Ragelani Phambili NjengeZakhamuzi ZomBuso!

‘Niphile niziphathe ngendlela efanele iindaba ezimnandi.’—FIL. 1:27.

UNGAPHENDULA NJANI?

Bobani abangaba zizakhamuzi zomBuso?

Khuyini okufuze sikwenze malungana nelimi, umlando, nemithetho yomBuso?

Izakhamuzi zomBuso zitjengisa njani bona ziyayithanda imithethokambiso kaZimu?

1, 2. Kubayini isiluleko sakaPowula esiya ebandleni leFilipi siqakatheke ngokukhethekileko?

UMPOSTOLI uPowula wakhuthaza ibandla leFilipi bona ‘liziphathe ngendlela efanele iindaba ezimnandi.’ (Funda KwebeFilipi 1:27.) Ikulumo yesiGirigi eyasetjenziswa nguPowula ngebizo elithi “niziphathe” godu ingabekwa nangokuthi “ragelani phambili njengezakhamuzi.” Amezwi la bekaqakathe ngokukhethekileko ebandleni leFilipi. Kubayini bekunjalo? Ngombana kubonakala kwanga iFilipi bekungesinye isiqhema samadorobha akhethiweko lapho izakhamuzi zakhona bezifumene imvumo yokuba zizakhamuzi zeRoma. Izakhamuzi zeRoma eFilipi nakuwo woke umBuso weRoma bezizikhakhazisa ngobujamo bazo begodu bezithabela ivikeleko elikhethekileko ngaphasi komthetho weRoma.

² Amalunga webandla leFilipi bekanebanga elingcono lokuzikhakhazisa. UPowula wawakhumbuza bona njengamaKrestu azesiweko azizakhamuzi ‘zezulwini.’ (Fil. 3:20) Bekazizakhamuzi zomBuso kaZimu ingasi zombuso wabantu. Ngalokho, bewathabela iinzuzo nevikeleko engekhe lamadaniswa nalitho.—Efe. 2:19-22.

3. (a) Bobani abanelungelo lokuba zizakhamuzi zomBuso? (b) Khuyini esizoyicabangela esihlokwenesi?

³ Isiluleko sakaPowula ‘sokuragela phambili njengezakhamuzi’ ngokuyihloko sisebenza kilabo abayokubusa noKrestu ezulwini. (Fil. 3:20) Kodwana ngokunabileko, singasebenza nakilabo abazokuba zizakhamuzi zomBuso kaZimu ephasini. Kubayini? Ngombana woke amaKrestu azinikeleko akhonza iKosi yinye, uJehova, begodu kufuze aphile ngeemthethokambiso efanako. (Efe. 4:4-6) Namhlanjesi, abantu basebenza budisi bona bafanelekele ukuba zizakhamuzi zenarha enothileko. Qala bona kufuze siliqale njengeliyigugu kangangani ithuba lokuba zizakhamuzi zomBuso! Bona sidephise ukuthokoza kwethu ngelungelwelo, akhe siqale okhunye ukufana okukhona  hlangana neemfuneko zokuba zizakhamuzi zombuso wabantu nezakhamuzi zomBuso kaZimu. Sizokuhlolisisa izinto eentathu ekufuze sizenze nengabe sisafuna ukubulunga ilungelo lokuba zizakhamuzi zomBuso.

