Okubuzwa Bafundi Bakamagazini Lo . . .

UKayini Wamtholaphi Umkakhe?

▪ “Nengabe u-Adamu no-Efa gade banamadodana amabili, uKayini no-Abela, uKayini wamtholaphi-ke umfazi?” Nanyana lokhu kuvame ukubuzwa njengombuzo orarejako ngilabo abazaza iimfundiso zeBhayibhili, iBhayibhili inemininingwana eyaneleko ukunikela iimpendulo ezanelisako.

Izahluko-3 no 4 zakaGenesisi zisinikela ukwazisa okulandelako: (1) U-Efa “bekangumma wawo woke umuntu ophilako.” (2) Kwadlula isikhathi esithileko hlangana nokubelethwa kwakaKayini nokunikela kwakhe umnikelo owaliwa nguZimu. (3) Ukulandela ukuqothwa kwakhe bona abe “mkhambahlala nombaleki,” uKayini watshwenywa kukobana ‘nanyana ngubani ongamfumana’ angalinga ukumbulala. (4) UZimu wabeka itshwayo lokuvikela uKayini, ukutjengisa bona abantwana bakwabo nofana ezinye iinhlobo zakhe zingalinga ukumbulala. (5) “Ngemva kwalokho,” uKayini walala nomkakhe “enarheni yoBubaleki.”—Genesisi 3:20; 4:3, 12, 14-17.

Kusukela emaphuzwini avezwe ngehla, singaphetha ngokufaneleko ngokobana umkaKayini bekusizukulwana saka-Efa okungaziwako bona sabelethwa nini. UGenesisi 5:4 uveza bona phakathi kweemnyaka ema-930 yokuphila kwakhe, u-Adamu “waba nguyise wamadodana namadodakazi.” Kuliqiniso, iBhayibhili ayitjho ngokunqophileko bona umkaKayini bekayindodakazi ka-Efa. Kwamambala, iqiniso lokobana kukhulunywa ngaye ngemva kokuqothwa kwakaKayini kutjengisa bona kwadlula isikhathi esaneleko sokobana angaba ngitjho namzukulwana ka-Adamu no-Efa. Ngikho i-The Amplified Old Testament ihlathulula umkaKayini “njengomunye weenzukulwana zaka-Adamu.”

Umkhulumeli weBhayibhili wangekhulu letjhumi nethoba u-Adam Clarke walinganisa bona ukwenza kwakaZimu itshwayo ngebanga lokusaba kwakaKayini kwabangelwa kukobana besele kuneenzukulwana ezimbalwa zaka-Adamu—ezaneleko, “bona zakhe imizi eembalwa.”

Kweminye iimphakathi akucabangeki bona uKayini watjhada nodadwabo namtjhana esinye isizukulwana samuva saka-Adamu, esabelethwa ngokutjhadana kwamadodana namadodakazi ka-Adamu. Lokhu kungebanga lokobana into enjalo ilahlwa mphakathi namtjhana ngebanga loburhole obubangelwa lifuzo. Nanyana kunjalo, u-F. LaGard Smith wathi ku-The Narrated Bible in Chronological Order: “Kubonakala kufaneleka bona abantwana bomuntu bokuthomaba bathathane, ngaphandle kokucabanga okungakafaneli kwalokho obekungenzeka nange ukuthathana okunjalo kwenzeka eenzukulwaneni ezilandelako.” Godu kuyabonakala bona lokhu bekunganandaba bekwaba ngo-1513 B.C.E. lokha uMosisi nafumana umthetho kaZimu oya esitjhabeni sama-Israyeli ogade utjho bona ukuhlangana ngokomseme kweenhlobo ezitjhidelene khulu gade kulahlwa ngokunqophileko.—Lefitikosi 18:9, 17, 24.

Namhlanjesi, sikude ngeenkulungwana zeemnyaka ekupheleleni ababelethi bethu bokuthoma abakhe baba nakho. Umphumela ifuzo elinawo kithi kungenzeka azange ubathinte. Ngaphezu kwalokho, iimfundo zamvanje, njengalezo ezagadangiswa ku-Journal of Genetic Counseling, zatjengisa bona ukuhlangana kweenhlobo ezitjhidelene khulu kuneengozi ezincani zokufumana abantwana abarholopheleko kunalokho egade kucatjangwa. Ngokunengqondo, iindaba ezinjalo bengekhe ziqalwe njengeziqakathekileko esikhathini sokuphila kwaka-Adamu namtjhana ngitjho nangaphambi kwesikhathi sakaNuwa. Ngalokho, singaphetha ngokobana umkaKayini gade kungomunye weenhlobo zakhe.