Abasasisabi Isiphelo

EKUPHELENI kwabo-1970, uGary noKaren baqiniseka bona ukuphela kwephasi sekuseduze. Nje-ke bafuduka edorobheni bayokuhlala emakhaya begodu bakhetha ukuphila ngaphandle kwerhelebho labanye abantu. Bebafuna ukuphuluka.

Ukufumana amakghono abazowatlhoga, bathenga iincwadi, baya eenkolweni nemihlanganweni, babawa iinluleko ebantwini abanengi ngendlela abangakghona ngayo. Batjala nesimu yemirorho nemithi ema-50 yeenthelo. Babulunga iimbewu namathulusu. Bafunda ukutjala nokubulunga ukudla. Umnganabo wabafundisa ukuhlinza nokwenza umrhwabha. UKaren wafunda ukuhlukanisa iintjalo nemirabhu emangweni khona bazokudla zona nebangaphelelwa kukudla. UGary wafunda ukwenza iimbaseli ngesiphila, wenza nesitofu sesimbi esiberega ngeenkuni, wakha nendlu engatlhogi iinsetjenziswa ezivela ngaphandle njengegezi.

UKaren uthi, “Ngebanga lobujamo obumbi bephasi ngesikhatheso, ngaba namazizo wokobana ukuphela kwephucuko sekusemnyango.” UGary uyahlathulula, “Njengabanye abasesebatjha, bengimajadujadu ngilinga ukuqeda ibandlululo, iPi ye-Vietnam, nokukhohlakala. Kodwana msinyana ngaphelelwa lithemba. Kwangikhanyela bona isintu sizozitjhabalalisa nekungabi namatjhuguluko enzekako.”

 UGary uthi, “Ngobunye ubusuku ngaba nesikhathi sokuzigedla, ngalokho ngathatha iBhayibhili ngayifunda kusuka kuMatewu ukuya kuSambulo. Ngobusuku obune obulandelako, ngayifunda godu. Ekuseni ngelanga lesihlanu, ngatjela uKaren: ‘Siphila emihleni yokuphela. Msinyana uZimu uzokuhlanza iphasi. Kufuze sifumane abazokuphuluka.’” UGary noKaren bathoma ukugega namasondo, bafuna abantu abafuna ukubhincela isiphelo.

Msinyana, omunye waboFakazi BakaJehova wafika emzinabo, kwathonyiswa isifundo seBhayibhili. “Ngathaba khulu,” kukhumbula uKaren, “ngombana ngayihlathululelwa kuhle iMitlolo. Iqiniso ngemihla yokuphela bekuyinto ebengiyifuna, begodu emaswapheleni ngilifumene. Bekunethemba eliqinisekileko ngengomuso. Kodwana okukarisa khulu, ngathoma ukwakha ubungani noBabami weZulwini, uMbumbi noZimu wezulu nephasi.”

UGary uthi: “Ukuphila kwami kwaba nomnqopho wamambala. Nengithoma ukufunda iBhayibhili, bengingakghoni ukulisa. Ngafunda isiporofido seBhayibhili, ngahlola ubufakazi bokuzaliseka kwaso, ngaqiniseka bona msinyana uZimu uzokuthatha amagadango. Ngacabanga, ‘Abantu bekufuze babhince, bangabhinceli ihlekelele, kodwana ukuphila uZimu asifunela khona.’” UGary noKaren baba nombono omuhle ngengomuso. Kunokobana batshwenyeke ngokuphela kwephasi, baqiniseka bona uZimu uzokususa yoke iimraro etshwenya isintu begodu uzokubuyisela iphasi libe yiparadeyisi.

Njengombana sekudlule iimnyaka engaba ma-25, uGary noKaren benzani namhlanjesi? UKaren uthi: “Ngiragela phambili ngakha ithando lami ngoJehova uZimu nekholo lami kuye, ngilinga nokurhelebha abanye bona benze okufanako. Mina noGary siyasekelana njengombana silwela ukubulunga umndenethu uqinile ubumbene ekukhulekeleni uZimu. Silinga ukuhlala sihlophisekile, senza nomzamo wokubulunga ukuphila kwethu kulula bona sikghone ukucabangela abanye neentlhogo zabo.”

UGary uyangezelela: “Ngithandaza qobe bona uMbuso kaZimu ufike ulethele iingidi zabantu ipumuzo. Isikhathi ngasinye ngihlanganyela iindaba ezimnandi zoMbuso kaZimu nabanye, ngithandaza bona ngingatjela okungenani umuntu oyedwa ngethemba eliseBhayibhilini. Iimnyaka engaphezu kwama-25, uJehova uwuphendule ngomusa umthandazo loyo. Mina noKaren sikholelwa bona uJehova msinyana uzokwenza amatjhuguluko amakhulu ephasini, kodwana asisasisabi isiphelo.”—Matewu 6:9, 10; 2 Pitrosi 3:11, 12.

[Isithombe ekhasini 9]

UGary noKaren bathabela ukurhelebha abanye babe nethemba emlayezweni weBhayibhili