IIMFUNEKO ZOKUBA SISAKHAMUZI

4. Liyini ilimi elihlwengileko, begodu ‘silikhuluma’ njani?

⁴ Funda ilimi. Abanye aborhulumende babantu bafuna bona labo abafuna imvumo yokuba zizakhamuzi bakhulume ilimi lenarha leyo. Ngitjho nangemva kokufumana imvumo yokuba sisakhamuzi, kungathatha isikhathi eside bona abantu balazi kuhle ilimi elitjha. Bangayifunda msinyana imithetho yelimi, kodwana kungathatha isikhathi ukwazi ukubiza kuhle amagama. Ngokufanako, umBuso kaZimu ufuna bona izakhamuzi zawo zazi lokho iBhayibhili ekubiza ngokobana ‘lilimi elihlwengileko.’ (Funda UZefaniya 3:9.) Liyini ilimelo? Liqiniso ngoZimu nangeminqophwakhe njengombana ifumaneka eBhayibhilini. “Sikhuluma” ilimi elihlwengileko nengabe ukuziphatha kwethu kuvumelana nemithetho neenkambisolawulo zakaZimu. Izakhamuzi zomBuso kaZimu zingazifunda msinyana iimfundiso zeBhayibhili ezisisekelo begodu zibhabhadiswe. Ngitjho nangemva kokubhabhadiswa kwazo, kufuze zilwele ‘ukukhuluma’ ilimi elihlwengileko ngcono njengombana isikhathi sikhamba. Ngayiphi indlela? Omunye nomunye wethu kufuze avale isikhala hlangana nalokho akwaziko ngeenkambisolawulo zeBhayibhili nalokho akwenzako.

5. Kubayini kufuze sifunde koke esingafunda ngomlando wehlangano kaJehova?

⁵ Funda umlando. Umuntu ofuna ukuba sisakhamuzi sakarhulumende wabantu kufuze afunde okuthileko ngomlando wakarhulumende loyo. Ngokufanako, labo abafuna ukuba zizakhamuzi zomBuso benza kuhle ngokufunda koke abangakufunda ngomBuso kaZimu. Cabangela isibonelo esabekwa madodana kaKora egade akhonza kwa-Israyeli wekadeni. Bekakuthabela kwamambala ukuba seJerusalema nendaweni yalo ekukhulekelwa kiyo nokulandisa ngomlando wedorobheli. Bekungasi mamatje nedaka ekwakhiwe ngalo egade kubakara khulu kodwana gade kungilokho okujanyelwe lidorobha nendawo leyo yokukhulekela. IJerusalema ‘bekumumuzi weKosi ekulu,’ uJehova, ngombana beliyikaba yokukhulekela okuhlwengileko. Bekukulapho umThetho kaJehova bewufundiswa khona. Bekusebantwini egade babuswa yiKosi yeJerusalema lapho uJehova atjengisa khona umusakhe wethando. (Funda IRhalani 48:1, 2, 9, 12, 13.) Njengawo, uyakululukela na ukufunda nokulandisa ngomlando wengcenye yehlangano kaJehova yephasini? Newufunda ngehlangano kaZimu ngokungeziweko nendlela uJehova asekela ngayo abantu bakhe, kulapho umBuso kaZimu uzokuba ngewamambala kuwe. Isifiso  sakho sokutjhumayela iindaba ezimnandi zomBuso sizokukhula ngokuzenzakalelako.—Jer. 9:24; Luka 4:43.

6. Kubayini kunengqondo bona uJehova ufuna sifunde begodu silalele imithetho neenkambisolawulo zomBuso?

⁶ Yazi imithetho. Aborhulumende babantu bafuna bona izakhamuzi zawo zifunde begodu zilalele umthetho wenarha. Kubonakala kunengqondo bona uJehova alindele bonyana sifunde begodu silalele imithetho neenkambisolawulo ezilawula zoke izakhamuzi zomBuso. (Isa. 2:3; Jwa. 15:10; 1 Jwa. 5:3) Imithetho yabantu kanengi ineemphoso kungenzeka nokobana iyabandlulula. Ngokuphambene nalokho, ‘umthetho kaJehova uphelele.’ (Rha. 19:7, NW.) Siyawuthabela na umthetho kaZimu begodu sifunde iLizwi lakhe qobe langa? (Rha. 1:1, 2) Okukuphela kwendlela esingafunda ngayo umthetho kaZimu kukuwutaditjha ngokwethu. Akunamuntu ongasenzela lokhu.

