“Kunomvuzo Emsebenzinenu”

IDOSA phambili amabuthwayo, iKosi u-Asa msinyana itjhinga nawo ngemrhobeni otjhingako ukusuka epakameni yakwaJuda ukuya endaweni emagega nelwandle. Nebafika lapho umrhoba uvuleka khona, u-Asa ujama kancani uphefumulela phezulu. Ngenzasi kunekampa yamanabakhe—begodu yikulu! Kufuze bona amabutho weTopiya lawo bekasigidi sinye—nekabalwako. Kodwana inani lamabutho ka-Asa belisiquntu nelimadaniswa nenani lamabutho weTopiya.

Njengombana izokubambana ngeenhluthu, ngiyiphi into yokuthoma u-Asa ayenzako? Kghani unikela iinkhulu zamabuthwakhe iinqophiso? Ukhuthaza amabuthwakhe? Uthumela iincwadi emndeninakhe? Awa, akusinjalo! Njengombana aqalene nobujamo obubudisobu, u-Asa uyathandaza.

Ngaphambi kobana sibuyekeze umthandazwakhe sihlole nalokho okwenzekako esenzakalwenesi, akhe sicoce ngehlobo lomuntu u-Asa egade angilo. Khuyini eyamenza wenza ngendlela enza ngayo? Bekalindele isizo lakaJehova na? Ukulandisa okumalungana no-Asa kusitjelani ngendlela uJehova abusisa ngayo umsebenzi weenceku Zakhe?

UMLANDO KA-ASA

Eemnyakeni ema-20 eyalandelwa kuhlukana kwama-Israyeli aba mibuso eembili, uJuda wonakaliswa mimikghwa yoburhedeni. U-Asa nekaba yikosi ngo-977 B.C.E., ngitjho nesigodlo sebukhosini besele sisilaphazwe kukhulekelwa kwabosingazimu benzalo beKanana. Kodwana umlando ophefumulelweko wokubusa kwaka-Asa uthi, “wenza okuhle nokulungileko emehlweni kaJehova uZimakhe.” U-Asa “wasusa ama-aldara wabanye abosingazimu neendawo eziphakamileko begodu waphula neensika ezicwengileko waqunta neengodo ezicwengileko.” (2 Mil. 14:2, 3) Godu embusweni wakwaJuda u-Asa wasusa “amadoda afebako etempelini,” alala namanye amadoda ebizweni lekolo. U-Asa akhenge asuse ukukhulekelwa kwamala kwaphela. Kodwana wakhuthaza abantu bona “bafune uJehova uZimu wabokhokho babo” begodu balalele “umthetho nomlayo” kaZimu.—1 Kho. 15:12, 13; 2 Mil. 14:4.

Athatjiswe yitjiseko ka-Asa yokukhulekela kweqiniso, uJehova wamvuza ngeemnyaka yokuthula. Ngalokho ikosi beyingathi: “Simfunile uJehova uZimethu. Simfunile, begodu usiphe ukuphumula koke.” Abantu basebenzisa isikhathi sokuthulesi bona baqinise amadorobha wombuso wakwaJuda. Ukulandisa kweBhayibhili kuthi, ‘baragela phambili nokwakha begodu baba nepumelelo.’—2 Mil. 14:1, 6, 7.

EPINI

Nesiqala umlando ka-Asa, akukafuzi kusirare bona wathandaza nekazokulwa nebutho elikhulu labantu okukhulunywe ngalo emiTlolweni. U-Asa bekazi bona uZimu uvuza izenzo zekholo. Emthandazwenakhe, ikosi yabawa isizo lakaJehova. U-Asa walemuka bona nekathembela kuZimu begodu anesekelo lakhe, akutshwenyi bona likhulu namtjhana linamandla kangangani ibutho lenaba. Ibizo lakaJehova belibandakanyekile epini le, ngalokho u-Asa wabawa uZimu ngesisekelweso. Ikosi yathandaza: “Sisiza Jehova Zimethu, ngombana sithembele kuwe, begodu size ukuzokulwa nesiqubuthwesi ngebizo lakho. Jehova, wena unguZimethu. Ungavumeli umuntu ofako abe namandla wokujamelana nawe.” (2 Mil. 14:11) Lokho bekufana nokuthi: ‘AmaTopiya asahlele wena Jehova. Ungavumeli  ibizo lakho lihlanjalazwe ngokuvumela abantu ababuthakathaka bona bahlule labo abajamele ibizo lakho.’ Ngalokho “uJehova wawahlula amaTopiya phambi kwaka-Asa naphambi kwakaJuda, begodu amaTopiya abaleka.”—2 Mil. 14:12.

