1. (a) Iinceku zakaZimu bezazini ngokubandula, begodu kuqakatheke ngani namhlanjesi? (b) Sizabe siphethe yiphi-ke esihlokwenesi?

ABANTU bakaZimu bazi kuhle ukuthi ukubandula kuletha ipumelelo. Ngokwesibonelo, u-Abramu wabuthelela “amadoda abanduliweko angaphasi kwakhe,” alwa asindisa uLoti. (Genesisi 14:14-16, NW) Ababhini beKosi uDavida “bebabandulelwe” ukukhalela iingoma ezidumisa uJehova. (1 IinKronike 25:7) Nathi namhlanjesi sibambene itjhumi lezandla phezulu noSathana nephasi lakhe. (Efesu 6:11-13) Ngapha kusafuze sidumise uJehova ngokutjhumayela ngebizo lakhe. (Hebheru 13:15, 16) Yeke kumele sibandulwe nesizakuphumelela njengeenceku zakhe zakade. Ngikho uJehova awutjathe phezu kwabadala bebandla umthwalo wokubandula abanye. (2 Thimothi 2:2) Kodwana abadala bangasebenzisa ziphi iindlela zokubandula abazalwana bona bakghone ukutlhogomela abantu bakaJehova?

2. Ngaphambi kobana afundise umzalwana izinto ezitja, umdala kufuze enzeni? Kubayini kufuze ayenze into leyo?

² Umdala ufana nomlimi. Ngaphambi kobana atjale,  umlimi kufuze afake umsuqwa ehlabathini khona iintjalo zizokukhula zibe zihle. Nomdala wenza soneso. Ngaphambi kobana afundise umzalwana amakghono amatjha, kufuze asebenzise iBhayibheli njengomsuqwa. Lokho kuvundisa ihliziywakhe ilungele lokho umdala azomfundisa khona.—1 Thimothi 4:6.

3. (a) Umdala angawasebenzisa njani amezwi kaJesu akuMarkosi 12:29, 30 emzalwaneni ambandulako? (b) Umthandazo womdala ungaba njani mthelela kumzalwana obandulwako?

³ Kuqakatheke khulu ukuzwisisa bona iqiniso lenzani endleleni umuntu acabanga nazizwa ngayo. Nawuzakuzwisisa lokho, kufuze umbuze umzalwana bona ukuzinikela kwakhe kuJehova kwenzani eenquntweni azenzako epilwenakhe. Umbuzo lo unganenza nicoce ngokuthi umuntu angamsebenzela njani uJehova ngehliziywakhe yoke. (Funda uMarkosi 12:29, 30.) Kungaba njani nawungathandaza naye umzalwana lo, ubawe uJehova amnikele umoya ocwengileko khona azakubanduleka? Cabanga ukuthi umzalwana lo angazizwa njani nakakuzwa umthandazela ngalendlela. Angahlohlozeleka bona athuthukise izinto azenzela uJehova.

4. (a) Akhuze nendaba eseBhayibhelini engabasela umzalwana bona athuthuke. (b) Abadala kufuze babe namuphi umgomo nababandula abanye?

⁴ Nawuthoma ukubandula umzalwana, kuhle bona ukhethe abantu ongacoca ngabo naye abaseBhayibhelini. Mfundise ukuqakatheka kokuba lisizo, kokukhuthala nokuthobeka. (1 AmaKhosi 19:19-21; Nerhemiya 7:2; 13:13; IzEnzo 18:24-26) Ubuntobu buqakatheke njengomsuqwa ehlabathini. Buyamkhulisa umzalwana, bumenze athuthuke msinya. UJean-Claude, umdala kwelinye ibandla eFrance, uthi umgomakhe bekukubandula umzalwana bona nakenza iinqunto azisekele ekambisweni yeBhayibheli. Nakanabako uthi: “Bengifuna amathuba wokufunda naye iBhayibheli ‘ngimvule amehlo,’ khona azokubona ‘izinto ezikarisako’ eziseliZwini lakaZimu.” (IRhubo 119:18) Kghani kunezinye iindlela zokubandula umzalwana? Nazikhona ngiziphi?

5. (a) Kubayini kuqakathekile bona ukhulume ngemigomo yomsebenzi kaZimu nomzalwana ombandulako? (b) Kubayini abadala kufuze baligobe lisesemanzi? (Qala umtlolo ongenzasi.)

