Batjha—Nizakwenzani Ngepilo Yenu?

“Ngikho ngilingisa umbethi wesidubulo ongakhuthi abethe umoya.” —1 KOR. 9:26.

1, 2. Newuzakuba ngophumelelako newukhulela ebudaleni, khuyini oyitlhogako?

NENGABE uzokukhamba endaweni ongayaziko, ungafuna ukukhamba nomebhe nekhampasi. Umebhe uzokurhelebha ubone indawo okiyo begodu ukurhelebhe ukukutjengisa lapho uya khona. Ikhampasi yona izokurhelebha bona ungaphambuki endleleni. Nokho, kokubili umebhe nekhampasi angeze kwaba lisizo nengabe awukwazi lapho ukhona. Bona ugegede ukugelagela unganamnqopho, kufuze wazi kuhle bona uyaphi.

² Uqalene nobujamo obufanako newukhulela ebudaleni. Unakho kokubili umebhe nekhampasi. IBhayibhili umumebhe ongakurhelebha bona uhlophise ipilwakho ngendlela efaneleko. (Iziy. 3:5, 6) Nesibandulwe kuhle, isazelo sakho singaba lirhelebho khulu ekukubekeni endaweni efaneleko. (Rom. 2:15) Singafana nekhampasi. Nokho, bona ipilwakho iphumelele, utlhoga ukwazi bonyana uyaphi. Utlhoga iimnqopho ekhanyako.

3. Ngiziphi iinzuzo zokuba neemnqopho uPowula aqalise kizo kweyoku-1 KwebeKorinte 9:26?

³ Umpostoli uPowula wabalula iinzuzo zokuzibekela iimnqopho nokulinga ngamandla ukuyifikelela natlola athi: “Ngikho lokhu ngigijima thwi ngiphikelela ekunqopheni, ngikho ngilingisa umbethi wesidubulo ongakhuthi abethe umoya.” (1 Kor. 9:26) Nengabe uneemnqopho, ungagijima ngokuzithemba. Ingasi kade, kuzokutlhogeka bona wenze iinqunto eziqakathekileko malungana nokukhulekela, umberego, umtjhado nomndeni nesidzubhula okumbalwa. Ngezinye iinkhathi, ungazizwa kwanga uqalene nokukhetha okuraranisako. Kodwana nengabe uhlophisa ipilwakho kusesenesikhathi, usekela iinqunto zakho emaqinisweni neenkambisolawulweni ezifumaneka eLizwini lakaZimu, angeze walingeleka ekukhambeni endleleni engasiyo.—2 Thi. 4:4, 5.

4, 5. (a) Khuyini engenzeka newungazibekeli iimnqopho? (b) Kubayini ukukhetha kwakho kufuze kunqotjhiswe sifiso sakho sokuthokozisa uZimu?

⁴ Newungazibekeli iimnqopho, iintanga zakho nabothitjhere kungenzeka babe nomthelela ekukwenzeni bona ukhethe lokho bona abacabanga bonyana kukulungele. Kuliqiniso, ngitjho nanyana uneemnqopho ethileko, abanye basese nokufaka iimbonwabo. Newulalela lokho abakutjhoko, zibuze, ‘Iimnqopho abayibekako ingangirhelebha na bona ngikhumbule uMbumbi wami ngisesemutjha namtjhana izongithikazisa ekwenzeni njalo?’—Funda UMtjhumayeli 12:1.

⁵ Kubayini ukukhetha kwakho ekuphileni kunqotjhiswa sifiso sokuthokozisa uZimu? Elinye ibanga kukobana uJehova usiphe koke okuhle esinakho. (Jak. 1:17) Kuliqiniso, omunye nomunye kufuze athokoze uJehova. (ISam. 4:11) Ngiyiphi indlela ongatjengisa ngayo ukuthokoza uJehova kunobanyana umkhumbule newenza iinqunto? Akhe sicabangele bona ngimiphi iimnqopho okufanele siyifikelele nalokho esingakwenza bona siyifikelele.

