Uyahlanganyela Ekwenzeni IImhlangano YobuKrestu Ibe Ngeyakhako?
Uyahlanganyela Ekwenzeni IImhlangano YobuKrestu Ibe Ngeyakhako?
“Nanihlanganako, . . . akwenziwe koke ze kwakhiwe ibandla!”—1 KOR. 14:26.
1. NgoKwebeKorinte bokuthoma isahluko14, uyini umnqopho oqakathekileko weemhlangano yamaKrestu?
‘SAKHEKA-KE emhlanganweni lo!’ Wakhe wazizwa ngendlela efanako newubuya emhlanganweni eWolweni LoMbuso? Akunakuzaza bona wakhe wazizwa njalo! Kwamambala iimhlangano yebandla iimthombo wesikhuthazo, kodwana lokho akusirari. Ngaphezu kwakho koke, njengeenkhathini zamaKrestu wokuthoma, umnqopho oqakathekileko weemhlanganwethu namhlanjesi kuqinisa boke abakhona ngokomoya. Tjheja bona umpostoli uPowula wawugandelela njani umnqopho weemhlangano yamaKrestu encwadini yakhe yokuthoma eya eKorinte. Esahlukweni se-14 wakhuluma ngokubuyelelweko bona incenye ngayinye ethulwako eemhlanganweni yebandla kufuze ibe nomnqopho ofanako—“ze kwakhiwe ibandla.”—Funda u-1 KwebeKorinte 14:3, 12, 26. *
2. (a) Yini eyenza bona iimhlangano ibe ngeyakhako? (b) Ngimuphi umbuzo esizowucabangela?
2 Siyatjheja bona mumoya kaZimu owenza bona iimhlangano le ibe ngeyakhako nefundisako. Ngalokho-ke, sithoma umhlangano ngamunye ngokuthandaza kuJehova ngokusuka ehliziyweni, lapho sibawa uBabethu wezulwini bona ngomoyakhe ocwengileko abusise ukuhlangana kwethu. Nanyana kunjalo, siyazi bona woke amalunga webandla angahlanganyela ekwenzeni umhlangano ube ngowakhako ngendlela angakghona ngayo. Alo-ke, ngimaphi amanye amagadango umuntu ngamunye angawathatha ukuqinisekisa bona iimhlangano yaqobe veke eba seWolweni LoMbuso ihlale iimthombo wokuqabuleka nesikhuthazo?
3. Iqakatheke kangangani iimhlangano yobuKrestu?
3 Ukuphendula, sizokuhlola ezinye iincenye zeemhlanganwethu okufuze zikhunjulwe ngilabo abaphatha iimhlangano leyo. Godu sizokucabangela bona ibandla liloke lingahlanganyela njani ekwenzeni iimhlangano ibe ngeyakhako kibo boke abakhona. Indaba le iqakatheke khulu kithi ngombana iimhlanganwethu iimbuthano ecwengileko. Kwamambala, ukuba khona nokuhlanganyela eemhlanganweni kuyincenye eqakathekileko yokukhulekela kwethu uJehova.—Rha. 26:12; 111:1; Isa. 66:22, 23.
Iimhlangano Yenzelwe Ukufunda IBhayibhili
4, 5. Uyini umnqopho weSifundo seSithalasokulinda?
4 Soke sifuna ukuzuza ngokuzeleko eSifundweni seSithalasokulinda saqobe veke. Ngalokho, ukuzwisisa umnqopho oyihloko womhlangano loyo, akhe sibuyekeze amatjhuguluko enziwa kumagazini ISithalasokulinda neenhlokweni ezifundwako.
5 Ibanga lokobana kubayini sibe neSifundo seSithalasokulinda qobe veke, kufunda iBhayibhili ngerhelebho lakamagazini lo. Kwamambala, eSifundweni sethu seSithalasokulinda saqobe veke, iLizwi lakaZimu ‘liyahlathululwa,’ begodu njengeenkhathini zakaNehemiya wekadeni, ‘liyakhanyiswa.’—Neh. 8:8; Isa. 54:13.
6. (a) Ngimaphi amatjhuguluko enziweko eSifundweni seSithalasokulinda? (b) Khuyini okufuzwe ikhunjulwe malungana nemitlolo ethi “funda?”
