Ifihlo 5

Yanelisa Iintlhogo Zakho Ezingokomoya

KHUYINI OKUFUNDISWA YIBHAYIBHILI? “Bayathaba abatlhogomela iintlhogo zabo zomoya.”—Matewu 5:3, NW.

NGISIPHI ISITJHIJILO? Kuneenkulungwana ezihlukahlukeneko zeenkolo, ezinengi zazo ezifundisa iindlela eziphikisanako zokwanelisa iintlhogo zakho ezingokomoya. Ungazi njani bona ngiyiphi efundisa iqiniso nethabisa uZimu kwambala? Abanye abatloli abadumileko bathi ukukholelwa kuZimu nokuzinikela kuye akunangqondo, kuyalimaza. Umagazini i-Maclean’s urhunyeza iimbono yomunye umtloli odumileko ngendlela le: “Umbono wobuKrestu, wokobana kunento engaphezu kwesayensi nengaphezu kwelwazi lethu . . . unyaza okukuphela kwepilo esinayo begodu usenza sibe nenturhu.”

KHUYINI ONGAYENZA? Hlola ubufakazi bokobana uZimu ukhona. (KwebeRoma 1:20; KumaHebheru 3:4) Ungavumeli nanyana ngubani bona akuqede amandla ekuqaleni iimpendulo zeembuzo eqakathekileko, enjengelandelako le: Kubayini sila? Kukhona ukuphila ngemva kokufa? Kubayini kunokutlhaga okungaka? Khuyini uZimu ayifunako kimi? Ukuthola kwakho iimpendulo ezanelisako zeembuzo leyo ligadango eliqakathekileko elizokurhelebha ufumane ukwaneliseka.

Nanyana kunjalo, ungakholelwa yoke into abanye abakutjela yona. ILizwi lakaZimu likukhuthaza bona uberegise “amandla wakho wokucabanga” ukuzibonela ngokwakho bonyana yini eyamukelekako kuye. (KwebeRoma 12:1, 2, NW) Uzokuthola umtlomelo ngokuzikhandla kwakho. Nengabe uzenzela isikhathi sokufunda iBhayibhili bewuberegise isiluleko sayo, uzokugegeda imiraro, unciphise ukugandeleleka, ukhulise nokuthabela kwakho ipilo. Lesi sithembiso ongasithemba. Iingidi zabantu bazo zoke iinzinda zizuza ngokufunda amaqiniso ngoZimu nangeenhloso zakhe.

Njengombana uzuza ekuberegiseni isiluleko seBhayibhili esihlakaniphileko, ukuzinikela kwakho kuZimu kuzokukhula. Kubayini ungamukeli isimemo sokufunda iBhayibhili naboFakazi BakaJehova? Newenza njalo, ungazifumana uvumelana nompostoli uPowula, owatlola: “Eqinisweni, okungiyo inzuzo ekulu kukobana simlotjhe uZimu, saneliswe ngilokho esinakho.”—1 KuThimothi 6:6.

[Isithombe ekhasini 8]

Zibonele ngokwakho bona yini eyamukelekako kuZimu