UMdosiphambili Wethu Omajadujadu Namhlanjesi

“Waphuma angohlulako, wahlula.”—ISAM. 6:2.

1, 2. (a) Imisebenzi kaKrestu njengekosi kusukela ngo-1914 ivezwe njani eBhayibhilini? (b) Ngimaphi amagadango uKrestu esele awathethe solo abekwa njengekosi?

UKRESTU wabekwa njengeKosi yoMbuso kaJehova wobuMesiya ngo-1914. Emkhumbulwenakho umbona enzani? Umbona ayikosi ecabanga khulu na, ehlezi esihlalweni sayo sobukhosi, ekuthi ngesikhathi esithileko ithi rhedlu ephasini ukuqala bona izinto zikhamba njani ebandleni layo? Nengabe ucabanga njalo, ubethe phasi. AmaRhalani nencwadi yeSambulo zimveza njengekosi eyikakaramba ekhwele ipera erholobhako, “waphuma angohlulako, wahlula,” aragela phambili aswaphelisa ‘ipumelelo’ yakhe.—ISam. 6:2; Rha. 2:6-9; 45:1-4.

² Into yokuthoma eyenziwa nguKrestu ngemva kokubekwa ikosi, kuhlula “unomrhaswa neengilozi zakhe.” UMikhayeli njengengilozi ekulu elawula iingilozi zayo, wakhupha uSathana namadimonakhe ezulwini elicwengileko wabaphosela ephasini. (ISam. 12:7-9) Ngemva kwalokho, azalisa indimakhe yokuba ‘sithunywa sesivumelwano’ sakaJehova, uJesu weza noYise ukuzokuhlola itempeli elingokomoya. (Mal. 3:1) Wahlulela iSingabukrestu, ingcenye enomlandu khulu ‘yeBhabhiloni ledumo,’ alifumana linomlandu wokuphalaka kweengazi nokwenza ubuhlola obungokomoya neenhlangano zepolotiki zephaseli.—ISam. 18:2, 3, 24.

Uhlanza Incekwakhe Yephasini

3, 4. (a) Ngiwuphi umberego uKrestu awenzako ‘njengesithunywa’ sakaJehova? (b) Ukuhlolwa kwetempeli kweembulani, begodu njengeHloko yebandla, ngikuphi ukujanyiswa uJesu akwenzako?

³ Ukuhlola okwenziwa nguJehova ‘nesithunywa’ sakhe godu kweembula bona ngesirhodlweni  setempeli elingokomoyelo kunesiqhema samaKrestu weqiniso, egade singazibandakanyi namasondo weSingabukrestu. Nokho, ngitjho namaKrestu azesiweko la, namtjhana “amadodana kaLevi,” bekatlhoga ukuhlanzwa. Bekunjengombana umporofidi uMalaki abikezela: “[UJehova] kufuze ahlale njengomtsengi nomhlanzi wesilivere begodu kufuze ahlanze amadodana kaLevi; abatsenge njengerhawuda nanjengesilivere, ngokuqinisekileko kuJehova bazokuba babantu abaletha isipho somhlatjelo ngokulunga.” (Mal. 3:3) UJehova waberegisa ‘isithunywa sakhe sesivumelwano,’ uKrestu Jesu, bona ahlanze ama-Israyeli angokomoya la.

⁴ Nofana kunjalo, uKrestu wafumana amaKrestu azesiweko athembekileko la enza koke okusemandlenawo ukunikela indlu yokukholwa ukudla okungokomoya ngesikhathi esifaneleko. Kusukela ngo-1879 ukuya phambili, ebuhleni nebumbini, bebasolo bagadangisa amaqiniso weBhayibhili amalungana noMbuso kaZimu kumagazini lo. UJesu waporofida bona ‘nekafikako’ azokuhlola bendlwakhe phakathi ‘nesikhathi sokuphela kwephasi,’ uzokufumana inceku ibanikela ‘ukudla ngesikhathi esifaneleko.’ Uzokuthi iyathaba inceku leyo begodu ‘uzoyibeka bona iqale yoke ipahla yakhe’ ephasini. (Mat. 24:3, 45-47) NjengeHloko yebandla lobuKrestu, uKrestu uberegise ‘inceku ethembekileko nehlakaniphileko’ le bona yengamele zoke izinto eziphathelene noMbuswakhe ephasini. Unqophise [“bendlu,” NW] abazesiweko nabangani babo ‘bezinye izimvu’ aberegisa iSihlopha Esibusako.—Jwa. 10:16.