 Ngimiphi Iimnqopho Ongazibekela Yona?

6. Ngimuphi umnqopho oqakathekileko ongawubeka, begodu kubayini?

⁶ Njengombana kutjengiswe esihlokweni esigadungileko, umnqopho oqakathekileko osisekelo ongawubeka, kukuzibonela ngokwakho bona lokho okutjhiwo yiBhayibhili kuliqiniso. (Rom. 12:2; 2 Kor. 13:5) Iintanga zakho zingakholelwa ekuzitjhugulukeleni kweemvelo namtjhana eemfundisweni ezihlukahlukeneko zamala zekolo ngombana abanye bazitjele bona lokho ngikho okufuze bakukholelwe. Nokho, akukafuzi ukholelwe entweni ethileko ngombana abanye bafuna wenze njalo. Khumbula, uJehova ufuna umkhulekele ngomkhumbulwakho woke. (Funda uMatewu 22:36, 37.) UBabethu wezulwini ufuna bona wakhe ikholo lakho entweni enobufakazi.—Heb. 11:1.

7, 8. (a) Kubeka miphi iimnqopho yesikhathi esifitjhani okuzokurhelebha bona uqinise ikholo lakho? (b) Khuyini ezokwenzeka njengombana ufikelela iimnqophwakho yesikhathi esifitjhani?

⁷ Ukukurhelebha uthuthukise ikholo lakho, kubayini ungazibekeli iimnqopho ongakwazi ukuyifikelela ngesikhathi esifitjhani? Omunye umnqopho kungaba kuthandaza qobe langa. Ukukurhelebha bona ubulunge iimthandazwakho inqophile begodu ingabuyeleli, ungawukhumbula namtjhana utlole phasi izinto ezenzeke phakathi nelanga. Qiniseka bona awutjho ubudisi oqalene nabo kwaphela kodwana godu nezinto ozithabeleko. (Fil. 4:6) Omunye umnqopho kufunda iBhayibhili qobe langa. Uyazi bona newufunda amakhasi amane ngelanga ungaqeda yoke iBhayibhili ngomnyaka owodwa kwaphela? * AmaRhalani 1:1, 2 athi: ‘Babusisiwe labo . . . abathabela umlayo wakaSokulunga, bawukhumbule imini nobusuku.’

⁸ Umnqopho wesithathu omfitjhani ongazibekela wona kulungiselela ipendulo kiyo yoke iimhlangano yebandla. Kokuthoma, ungathanda ukufunda iimpendulo namtjhana umtlolo. Ngokukhamba kwesikhathi, ungaba nomnqopho wokuphendula ngamazwakho. Kwamambala, esinye nesinye isikhathi ophendula ngaso, wenza isipho kuJehova. (Heb 13:15) Nesele ufikelele eminye yeemnqopho le, ukuzithemba kwakho kuzokukhula, njengombana uthokoza uJehova, begodu uzokulungela ukubeka iimnqopho yesikhathi eside.

9. Nengabe awukabi mtjhumayeli woMbuso, ngimiphi iimnqopho yesikhathi eside ongazibekela yona?

⁹ Ngimiphi iimnqopho yesikhathi eside ongazibekela yona? Nengabe awukathomi ukutjhumayela iindaba ezihle nebandla, umnqopho wakho wesikhathi eside ungaba kukuba mtjhumayeli woMbuso. Nesele ufikelele umnqopho ohloniphekako lo, uzokufuna ukuba khona qobe ube lirhelebho, ungaphundwa yinyanga ungayi ekonzweni. Godu uzokufuna ukufunda ukuberegisa iBhayibhili ekonzweni. Njengombana wenza njalo, kungenzeka uzokufumana bona uwuthabela khulu umsebenzi wokutjhumayela. Ungandisa isikhathi osiberega emsebenzini wendlu nendlu namtjhana uzimisele ukuraga isifundo seBhayibhili. Njengomtjhumayeli ongakabhabhadiswa, ngimuphi umnqopho obhedere ongaba nawo kunobanyana ufanelekele ukubhabhadiswa begodu ube nguFakazi kaJehova uZimu obhabhadisiweko?