⁵ Akhewubuze umzalwana ombandulako  lo bona yini afuna ukuyenza emsebenzini kaJehova. Nengabe akazi bona angenzani, msize azibekele imigomo angakghona ukuyifikelela. Nawe ube nomdlandla newumtjela ngemigomo owazibekela yona, nokuthi wazizwa njani newuyifikelelako. Ukufundisa njalo kubulula begodu kuyakha. UVictor umdala oliphayona e-Afrika uthi: “Nangisakhulako, omunye umdala wangibuza ukuthi ngimiphi imigomo engizibekele yona. Imibuzo angibuza yona yangisiza ngawudlela amathambo wengqondo umsebenzi kaZimu.” Abanye abadala ababomakadabona bathi kuqakathekile ukubandula umzalwana asesemutjha, ngombana ligotjwa lisesemanzi. Yeke abadala bangamabela umsebenzi omlingeneko ebandleni. Nawungamthoma asakhula, uzokudzimelela emgomenakhe ngitjho nanyana ahlangabezana nemiraro yokukhula.—Funda iRhubo 71:5, 17. * (Qala umtlolo ongenzasi.)

6. Ngiyiphi indlela eqakathekileko esetjenziswe nguJesu nakabandula abafundi bakhe?

⁶ Nawukhuthaza umzalwana bona abe mdala namkha inceku ekhonzako, ungamtjeli lokho okufuze akwenze kwaphela. Kunalokho mtjele nokuthi kubayini kufuze akwenze. UMfundisi oMkhulu  uJesu watjela abafundi bakhe bona bakhambe bayokutjhumayela. Kodwana wathoma ngokubatjela ukuthi kubayini kufuze bakwenze lokho. Wathi: “Nginikelwe woke amandla ezulwini nephasini. Ngalokho khambani niye ebantwini boke nanyana kukuphi, nibenze abafundi.” (Matewu 28:18, 19) Manje, wena ungamlingisa njani uJesu endabeni le?

7, 8. (a) Abadala bangamlingisa njani uJesu nababandula abanye? (b) Kuqakatheke kangangani ukuthokoza umzalwana ombandulako? (c) Ngiziphi ezinye iindlela abadala abangabandula ngazo abanye? (Qala ibhoksi elithi “ Iindlela Zokubandula Abanye.”)

⁷ Nawubawa umzalwana bona enze umsebenzi othileko ebandleni, mvulele iBhayibheli umhlathululele bona kubayini umsebenzi loyo uqakathekile. Nawenza njalo umfundisa ukuthi izinto azenziwa ngoba kutjho umthetho wehlangano, kodwana zenziwa ngombana ziyikambiso yeBhayibheli. Ngokwesibonelo, nangabe ubawa umzalwana ahlwengise icabazi leWolo khona kungazukuba yingozi ebantwini abangenako, mvulele umtlolo onjengoTitosi 2:10. Mhlathululele bona umsebenzi awenzako lo udosa abantu esibatjhumayezako. Mbuze nangokuthi abantu abalupheleko bazokusizakala njani nakenza njalo. Nawucoca naye ngalendlela, umbandulela ukuthi acabange ngokutlhogomela abantu kunokucabanga ngemithetho yebandla. Uzozizwa kamnandi ngokwazi ukuthi into ayenzako leyo isiza abazalwana nabodade ebandleni.

⁸ Ungalibali ukumthokoza nakenza ngokuya ngokwalokho okutjhwileko. Kuqakatheke kangangani ukwenza njalo? Njengombana isitjalo sitlhoga ukuniselwa khona sizokukhula kuhle, ukuthokoza umzalwana ombandulako kunisela ituthukwakhe yokusebenzela uJehova.—Madanisa noMatewu 3:17.

9. (a) Kubayini kubudisi ngabadala ukubandula abazalwana eenarheni ezinothileko? (b) Kubayini ukusebenzela uZimu kuyinto inengi labazalwana abatjha abangayithandi?

⁹ Abadala abahlala eenarheni ezinothileko bakufumana kubudisi ukubandula abazalwana abaneminyaka ehlangana kwaka-20 no-30. Abanye babadala abahlala eenarheni ezingaba yi-20, basitjele ukuthi abazalwana abasesebatjha abafuni ukusebenza ebandleni. Inengi labo lithi ababelethi babazalwanaba akhenge babakhuthaza basesebancani bona bazibekele imigomo yokusebenzela uJehova. Ngitjho nanyana abanye abazalwana bafuna ukuthuthuka, ababelethi bathi abakhambe bayokufunda emayunivesithi khona bazakuphila kuhle ephasineli! Yeke ukusebenzela uZimu akusiyinto eza qangi epilwenabo.—Matewu 10:24.

