1, 2. (a) Kubayini uqiniseka bona uJehova uyabathanda abantu bakhe? (b) Abantu bathi nabadalwako benziwa baba nasiphi isifiso?

YINI le engakangaka ekwenza uqiniseke bona uJehova uyakuthanda njengomuntu wakhe? Ngaphambi kokobana uphendule umbuzo lo, akhucabange nganapu ubujamo: Sekuminyaka abafowethu nabodade balinga ukutjela uTaylene bona angathomi azibethe khulu. Kodwana yena nakatjhoko uthi: “Nangabe uJehova bekangangithandi bekangekhe asolo elulekana nami mihle namalanga.” UBrigitte okwamkosa bona akhulise abantwabakhe ayedwa ngemva kokuhlongakalelwa ngubabakwakhe uthi: “Kubudisi ukukhulisa abantwana ephasini lakaSathaneli, khulukhulu nawubakhulisa wedwa. Kodwana ngiyazi ukuthi uJehova uyangithanda, ngombana uyangisekela kiyo yoke into ebuhlungu engiqalana nayo. Akangivumeli bona ngiqalane nemiraro edlula ihlokwami.” (1 Korinte 10:13) USandra yena ukugula kwakhe kuhlule abodorhodere. Wathi nakasemhlanganweni omkhulu kwaba nodade omnakako. Ubabakwakhe uthi: “Ngitjho nanyana singazani nodade lo,  ukuthi usinakile nje kwaphela, kusikghwathe ngaphakathi eenhliziyweni. Nanyana kungaba kuncani kangangani okwenza kuvela ehliziyweni enethando kungitjengisa bona uJehova usithanda kwamambala.”

² UJehova wathi nakadala abantu wabenza baba nesifiso sokuthanda nesokuthandwa. Kodwana ukugula, imiraro yeemali, namkha ukubona ngasuthi sisebenzela emva njengekukhu esimini kungasiqeda amandla. Singazitjela bona awa uJehova akasasithandi. Nangabe kunjalo, ungalibali bona siligugu kuye, nokuthi uzasolo asigugudlhele ngesandla sakhe sokugoma, asisiza. Angekhe asilibala nangelanga lomhlolo nange sihlala sithembekile kuye.—Isaya 41:13; 49:15.

3. Yini engasiqinisekisa bona ithando lakaJehova ngathi alipheli?

³ AboFakazi okukhulunywe ngabwaba, bayaqiniseka bona uZimu bekasolo abasekela ngeenkhathi ezibudisi. Nathi-ke asiqiniseke njengabo. (IRhubo 118:6, 7) Esihlokwenesi-ke, sizokudemba ngezipho ezine ezitjengisa bona uJehova uyasithanda. (1) Indalwakhe, (2) iBhayibheli, (3) umthandazo (4) nesihlengo. Nasingazindla ngezinto ezihle uJehova asenzele zonezi, sizokuhlala silithokoza ithando lakhe elingapheliko.—Funda iRhubo 77:12, 13, [77:11, 12, NW].

4. Indalo kaJehova isifundisani?

⁴ Nawufuna ukubona ukuthi uJehova ukuthanda kangangani, yewuqalisise indalwakhe. (Roma 1:20) Ngokwesibonelo, uJehova wathi nakadala iphasi khenge alidalele bona siphile kilo kwaphela, kodwana usenzele nezinto ezinengi ezisithabisako. Ukudla khona siyakutlhoga, kodwana uJehova wenze ukudla okuhlukahlukeneko okumnandi ngeendlela ezinengi! (UMtjhumayeli 9:7) Omunye udade onguCatherine uyakuthabela ukuqala indalo kaZimu, khulukhulu ngesilimela eCanada. Uthi: “Awazi bona ingikara kangangani indlela izinto eziphila ngayo—amabhlomu ayazimilela ehlabathini, neenyoni ziyathutha endawenazo bese zibuyele kiyo godu. Kunenyoni encani engikarako evane ize lapha ngibeka ukudla kweenyoni hlanu kwefesidere langekhwitjhini. Kuyatjho bona uJehova usithanda kwamambala ngokusenzela izinto ezisikarisa kangaka.” UBabethu uyayithanda indalwakhe, manje nathi ufuna siyithabele.—IzEnzo 14:16, 17.