10, 11. Ngimiphi iimnqopho yesikhathi eside abatjha ababhabhadisiweko abangazibekela yona?

¹⁰ Nengabe sewuyinceku kaJehova ebhabhadisiweko, nasi eminye iimnqopho yesikhathi eside ongazibekela yona. Ngeenkhathi ezithileko ungafuna ukurhelebha amabandla ukutjhumayela isimu angayiberegi qobe. Godu ungakhetha ukuberegisa amandlakho nepilwakho ehle ebuphayoneni besigiyani namtjhana besikhathi esizeleko. Amatjhumi weenkulungwana zamaphayona athabileko azokutjela bona ikonzo  yesikhathi esizeleko yindlela ezuzisako yokukhumbula uMbumbi wakho esikhathini sobutjha bakho. Le, minqopho ongayifikelela usahlala ekhaya. Ibandla lekhenu nalo lingazuza ngokufikelela kwakho iimnqopho le.

¹¹ Eminye iimnqopho yesikhathi eside ingenza bona usuke ebandleni lekhenu. Isibonelo, ungahlela ukukhonza kwenye indawo namtjhana inarha lapho kunetlhogakalo ekulu khona. Ungafuna ukurhelebha ekwakhiweni kwamaWolo woMbuso namtjhana ama-ofisi wegatja eenarheni ezingaphandle. Ungakwazi nokungenela ikonzo yeBethel namtjhana ube sithunywa sevangeli. Kwamambala, umqopho wokuthoma oqakathekileko ozokufuna ukuwufikelela ngaphambi kobana udlulele eemnqophweni yesikhathi eside okukhulunywe ngayo la, kubhabhadiswa. Nengabe awukabhabhadiswa, cabanga bona khuyini ebandakanyekileko ekufikeleleni umnqopho oqakathekileko lo epilwenakho.

Ukufikelela Umnqopho Wokubhabhadiswa

12. Kubayini abanye babhabhadiswa, begodu kubayini lokho kungakaneli?

¹² Ungawuhlathulula njani umnqopho wokubhabhadiswa? Abanye bangacabanga bona kungakuvikela bonyana ungaweli esonweni. Abanye bangazizwa kwanga kufuze babhabhadiswe ngombana iintanga zabo zibhabhadisiwe. Abanye abatjha bangafuna ukuthabisa ababelethi babo. Nokho, ukubhabhadiswa akusiso isibopho esikuvimbela ekwenzeni izinto ongathanda ukuzenza ngerhorhomejeni; namtjhana bona ubhabhadiswe ngombana abanye bafuna wenze njalo. Kufuze ubhabhadiswe nesele uzwisisa ngokuzeleko bona ukuba ngomunye waboFakazi BakaJehova kubandakanyani, nalokha nesele uqiniseka bona ukulungele begodu uzimisele ukuthatha umthwalo lo.—Mtj. 5:4, 5.

13. Kubayini kufuze ubhabhadiswe?

¹³ Elinye ibanga lokubhabhadiswa kukobana uJesu walayela abalandeli bakhe bona ‘benze abafundi . . . , bababhabhadise.’ Godu wabeka isibonelo ngokobana abhabhadiswe. (Funda uMatewu 28:19, 20; noMarkosi 1:9.) Ngaphezu kwalokho, ukubhabhadiswa ligadango eliqakathekileko kilabo abafuna ukuphuluswa. Ngemva kokukhuluma ngokwakha kwakaNuwa umkhumbi ozokuphulusa yena nomndenakhe kuKukhulamungu, umpostoli uPitrosi wathi: “Umbhabhadiso lo uyaniphulusa ngokuvuka kwakaJesu Krestu.” (1 Pit. 3:20, 21) Nokho, lokhu akutjho bona ukubhabhadiswa kufana netjhorensi leyo oba nayo nekungenzeka kuvele ingozi. Kunalokho, ubhabhadiswa ngombana uthanda uJehova begodu ufuna ukumkhonza ngehliziyo yakho yoke, nangomphefumulo wakho woke nangomkhumbulo wakho woke, nangamandla wakho woke.—Mar. 12:29, 30.

