Umthandazo

4 Khuyini Esingayithandazela?

UBIZWE ngokobana mthandazo obuyelelwa khulu kinayo yoke iimthandazo yamaKrestu. Bona lokho kuliqiniso namtjhana awa, umthandazo kaJesu osibonelo—ngezinye iinkhathi obizwa ngokobana Mthandazo weKosi namtjhana uBabethu wezulwini—uhlangana neminye abantu abangayizwisisiko. Iingidi zabantu zitjho amezwawo ngokubuyelelweko ilanga nelanga, mhlamunye kanengi phakathi kwelanga. Kodwana uJesu gade angakanqophi bona umthandazo lo uberegiswe njalo. Sikwazi njani lokho?

Ngaphambi kokulandisa umthandazo loyo, uJesu wathi: “Nenithandazako ningabuyeleli izinto ezifanako.” (Matewu 6:7, NW) UJesu waragela phambili na ngokuziphikisa abeka irhelo lamezwi bona akhunjulwe begodu abuyelelwe? Akusinjalo! Kunalokho, uJesu gade asifundisa bona khuyini esingayithandazela, asinikela nerhelo lezinto eziza qangi esingazikhumbula nesithandazako. Akhe siqalisise lokho akutjhoko. Umthandazo lo utlolwe kuMatewu 6:9-13.

“Baba wethu osezulwini: Ibizo lakho alicwengiswe.”

Ngalokho, uJesu wafundisa abalandeli bakhe bona yoke iimthandazo kufuze inqotjhiswe kuYise, uJehova. Kodwana uyazi bona kubayini ibizo lakaZimu liqakatheke kangaka nokobana kubayini kufuze licwengiswe?

Kusukela ekuthomeni komlando wesintu, ibizo lakaZimu elicwengileko lanyefulwa. Inaba lakaZimu, uSathana, labiza uJehova bona Mbusi onamala nomarhamaru onganalungelo lokubusa iimbunjwa Zakhe. (Genesisi 3:1-6) Abanengi bajama noSathana, bafundisa bona uZimu akanabuntu, unelunya begodu bala bona kunoMbumbi. Abanye basahlela ngitjho nebizo lakhe ngokwalo, basusa ibizo lakaJehova eemBhayibhilini begodu bala bona liberegiswe.

IBhayibhili ithi uZimu uzokulungisa koke ukungalungokhu. (Ezekiyeli 39:7) Ngokwenza njalo, uzokuzalisa zoke iintlhogo zakho ararulule nayo yoke iimrarwakho. Uzokwenza njani lokho? Amezwi alandelako emthandazweni kaJesu anikela iimpendulo.

“Umbuso wakho awuze.”

Namhlanjesi, kunokutjharagana okunengi hlangana nabafundisi bekolo malungana noMbuso kaZimu. Kodwana njengombana iinlaleli zakaJesu bezazi, abaporofidi bakaZimu babikezela bona uMesiya, uMphulusi okhethwe nguZimu, uzokubusa uMbuso ozokutjhugulula  iphasi. (Isaya 9:6, 7; Danyela 2:44) Kodwana uzokucwengisa ibizo lakaZimu ngokuveza uSathana njengomleyimala bese uyamsusa nayo yoke iimsebenzakhe. UMbuso kaZimu uzokuphelisa ipi, ukugula nendlala—ngitjho nokufa ngokwakho. (AmaRhalani 46:9; 72:12-16; Isaya 25:8; 33:24) Newuthandazela uMbuso kaZimu bona uze, uthandazela bona zoke iinthembiswezi zibe liqiniso.

“Intando yakho ayenziwe ephasinapha njengezulwini.”

Amezwi kaJesu alinganisa bona intando kaZimu, ngokuqinisekileko izokwenziwa ephasinapha njengombana yenziwa ezulwini, lapho kuhlala khona uZimu. Intando kaZimu ibonakala inganakuvinjelwa ezulwini; lapho, iNdodana kaZimu yalwa noSathana nalabo abamsekelako, yabalahlela ephasini. (ISambulo 12:9-12) Isibawo sesithathu somthandazo osibonelo, njengezokuthoma eembili, sisirhelebha bona sidzimelele eentweni eziqakatheke khulu—ingasi entandwenethu, kodwana kweyakaZimu. Yintando yakhe ngaso soke isikhathi eletha okuhle khulu kizo zoke iimbunjwa. Ngalokho, ngitjho nendoda epheleleko uJesu yathi kuYise: “Ingasingentando yami kodwana ngentando yakho.”—Luka 22:42.

‘Usiphe namhlanjesi ukudla kwethu esikutlhogako.’

UJesu ngokulandelako wathi singathandaza nangeentlhogo zethu ngenyama. Akunantwembi ngokuthandaza kuZimu ngeentlhogo zethu zelanga nelanga. Eqinisweni, ukwenza njalo kusikhumbuza bona uJehova nguye kwaphela ‘ophako ubuphilo nokuphefumula nakho koke ebantwini.’ (IZenzo 17:25) IBhayibhili iveza bona mbelethi onethando othabela ukunikela abantwabakhe lokho abakutlhogako. Nokho, njengombelethi onethando, akasinikeli izinto ezingasizuzisiko.

“Usilibalele imitjhapho yethu.”

Umkoloda kwamambala uZimu na? Uyakutlhoga ukulitjalelwa nguye? Abanengi namhlanjesi abasazi bonyana khuyini isono nokobana siyinto embi khulu. Kodwana iBhayibhili ifundisa bona isono ngunobangela weemrarwethu eemnengi, singunobangela osisekelo wokufa kwesintu. Njengombana sibelethwe sizizoni, kanengi soke siyona, begodu okukuphela kwethemba lethu lengomuso elingapheliko lisemandleni wokuthethelelwa nguZimu. (KwebeRoma 3:23; 5:12; 6:23) Kuyatjhaphulula ukwazi bona iBhayibhili ithi: “Wena Jehova, umuhle begodu ukulungele ukulibalela.”—AmaRhalani 86:5.

‘Usiphuluse komumbi.’

Uyatjheja bona kurhabeke kangangani bona ufune isivikelo sakaZimu? Abanengi bayala ukukholelwa bona ‘omumbi,’ uSathana, kwamambala ukhona. Kodwana uJesu wafundisa bona uSathana mumuntu wamambala, ambiza nangokobana ‘mbusi wephaseli.’ (Jwanisi 12:31; 16:11) USathana wonakalisa iphasi alibusakweli, begodu angakuthanda khulu ukukonakalisa nawe, akususe ekuhlawuleleni ubuhlobo obuseduze noYihlo, uJehova. (1 KaPitrosi 5:8) Nokho, uJehova unamandla khulu kunoSathana begodu uyakuthabela ukuvikela labo abamthandako.

Ukurhunyezwa kwamaphuzu aqakathekileko la womthandazo kaJesu osibonelo akuhlanganisi zoke izinto esingazithandazela. Khumbula, yoku-1 KaJwanisi 5:14 isitjela lokhu malungana noZimu: “Uyasizwa nasimbawa nayini emalungana nentando yakhe.” Ngalokho ungatshwenyeki bonyana iimrarwakho oyithandazela kuZimu ayazisi.—1 KaPitrosi 5:7.

Nokho, kuthiwani ngesikhathi nendawo? Kuyatshwenya na bona sithandaza nini begodu kuphi?