Ukuvunwa Kwephasi

5. Embonweni, uJwanisi wabona iKosi enguMesiya yenzani?

⁵ Umpostoli uJwanisi waba nombono wokhunye iKosi enguMesiya ezokwenza “ngesuku leKosi,” ngemva kokubekwa njengekosi ngo-1914. UJwanisi watlola: “Ngaqala ngabona ilifu elimhlophe, kuhlezi kilo othile ofana neNdodana yoMuntu, izungeze ngekatha yerhawuda ehloko yayo, iphethe isegere ebukhali ngesandla.” (ISam. 1:10; 14:14) UJwanisi wezwa ingilozi evela kuJehova itjela uMvuni lo bona aphose isegerakhe ngombana ‘isivuno sephasi sesihlezi silindele ukubuthelelwa.’—ISam. 14:15, 16.

6. UJesu wathi yini ezokwenzeka ngokukhamba kwesikhathi?

⁶ ‘Isivuno sephasesi’ sisikhumbuza umfanekiso kaJesu wekoroyi nekhula. UJesu wazifanisa nendoda eyatjala imbewu yekoroyi esiminayo inomnqopho wokufumana isivuno sekoroyi ehle, efanekisela labo ‘engebombuso,’ amaKrestu weqiniso azesiweko azokubusa naye eMbuswenakhe. Kodwana ebusuku, inaba, ‘uSathana,’ watjala ikhula esimini, ‘abakhohlakeleko.’ Umtjali walayela iinsebenzi zakhe bona zilise ikoroyi nekhula kukhule ndawonye bekube sikhathi sokuvuna, ‘isikhathi sokuphela.’ Ngesikhatheso, uzokuthuma iingilozi zakhe bona zihlukanise ikoroyi nekhula.—Mat. 13:24-30, 36-41.

7. UKrestu uwenza njani umsebenzi ‘wesivuno sephasi’?

 ⁷ Ekuzalisekeni kombono owanikelwa uJwanisi, uJesu gade anqophisa umsebenzi wokuvuna wephasi mazombe. ‘Isivuno sephasi’ sathoma ngokubuthelelwa kwabazi-144 000 ‘abangebombuso,’ ‘ikoroyi’ yomfanekiso kaJesu. Umahluko phakathi kwamKrestu weqiniso newamala waba sepepeneneni ngemva kwePi Yephasi I, kangangobana yaba nomthelela engcenyeni yesibili ‘yesivuno sephasi’—ukubuthelelwa kwezinye izimvu. Laba akusibo ‘abangebombuso’ kodwana kunalokho, ‘siqubuthu esikhulu’ esizithoba ngokuzithandela eMbusweni. Bavunwa hlangana “nemindeni namakoro neenlimi.” Bazithoba eMbusweni wobuMesiya owakhiwa nguKrestu Jesu nabazi-144 000 “abacwengileko” abazokuhlanganiswa naye kurhulumende wezulwini.—ISam. 7:9, 10; Dan. 7:13, 14, 18.

Ubudosiphambili Bamabandla

8, 9. (a) Khuyini etjengisa bona uKrestu akatjheji kwaphela ibandla nebandla kodwana nokuphila kwelunga lebandla ngalinye? (b) Njengombana kutjengiswe esithombeni esisekhasini 29, ngiyiphi ‘ifihlo ekulu yakaSathana’ okufuze siyibalekele?