5. Silibona njani ithando lakaJehova endleleni umuntu adalwe ngayo?

⁵ UJehova wabuye wasenza sakghona ukwenza imisebenzi eminengi ethabisako. (UMtjhumayeli 2:24) Wathi abantu abazalise iphasi, balilime, batlhogomele iimfesi, iinyoni, nezinye izinto ezihlala kilo. (Genesisi 1:26-28) Wasenza saba nobuntu obuhle khona sizokukghona ukumlingisa!—Efesu 5:1.

6. Kubayini kufuze silithande khulu iliZwi lakaZimu?

⁶ UJehova usinikele iBhayibheli ngombana asithanda kwamambala. Lona-ke  lisitjela izinto okufuze sizazi ngaye nangokuthi uzizwa njani ngabantu ephasini. Ngokwesibonelo, nawungafunda ngama-Israyeli, ubona indlela ebekazizwa ngayo ngawo, ngitjho nanyana bekanomukghwa wokungamlaleli. IRhubo 78:38 lithi: “Phezu kwalokho yena waba nomusa, wacolela ubumenemene babo; iye, akhange ababhubhise, wazibamba kanengi elakeni lakhe, azange aveze boke ubukhali bakhe.” Nawungazindla ngeveseli kulapho-ke ongabona khona bonyana uJehova ukuthanda kangangani. Yeke, asiqiniseke bona uJehova usikhathalela kwamambala.—Funda 1 Pitrosi 5:6, 7.

7. Kubayini iBhayibheli kufuze libe ligugu kithi ukudlula nanyana yini?

⁷ IBhayibheli kufuze libe ligugu kithi ukudlula nanyana yini. Kubayini sitjho njalo? Kungombana uJehova ukhulumisana nathi ngalo iliZwi lakheli.  Akhesifanise indaba le nombelethi nomntwanakhe. Umuntu nomntwanakhe nabahlala bakhulumisana, bayathandana bathembane. UJehova naye unjalo, unguBaba obathandako abantu bakhe. Ngitjho nanyana singakamboni nje, namkha singakalizwa iphimbo lakhe, ukhulumisana nathi ngeBhayibheli. Ngikho-ke kufuze sihlale simlalela! (Isaya 30:20, 21) Yeke, nasifunda iliZwi lakhe, simazi kuhle besimthembe. Uyasinqophisa bekasivikele.— Funda iRhubo 19:7-11; IzAga. 1:33.

8, 9. Khuyini uJehova afuna siyazi? Akhuze nendaba eseBhayibhelini efakazela ipendulwakho.

⁸ UJehova ufuna sazi bona uyasithanda. Angithi phela uqala ngale kwemitjhaphwethu, abone izinto ezihle kithi. (2 IinKronike 16:9) Akhesicoce ngendlela uJehova ebekaqala ngayo ikosi yakwaJuda uJehotjhafathi. Umswa lo wathatha isiqunto esingakavuthwa, waqhema nekosi yakwa-Israyeli u-Arhabi bona ayokuthathana phezulu namaSiriya eRamothi eseGileyadi. Ngitjho nanyana abaphorofidi bamala abayi-400 bakhohlise u-Arhabi okhohlakeleko bona uzoyithumba ipi le, Umphorofidi weqiniso uMikaya watjela uJehotjhafathi no-Arhabi ukuthi balale balahlile, nakuyipi le angekhe bayithumba. Vele kwenzeka njengombana atjhwile. U-Arhabi wafela epini, uJehotjhafathi yena wawuma ukufa. Kwathi ipi nayiphelako, uJehova wathumela uJehu bona ayokukhalima uJehotjhafathi ngomtjhapho awenzileko lo. Ngemva kokumkhalima, uJehu wathi: “Nokho kukhonyana ukulunga kuwapha.”—2 IinKronike 18:4, 5, 18-22, 33, 34; 19:1-3.