6 Njengombana iBhayibhili iyincwadethu eqakathekileko, kwenziwa amatjhuguluko eSifundweni seSithalasokulinda. Imitlolo eemnengi edzubhuliweko eenhlokweni ezifundwako ithi “funda.” Soke sikhuthazwa bona sivule iimBhayibhili zethu silandele ukufundwa kwemitlolo le neyifundwako emhlanganweni. (IZe. 17:11) Kubayini kufuze senze njalo? Nesibona isilayo sakaZimu eemBhayibhilini zethu, sisenza sibe nekareko edephileko. (Heb. 4:12) Ngalokho, ngaphambi kobana imitlolo enjalo ifundwe ngokuzwakalako, ophethe umhlangano kufuze anikele iinlaleli isikhathi esaneleko sokufumana imitlolo le nokulandela njengombana amavesi afundwa.
Kunesikhathi Esingeziweko Sokuveza Ikholo Lethu
7. Ngiliphi ithuba esinalo phakathi neSifundo seSithalasokulinda?
7 Godu elinye itjhuguluko elenziwe eenhlokweni ezifundwako zeSithalasokulinda bubude bazo. Eemnyakeni yamva-nje, zifitjhani. Ngalokho, phakathi neSifundo seSithalasokulinda kuberegiswa isikhathi esincani ukufunda iingaba bese kuba nesikhathi esinengi sokuphendula. Abanengi ebandleni nje banethuba lokuzwakalisa ikholo labo ngokuphendula iimbuzo etloliweko, nokuberegiswa kwemitlolo nangokulandisa okuhlangabezwane nakho okufitjhani okutjengisa ukuhlakanipha kokulandela iinkambisolawulo zeBhayibhili, namtjhana ngezinye iindlela. Esinye isikhathi kufuze siberegiselwe ukucoca ngeenthombe.—Funda AmaRhalani 22:22; 35:18; 40:9.
8, 9. Iyini indima yomphathi weSifundo seSithalasokulinda?
8 Nokho, isikhathi esingeziwekweso sokunikela iimpendulo ezihlukahlukeneko sizokuba khona kwaphela nengabe abaphendulako benza iimpendulo zabo zibe zifitjhani naloyo ophethe isifundo angakhulumi khulu hlangana neSifundo seSithalasokulinda. Ngalokho-ke, khuyini ezokurhelebha umphathi weSifundo seSithalasokulinda bona amede kuhle ukukhulumela kwakhe nokwebandla bonyana umhlangano ube ngowakhako kibo boke?
9 Ukuphendula, cabangela naku umfanekiso. ISifundo seSithalasokulinda esiragwe kuhle sifana nenyanda yamabhlomu ekarisako emehlweni. Inyanda leyo yenziwe ngamabhlomu amanengi ahlukahlukeneko, njengombana iSifundo seSithalasokulinda senziwa ziimpendulo ezinengi ezihlukahlukeneko. Njengombana ibhlomu nebhlomu enyandeni linobukhulu obungafaniko, nombala, ngalokho iimpendulo hlangana nomhlangano zihlukile ngobude nendlela ezibekwa ngayo. Alo-ke, iyini indima yomphathi wesifundo? Iimbono anande ayifaka ifana neenquntwana ezihlaza ezingezelelwe enyandeni yamabhlomu. Iinquntuntwanezi akusizo eziveleleko; kunalokho, zenzelwe bona inyanda le ibumbane yoke. Ngokufanako, loyo ophethe umhlangano kufuze akhumbule bona indimakhe, akusikunyaza iimpendulo zabanye, kodwana kubuka amezwi wokudumisa anikelwa libandla. Kwamambala, nengabe kuneempendulo ezihlukahlukeneko ezinikelwa libandla namaphuzu ambalwa anikelwa ngophethe iimhlangano ahlanganiswe kuhle akha inyanda ehle yamezwi azokuthabisa boke abakhona.
“Asinikeleni KuZimu Isihlabelo Sokudumisa”
10. AmaKrestu wokuthoma gade ayiqala njani iimhlangano yebandla?
10 Ihlathululo kaPowula yomhlangano wamaKrestu efumaneka ku-1 KwebeKorinte 14:26-33, isinikela umbono wokobana iimbuthano le gade iphathwa njani ekhulwini lokuthoma leemnyaka. Sikhuluma ngamavesi la, esinye isazi seBhayibhili satlola: “Into egade ibonakala khulu ngeemhlangano yamaKrestu (yokukhulekela) yangekhulu lokuthoma bekufuze kube kukobana pheze woke umuntu ubuya azizwa bona ube nelungelo nesibopho sokunikela okuthileko kiyo. Umuntu gade angezi anomnqopho wokulalela kwaphela; angazeli ukuzokufumana kwaphela kodwana nokupha.” Kwamambala, amaKrestu wokuthoma gade aqala iimhlangano yobuKrestu njengethuba lokuveza ikholo lawo.—Rom. 10:10.
