Ubunye Butshwaya Ukukhulekela Kweqiniso
Ubunye Butshwaya Ukukhulekela Kweqiniso
“Ngizobabeka ngobunye, njengomhlambi ngesibayeni.”—MIK. 2:12.
1. Indalo ikutjengisa njani ukuhlakanipha kwakaZimu?
UMRHALANI wababaza: “Sokulunga wenze okunengi kangangani! Wakwenza koke ngobuhlakani obukhulu! Iphasi loke lizele iimbunjwa zakho.” (Rha. 104:24) Ukuhlakanipha kwakaZimu kubonakala ekurhelebhaneni kweengidi zemihlobohlobo yeentjalo, yeengogwana, yeembandana, namabhaktheriya ephasini elirarako lerhelo lezinto eziphilako. Godu neemzimbenakho, kuneenkulungwana zeenkambiso ezihlukahlukeneko, kusukela ezithweni ezikulu kuya eengcenyeni ezincani khulu zamaseli wakho, zoke ziberega ndawonye ukukwenza bona ube mumuntu ophilileko.
2. Njengombana kutjengiswe ekhasini 16, kubayini ubunye bamaKrestu beburara?
2 UJehova ubumbe abantu bona bangakghoni ukuziphilela ngaphandle kwabanye. Ihlanga lesintu lihlukile, ngokuqaleka, ubuntu namakghono. Ukungezelela, wapha abantu bokuthoma iimfanelo ezifana nezakhe ezibenza bakghone ukubambisana nokuphilisana nabanye. (Gen. 1:27; 2:18) Nanyana kunjalo, inengi ephasini nje lihlukanisiwe noZimu, begodu khenge liberegisane ngobunye. (1 Jwa. 5:19) Ngalokho-ke, nesicabanga bona ibandla lamaKrestu langekhulu lokuthoma lakhiwa babantu abahlukahlukeneko njengeengqila ze-Efesu, abafazi bamaGirigi abaveleleko, namadoda wamaJuda aziimfundiswa, negade babakhulekeli beenthombe, ubunye babo beburara.—IZe. 13:1; 17:4; 1 Tes. 1:9; 1 Thi. 6:1.
3. IBhayibhili ibuhlathulula njani ubunye bamaKrestu, begodu yini esizoyicabangela esihlokwenesi?
3 Ukukhulekela kweqiniso kwenza abantu babambisane ngokuvumelana njengamalungu weemzimbethu. (Funda u-1 KwebeKorinte 12:12, 13.) Amanye amaphuzu esizowahlola esihlokwenesi ngila: Ukukhulekela kweqiniso kubahlanganisa njani abantu? Kubayini kunguJehova kwaphela ongahlanganisa iingidi zabantu ezivela kizo zoke iintjhaba? Ngibuphi ubudisi obukhandela ubunye uJehova asirhelebha bona sibuhlule? Begodu malungana nobunye, ubuKrestu beqiniso buhluke njani kubuSingabukrestu?
Ukukhulekela Kweqiniso Kubahlanganisa Njani Abantu?
4. Ukukhulekela kweqiniso kubahlanganisa njani abantu?
4 Abakhulekeli beqiniso bayamukela bona njengombana uJehova wabumba zoke izinto, uyafaneleka bona abe Mbusi wezulu nephasi. (ISam. 4:11) Nanyana amaKrestu wamambala aphila eemphakathini eemnengi nangaphasi kobujamo obuhlukahlukeneko, woke alalela iimthetho efanako kaZimu begodu aphila ngeenkambisolawulo zeBhayibhili ezifanako. Boke abakhulekeli beqiniso babiza uJehova kufanele ngokobana “Baba.” (Isa. 64:8; Mat. 6:9) Ngalokho, boke babanakwabo lomunye nomunye ngokomoya begodu bathabela ubuhle bobunye obuhlathululwe mrhalani: “Qala! Kuhle kuthabisa kangangani bona abazalwana bahlale ndawonye ngobunye!”—Rha. 133:1.
5. Ngiyiphi ifanelo erhelebha ebunyeni babakhulekeli beqiniso?
5 Nanyana amaKrestu weqiniso angakapheleli, akhulekela ndawonye ngobunye ngombana afunde ukuthandana. UJehova uwafundisa ukuthandana ngendlela okungekho omunye ongabafundisa ngayo. (Funda u-1 Jwanisi. 4:7, 8.) ILizwi lakhe lithi: “Nje-ke kufanele nibe nobudlelwano, nesisa, nizithobe, nibe nobuntu, nomusa. Ninyamazelelane, nilibalelane nengabe omunye ukhube omunye, njengombana neKosi yanilibalela, nani-ke yenzani njalo. Kodwana kikho koke lokhu, yengezani ithando elibopha izinto zoke zibe yinyanda yinye.” (Khol. 3:12-14) Isibopho sobunye esiphelelekwesi—ithando—yifanelo ngokuyihloko etshwaya amaKrestu weqiniso. Wena ngokwakho, awukaboni bona ubunyobu bulitshwayo elihlukanisa ukukhulekela kweqiniso?—Jwa. 13:35.