14. Kubayini abanye kungenzeka bazaze ukubhabhadiswa, kodwana khuyini ongaqiniseka ngayo?

¹⁴ Abanye bangazaza ukubhabhadiswa ngombana basaba bona kungenzeka basuswe ngokukhamba kwesikhathi. Unakho ukusaba okunjalo? Nekunjalo, ukusaba okunjalo akusikumbi. Kungatjho bona uyawazi umthwalo wefanelo oqakathekileko wokuba ngomunye waboFakazi BakaJehova. Kungenzeka mhlamunye kunelinye ibanga godu? Mhlamunye awukabukuqiniseka bona ukuphila ngeenkambisolawulo zakaZimu kuyindlela ebhedere yokuphila. Endabeni enjalo, ukucabanga ngeemphumela evelela labo abangazinakiko iinkambisolawulo zeBhayibhili kungakurhelebha wenze isiqunto. Ngakelinye ihlangothi, kungenzeka uyazithanda iinkambisolawulo zakaZimu kodwana awuzithembi bona ungakghona ukuphila ngokuvumelana nazo. Eqinisweni, lokho kungaba litshwayo elihle, lokutjengisa ukuthobeka. Ngaphezu kwalokho, iBhayibhili ithi zoke iinhliziyo zabantu abangakapheleli  ziyakhohlisa. (Jer. 17:9) Kodwana ungaphumelela ‘newuhlala uyelela ngokuvumelana nelizwi lakaZimu.’ (Funda AmaRhalani 119:9.) Nanyana ngimaphi amabanga akwenza uzaze ukubhabhadiswa, kufuze uwulungise umraro onjalo. *

15, 16. Ungazi njani bona ukulungele ukubhabhadiswa?

¹⁵ Nokho, ungazi njani bona ukulungele ukubhabhadiswa? Enye indlela kuzibuza iimbuzo enjenga le: ‘Ngingakghona ukuhlathulula iimfundiso ezisisekelo zeBhayibhili kwabanye? Ngiyahlanganyela ekonzweni ngitjho nanyana ababelethi bami bangekho? Ngiyawenza umzamo wokuhlanganyela kiyo yoke iimhlangano yobuKrestu? Ngingakghona ukukhumbula isehlakalo esikhethekileko engakwazi kiso ukubalekela ukugandelelwa ziintanga? Ngingakghona ukukhonza uJehova ngitjho nanyana ababelethi nabangani bami balisa ukwenza njalo? Ngakhe ngathandaza ngobuhlobo bami noZimu? Eqinisweni ngizinikele ngokupheleleko kuJehova ngomthandazo?’

¹⁶ Ibhabhadiso ligadango elitjhugulula ukuphila begodu akukafuzi lithathwe bulula. Uvuthwe ngokwaneleko na bona ucabangele igadango eliqakathekilekweli? Ukuvuthwa akusiyindaba yokukghona ukunikela iinkulumo ezihle esteji nofana iimpendulo phakathi komhlangano. Kufuneka ukghone ukwenza iinqunto ezisekelwe eenkambiswenilawulo zeBhayibhili. (Funda KumaHebheru 5:14.) Nengabe sewungakghona ukwenza njalo, ngalokho into ephambi kwakho lilungelo elikhulu kunawo woke—ukukhonza uJehova ngehliziyo yoke begodu uphile ngendlela etjengisa bona kwamambala uzinikele kuye.