IZAKHAMUZI ZOMBUSO ZIYAYITHANDA IMITHETHOKAMBISO KAZIMU

7. Izakhamuzi zomBuso ziphila ngamiphi imithethokambiso ephakemeko?

⁷ Nesifuna ukuhlala sizizakhamuzi zomBuso, kutlhogeka okungaphezu kokwazi imithethokambiso kaZimu kodwana kufuze siyithande godu. Izakhamuzi ezinengi zaborhulumende zithi ziyavumelana nemithetho nemithethokambiso yenarha ezihlala kiyo. Nokho, nezifumana bona ifuneko ethileko ayisibulula begodu zibona bonyana akunamuntu oziqalileko, ziyawuphula umthetho. Kanengi, abantwaba ‘[bathabisa] abantu.’ (Khol. 3:22) Izakhamuzi zomBuso ziphila ngemithethokambiso ephakemeko. Siyilalela ngokuzithandela imithetho kaZimu, ngitjho nanyana kunganamuntu osibonako. Kubayini? Ngombana siyamthanda uMenzi womthetho.—Isa. 33:22; funda uLuka 10:27.

8, 9. Ungazi njani bona uyithanda kwamambala imithetho kaZimu?

⁸ Ungazi njani bona uyithanda kwamambala imithetho kaZimu? Hlolisisa indlela osabela ngayo newufumana isiluleko ngalokho ocabanga bona siqunto somuntu mathupha—ngokwesibonelo, endabeni yokumbatha nokuzilungisa. Ngaphambi kobana ube sisakhamuzi somBuso, kungenzeka bewumbatha budlabha namtjhana ngendlela evusa ikanuko. Njengombana ithando lakho ngoZimu likhula, wafunda ukumbatha ngendlela emdumisako. (1 Thi. 2:9, 10; 1 Pit. 3:3, 4) Kungenzeka nje ucabanga bona umbatha ngesizotha. Kodwana kuthiwani nengabe umdala ukutjela bona indlela ombatha ngayo ikhuba abarhuweleli abathileko abambalwa ebandleni? Ungasabela njani? Uzozivikela, ukwate namtjhana ube nekani? Isisekelo somthetho womBuso kaZimu kukobana zoke izakhamuzi zilingise uKrestu. (1 Pit. 2:21) Malungana nesibonelo sakaJesu, umpostoli uPowula watlola wathi: “Ngiloyo naloyo akenze okuthokozisa umakhelwane wakhe, kube lisizo kuye, akheke ekukholweni. Ngombana noKrestu akakenzi okuthokozisa yena kwaphela.” (Rom. 15:2, 3) Bona kube nokuthula ebandleni, umKrestu ovuthiweko uzimisele ukuzithoba ngaphandle kokukhuba izazelo zabanye.—Rom. 14:19-21.

⁹ Cabangela izinto eembili ezingeziweko eziqakatheke khulu: ubujamo bethu bomkhumbulo ngomseme nombonwethu ngomtjhado. Labo abangakabi zizakhamuzi zomBuso kaZimu kungenzeka bayakuvumela ukuthandana kwabantu bobulili obufanako, baqala iinthombe zomseme ezisilapheleko njengento yokuzithabisa engasiyingozi begodu bacabanga bona ukuphinga nokutlhala ziindaba zomuntu mathupha. Izakhamuzi zomBuso zikulahlile ukucabanga okumarhamaru nokufiphelekokhu. Nanyana amaKrestu amanengi bewangaziphathi kuhle ngaphambilini, nje aqala ubuhlobo bomseme nomtjhado njengezipho ezivela kuZimu. Ayiqala njengeyigugu imithethokambiso kaJehova ephakemeko begodu avuma ngehliziyo epheleleko bona labo abaragela phambili baziphatha kumbi ngokomseme abakufanelekeli  ukuba zizakhamuzi zomBuso. (1 Kor. 6:9-11) Nokho, godu bayatjheja bona ihliziyo iyakhohlisa. (Jer. 17:9) Ngalokho bayakuthabela ukufumana iinyeleliso ezinqophileko ezibasiza bona babulunge imithethokambiso yokuziphatha ephakemeko.

IZAKHAMUZI ZOMBUSO ZIYAZITHABELA IINYELELISO

10, 11. Ngiziphi iinyeleliso ezifike ngesikhathi ezikhutjhwa mBuso kaZimu, begodu uzizwa njani ngeenyeleliswezo?