11. (a) Khuyini enesandla khulu eemhlanganweni eyakhako, begodu kubayini? (b) Kulandela kuphi ukulinganisa okungathuthukisa iimpendulo zethu eemhlanganweni? (Qala umtlolo ophasi.)
11 Ukuveza ikholo lethu eemhlanganweni kunesandla khulu ‘ekwakhiweni kwebandla.’ Kwamambala uzokuvuma bona nanyana sineemnyaka eemnengi kangangani siba khona eemhlanganweni, kuhlala kulithabo ukulalela iimpendulo ezinikelwa bafowethu nabodadwethu. Sithintwa yipendulo esuka ehliziyweni yomuntu okhulileko, esikholwa naye othembekileko; sithatjiswa kutjhejisisa okwenziwa mdala okhathalelako; sikareka khulu nesizwa ipendulo yomntwana ephuma kuye etjengisa ithando lamambala ngoJehova. Kwamambala, ngokunikela iimpendulo, soke sihlanganyela ekwenzeni iimhlangano yobuKrestu ibe ngeyakhako. *
12. (a) Singafundani esibonelweni sakaMosisi noJeremiya? (b) Ngiyiphi indima umthandazo onayo ekunikeleni ipendulo?
12 Nokho, kilabo abaneenhloni, ukuphendula kungaba budisi khulu. Nengabe kunjalo ngawe, kungarhelebha ukwazi bona ubujamo bakho abusiyinto erarako. Eqinisweni, ngitjho neenceku zakaZimu ezinjengoMosisi noJeremiya zatjengisa ukunyaza amakghonwazo wokukhuluma enengini. (Eks. 4:10; Jer. 1:6) Nokho, njengombana uJehova arhelebha iinceku zekadenezi bona zimdumise enengini, uZimu uzokurhelebha bona unikele isihlabelo sokudumisa. (Funda amaHebheru 13:15.) Ungalifumana njani irhelebho lakaJehova lokuhlula ukusaba ukuphendula? Kokuthoma, ilungiselele kuhle iimhlangano. Bese, ngaphambi kobana uye eWolweni LoMbuso, thandaza kuJehova ngokukhethekileko umbawe bona akuphe isibindi sokuphendula. (Fil. 4:6) Ubawa into “emalungana nentando yakhe” ngalokho ungaqiniseka bona uJehova uzowuphendula umthandazwakho.—1 Jwa. 5:14; Iziy. 15:29.
Iimhlangano Enomnqopho ‘Wokwakha, Ukuqinisa Isibindi Nokudunduzela’
13. (a) Ngiwuphi umphumela iimhlanganwethu okufuze ibe nawo kilabo abakhona? (b) Ngiwuphi umbuzo oqakatheke ngokukhethekileko kwabadala?
13 UPowula wathi umnqopho oqakathekileko weemhlangano webandla ‘ukwakha, ukuqinisa isibindi nokudunduzela’ labo abakhona. * (1 Kor 14:3) Abadala abamaKrestu namhlanjesi bangaqiniseka njani bona iincenye zabo emhlanganweni zivuselela umoya wabafowabo nabodadwabo begodu zibatjhiye badunduzelekile? Ukuphendula, akhe sicabangele umhlangano uJesu awuphatha msinyana ngemva kokuvuswa kwakhe.
14. (a) Ngiziphi izenzakalo ezenzeka ngaphambi komhlangano owahlelwa nguJesu? (b) Kubayini kungenzeka abapostoli bazizwa batjhaphulukile uJesu ‘nekatjhidelako akhuluma nabo?’
14 Kokuthoma, tjheja izenzakalo ezenzeka ngaphambi komhlangano loyo. Ngaphambi kobana uJesu abulawe, abapostoli “bamtjhiya babaleka,” begodu njengombana kubikezelwe, ‘barhatjheka omunye nomunye waya kwakhe.’ (Mar. 14:50; Jwa. 16:32) Ngemva kokuvuka kwakhe, uJesu wamema abapostoli bakhe abadanileko bona babe khona emhlanganweni okhethekileko. * Basabela esimemweneso, “abafundi abalitjhumi nanye baya eGaleliya entabeni lapha uJesu abatjele bona baye khona.” Nebafikako, ‘uJesu watjhidela wakhuluma nabo.’ (Mat. 28:10, 16, 18) Cabanga bona kungenzeka bazizwa batjhaphuluke kangangani uJesu nekathatha igadango lokuthoma eliqakathekilekwelo! Wakhuluma ngani uJesu?
