Umthandazo

3 Kufuze Sithandaze Njani?

NEKUZIWA emthandazweni, iinkolo ezinengi zidzimelela eencenyeni ezingokwenyama zomthandazo, njengendlela okufuze umuntu ajame ngayo nekathandazako, amezwi okufuze awatjho, nemikhutjana okufuze ayilandele. Nanyana kunjalo, iBhayibhili isirhelebha bona singatjheji khulu izinto ezinjalo kodwana siqale iincenye eziqakathekileko zombuzo othi, “Kufuze sithandaze njani?”

IBhayibhili iveza iinceku zakaZimu ezithembekileko zithandaza ziseendaweni ezihlukahlukeneko nebujamweni obuhlukahlukeneko. Zithandaza buthule namtjhana ngokuzwakalako kuye ngendlela ubujamo obuzivumela ngayo. Zithandaza ziqale phezulu emafini namtjhana zikhothamile. Kunokuberegisa iinthombe, iimncamo namtjhana iincwadi zomthandazo njengeenqophiso, zithandaza ngokusuka ehliziyweni ngamezwazo. Khuyini eyenza iimthandazwazo izwiwe nguZimu?

Njengombana kuveziwe esihlokweni esigadungileko, zinqophisa iimthandazwazo kuZimu oyedwa kwaphela—uJehova. Kunelinye iphuzu eliqakathekileko. Kweyoku-1 KaJwanisi 5:14 siyafunda: “Sibandamela kuZimu ngesibindi, ngombana siyazi bona uyasizwa nasimbawa nayini emalungana nentando yakhe.” Iimthandazwethu kufuze ivumelane nentando kaZimu. Kutjho ukuthini lokho?

Bona sithandaze ngokuvumelana nentando kaZimu, kufuze siyazi bonyana iyini. Ngalokho, isifundo seBhayibhili siyincenye eqakathekileko yomthandazo. Lokhu kutjho bona uZimu akazusizwa nesingasizo izazi zeBhayibhili? Awa, kodwana uZimu ulindele bona sifunde ngentando yakhe, sifune ukuyizwisisa senze ngokuvumelana nayo. (Matewu 7:21-23) Kufuze sithandaze ngokuvumelana nalokho esikufundako.

Njengombana sifunda ngoJehova nentando yakhe, siyakhula ekholweni—okungenye incenye eqakathekileko emthandazweni. UJesu wathi: “Nanikholwako, nizakwamukela koke enikubawako ngomthandazo.” (Matewu 21:22) Ikholo alitjho ukukhohliseka lula. Kunalokho, litjho ukukholelwa entweni ngitjho nanyana ingabonakali, esekelwa bufakazi obuqinileko. (KumaHebheru 11:1) IBhayibhili inobufakazi obuzeleko bokobana uJehova, esingeze sambona, ukhona, singamthemba, begodu uzimisele ukuphendula iimthandazo yalabo abanekholo kuye. Ngaphezu kwalokho, singahlale simbawa ikholo elingeziweko, begodu uJehova uyakuthanda ukusipha esikutlhogako.—Luka 17:5; KaJakobosi 1:17.

Nokho nasi enye incenye eqakathekileko yokobana  kufuze sithandaze njani. UJesu wathi: “Akakho noyedwa ozakuya kuBaba ngaphandle kwami.” (Jwanisi 14:6) Ngalokho, uJesu uyindlela esingatjhidela ngayo kuBaba, uJehova. UJesu watjela abalandeli bakhe bona bathandaze ebizweni lakhe. (Jwanisi 14:13; 15:16) Lokhu akutjho bona kufuze sithandaze kuJesu. Kunalokho, sithandaza ngebizo lakaJesu, sikhumbula bona uJesu uyindlela yokobana sikwazi ukutjhidela kuBabethu opheleleko nocwengileko.

Abalandeli bakaJesu abaseduze bakhe bambawa: “Kosi, sifundisa ukuthandaza.” (Luka 11:1) Ngokukhanyako, bebangabawi izinto esele sikhulume ngazo. Bebafuna ukwazi kwamambala ngalokho okumumethwe mthandazo loyo—eqinisweni bathi, ‘Khuyini okufuze siyithandazele?’

[Umkhangiso osekhasini 6]

Iimthandazo ephumelelako ngileyo evumelana nentando kaZimu, eyenziwa ngekholo neyenziwa ngebizo lakaJesu