“Ibhudango Lami Lizalisekile”

Eemnyakeni elitjhumi nahlanu edlulileko, u-Emilia bekaliphayona lesikhathi esizeleko. Nokho, walisa ikonzo yesikhathi esizeleko. Eemnyakeni yamva nje, kanengi bekasolo acabanga ngesikhathi esithabisa khulu ekuphileni kwakhe, begodu bekafuna ukwandisa ikonzwakhe godu.

Nokho, umsebenzi ka-Emilia bewudla isikhathi sakhe esinengi begodu isiqabesi besimqedela ithabo. Ngesinye isikhathi, wanghonghoyila phambi kwabantu egade asebenza nabo, wathi: “Ngifisa ngathana ngingasebenza ama-awara ambalwa!” Umphathi wakhe wakuzwa lokhu, waya kuye wambuza bona kuliqiniso na. U-Emilia wavuma bona kunjalo. Nokho, bona kwenzeke lokho bekuzokutlhogeka abawe imvume kumqophisi ngombana umthetho wekampani bewufuna bona zoke iinsebenzi zayo zizinikele ngokupheleleko. Udadwethu walungiselela ukuyokuhlangana nomnqophisi begodu wathandazela ukuthula nesibindi.

Hlangana nomhlangano loyo, u-Emilia ngokuhlakanipha nangesibindi wabawa ukuphungulelwa ama-awara womsebenzi. Wahlathulula bona usebenzisa isikhathi sakhe angekho ngaso emsebenzini bona asize abanye: “Ngingomunye waboFakazi BakaJehova, begodu ngisiza abantu ngokomoya. Namhlanjesi ukuziphatha kwabantu abanengi kuyabogaboga. Batlhoga iinkambisolawulo ezikhanyako, begodu ukuhlakanipha okuvela eBhayibhilini engikuhlanganyela nabo kuqakatheke khulu kibo. Angifuni bona izinto engizenza ngemva komsebenzi ziphungule izinga engisebenza ngalo la, kodwana ngingathabela ukuba nesikhathi esingeziweko bona ngisize abantu. Kungebangelo ngifuna bona ama-awara engiwasebenzako aphungulwe.”

Umnqophisi wamlalelisisa begodu wathi naye wakhe wawucabangela umsebenzi wokusiza abantu. Ngemva kwalokho wathi: “Ngamabanga owabekileko, ngizizwa kufuze bona ngisamukele isibawo sakho. Kodwana uyalemuka bona uzokurhola imali encani?” U-Emilia wathi uyalemuka begodu wathi nekukghonekako uzokwenza ukuphila kwakhe kube lula. Wangezelela: “Umnqophwami oqakathekileko kukwenza okuthileko okuzokuzuzisa abantu.” Umnqophisi wathi kuye: “Ngiyabahlonipha labo abanikela ngokuzithandela ngesikhathi sabo bona basize abanye.”

Akekho osebenza ekampanini leyo owakhe wasebenza ngaphasi kobujamo obufunwa nguye. U-Emilia kwanje uvunyelwe ukusebenza amalanga amane kwaphela ngeveke. Okwamrara khulu kukobana wakhutjhulelwa umrholo, sekarhola imali elingana neyangaphambilini! Uthi: “Ibhudango lami lizalisekile, begodu ngingaba liphayona lesikhathi esizeleko godu!”

Wakhe wacabanga ngokulungisa ubujamo bakho bona ungenele namtjhana ubuyele godu ekonzweni yobuphayona?

[Umkhangiso osekhasini 32]

Umnqophisi wathi kuye: “Ngiyabahlonipha labo abanikela ngokuzithandela ngesikhathi sabo bona basize abanye”