunamabandla amathathu namaphayona angaphezu kwama-30 endaweni leyo. Akukho okungamadaniswa nokubona abanengi abatjha bathuthuka!” Uyangezelela: “Ngisand’ukuthuthela edorobheni elimamitha azi-2 743 esiqongolweni se-Andes Mountains. Idorobhelo linabantu abangaphezu kwe-75 000 kodwana kunebandla elilodwa kwaphela. Yisimu ekhiqizako! Ngiyithabela khulu ikonzwami.”

IINTJHIJILO EZIBANDAKANYEKILEKO

Kuliqiniso, ukukhonza kwenye inarha kuneentjhijilo ezikulu. Eqinisweni, abanye abantu abatjha baqalana neenqabo ngitjho nangaphambi kobana bakhambe. UKayla ovela e-United States uthi: “Ukusabela okungasikuhle kwabanye abazalwana abaneemnqopho emihle bebandleni lekhaya bekudanisa. Akhenge bazwisise bona kubayini ngifuna ukukhamba ngiyokuphayona kenye inarha. Ngezinye iinkhathi, kwangenza ngazibuza, ‘Ngenze isiqunto esihle na?’” Ngitjho nanyana kunjalo, uKayla wakhamba. Uyahlathulula: “Ukuthandaza kanengi kuJehova neengcoco ezide nabazalwana nabodade kwangisiza ngabona bonyana uJehova ubusisa umoya wokuzithandela.”

Kwabanengi, ukufunda ilimi elitjha kusiqabo. USiobhan ovela e-Ireland uyakhumbula: “Bekubudisi ngami ukungakghoni ukuveza indlela engizizwa ngayo. Bekufuze ngifunde ukuba nesineke, ngifunde budisi ilimi, begodu ngizihleke nengenza iimtjhapho.” U-Anna ovela e-Estonia uyangezelela: “Ukujayela ubujamo bezulu obutjhisako, ithuli elinengi nokutlhoga amanzi atjhisako wokuhlamba bekungasililitho nekumadaniswa nokufunda iSpanish. Ngezinye iinkhathi, bengizizwa kwanga ngingalahla itewu. Bekufuze ngifunde ukudzimelela etuthukweni yami, ingasi emitjhaphweni yami.”

Isitjhijilo okungakafaneli seqiselwe amehlo kukhumbula ekhaya. UJonathan ovela e-United States uyavuma: “Ngemva kobana ngifikile ngazizwa ngidanile ngebanga lokuhlukana nabangani nomndenami. Kodwana ngahlula amazizo anjalo ngokudzimelela esifundweni sami somuntu mathupha seBhayibhili nekonzweni. Kungasikade, okuhlangabezanwe nakho okuthabisako engaba nakho ekonzweni nabangani abatjha engabenzako ebandleni kwangisiza ngafumana ithabo lami godu.”

Esinye isitjhijilo bujamo bendawo. Pheze, angekhe bafana nalobo ebewubujayele. UBeau ovela eCanada uyasitjela: “Enarheni yekhenu, ungazithatha lula izinto ezifana negezi namanzi wepompi. Kodwana  la, iintwezi ziba khona bese zikhamba nanyana kukunini.” Umtlhago, ukutlhoga izinto zokukhamba ezisebujamweni obuhle, nokungakafundi nakho kuvamile eenarheni ezinengi ezisathuthukako. U-Ines ovela e-Austria uqalana nobujamo obunjalo ngokudzimelela eemfanelweni ezihle zabantu bendawo. Uthi, “Banomoya wokungenisa iinkhambi, umusa, bayasizana begodu bathobekile. Abanengi babo, banekareko ekulu yokufunda okungeziweko ngoZimu.”

“ISIBUSISO BEKUBE KULAPHO UNGASATLHOGI”

Njengombana boke abatjha abakhonza e-Ecuador bazidela, bafumana bona uJehova ubatlhogomela ‘ngezinto eziphezulu khulu’ ebebangakazilindeli. (Efe. 3:20) Kwamambala, bazizwa bafumene ‘isibusiso bekube kulapho bangasatlhogi.’ (Mal. 3:10) Nasi indlela abazizwa ngayo ngekonzwabo:

UBruno: “Ngathoma ikozwami e-Ecuador endaweni ekarisa khulu e-Amazon. Ngemva kwalokho, ngasiza nekukhuliswa i-ofisi legatja e-Ecuador. Kwanje ngikhonza eBethel. Emva e-Italy, ngenza isiqunto sokubeka uJehova qangi, begodu kwamambala uzalisa isifiso sami ngokuphila okuhlukahlukeneko, nokuthabisako ekonzwenakhe.”