15. (a) Ngiyiphi indaba uJesu ayicabangelako, kodwana khuyini angakhenge acoce ngayo? (b) Umhlangano loyo wabathinta njani abapostoli?
15 UJesu wathoma ngokwenza isaziso: “Nginikelwe woke amandla.” Ngemva kwalokho wabanikela isabelo: “Khambani-ke, niye ebantwini boke nanyana kukuphi nibenze abafundi.” Emaswapheleni, wabanikela isiqinisekiso sethando: “Ngizahlala nginani njalo.” (Mat. 28:18-20) Kodwana uyatjheja bona khuyini uJesu angekhenge ayenze? Akhenge abathuke abapostoli bakhe; namtjhana ukuberegisa umhlangano loyo ukusola iimnqophwabo namtjhana ukubenza bazizwe banecala khulu ngokuqalisa ekubogabogeni kwekholo labo kwesikhatjhana. Kunalokho, uJesu wabaqinisekisa ngethando lakhe nelakaYise ngokubanikela isabelo esiqakathekileko. Indlela uJesu enza ngayo yabathinta njani abapostoli? Bakheka khulu, baqina isibindi, badunduzeleka kangangobana ngesinye isikhathi ngemva komhlangano loyo, “baraga ngokufundisa nangokutjhumayela iindaba ezimnandi.”—IZe. 5:42.
16. Abadala abamaKrestu namhlanjesi bamlingisa njani uJesu ekuphatheni iimhlangano emthombo wokuqabuleka?
16 Ukulingisa uJesu, abadala namhlanjesi baqala iimhlangano njengethuba lokuqinisekisa abakholwa nabo ngethando elingapheliko uJehova analo ngabantu bakhe. (Rom. 8:38, 39) Ngalokho, eencenyeni ebabelwe zona emhlanganweni, abadala baqala amandla wabafowabo, ingasi ukubogaboga kwabo. Abasoli iimnqopho yabafowabo. Kunalokho, lokho abakutjhoko kuveza bona baqala abakholwa nabo njengabantu abathanda uJehova nebafuna ukwenza okulungileko. (1 Tes. 4:1, 9-12) Liqiniso, abadala ngesinye isikhathi kutlhogeka bona banikela isiluleko esilungisako kilo loke ibandla, kodwana nengabe kunabambalwa kwaphela abafuna ukulungiswa, isiluleko esinjalo kubhedere sinikelwe ngeqadi kilabo ababandakanyekileko. (Gal. 6:1; 2 Thi. 2:24-26) Nebakhuluma nebandla loke, abadala bafuna ukubuka lapho kutlhogeka khona. (Isa. 32:2) Balwela ukukhuluma ngendlela yokobana ekupheleni komhlangano, boke abakhona bazizwe baqabulekile begodu banamandla. Mat. 11:28; IZe. 15:32.
Indawo Ephephileko
17. (a) Kubayini kuqakathekile kunanini ngaphambili bona iimhlangano yethu ibe yindawo yokuphephela? (b) Wena ngokwakho yini ongayenza ukwenza iimhlangano ibe ngeyakhako? (Qala ibhoksi elithi, “Iindlela Ezilitjhumi Zokwenza Iimhlangano Ibe Ngeyakhako Kuwe Nakwabanye.”)
17 Njengombana iphasi lakaSathana ligandelela khulu kunangaphambili, sifuna ukuqiniseka bona iimbuthanwethu yobuKrestu iyindawo ephephileko—umthombo wesikhuthazo kibo boke. (1 Tes. 5:11) Udade nendodakwakhe abakghodlhelelela iinlingo eziphikelelako eemnyakeni eyadlulako bayakhumbula: “Ukuba seWolweni LoMbuso bekufana nokuba sezandleni zakaJehova ezitlhogomelako. Hlangana nama-awara ebesilapho ngawo, sibhodwe bafowethu nabodadwethu abamaKrestu, besizizwa kwanga sibeke umthwalwethu kuJehova, begodu sithabela ukuthula kwangaphakathi okulinganiselweko.” (Rha. 55:22) Kwanga boke ababa khona emhlanganwenethu bangazizwa bakhuthazekile begodu badunduzelekile. Ukuqiniseka bona lokhu kuyenzeka, asirageleni phambili ekwenzeni incenyethu bonyana senze iimhlangano yobuKrestu ibe ngeyakhako.
