Umthandazo

7 UZimu Uzowuzwa Abe Awuphendule?

UMBUZO ongehla lo uletha ithabo ebantwini begodu ubenza bafune ukwazi. IBhayibhili itjengisa bona uJehova uyayilalela iimthandazo namhlanje. Bona uyayizwa yethu namtjhana awa kudzimelele khulu kithi.

UJesu wabalahla abadosiphambili bekolo bangesikhathi sakhe ebebathandaza ngokuzenzisa; bakhathalela kwaphela ukubonakala balungile ebantwini. Wathi amadoda layo azowufumana ‘umvuzo wawo ngokuzeleko,’ okutjho bona bazokufumana lokho abakufuna khulu, ukubukwa babantu, kodwana ingasi abakutlhogako, ukuzwiwa nguZimu. (Matewu 6:5) Ngokufanako namhlanje, abanengi bathandaza ngokwentando yabo ingasi kaZimu. Ngokungatjheji kwabo iinkambisolawulo zeBhayibhili esicoce ngazo, uZimu akazubezwa.

Nokho, kuthiwani ngawe? UZimu uzoyizwa bekayiphendule na iimthandazwakho? Bona uZimu uzoyiphendula iimthandazwakho namtjhana awa akuyi ngobuhlanga, ubutjhaba nofana ubujamo bakho emphakathini. IBhayibhili iyasiqinisekisa: “UZimu uphatha boke abantu ngokulingana, kodwana loyo omesabako, enze koke okulungileko wamukelekile kuye nanyana angewaliphi itjhaba.” (IZenzo 10:34, 35) Amezwi la ahlathulula wena? Newusaba uZimu, kutjho bona uzomhlonipha usabe nokumkwatisa. Newuberega ngokulunga, ufuna ukwenza lokho uZimu athi kulungile kunokulandela intandwakho namtjhana yabanye. Uyafuna kwamambala bona uZimu alalele iimthandazwakho? IBhayibhili iyakutjengisa bona kufuze uthandaze njani bona uZimu ezwe iimthandazwakho. *

Kuliqiniso, abanengi bafuna uZimu aphendule iimthandazwabo ngokusimanga. Nokho, ngitjho neenkhathini zeBhayibhili uZimu gade angazenzi qobe iinkarisomraro. Ngezinye iinkhathi bekudlula amakhulu weemnyaka hlangana nekarisomraro etloliweko nelandelako. Ngaphezu kwalokho, iBhayibhili itjengisa bona iinkhathi zeenkarisomraro zaphela ngemva kweenkhathi zabapostoli. (1 KwebeKorinte 13:8-10) Ngalokho-ke, lokhu kutjho bona uZimu akasayiphenduli iimthandazo yethu namhlanjesi? Awa, akusinjalo! Cabangela iimthandazo ayiphendulako.

UZimu usipha ukuhlakanipha. UZimu uMthombo oqakathekileko wokuhlakanipha koke kweqiniso. Uyaphana ngakho, ukuhlanganyela nalabo abafuna isinqophiso sakhe nalabo abafuna ukuphila ngaso.—KaJakobosi 1:5.

UZimu usipha umoya ocwengileko nazo zoke iinzuzo zawo. Umoya ocwengileko umamandla kaZimu aberegako. Awekho amandla amakhulu ukudlula la. Ungasirhelebha sikghodlhelelele iinlingo. Ungasizalisa ngokuthula nesisemrarweni. Ungasirhelebha sihlawulele ezinye iimfanelo ezihle nezithandekako. (KwebeGalatiya 5:22, 23) UJesu waqinisekisa abalandeli bakhe bona uZimu uphana ngesiphwesi ngesandla esivulekileko.—Luka 11:13.

UZimu ubanikela ilwazi labo abamfuna ngetjiseko. (IZenzo 17:26, 27) Ephasini mazombe, kunabantu abalifuna kwamambala iqiniso. Bafuna ukwazi ngoZimu—bona ngubani ibizo lakhe, uyini umnqophwakhe ngephasi nangesintu, nokobana bangatjhidela njani kuye. (KaJakobosi 4:8) AboFakazi BakaJehova kanengi bahlangana nabantu abanjalo begodu bayakuthabela ukuhlanganyela nabo iimpendulo zeBhayibhili zeembuzo enjalo.

Uwufumene ngebangelo na umagazini lo? Ufuna ilwazi ngoZimu? Mhlamunye le yindlela aphendula ngayo umthandazwakho.

[Umtlolo waphasi]