Kuneembunjwa Ezihlakaniphileko Endaweni Yemimoya—Kodwana Zibobani?

EYurobhu, isilukazana singena esondweni, siphethe irosari ngesandla, bese siguqa ngehlonipho phambi kwesithombe sakaMariya. E-Afrika, umndeni uthela utjwala eqadi kwethuna lelunga lomndeni elihloniphekako. E-Amerika, isokana liyazila belizindle, lithemba ukukhulumisana nengilozi elitlhogomelako. E-Asiya, umpristi utjhisa izinto ezenziwe ngephepha elimibalabala njengesihlabelo kukhokho wakhe womoya.

KHUYINI abantwaba abafana ngayo? Boke bakholelwa bona kuneembunjwa ezihlakaniphileko endaweni yemimoya okungakhulunywa nazo nezinamandla nomthelela omkhulu emaphilweni wabantu. Kwamambala, ikolelo le ayisiyitja begodu ayirari. Okurarako kukobana kunokuphikisana okunengi neembono malungana nalabo abahlala endaweni yemimoya.

AmaSulumani akhulekela uZimu oyedwa—u-Allah. * KwelobuSingabukrestu abantu bathi uZimu nguZiquntathu, owenziwa nguZimu uBaba, uZimu iNdodana noZimu uMoya Ocwengileko. AmaHindu akholelwa ekubeni khona kwabozimu abaduna nabasikazi abangaphezu kwekulungwana. Abanye abantu bathi imimoya ihlala kezinye iinlwana, imithi, amatje neemlanjana. Nanyana kunjalo, abanye badoswa ngezeendaba, ezikhipha iincwadi, amabhayisikobho namahlelo wakamabonwakude malungana neengilozi namadimoni, iimpuku nabozimu abaduna nabasikazi.

Njengombana kunokuhlukana nokuphikisana ngeembono okunengi malungana nabozimu abaduna nabasikazi, godu kunokuhlukana okukhulu nokuphikisana kweembono ngokobana kungakhulunywa njani nabo. Nesicabangisisako singaphetha ngokobana akusizo zoke iindlela zokukhulumisana ezinembileko. Cabanga ngendlela nasi: Ngaphambi kobana sidose umtato, kufuze sazi bona siwudosela bani begodu sithembe bonyana umuntu loyo kwamambala ukhona nokobana uzowuphendula umtatwethu. Ukulinga ukukhuluma nomuntu osebhudangweni kungaba budlhayela. Okumbi khulu, ukukhuluma nomkhohlisi kungaba yingozi.

Ngalokho-ke, ngubani ohlala endaweni yemimoya? IBhayibhili ayiphenduli kwaphela umbuzo lo, kodwana ihlathulula nokobana singakhuluma nobani begodu khuyini okufuze siyilindele. Sibawa uragele phambili ufunda iinhloko ezilandelako. Uzokurareka ukubona lokho okutjhiwo yiBhayibhili.

[Umtlolo waphasi]