[Imitlolo yaphasi]
^ isig. 1 Kwabikezelwa bona iincenye eziqakathekileko zeemhlangano yamaKrestu wekhulu lokuthoma zizokuphela. Ngokwesibonelo, ‘asisakhulumi ngeenlimi’ namtjhana ‘asisaporofidi.’ (1 Kor. 13:8; 14:5) Nanyana kunjalo, isinqophiso sakaPowula sisirhelebha bona sizwisise bonyana kufuze iphathwe njani iimhlangano yamaKrestu namhlanje.
^ isig. 11 Imininingwana yokobana singazithuthukisa njani iimpendulo zethu eemhlanganweni, qala INqabayokulinda, yakaSeptemba 1, 2003, amakhasi 19-22.
^ isig. 13 Ukutjengisa umehluko hlangana ‘nokuqinisa isibindi’ ‘nokudunduzela,’ i-Vine’s Expository Dictionary of Old and New Testament Words ihlathulula bona ibizo lesiGirigi elithi ‘ukudunduzela’ litjengisa isirhawu [kunokukhuthaza].—Madanisa noJwanisi 11:19.
^ isig. 14 Lesi kungenzeka bona sisenzakalo uPowula aqalisa kiso ngokukhamba kwesikhathi nekasithi uJesu “wabonakala ebazalwaneni abamakhulu amahlanu.”—1 Kor. 15:6.
Ungaphendula Njani?
• Iqakatheke kangangani iimhlangano yobuKrestu?
• Kubayini iimpendulo ezinikelwa eemhlanganweni zinesandla ‘ekwakheni ibandla’?
• Khuyini esingayifunda emhlanganweni uJesu aba nawo nabalandeli bakhe?
[Iimbuzo Yesifundo]
[Ibhoksi/Iinthombe ekhasini 26, 27]
IINDLELA EZILITJHUMI ZOKWENZA IIMHLANGANO IBE NGEYAKHAKO KUWE NAKWABANYE
Lungiselela kusesengaphambili. Newufunda kusesengaphambili lokho okuzokukhulunywa ngakho eWolweni LoMbuso, iimhlangano izokubamba ikarekwakho ngokuzeleko ikutjhiye uthabe tle.
Iba khona qobe. Njengombana inani elihle lababa khona likhuthaza kibo boke, ukuba khona kwakho kwenza umahluko.
Fika ngesikhathi. Newuhlala phasi ngaphambi kobana umhlangano uthome, ungahlanganyela engomeni yokuvula nomthandazo, okuyincenye yokukhulekela kwethu uJehova.
Iza uhlome kuhle. Iza neBhayibhilakho neencwadi ezizokuberegiswa hlangana nomhlangano bona uzokwazi ukulandela nokuzuza bhedere kilokho okutjhiwoko.
Gegeda iinthikamezo. Isibonelo, funda iimlayezwakho kafunjathwako ngemva kweemhlangano ingasi hlangana nayo. Ngendlela leyo, ubekela izinto zomuntu ngenyama endawenazo efaneleko.
Hlanganyela. Abanengi nebaphendulako, abanengi bakhuthazwa bebakhiwe kuvezwa kwekholo ngeendlela ezingafaniko.
Yenza iimpendulo zakho zibe zifitjhani. Lokhu kunikela abanengi ngendlela ekungakghoneka ngayo ithuba lokuphendula.
Yenza izabelo zakho. Njengomfundi eSikolweni Sekonzo Sezulwini namtjhana njengomhlanganyeli eMhlanganweni Wekonzo, lungiselela kuhle, buyekeza kusesenesikhathi, begodu linga ngamandla ukungaphundwa zizabelo zakho.
Buka ababe nencenye. Tjela ababe nencenye emhlanganweni namtjhana abaphendulileko bona umzamabo uthokozwa khulu.
Zihlanganise nabanye. Ukulotjhisa ngomusa neengcoco ezakhako ngaphambi nangemva kweemhlangano kungeza likhulu ethabweni neenzuzweni eziza ngokuba khona kiyo.