17. Khuyini ezokurhelebha uqalane neenlingo ezingalandela ngemva kokubhabhadiswa kwakho?

¹⁷ Msinyana ngemva kokubhabhadiswa,  ungazizwa unetjisakalo ekulu yokukhonza uZimu. Nokho, msinyana ungaqalana neenlingo ezizokuhlahluba ikholo lakho begodu ziliqinise. (2 Thi. 3:12) Akukafuzi uzizwe ngasuthi kufuze uqalane neenlingwezo uwedwa. Funa isiluleko sababelethi bakho. Bawa abantu abavuthiweko ebandleni bona bakurhelebhe. Yenza ubungani nalabo abazokusekela. Ungakhohlwa bona uJehova uyakukhathalela, begodu uzokupha amandla owatlhogako ukuqalana nanyana ngibuphi ubujamo obungavela.—1 Pit. 5:6, 7.

Ungayifikelela Njani Iimnqopho Yakho?

18, 19. Ungazuza njani ekuhloleni izinto eziza qangi kuwe?

¹⁸ Ngitjho nanyana uneemnqopho emihle, lokhu kubonakala kwanga ngeze usaba nesikhathi esaneleko sokwenza ofuna notlhoga ukukwenza? Nekunjalo, kufuze uhlole izinto eziza qangi kuwe. Ukufanisa: Thatha ithunga leplastiki ufake amatje amakhulu ngaphakathi. Bese ulizalisa ngesanda. Kwanjesi uphethe ithunga elizele amatje nesanda. Kghuthula ithungelo bese ubulunga isanda namatje. Nje-ke, zalisa ithunga ngesanda qangi, bese linga ukubuyisela amatje layo ngethungeni. Asizokuba khona isikhala samatje, ngombana uthome ngokufaka isanda qangi.

¹⁹ Uqalene nobudisi obunjalo newuhlela isikhathi sakho. Newenza izinto ezinjengezokuzithabisa zize qangi, angekhe ube nesikhathi esaneleko sezinto eziqakathekileko ekuphileni kwakho—ezihlobene nokukhonza uZimu. Kodwana newulandela isiyeleliso seBhayibhili ‘sokuqiniseka ngezinto eziqakathekileko,’ uzokufumana bona unesikhathi sokukhonza uZimu nesokuzithabisa.—Fil. 1:10, NW.

20. Newunokutshwenyeka nokuzaza njengombana ulwela ukufikelela iimnqophako, khuyini okufuze ukwenze?

²⁰ Njengombana ulwela ukufikelela iimnqophwakho, kuhlanganise nokubhabhadiswa, kungenzeka ngezinye iinkhathi ube nokutshwenyeka nokuzaza. Nekwenzeka njalo, “phosa umthwalwakho phezu kwakaJehova, begodu yena uzakurhelebha.” (Rha. 55:22) Kwanjesi, unethuba lokuhlanganyela emberegweni othabisako noqakathekileko emlandweni wesintu, wejima lokutjhumayela nokufundisa ephasini mazombe. (IZe. 1:8) Ungakhetha bona ungahlanganyeli emberegweni lo ubukele abanye bawenza. Nofana ungaba nencenye emberegweni othabisako lo. Ungariyadi ekuberegiseni amakghonwakho ukuthuthukisa iinkareko zoMbuso. Angekhe uzisole ngokukhonza “uMbumbi wakho emihleni yobutjha bakho.”—Mtj. 12:1.

[Imitlolo yaphasi]

Ungaphendula Njani?

• Kubayini kufuze uzibekele iimnqopho?

• Ngimiphi eminye iimnqopho efanelekako bona uyifikelele?

• Kuhlanganisani ukufikelela iimnqopho yokubhabhadiswa?

• Ukuhlola izinto eziza qangi kungakurhelebha njani bona ufikelele iimnqophwakho?

[Imibuzo Yesifundo]

[Isithombe ekhasini 23]

Unomnqopho wokufunda iBhayibhili qobe langa?

[Isithombe ekhasini 24]

Ngisiphi isifundo osifunda emfanekisweni lo?