10, 11. (a) Umdala angamsiza njani umzalwana kabuthaka bona atjhugulule umkhumbulwakhe? (b) Ngimiphi imitlolo umdala angakhuthaza ngayo umzalwana, begodu kubayini kufuze ayisebenzise? (Qala umtlolo ongenzasi.)

¹⁰ Kuzokuba budisi nangabe umzalwana akanandaba nokusebenzela uZimu ebandleni. Abadala bazokufukuza nekufuze bambandule, batjhugulule nomkhumbulwakhe. Phela umlimi usikhulisa kabuthaka isitjalo bona sithi nasikhulako sitjhinge phezulu kuhle. Nabadala-ke kufuze bamsize kabuthaka umzalwana, bamtjengise bona kufuze atjhugulule umkhumbulwakhe amukele izabelo ebandleni. Kodwana bakwenza njani lokho?

¹¹ Thatha isikhathi sakho wakhe isikhozi nomzalwana ofuna ukumbandula. Mtjele ukuthi ibandla liyamtlhoga. Kuzakuthi nekukhamba isikhathi, uhlale  naye phasi-ke kube kukhani umvulela iBhayibheli, umsize acabangisise ngokuzinikela kwakhe kuJehova. (UMtjhumayeli 5:4; Isaya 6:8; Matewu 6:24, 33; Lukasi 9:57-62; 1 Korinte 15:58; 2 Korinte 5:15; 13:5) Mbuze imibuzo embetha emanonini enjengokuthi: ‘Wathini kuJehova newuzinikela kuye? Wathi ufuna enzeni ngepilwakho? Ucabanga bona uJehova wazizwa njani newubhajadiswako?’ (IzAga 27:11) USathana yena wazizwa njani? (1 Pitrosi 5:8) Imitlolo enjengale ingahlaba iphukele ehliziywenakhe.—Funda amaHebheru 4:12. * (Qala umtlolo ongenzasi.)

12, 13. (a) U-Elitjha waba mumuntu onjani njengombana bekabandulwa nje? (b) UJehova wamvuza njani u-Elitjha ngokuthembeka kwakhe?

¹² Nina bazalwana abasese batjha ibandla liyanitlhoga! Kodwana kufuze nibe babantu abanjani nanizakuphumelela ekusebenzeleni uJehova? Ipendulo yombuzo lo itholakala komunye naye ebekamfundi, u-Elitjha.

¹³ Eminyakeni engaba yi-3 000 eyadlulako, umphorofidi u-Eliya wabiza u-Elitjha bona azomsiza. U-Elitjha wavumela phezulu, bewathembeka ekwenzeni umsebenzi ophasi wokuba mphorofidi. (2 AmaKhosi 3:11) U-Eliya kwamthatha iminyaka engaba sithandathu bona abandule u-Elitjha. Kwathi bona umsebenzi ka-Eliya wokuphorofida kwa-Israyeli ufike emaphethelweni, watjela umfundakhe bona akabone eze ngayo ngoba umsebenzi uphelile. Kodwana u-Elitjha walikhomba libaba, bekwaba kathathu amtjela bona yena angekhe alise ukuba naye. UJehova wakuvuza ukuthembeka kwaka-Elitjha, wamvumela bonyana abone u-Eliya nekahlwithwa ngesiwuruwuru.—2 AmaKhosi 2:1-12.

14. (a) Abafundi bangamlingisa njani u-Elitjha? (b) Kubayini kuqakathekile ngobandulwako bona athembeke emsebenzini anikelwe wona?

¹⁴ Njengomzalwana obandulwako, wena ungamlingisa njani u-Elitjha? Yiba ngumabizwa asabele nawabelwa umsebenzi okufuze uwenze ebandleni. Ungakhohlwa ukuthi utitjherakho ungumnganakho. Mtjele umdala bona umthokoza kangangani ngokukunikela umsebenzi loyo. Mtjengise nokuthi uyafuna arage nokukubandula. Okuqakatheke khulu, thembeka emsebenzini onikelwe wona. Kubayini? Phela newuthembekileko, uwenza kuhle nomsebenzakho, nabadala bazokuthembela kuwe, babone ukuthi uJehova ufuna ukukunikela eminye imisebenzi ebandleni lakhe.—IRhubo 101:6; funda u-2 Thimothi 2:2.