Namhlanje, abantu bakaJehova baqalana namanaba amanengi anamandla. Angeze silwe nawo ngeenkhali eziphathekako epini yamambala. Nokho, singaqiniseka bona boke abathembekileko abalwa ipi engokomoya ebizweni lakhe, uJehova uzobavuza ngokuthumba. Izipi esiqalana nazo mathupha zingahlanganisa ukuzimisela bona sijamelane nomoya wokuziphatha oliselelako, silwe nobuthakathaka bethu namtjhana sivikele umndenethu emitheleleni esilapheleko. Nokho, nanyana ngibuphi ubudisi esiqalana nabo, singafumana isikhuthazo emthandazweni ka-Asa. Ukuhlula kwakhe bekutjho ukuhlula kwakaJehova. Kutjengisa nalokho okungalindelwa ngibo boke abathembela kuZimu. Awekho amandla womuntu angajamelana noJehova.

ISIKHUTHAZO NESIYELELISO

Nekabuya epini, u-Asa wahlangabezwa ngu-Azariya. Umporofidi lo wamnikela isikhuthazo nesiyeleliso: “Ngilalelani, Asa nani noke Juda nawe Benjamini! UJehova unani kwaphela nengabe nina niba naye; nengabe niyamfuna, uzozenza afumaneke kini, kodwana nengabe niyamtjhiya uzonitjhiya. . . . Yibani nesibindi begodu ningavumeli izandla zenu ziwe, ngombana kunomvuzo emsebenzinenu.”—2 Mil. 15:1, 2, 7.

Amezwi la angaqinisa ikholo lethu. Atjengisa bona uJehova uzokuba nathi kwaphela nengabe simkhonza ngokuthembeka. Nesililela isizo lakhe, singaqiniseka bona uyasizwa. U-Azariya wathi, “Yibani nesibindi.” Kutlhoga isibindi esikhulu ukwenza okulungileko, kodwana siyazi bona singenza njalo ngesizo lakaJehova.

Ngebanga lokobana ugogo ka-Asa uMahakha wenza “isithombe esithusako esigodweni esicwengileko,” u-Asa waqalana nomsebenzi obudisi wokumsusa esikhundleni sebukhosini ‘njengendlovukazi.’ Wakghona ukuqalana nesitjhijilweso begodu watjhisa isithombe sakhe. (1 Kho. 15:13) U-Asa wabusiswa ngokuzimisela nangokuba nesibindi kwakhe. Nathi kufuze sikakarele ngesibindi kuJehova neenkambiswenilawulo zakhe ezilungileko kungakhathaliseki bona iinhlobo zethu zithembekile kuZimu nofana awa. Nesenza njalo, uJehova uzosivuza ngezenzo zethu zokuthembeka.

Okhunye okwaba mvuzo ku-Asa kubona ama-Israyeli amanengi aziinhlubuki wembusweni wetlhagwini eza kwaJuda nekezwa bona uJehova bekanaye. Akuthabela ukukhulekela okuhlwengileko kangangobana akhetha ukutjhiya imizawo bona ahlale hlangana neenceku zakaJehova. U-Asa nawo woke amaJuda ngokuthaba bangena ‘esivumelwaneni sokufuna uJehova ngayo yoke ihliziyo nangomphefumulo wabo woke.’ Waba yini umphumela? UZimu “wazenza bona bamfumane; begodu uJehova waragela phambili abanikela ukuphumula koke.” (2 Mil. 15:9-15) Qala bona sithaba kangangani abathandi bokulunga nebamukela ukukhulekela kwakaJehova okuhlwengileko!

Nokho, emezwini womporofidi u-Azariya bekunamanye asiyeleliso. Wayelelisa: “Nengabe niyamtjhiya [uJehova] uzonitjhiya.” Kwanga lokho angekhe kwenzeka kithi, ngombana iimphumela ingaba ngebuhlungu! (2 Pit. 2:20-22) ImiTlolo ayitjho bona  kubayini uJehova anikela u-Asa isiyeleliswesi, kodwana ikosi yabhalelwa kusilalela.