¹⁰ Aborhulumende babantu banganikela iinyeleliso ezingokwepilo malungana nokudla neenhlahla zokusela. Liqiniso, akusikho koke ukudla neenhlahla eziyingozi. Kodwana nengabe umkhiqizo othileko uyingozi, urhulumende angakhupha iinyeleliso ezifaneleko ukuvikela izakhamuzi zawo. Nengabe urhulumende akhenge akwenze lokho, uzokuba nomlandu wokungatjheji. Ngokufanako, umBuso kaZimu ukhupha iinyeleliso ezifike ngesikhathi malungana neengozi ezithileko zokuziphatha nezingokomoya. Ngokwesibonelo, i-Internet sele kuyindlela elisizo yokukhulumisana, ukufundisa nokuzithabisa. Ihlangano kaZimu iyayisebenzisa i-Internet begodu yenza umsebenzi omnengi omuhle ngayo. Nokho, amanye ama-Web site ku-Internet ayingozi ngokuziphatha nangokomoya. Ama-Web site athuthukisa iinthombe zomseme ezisilapheleko, abangela ingozi engakafihleki epilweni engokomoya yezakhamuzi zomBuso. Sele kumatjhumi weemnyaka isigaba senceku ethembekileko sisiyelelisa ngama-Web site anjalo. Qala bona sithokoza kangangani ngeenyeleliso zepilo engokomoya ezinjalo!

¹¹ Eemnyakeni yamva nje, kunenye i-Web site esele ithandwa khulu—leyo engaba lisizo nengabe isetjenziswa ngokukhulu ukutjheja. Kodwana ama-Web site abizwa ngokobana lithungelelwano lezokuthintana la (social networking Web sites), godu angaba yingozi. Angabangela umuntu bona azihlanganise nabantu abangakalungi. (1 Kor. 15:33) Kungebangelo ihlangano kaZimu ikhuphe iinyeleliso ezifaneleko malungana nokusebenzisa ama-Web site anjalo. Sele uzifundile iinhloko zamva ezigadangiswe yinceku ethembekileko ezimalungana nokusebenzisa ithungelelwano lezokuthintana? Qala bona kuzokuba budlhayela kangangani ukusebenzisa ama-Web site anjalo ungakafundi ukwazisokho! * Kuzokufana nokusela isihlahla esibukhali ungakafundi isiyeleliso esitlolwe ngaphandle kwebhodlelo.

12. Kubayini kubudlhayela ukungazitjheji iinyeleliso?

¹² Labo abangazitjhejiko iinyeleliso ezikhutjhwa yinceku ethembekileko bazilimaza bona nabantu ababathandako ngabomu. Abanye sebamakghoba wokubukela iinthombe ezisilapheleko namtjhana bawele ekuziphatheni okumbi begodu bazikhohlisa ngokwabo ngokucabanga bona uJehova angeze abona abakwenzako. Qala bona kubudlhayela kangangani ukukholelwa bonyana singafihla izenzo zethu kuJehova! (Iziy. 15:3; funda kumaHebheru 4:13.) UZimu ufuna ukusiza abantu abanjalo begodu usebenzisa abajameli bakhe bephasini bona balinge ukubasiza. (Gal. 6:1) Nokho, njengombana naborhulumende babantu bangathathela umuntu owenze izinto ezithileko ezingakalungi ilungelo lokuba sisakhamuzi, uJehova uzokuthathela labo abaphula imithethokambiswakhe ngokungatjhugulukiko ilungelo lokuba zizakhamuzi. * (1 Kor. 5:11-13) Nanyana kunjalo,  unesirhawu. Labo abazisolako batjhuguluke endlelanabo yokuziphatha bangaba nobuhlobo obuhle godu noJehova bahlale bazizakhamuzi zomBuso. (2 Kor. 2:5-8) Qala bona kulilungelo elingangani esinalo lokukhonza iKosi enethando le!