15, 16. (a) U-Elitjha bekamhlonipha njani umbandulakhe? (Qala isithombe esisekuthomeni.) (b) Kubayini abanye abaphorofidi bebamthemba u-Elitjha?

¹⁵ Indaba ka-Elitjha ukuveza kuhle ukuqakatheka kokuhlonipha abadala ababomakadabona. Kwathi bona u-Eliya no-Elitjha bavakatjhele isiqhema sabaphorofidi eJeriko, bafika emLanjeni iJordani. Bathi nasele bafikile, “U-Eliya wathatha inaka lakhe walisonga, wabetha ngalo amanzi. Amanzi ahlukana phakathi, bobabili bayama bakhamba etjhwabatjhwabeni eyomileko.” U-Elitjha yena bekasolo alalele koke umbanduli wakhe amtjela khona. Uyabona-ke,  u-Elitjha khenge athi yena wazi koke. Yeke, kwathi bona u-Eliya ahlwithwe ngesiwuruwuru, u-Elitjha wabuyela emva emLanjeni iJordani. Wathi nakafika labo wabetha amanzi godu wahlukana phakathi bewathi: “Uphi-ke nje” uJehova “uZimu waka-Eliya?” Amanzi ahlukana phakathi godu.—2 AmaKhosi 2:8-14.

¹⁶ Ulemukile na bona ikarisomraro eyenziwa ngu-Elitjha kokuthoma yikarisomraro u-Eliya agcina ukuyenza baboke? Kusifundisani lokho? U-Elitjha khenge azitjele bona sekuphethe yena-ke kwanjesi, izinto sekufuze zikhambe ngenye indlela ehlukileko kuneka-Eliya. Kunalokho wenza lokho ebekwenziwa ngu-Eliya. Lokho bekutjengisa bona uyamhlonipha utitjherakhe. Kwafundisa nabanye abaphorofidi bona bamthembe u-Elitjha. (2 AmaKhosi 2:15) Waba mphorofidi iminyaka eyi-60 yoke, noJehova wamnikela amandla wokwenza iimangaliso ezinengi kunezaka-Eliya. Abafundi bafundani-ke endabeni le?

17. (a) Abafundi bangabulingisa njani ubuntu baka-Elitjha? (b) Nakukhamba isikhathi uJehova angabasebenzisa njani abazalwana ababandulwako?

¹⁷ Lokha abadala nabakunikela imisebenzi eminengi ebandleni, ungathomi ufune ukwenza izinto ngendlelakho ehlukileko kunangendlela abadala abenza ngayo. Ungalibali ukuthi izinto zitjhentjhwa sinqophiso esivela ehlanganweni kaJehova namkha itlhogeko ethileko ebandleni. Ungatjhugululi izinto ngoba wena ufuna izinto zenziwe ngeyakho indlela. U-Elitjha wabandula abanye abaphorofidi ngendlela u-Eliya ambandule ngayo bekabatjengisa bona uyamhlonipha u-Elitjha. Yeke, nawe newubandula ngeBhayibheli, utjengisa bona uyabahlonipha abadala ababomakadabona. Nawenza njalo abafowenu nabodadwenu bazokuthemba. (Funda u-1 Korinte 4:17.) Njengombana uba nelemuko emsebenzini owenzako, ungatjhugulula izinto ibandla lisizeke, lilandele ihlangano kaJehova njengombana nayo yenza amatjhuguluko nje. Kuzakuthi ngokukhamba kwesikhathi uJehova akuthwalise eminye imithwalo edlula yalabo abakubandulileko, njengombana asiza u-Elitjha.—Jwanisi 14:12.

18. Kubayini kurhabe kangaka bona abazalwana emabandleni babandulwe?

¹⁸ Sithemba bona amaphuzu asesihlokwenesi nakilesa esigadungileko angakhuthaza abadala bona bakusikimele phezulu ukubandula abanye abazalwana. Sithandazele nokuthi inengi abazalwana babe nesifiso sokubandulwa khona bazokutlhogomela abantu bakaJehova. Ukubandulokhu kuzokuqinisa woke amabandla ephasini mazombe, kulungisele ngamunye wethu bona athembeke njengombana iinkhathi ezimbi zisemnyango nje.