Ifihlo 1

Thanda Abantu, Ingasi Imali Nezinto Eziqalekako

KHUYINI OKUFUNDISWA YIBHAYIBHILI? “Ukuthanda imali kusisusa sakho koke okumbi.”—1 KuThimothi 6:10.

NGISIPHI ISITJHIJILO? Ababukisi basigandelela bona singaneliseki ngalokho esinakho. Bafuna siberege ngaso soke isikhathi bona sifumane imali esizoyiberegisa ekuthengeni izinto ezitja, ezibhedere nezikulu. Imali iyarhorha, begodu singawela lula ekuyithandeni. Nokho, iBhayibhili iyelelisa bona umuntu othanda uburego ngeze aneliseka. IKosi uSolomoni yatlola yathi: “Umthandi wesilivere ngeze aneliswa ngesilivere, nanyana ngubani omthandi woburego ngeze aneliswe yinzuzo engenako.”—UMtjhumayeli 5:10.

KHUYINI ONGAYENZA? Lingisa uJesu, ufunde ukuthanda abantu kunezinto eziqalekako. UJesu bekazimisele ukudela koke egade anakho—ngitjho nokuphila kwakhe—ngebanga lokuthanda abantu. (Jwanisi 15:13) Wathi: “Kukhona ithabo elikhulu ekupheni, kunekwamukeleni!” (IZenzo 20:35) Nesijayele ukupha abanye isikhathi sethu nezinto esinazo, bazokusabela ngendlela efanako. ‘Yiphani abanye, nani bazanipha.’ (Luka 6:38) Labo abalandelela imali nezinto eziqalekako bazibangela ubuhlungu nokutlhaga. (1 KuThimothi 6:9, 10) Ngakelinye ihlangothi, ukwaneliseka kwamambala kuza ngokuthanda abantu nokuthandwa babantu.

Kubayini ungaqali bona ungakghona na ukwenza ukuphila kwakho kube bulula? Ungakghona ukuphungula inani lezinto eziqalekako onazo namtjhana lezinto ofuna ukuzithenga? Newenza njalo, ungafumana bona unesikhathi esinengi namandla wokwenza izinto eziqakathekileko epilweni—njengokurhelebha abantu nokukhonza uZimu, okuphe koke onakho.—Matewu 6:24; IZenzo 17:28.

[Isithombe ekhasini 4]

‘Yiphani abanye, nani bazanipha’