6. Ithemba loMbuso lisirhelebha njani bona sithabele ubunye?
6 Godu abakhulekeli beqiniso banobunye ngombana baqala uMbuso kaZimu njengokuphela kwethemba lesintu. Bayazi bona uMbuso kaZimu msinyana uzokujamiselela aborhulumende babantu begodu ubusise isintu esilalelako ngokuthula kwamambala okungapheliko. (Isa. 11:4-9; Dan. 2:44) Ngalokho, amaKrestu alalela lokho uJesu akutjhoko ngabalandeli bakhe: “Njengombana nami ngingasingowephasi, nabo abasingebephasi.” (Jwa. 17:16) AmaKrestu weqiniso awazibandakanyi eemgurugurwini yephasi; kunalokho athabela ubunye ngitjho nanyana labo abababhodileko basepini.
Okukuphela Komthombo Wesinqophiso Esingokomoya
7, 8. Isinqophiso seBhayibhili sifaka njani isandla ebunyeni bethu?
7 AmaKrestu wekhulu lokuthoma athabela ubunye ngombana woke afumana isikhuthazo emthonjeni ofanako. Bekatjheja bona uJesu gade afundisa begodu anqophisa ibandla ngesihlopha esibusako, esakhiwa bapostoli namadoda amadala eJerusalema. Amadoda azinikeleko la asekela iinqunto zawo eLizwini lakaZimu aberegisa nababonisi abakhambako bona badlulisele iinqophiso zawo emabandleni aseenarheni ezinengi. Malungana nabanye ababonisi abanjalo, iBhayibhili ithi: “Nebakhambako hlangana nemizi batjela abazalwana iimthetho eyenzwe bapostoli neenkhulu ngeJerusalema.”—IZe. 15:6, 19-22; 16:4.
8 Ngokufanako namhlanjesi, iSihlopha Esibusako esakhiwa maKrestu azeswe ngomoya sifaka isandla ebunyeni bamabandla wephasi loke. ISihlopha Esibusako sirhatjha iincwadi ezikhuthazako ngokomoya ngeenlimi ezinengi. Ukudla okungokomoyokhu kusekelwe eLizwini lakaZimu. Ngalokho, okufundiswako akuveli emntwini kodwana kuvela kuJehova.—Isa. 54:13.
9. Umsebenzi esiwunikelwe nguZimu usirhelebha njani bona sibe nobunye?
9 Ababonisi abamaKrestu nabo bathuthukisa ubunye ngokudosa phambili ekutjhumayeleni. Umoya wetjhebiswano ohlanganisa labo ababerega ndawonye ekonzweni kaZimu uqine khulu kunomoya ohlanganisa abahlangana ndawonye ephasini. Ibandla lobuKrestu lakhelwa, ingasi bona liberege njengendlela yokuhlangana kwaphela, kodwana bonyana kudunyiswe uJehova kwenziwe nomsebenzi—umsebenzi wokutjhumayela iindaba ezimnandi, ukwenza abafundi nokwakhiwa kwamabandla. (Rom. 1:11, 12; 1 Tes. 5:11; Heb. 10:24, 25) Ngalokho, umpostoli uPowula gade angathi ngamaKrestu: “Nidzimelele entweni yinye, nilwe noke ngetjisakalo eyodwa, nilwela ikolo yevangeli.”—Fil. 1:27.
10. Ngiziphi ezinye iindlela esimunye ngazo njengabantu bakaZimu?
10 Njengabantu bakaJehova, sibumbene ngombana simukela ukubusa kwakaJehova, sithanda abanakwethu, sithembele eMbusweni kaZimu, begodu sihlonipha labo uZimu ababeregisa bona badose phambili. UJehova usirhelebha bona sihlule imikghwa ethileko yokungapheleli engafaka ubunye bethu engozini.—Rom. 12:2.