“WENZE NGOBUDLHAYELA”

Ekubuseni kwaka-Asa iimnyaka ema-36, iKosi uBhahatjha yakwa-Israyeli yathoma ipi ngokujamelana namaJuda. Mhlamunye bona ivikele abantu bayo bonyana bangathembeli ku-Asa nekukhulekeleni okuhlwengileko, uBhahatjha wathoma ukwakha amaboda aqinileko wedorobha leRama, belimakhilomitha abu-8 etlhagwini yeJerusalema. Kunokobana afune isizo lakaZimu njengombana enza ngaphambilini nekaqalane nokusahlelwa maTopiya, u-Asa wafuna isizo ebantwini. Wathumela isipho ekosini yeSiriya, ayibawa bona isahlele umbuso wakwa-Israyeli wetlhagwini. AmaSiriya nekasahlelako, uBhahatjha wahlehla eRama.—2 Mil. 16:1-5.

UJehova bekangakathabi ngo-Asa begodu wathumela umporofidi uHanani bona amtjele. Alemuka indlela uZimu asebenzelana ngayo namaTopiya, u-Asa bekufuze afunde bonyana ‘amehlo kaJehova abona koke ephasini bona atjengise amandlakhe kilabo iinhliziyo zabo ziphelele kuye.’ Mhlamunye u-Asa wafumana isiluleko esingakalungi nofana khenge acabange bona uBhahatjha namabuthwakhe bangaba yingozi khulu begodu wacabanga nokobana angakghona ukuzibambela mathupha. Kinanyana ngibuphi ubujamo, u-Asa waphendukela ekucabangeni kwabantu begodu wabhalelwa kuthembela kuJehova. UHanani wathi, “Wenze ngobudlhayela malungana nalokhu, ngombana kusukela nje kuragele phambili kuzokuba nezipi ngokujamelene nawe.”—2 Mil. 16:7-9.

U-Asa wasabela kumbi. Asilingekile, wafaka umporofidi uHanani ngejele. (2 Mil. 16:10) Kungenzeka bona u-Asa wacabanga, ‘Ngitlhoga ukulungiswa ngemva kobana ngithembeke iimnyaka eemnengi?’ Kwanje njengombana akhulile, kghani walahlekelwa ngamanye wamandlakhe wokucabanga? IBhayibhili alitjho.

Eemnyakeni ema-39 yokubusa kwakhe, u-Asa wagula khulu waphathwa bulwelwe beenyawo. Ukulandisa kuthi, “Ngitjho nekuguleni kwakhe akhenge afune uJehova kodwana wafuna abapholisako.” Ngesikhatheso, bekubonakala kwanga u-Asa bekangalitjheji ingokomoya lakhe. Asebujamwenobo begodu asacabanga ngendlela efanako, wahlongakala eemnyakeni ema-41 yokubusa kwakhe.—2 Mil. 16:12-14.

Nanyana kunjalo, iimfanelo zaka-Asa ezihle netjiseko yokukhulekela okuhlwengileko kubonakala kudlula kude imitjhaphwakhe. Akhenge alise ukukhonza uJehova. (1 Kho. 15:14) Alo ngokwalokhu, umlando wokuphila kwakhe ungasifundisani? Ungasisiza silemuke bona kufuze sitjheje indlela uJehova asisiza ngayo esikhathini esidlulileko, ngombana imikhumbulo eligugu enjalo ingasenza sithandazele isizo lakhe nesiqalana neenlingo ezitja. Nokho, akukafuzi sicabange bona asisitlhogi isiluleko esingokomTlolo sithi ngombana sesikhonze uZimu iimnyaka eemnengi ngokuthembeka. Naphezu komlandwethu, uJehova uzosilungisa nasenze umtjhapho. Kufuze samukele ukulungiswa okunjalo ngomusa ukwenzela bona sizuze kikho. Okuqakatheke kunakho koke, uBabethu wezulwini uzokuba nathi kwaphela nesitjengisa bona sinaye. Amehlo kaJehova ahlola ephasini loke kilabo abenza ngokuthembeka kuye. Ubavuza ngokubanikela amandlakhe. UJehova wakwenza ku-Asa, angakwenza nakithi.

[Umkhangiso osekhasini 9]

UJehova uyabavuza abathembekileko abalwa ipi engokomoya

[Umkhangiso osekhasini 10]

Isibindi siyatlhogeka bona wenze okulungileko emehlweni kaJehova