UBeau: “Ngatjhidela khudlwana kuJehova ngombana e-Ecuador bengikghona ukunikela ngesikhathi sami soke eentweni ezingokomoya. Ngesikhathi esifanako, ngafumana isibusiso esingeziweko sokukhamba eendaweni ezikarisako—into ebengisolo ngifuna ukuyenza.”

U-Anna: “Bengingacabangi bona kungenzeka ngami, udade ongakatjhadi, ukuthabela ipilo efana neyeenthunywa zevangeli. Kodwana kwanje ngiyazi bona kungenzeka. Ngithokoza isibusiso sakaJehova, ngithabela ukwenza abafundi, ukwakha amaWolo woMbuso, nokwenza abangani abatjha.”

U-Elke: “Enarheni yekhaya e-Austria, kanengi bengithandaza kuJehova bona angiphe isifundo sinye seBhayibhili. La, ngineemfundo zeBhayibhili ezi-15! Ukubona ubuso obuthabileko beemfundo ezithuthukako kunginikela ukwaneliseka okukhulu.”

UJoel: “Kungokuhlangabezanwe nakho okukhulu ukufika endaweni ongayaziko bona ukhonze uJehova. Ufunda ukuthembela kuye ngokungeziweko, begodu kuyathabisa ukubona isibusiso sakhe eemzamwenakho! Eemnyakenami wokuthoma la ngivela e-United States, isiqhema salapho engikhonza khona sande ngabarhuweleli aba-6 ukuya kwaba-21. Egade bakhona eSikhumbuzweni bebali-110.”

KUTHIWANI NGAWE?

Bazalwana nabodade abasesebatjha, ubujamo benu buyanivumela na bona nikhonze enarheni lapho kunetlhogeko ekulu yabarhuweleli boMbuso? Liqiniso, ukwenza isiqunto esikhulu esifana nalesi kuzokutlhoga ukuhlela okuhle. Ngaphezu kwakho koke okhunye, kutlhogeka ithando eliqinileko ngoJehova nangabomakhelwana ukuthatha igadango elinjalo. Nengabe unalo ithando elinjalo begodu ufaneleka, thandaza ngokuthembeka kuJehova ngendaba le yokumkhonza kwenye inarha. Ngaphezu kwalokho, khuluma nababelethi bakho abamaKrestu nabadala bebandla malungana nesifiso sakho. Ungafikelela isiphetho sokobana nawe ungaba nengcenye ehlobweni elithabisako nelanelisakweli ekonzweni ecwengileko.

[Umkhangiso osekhasini 3]

“Ukuthandaza kanengi kuJehova neengcoco ezide nabazalwana nabodade kwangisiza ngabona bonyana uJehova ubusisa umoya wokuzithandela.”—UKayla ovela e-United States

[Ibhoksi/Isithombe ekhasini 6]

Indlela ongazilungiselela ngayo ukukhonza kwenye inarha

• Yiba nemikghwa eqinileko yesifundo somuntu mathupha

• Buyekeza Ikonzwethu YoMbuso ka-Arhostosi 2011, amakhasi 4-6

• Coca nabanye abakhe bakhonza kwenye inarha

• Yenza irhubhululo ngamasiko nangomlando wenarha

• Thatha igadango elisisekelo lokufunda ilimi

[Ibhoksi/Isithombe ekhasini 6]

Abanye abakhonza kwenye inarha bazisekela ngokweemali  . . .

• ngokusebenza iinyanga ezimbalwa qobe mnyaka eenarheni zangekhabo

• ngokuqatjhisa indlu, ifledzi, namtjhana ibhizinisabo

• ngokusebenza basebenzisa i-Internet

[Iinthombe ekhasini 4, 5]

1 UJaqueline ovela eGermany

2 UBruno ovela e-Italy

3 UBeau ovela eCanada

4 USiobhan ovela e-Ireland

5 UJoel ovela e-United States

6 UJonathan ovela e-United States

7 U-Anna ovela e-Estonia

8 U-Elke ovela e-Austria

9 UChantal ovela eCanada

10 U-Ines ovela e-Austria