Ukuhlula Ukuzikhakhazisa Nekwele
11. Kubayini ukuzikhakhazisa kuhlukanisa abantu, begodu uJehova usirhelebha njani bona sikuhlule?
11 Ukuzikhakhazisa kuhlukanisa abantu. Umuntu ozikhakhazisako uthanda ukuziqala njengobhedere, ngokuvamileko ufumana ithabo ngokukghantjha. Kodwana lokhu kuvimbela ubunye; labo abezwa umuntu ozikhakhazisako bangaba nekwele. Umfundi uJakobosi usitjela ngokunqophileko: “Niyazigqaja, niyazigabazisa; koke lokho akukalungi kumbi.” (Jak. 4:16) Akusilithando ukuqalela abanye phasi. Ngokukhethekileko, uJehova sibonelo sokuthobeka ngombana uberegisana nabantu abangakapheleli abanjengathi. UDavidi watlola: “Kuthobeka kwakho [kwakaZimu] okungenza mkhulu.” (2 Sam. 22:36) ILizwi laZimu lisirhelebha bona sihlule ukuzikhakhazisa ngokusifundisa bona sicabange kuhle. UPowula waphefumulelwa bona abuze: “Ngubani owathi wena ungcono kunabanye na? Awukanikelwa nguZimu koke onakho na? Alo-ke ukhulumelani sengathi lokho onakho bekungasi sisipho na?”—1 Kor. 4:7.
12, 13. (a) Kubayini kubulula ukuba nomona? (b) Uba yini umphumela wokwamukela umbono kaJehova endleleni esiqala ngayo abanye?
12 Ikwele ingesinye isithiyo esivamileko sobunye. Ngebanga lokungapheleli esakuzuza njengelifa, soke ‘sinekwele,’ ngitjho namaKrestu asele anesikhathi eside angazizwa anesikhwele ngezinto ezithileko, ngalokho abanye abanakho, amalungelo namtjhana ngamakghono wabanye. (Jak. 4:5) Isibonelo, umzalwana onomndeni angaba nesikhwele ngamalungelo athabelwa sikhonzi sesikhathi esizeleko, ngaphandle kokutlhogomela bona isikhonzi sesikhathi esizeleko naso singaba nomonyana ngendoda enomkhaya nabantwana. Singawuvimbela njani umona onjalo bona ungathikazisi ubunye bethu?
13 Ukusirhelebha bona sibalekele umona, khumbula bona iBhayibhili imadanisa amalunga azesiweko webandla lobuKrestu namalungu womzimba womuntu. (Funda u-1 KwebeKorinte 12:14-18.) Isibonelo, namtjhana ilihlo lakho libonakala khulu kunehliziywakho, kokubili kuqakatheke khulu kuwe. Ngokufanako, uJehova uqala woke amalunga webandla njengaligugu ngitjho nanyana amanye ngesikhathi esithileko angabonakala khulu kunamanye. Ngalokho asimukeleni umbono kaJehova ngabafowethu. Kunobanyana sibe nomona ngabanye singabatjheja sibathabele. Ngokwenza njalo, sitjengisa umahluko ohlangana kwamaKrestu wamambala nalabo abasemasondweni weSingabukrestu.
ISingabukrestu—Ibonakala Ngokuhlukana
14, 15. UbuKrestu beenhlubuki bahlukana njani?
14 Ubunye bamaKrestu weqiniso buhlukile emgurugurwini ephakathi kwamasondo weSingabukrestu. Ngekhulu lesine leemnyaka, ubuKrestu beenhlubuki besele burhatjheke kangangobana umbusi weRoma omrhedeni wathoma ukubulawula, lokho kwaba nomthelela ekwakhekeni kweSingabukrestu. Ngalokho, ekuhlukaneni okwalandelako, iimbuso eemnengi yaphuma ngaphasi kweRoma yazakhela wawo amasondo woMbuso.
15 Eemnengi yeembuso leyo yalwa yodwa amakhulu weemnyaka. Hlangana nekhulu le-17 nele-18 leemnyaka, abantu beBritain, France, ne-United States bakhuthaza ukuzinikela eMbusweni yabo, ngalokho ubutjhaba, baba njengekolo. Phakathi nekhulu le-19 nelama-20 leemnyaka, ubutjhaba bathoma ukulawula ukucabanga kwabanengi esintwini. Emaswapheleni, amasondo weSingabukrestu, ahlukana aba ziinqhema ezinengi, inengi lawo libekezelela ubutjhaba. Abantu abasondako baya ngitjho nepini balwa nabasonda nabo bakwenye inarha. Namhlanjesi, iSingabukrestu ihlukaniswa kokubili ziinkolelo zeenqhema nobutjhaba.