⁸ Esihlokweni esigadungileko sibonile bona uKrestu ulazi kuhle kangangani ingokomoya lebandla nebandla ekhulwini lokuthoma C.E. Esikhathini sethu, njengeKosi enikelwe ‘woke amandla ezulwini nephasinapha’ uKrestu uMdosiphambili wethu usebenzisa ubuhloko phezu kwamabandla nababonisi bawo ephasini loke. (Mat. 28:18; Khol. 1:18) UJehova “wambeka waba yihloko phezu kwebandla loke” labazesiweko. (Efe. 1:22) Njengehloko yebandla, ubona yoke into eyenzekako emabandleni angaphezu kwe-100 000 waboFakazi BakaJehova.

⁹ Ebandleni lamandulo leThiyathira, uJesu wathi: “Naku umlayezo ovela eNdodaneni kaZimu, . . . ‘ngiyayazi yoke imisebenzi yakho.’” (ISam. 2:18, 19) Wakhalima amalunga webandlelo ngokuziphatha kumbi, ukuphila kokuzitika, wabatjela wathi: “Ngimi owazi imikhumbulo yabo boke; ngiloyo naloyo wenu ngomupha umvuzo ngemisebenzi yakhe.” (ISam. 2:23) Amezwi layo atjengisa bona uKrestu utjheja ingasi kwaphela ibandla nebandla kodwana nokuphila kwelunga lebandla ngalinye. UJesu wabuka amaKrestu weThiyathira ‘angakafundi lokho abathi yifihlo ekulu yakaSathana.’ (ISam. 2:24) Namhlanje, umukela abancani nabakhulu, ababalekela ukufunisisa ‘ifihlo ekulu yakaSathana’ ku-Internet, iimdlalo yamavidiyo enenturhu namtjhana ngokuzitika ngokucabanga komuntu okuliselelako. Qala bona kumthabisa kangangani ukubona umzamo neminikelo yamaKrestu amanengi namhlanjesi alinga ngamandla woke ukulandela ubudosiphambili bakhe kikho koke ukuphila kwawo!

10. Isinqophiso sakaKrestu ebadaleni bebandla siboniswa njani, kodwana khuyini okufuze bayitjheje?

¹⁰ UKrestu wenze ilungiselelo lokungamela kwethando lamabandlakhe ephasini ngabadala ababekiweko. (Efe. 4:8, 11, 12) Ekhulwini lokuthoma, boke ababonisi bebazeswe ngomoya. Bahlathululwe encwadini yeSambulo njengeenkwekwezi esandleni sakaKrestu sokudla. (ISam. 1:16, 20) Namhlanjesi, inengi labadala bebandla bangebezinye izimvu. Bakhethwa ngemva komthandazo ngaphasi kokunqophiswa komoya ocwengileko, ngalokho nabo bangaqalwa njengabangaphasi kwesinqophiso sakaKrestu namtjhana isandla sakhe. (IZe. 20:28) Nokho, bayatjheja bona uKrestu uberegisa imbijana yamaKrestu azesiweko weSihlopha Esibusako bonyana sidose phambili begodu sinqophise abafundi bakhe ephasini.—Funda IZenzo 15:6, 28-30.

“Yewize, Kosi Jesu”

11. Kubayini sikhanukela ukubona uMdosiphambilethu eza msinyana?

¹¹ Esambulweni esanikelwa umpostoli uJwanisi, iinkhathi ezimbalwa uJesu wathi uza msinyana. (ISam. 2:16; 3:11; 22:7, 20) Akunakuzaza bona bekaqalise ekuzeni kwakhe ukuzokukhupha isahlulelo phezu kweBhabhiloni  ledumo nalo loke iphasi lakaSathana elimbi. (2 Tes. 1:7, 8) Akhanukela ukubona ukuzaliseka kwazo zoke izehlakalo ezihle ezabikezelwako, umpostoli uJwanisi olupheleko wathi: “Ameni, akube njalo! Yewize, Kosi Jesu!” Nathi esiphila esikhathini sokuphela sephasi elimbeli siyakukhanuka ukubona uMdosiphambili neKosethu iza emandleni woMbuso ukucwengisa ibizo lakaYise nokulwelwa kobukhosi Bakhe.