IZAKHAMUZI ZOMBUSO ZIYITHATHA NJENGELIGUGU IFUNDO

13. Izakhamuzi zomBuso zitjengisa njani bona ziqala ifundo njengeqakathekileko?

¹³ Aborhulumende babantu abanengi basebenza budisi ukufundisa izakhamuzi zabo. Bahlela iinkolo ezithuthukisa ifundo nokufundisa amakghono womsebenzi ngendlela esebenzako. Izakhamuzi zomBuso ziyazithabela iinkolo zomphakathezi begodu zizimisele ukufunda, ukutlola nokuzisekela ngokweemali. Ziyiqala njengeqakatheke khulu ifundiso eziyifumana njengezakhamuzi zomBuso zakaZimu. Ngebandla lobuKrestu, uJehova uthuthukisa ifundo. Ababelethi bakhuthazwa bona bafundele abantwababo. Qobe nyanga, inceku ethembekileko igadangisa amakhasi amanengi asekelwe eBhayibhilini ISithalasokulinda ne-Phaphama! Newufunda amakhasi ambalwa ilanga ngalinye ngenyanga, uzobe ukhambisana nomzila oqakathekileko lo wefundo yomBuso.

14. (a) Ngiliphi ibandulo esilifumanako? (b) Ngiziphi iimphakamiso zokuKhulekela komNdeni othabele ukuzisebenzisa?

¹⁴ Qobe veke, izakhamuzi zomBuso zifumana ibandulo emihlanganweni yazo yebandla. Ngokwesibonelo, Isikolo Sekonzo Sezulwini sineemnyaka engaphezu kwelitjhumi nesithandathu sisiza abafundi bona babe bafundisi abaphumelelako beLizwi lakaZimu. Ubhalisile esikolwenesi? Eemnyakeni yamva inceku ethembekileko ikhuthaze bona kube nokuKhulekela komNdeni kwaqobe veke. Ilungiselelweli liqinisa ubunye bomndeni. Wakhe wazisebenzisa iimphakamiso ezigadangiswe eencwadini zethu? *

15. Ngiliphi ilungelo elikhulu esinalo?

¹⁵ Izakhamuzi zaborhulumende babantu zizokusekela tjhatjhalazi ijima leengcenye zepolotiki, zingene ngitjho umuzi nomuzi bona zenze njalo. Ngezinga elikhulu, izakhamuzi zomBuso ngetjiseko zisekela umBuso kaZimu kokubili endleleni nemzini nomuzi. Eqinisweni, njengombana kukhulunywe esihlokweni esifundwako esigadungileko, ISithalasokulinda, esazisa ngomBuso kaJehova, kwanje mumagazini orhatjhwa ngokunabileko ephasini! Ilungelo elikhulu esinalo ngelokutjela abanye ngomBuso kaZimu. Uhlanganyela ngetjiseko emsebenzini wokutjhumayela?—Mat. 28:19, 20.

16. Ungatjengisa njani bona usisakhamuzi esilungileko somBuso kaZimu?

¹⁶ Msinyana umBuso kaZimu uzokuba kuphela kwakarhulumende ozokubusa iphasi. Uzokutlhogomela zoke iingcenye zokuphila zaqobe langa, ingasi ezingokomoya kwaphela kodwana nezingokwenyama. Kghani uzokuba sisakhamuzi esilungileko somBuso kaZimu ngesikhatheso? Kwanje sikhathi sokutjengisa bona uzokuba ngiso. Kizo zoke iinqunto ozenza qobe langa, yenzela zoke izinto iphazimulo kaJehova begodu ngalokho uzozibonakalisa usisakhamuzi esilungileko somBuso kaZimu.—1 Kor. 10:31.

[Imitlolo yaphasi]

[Iimbuzo Yesifundo]

[Umkhangiso osekhasini 14]

Uyazilalela iinyeleliso ezisekelwe eBhayibhilini ezimalungana ne-Internet?

[Isithombe ekhasini 12]

Njengamadodana kaKora, uyalifumana ithabo ekukhulekeleni okuhlwengileko nomlando wakho?

[Isithombe ekhasini 15]

UkuKhulekela komNdeni kungakusiza khulu wena nabathandekako bakho bona nibe zizakhamuzi zomBuso ezilungileko