16. Ngiziphi iindaba ezihlukanisa labo abayingcenye yeSingabukrestu?
16 Ngekhulu lama-20 leemnyaka, amakhulu weenqhema zamasondo weSingabukrestu athoma ijima lokwakha ubunye. Kodwana ngemva kokulinga amatjhumi weemnyaka, ambalwa amasondo abumbanako aba lisondo linye, begodu abasondako basahlukene eendabeni ezinjengokuzitjhugulukela kweemvelo, ukurhulula umbungu, ubutabani nokubekwa kwabafazi eenkhundleni emasondweni. Kezinye iingcenye zeSingabukrestu, abadosiphambili bamasondo balinga ukubumbanisa abantu bamasondo ahlukeneko ngokunyaza iimfundiso egade zibahlukanisa. Nokho, ukunyaza iimfundiso kubogabogisa ikholo labantu begodu ngokuqinisekileko akuwahlanganisi amasondo weSingabukrestu ahlukeneko.
Ukuhlula Ubutjhaba
17. Kwabikezelwa njani bona ukukhulekela kweqiniso kuzokwenza abantu babe munye “engcenyeni yokuphela yamalanga”?
17 Ngitjho nofana namhlanjesi isintu sihlukene khulu kunanini ngaphambili, ubunye buseselitshwayo labakhulekeli beqiniso. Umporofidi kaZimu uMika wabikezela: “Ngizobabeka ngobunye, njengomhlambi ngesibayeni.” (Mika 2:12) UMika wabikezela bona ukukhulekela kweqiniso kuzokuphakama ukudlula zoke ezinye iindlela zokukhulekela, kungaba kukhulekela abosingazimu nofana uMbuso. Watlola: “Engcenyeni yokuphela yamalanga intaba yendlu kaJehova izokujanyiswa ngokudzimeleleko esiqongolweni seentaba, ngokuqinisekileko izokuphakanyiswa ngaphezu kwemibundu; abantu bazokuthutheleka kiyo. Ngombana boke abantu, bazokukhamba omunye nomunye ngebizo lakazimakhe; kodwana thina sizokukhamba ngebizo lakaJehova uZimethu.”—Mika 4:1, 5.
18. Ukukhulekela kweqiniso kusirhelebhe bona senze maphi amatjhuguluko?
18 UMika godu wahlathulula indlela ukukhulekela kweqiniso okuzokuhlanganisa ngayo abantu egade bamanaba. “[Abantu abavela] eentjhabeni ezinengi ngokuqinisekileko bazokukhamba bathi: ‘Yizani, nina bantu, asikhuphukeleni entabeni kaJehova nendlini kaZimu kaJakobho; uzosifundisa ngeendlela zakhe, begodu sizokukhamba eendleleni zakhe.’ . . . Bazakwenza iinsabula zabo zibe malembe nemikhondwabo ibe ziinkere zokusika imithi. Ngekhe basaphakamisa isabula, isitjhaba sijamelane nesinye isitjhaba ngekhe zisafunda ukulwa.” (Mika 4:2, 3) Labo abalisa ukukhulekelwa kwabozimu abenziwe babantu nofana beentjhaba bona bamukele ukukhulekela uJehova bathabela ubunye bephasi zombelele. UZimu ubafundisa iindlela zethando.
19. Ukuhlanganiswa kweengidi zabantu ekukhulekeleni kweqiniso kubufakazi obukhanyako bani?
19 Ubunye bephasi loke bamaKrestu weqiniso namhlanjesi buhlukile begodu bubufakazi obukhanyako bokobana uJehova uragela phambili anqophisa abantu bakhe ngomoya wakhe. Abantu abavela kizo zoke iintjhaba benziwa munye ngezinga okungakhenge kwenzeke ngalo emlandweni wesintu. Lokhu kuzaliseka okukarisako kwalokho okutjhiwo yiSambulo 7:9, 14, begodu kutjengisa bona iingilozi zakaZimu zizokutjhaphulula “imimoya” ezokutjhabalalisa iphasi elimbi lanamhlanje. (Funda ISambulo 7:9, 14, 1-4, 9, 10, 14.) Qala bona lilungelo elingangani ukuba yingcenye yobuzalwana bephasi loke! Ngamunye wethu angahlanganyela njani ekuthuthukiseni ubunye? Lokho kuzokucocwa ngakho esihlokweni esilandelako.
Ungaphendula Njani?
• Ukukhulekela kweqiniso kubahlanganisa njani abantu?
• Singawukhandela njani umona bona ungonakalisi ubunye bethu?
• Kubayini ubutjhaba bungabahlukanisi abakhulekeli beqiniso?
[Iimbuzo Yesifundo]
[Isithombe ekhasini 16]
AmaKrestu wekhulu lokuthoma gade avela eenzindeni ezihlukahlukeneko
[Iinthombe ekhasini 18]
Ukurhelebha kwakho ekwakheni amaWolo WoMbuso kubuthuthukisa njani ubunye?