12. Khuyini uKrestu azoyiphetha ngaphambi kobana imimoya yokutjhatjalaliswa kwephasi itjhatjhululwe?

¹² Ngaphambi kobana uJesu atjhabalalise ihlangano kaSathana ebonakalako, amalunga wokugcina waka-Israyeli ongokomoya wabazi-144 000 bazokubekwa itshwayo lokugcina. IBhayibhili ikubeka ngokukhanyako bona imimoya yokutjhatjalaliswa kwephasi lakaSathana ayizokutjhatjhululwa ngaphambi kobana ukubekwa itshwayo kwabazi-144 000 kuphelelisiwe.—ISam. 7:1-4.

13. UKrestu uzokwenza njani bona iphazimulo yakhe ibonakale engcenyeni yokuthoma ‘yeentlayiseko ezimbi’?

¹³ Kusukela ngo-1914 abantu abanengi ephasini khenge bakubone “ukuba khona” kwakaKrestu. (2Pi 3:3, 4, NW) Nokho, msinyana uzokwenza bonyana ukuba khona kwakhe kubonakale, ngokukhupha isigwebo sakaJehova kibo boke abasekela iphasi lakaSathana. Ukutjhatjalaliswa ‘koKhohlakeleko,’ abefundisi beSingabukrestu kuzokuba ‘litshwayo lephazimulo yakhe.’ (Funda u-2 KwebeTesalonika 2:3, 8.) Kuzokunikela ubufakazi obuqinileko bokobana uKrestu nguMahluleli kaJehova okhethiweko. (Funda u-2 KuThimothi 4:1.) Ukutjhatjalaliswa kweBhabhiloni ledumo elinomlandu kuzokwenzeka qangi, bese kulandela ukutjhatjalaliswa kwalo loke iphasi elimbi lekolo yamala. UJehova uzokufaka eenhliziyweni zabadosiphambili bezepolotiki bona batjhabalalise ingwadla le. (ISam. 17:15-18) Lokhu kuzokuba yingcenye yokuthoma ‘yeentlayiseko ezimbi khulu.’—Mat. 24:21.

14. (a) Kubayini ingcenye yokuthoma yeentlayiseko izokuncitjhiswa? (b) Sitjho ukuthini “isibonakaliso sokwiza kweNdodana yoMuntu” ebantwini bakaJehova?

¹⁴ UJesu wathi amalanga weentlayiseko azokuncitjhiswa “ngebanga labantu uZimu abakhethileko,” amaKrestu azesiweko asesephasini. (Mat. 24:22) UJehova ngekhe avumele ukutjhatjalaliswa kwekolo yamala kususe amaKrestu azesiweko nabangani babo bezinye izimvu. UJesu wangezelela bona “ngemva kweentlayiseko zemihleni leyo” kuzokuba namatshwayo elangeni, enyezini, neenkwekwezini, “yeke isibonakaliso sokwiza kweNdodana yoMuntu sizabonakala emafini.” Lokhu kuzokubangela iintjhaba ephasini bona ‘zilile.’ Angeze kube njalo ngalabo abazesiweko, abanethemba lokuya ezulwini nabangani babo abanethemba lokuphila ephasini. ‘Bazosikima baphakamise iinhloko zabo ngombana iphuluso yabo itjhidele.’—Mat. 24:29, 30; Luka 21:25-28.