⁹ Phela eminyakeni engaphambi kwesehlakalwesi, uJehotjhafathi bekatjele iinkhulu, amaLevi nabaphristi bona bakweriyele woke amadorobho wakwaJuda bawafundise ngomThetho kaJehova. Ngendlela abakhamba kuhle ngayo, nabantu bakosontjhaba besele bamazi uJehova. (2 IinKronike 17:3-10) Yeke, ngitjho nanyana athatha iinqunto ezingayi ngandlela ngokukhamba kwesikhathi, uJehova khenge akhohlwe izinto ezihle azenzileko epilwenakhe. Uyabona, indaba kaJehotjhafathi le iyasiduduza, ngombana nathi siyatjhapha ngezinye iinkhathi. Kodwana nasingalinga ngokusemandlenethu bona silotjhe uJehova, uzasolo asithanda begodu angekhe azilibale izinto ezihle esizenzileko.

10, 11. (a) Kubayini sithi umthandazo usisipho esiligugu esivela kuJehova? (b) UZimu angayiphendula njani imithandazwethu? (Qala isithombe esisekuthomeni.)

¹⁰ Ubaba obathanda kwamambala abantwabakhe uzipha isikhathi sokubalalela nabakukhuluma naye. Ufuna ukwazi bona bazizwa njani ngombana uyabakhathalela. Unjalo-ke noJehova uBabethu osithandako. Uyasilalela nasithandazako. Ngikho-ke sithi ukukhuluma noBabethu lo kulilungelo elingangelungelo!

¹¹ Singathandaza kuJehova ngananyana ngisiphi isikhathi. Phela uZimu Mkhozethu, yeke uzimisele ukulalela imithandazwethu. UTaylene okukhulunywe ngaye eengabeni ezingaphezulu uthi, “Ungatjho nanyana yini kuye, uzakulisa ukhulume bewuqede.” Yeke nasimtjela izinto ezingaphakathi eenhliziyweni zethu, angasiphendula ngomtlolo, ngesihloko esithileko esisencwadini zethu, namkha athumele udade namtjhana umfowethu bona  azosikhuthaza. UJehova uyezwa nasimbawa ngeenhliziyo zethu zoke, begodu ukuphela komuntu osizwisisa kuhle ukudlula nanyana ngubani. Yeke, indlela asiphendula ngayo le iyasitjengisa bona usithanda kangangani.

12. Kubayini kufuze sifunde ngemithandazo eseBhayibhelini? Akhe unikele isibonelo.

¹² Imithandazo yabantu abaseBhayibhelini ingasifundisa iimfundo eziqakathekileko. Akhenifunde ngayo ekukhulekeleni komndenenu ngesinye isikhathi. Naningazindla ngemithandazo yeenceku zakaZimu zekadeni, imithandazwenu ingathuthuka into erarako. Ngokwesibonelo, khewuziphe isikhathi sokufunda ngomthandazo kaJona asesiswini sehlambi ekulu. (Jona 1:17–2:10) Ungabuyekeza nomthandazo kaSolomoni awuthandaza ngehliziywakhe yoke kuJehova nakuvulwa ithempeli. (1 AmaKhosi 8:22-53) Uzabe utjhaphile nawungalibala ukuzindla ngomthandazo kaJesu osibonelo. (Matewu 6:9-13) Okuqakatheke khulu, ‘zoke iimbawo zakho azaziwe nguZimu.’ Uqedile nawenze njalo ngombana ‘ukuthula kwaZimu okudlula koke ukuzwisisa, kuzakubulunga ihliziywakho nomkhumbulwakho.’ Soke nasingenza nje, angekhe silise ukusolo silithokoza ithando lakaJehova elingapheliko.—Filipi 4:6, 7.

13. Ngiliphi ithuba esilivulelwe sihlengo sakaKrestu?

¹³ UJehova usinikele isipho sesihlengo seNdodanakhe bona “siphile ngayo.” (1 Jwanisi 4:9) UPowula nakakhuluma ngendlela uZimu asithanda ngayo le uthi: “UKrestu wafela abangakalungi. Ngambala, akukavami bona umuntu afele olungisisiweko, nanyana mhlambe kwenzeka bona umuntu angahle afele olungileko. Kodwana uZimu ubonise ithando lakhe kithi ngendlela yokobana sithe sisesezizoni, uKrestu wasifela.” (Roma 5:6-8) Isihlengo sisibonelo esihle kwamambala esitjengisa bona uZimu uyasithanda. Isihlengo sisivulele ithuba lokwakha isikhozi naye.