15. Ngiwuphi umberego uKrestu azowenza nekabuyako?

¹⁵ Ngaphambi kokuphelelisa ukuthumba kwayo, iNdodana yomuntu godu iza ngenye indlela. Yaporofida: “Mhlana iNdodana yoMuntu izako ngobukhosi bayo neengilozi zoke, izahlala esihlalweni sayo sobukhosi. Abantu bemihlobo yoke bazayizungeza. Izabahlukanisa iinqhema ezimbili, njengomelusi nahlukanisa izimvu neembuzi. Izabeka abalungileko  ngesigomeni sayo abanye ngesinxeleni.” (Mat. 25:31-33) Lokhu kuqaliswe kuJesu njengoMahluleli ozokuhlukanisa abantu “bemihlobo yoke” babe ziinqhema ezimbili: “izimvu,” labo ebebamajadujadu ekusekeleni abanakwabo abangokomoya (amaKrestu azesiweko ephasini) iimbuzi, labo “abangazithobeliko iindaba ezimnandi ngeKosi yethu uJesu.” (2 Tes. 1:7, 8) “Izimvu” ezihlathululwa njengalabo “abalungileko” zizokufumana ‘ukuphila okungapheliko’ ephasini, kodwana abaziimbuzi “bazasiwa ekuhlunguphazweni okungapheliko,” namtjhana bazokutjhatjalaliswa.—Mat. 25:34, 40, 41, 45, 46.

UJesu Uphelelisa Ukuhlula Kwakhe

16. UKrestu uMdosiphambili wethu uzokuphelelisa njani ukuhlula kwakhe?

¹⁶ Ngenani elipheleleko labangani bakhe abamakhosi nabapristi ababekwe itshwayo nezimvu ezihlukanisiweko zabekwa ngesandleni sakhe bona ziphuluswe, uKrestu angaragela phambili ‘nokuhlula.’ (ISam. 5:9, 10; 6:2) Akunakuzaza bona njengehloko yebutho elinamandla leengilozi, nabanakwabo abavusiweko, uzokutjhabalalisa woke amahlelo kaSathana wezepolotiki, zepi nezerhwebo ephasini. (ISam. 2:26, 27; 19:11-21) Ukuhlula kwakaKrestu kuzokuphela lokha atjhabalalisa iphasi elimbi lakaSathana. Uzokuphosela uSathana namadimonakhe ngemgodini onganamkhawulo iimnyaka eyikulungwana.—ISam. 20:1-3.

17. UKrestu phakathi Kokubusa kwakhe Kweemnyaka Eyikulungwana uzozidosela kuphi ezinye izimvu, begodu khuyini okufuze sizimisele ukuyenza?

¹⁷ Akhuluma ‘ngesiqubuthu esikhulu’ sezinye izimvu, esizokuphuluka eentlayesekweni ezikulu, umpostoli uJwanisi waporofida bona “iMvana esentendeni yendawo yesihlalo sobukhosi iyobelusa, ibadosele emanzini wokuphila okungapheliko.” (ISam. 7:9, 17) Liqiniso, phakathi Kokubusa kwakhe Kweemnyaka Eyikulungwana uKrestu uzokudosa phambili ezinye izimvu, ezililalela kwamambala ilizwi lakhe, azinqophise ekuphileni ongapheliko. (Funda u-Jwanisi 10:16, 26-28.) Kufuze sizinikele ngokuthembeka ekulandeleni ikosi emdosiphambili wethu—gadesi nephasini elitjha uJehova alithembisileko!

Ukubuyekeza

• Ngiliphi igadango uKrestu alithathako ngemva kobana abekwe bona abe yikosi?

• Ngiliphi ithulusu elibonakalako uKrestu aliberegisako ukunqophisa ibandla?

• UKrestu uMdosiphambili wethu uzokuza ngaziphi iindlela msinyana?

• UKrestu uzosinqophisa njani ephasini elitjha?

[Iimbuzo Yesifundo]

[Isithombe ekhasini 32]

Ukutjhatjalaliswa kwephasi lakaSathana elimbi kuzokwenza bona iphazimulo kaKrestu ibonakale