14, 15. Isihlengo siwazuzisa njani (a) amaKrestu akhethelwe ukuya ezulwini (b) amaKrestu alindele ukuphila ephasini?

¹⁴ Kunesiqhenyana sabantu esilithokoza khulu ithando lakaJehova ngebanga lesihlengo. (Jwanisi 1:12, 13; 3:5-7) Isiqhemeso sikhethwe nguZimu ngomoya ocwengileko bona siyokubusa ezulwini noKrestu. Kwathiwa sibantwana bakhe ngebanga lesihlwengwesi. (Roma 8:15, 16) Kodwana kubayini uPowula athi “uZimu wasivusa naye bewasihlalisa kanye naye embusweni wezulu kuKrestu Jesu” khibe abanye besiqhemesi basesekhona ephasinapha? (Efesu 2:6) Uwatjhwiso kukuthi uJehova sebele abathembisile bona bazokuphila isiphelani ezulwini.—Efesu 1:13, 14; Kolose 1:5.

¹⁵ Yeke kuthiwani-ke ngalabo abangakakhethwa? Nabo bangazakhela isikhozi noZimu ngokukholelwa esihlengweni. Angithi bathenjiswe bona bazokuphila isiphelani ephasini eliyipharadesi. Uyabona-ke  kwanjesi ukuthi isihlengo sitjengisa bona uJehova uthanda woke umuntu. (Jwanisi 3:16) Awazi bona kuthoba ihliziyo kangangani ukwazi ukuthi nasingathembeka ekulotjheni uZimu, uzosinikela ipilo ehle kuzidlula zoke ephasini elitjha! Yeke, asitjengise bona siyasithokoza isihlengo, esibufakazi obungaphikiswako bokuthi uZimu uyasithanda

16. Yini esizoyenza ngemva kokuzindla ngendlela uJehova asithanda ngayo?

¹⁶ Akukghonakali bona singazibala zoke iindlela uJehova asithanda ngazo. IKosi uDavida yabhina yathi: “Zimu, imicabango yakho iligugu kimi! Minengi ngendlela erarako! Nangithi ngiyayibala idlula iinhlayiya zehlabathi.” (IRhubo 139:17, 18, NW) Nasingahlala sizindla ngeendlela ezinengi uJehova asithanda ngazo, kubasela lethu ithando ngaye, kusenze simenzele okuhle ngokusemandlenethu.

17, 18. Ngiziphi ezinye iindlela esingatjengisa ngazo bona siyamthanda uZimu?

¹⁷ Nathi sineendlela ezinengi esingatjengisa ngazo ukuthi siyamthanda uJehova. Ngokwesibonelo, singakuveza ngokutjela abanye ngeendaba ezimnandi zomBuswakhe. (Matewu 24:14; 28:19, 20) Singakutjengisa nangokuthi sikghodlhelele nasiqalene neenlingo. (Funda iRhubo 84:12, [84:11, NW]; Jakopo 1:2-5) Ngitjho nanyana iinlingwezo zingaba budisi komhlolo, siyaqiniseka bona uyawubona umtlhago esiqalene nawo lo begodu uzosisiza ngombana siligugu kuye.—IRhubo 56:9, [56:8, NW].

¹⁸ Ithando lethu ngoZimu lisihlohlozela bona sizindle ngazo zoke izinto azidalileko. Silitjengise godu nangokukhuthalela ukufunda iBhayibheli. Sithandaza qobe kuJehova ngombana simthanda, sifuna nokuqinisa isikhozi sethu naye. Siyazindla nangesipho sakhe esiligugu sesihlengo seNdodanakhe. Lokho kubhebhedlhisa ithando lethu ngaye. (1 Jwanisi 2:1, 2) Lezi zimane zingezinye zeendlela esitjengisa ngazo bona siyalithokoza ithando lakaJehova elingapheliko.