Funda ELizwini LakaZimu

Kubayini Kufuze Sifunde KuZimu?

Isihlokwesi siphakamisa iimbuzo okungenzeka wakhe wazibuza yona, bese sikutjengisa bona ungazifumanaphi iimpendulo eBhayibhilinakho. AboFakazi BakaJehova bangakuthabela ukucoca nawe ngeempendulwezi.

1. Kubayini kufuze sifunde kuZimu?

UZimu uneendaba ezimnandi zokuthileko okungcono ngesintu. Usitjela ngazo eBhayibhilini. IBhayibhili ifana nencwadi evela kuBabethu onethando osezulwini.—Funda uJeremiya 29:11.

2. Ziyini iindaba ezimnandi?

Abantu batlhoga urhulumende olungileko. Akekho umbusi omumuntu okhe watjhaphulula isintu enturhwini, ukungalungi, ubulwelwe namtjhana ukufa. Kodwana kuneendaba ezimnandi. UZimu uzokulethela abantu urhulumende olungileko ozokutjhaphulula abantu kizo zoke izinto ezibangela ukutlhaga.—Funda uDanyela 2:44.

3. Kubayini kuqakathekile ukufunda kuZimu?

Msinyana uZimu uzokususa abantu ababangela ukutlhaga ephasini. Okwanje, ufundisa iingidi zabantu abathobekileko ukuthabela indlela engcono yokuphila, esekelwe ethandweni. ELizwini lakaZimu, abantu bafunda bona bangaqalana njani neemraro yokuphila, bangalifumana njani ithabo lamambala nokobana bangamthabisa njani uZimu.—Funda uZefaniya 2:3.

  4. Ngubani owatlola iBhayibhili?

IBhayibhili yenziwe ngeencwadi ezincani ezima-66. Yatlolwa madoda ama-40. Iincwadi ezihlanu zokuthoma zatlolwa nguMosisi eemnyakeni engaba zi-3 500 eyadlulako. Yamaswaphela yatlolwa mpostoli uJwanisi eemnyakeni engaphezu kweyi-1 900 eyadlulako. Kodwana abatloli beBhayibhili batlola imikhumbulo kaZimu ingasi yabo. Ngalokho, uZimu Mtloli weBhayibhili.—Funda 2 KuThimothi 3:16; 2 KaPitrosi 1:21.

Siyazi bona iBhayibhili ivela kuZimu ngombana isitjela ngemininingwana yengomuso ngokunqophileko. Akekho umuntu ongakwazi ukwenza njalo. (Isaya 46:9, 10) Godu iBhayibhili isimbulela ubuntu bakaZimu bethando. Inamandla wokutjhugulula amaphilo wabantu abe ngcono. Amaphuzu la aqinisekisa iingidi zabantu bonyana iBhayibhili iLilizwi lakaZimu.—Funda uJoshuwa 23:14; 1 KwebeTesalonika 2:13.

5. Ungakwazi njani ukuzwisisa iBhayibhili?

UJesu bekaziwa khulu ngokuba mfundisi weLizwi lakaZimu. Nanyana abantu abanengi egade akhuluma nabo bebayijayele iBhayibhili, bebatlhoga irhelebho bona bayizwisise. Ukubarhelebha, uJesu waqalisa endinyaneni yeBhayibhili ngemva kwenye, ayihlathulula bona “bazwisise iMitlolo.” Ingcenye le ethi, “Funda ELizwini LakaZimu,” izokusebenzisa indlela efanako ukukurhelebha.—Funda uLuka 24:27, 45.

Zimbalwa izinto ezithabisa njengokufunda kuZimu ngehloso yokuphila. Kodwana abanye abantu akuzobathabisa ukufunda kwakho iBhayibhili. Bangakuqedi amandla. Ithemba lakho lokuthabela ukuphila okungapheliko lisame ekufumaneni kwakho ilwazi ngoZimu.—Funda uMatewu 5:10-12; Jwanisi 17:3.

Ukufumana ilwazi elingeziweko, qala isahluko-2 sencwadi le Khuyini Kwamambala Okufundiswa YiBhayibhili?, egadangiswe boFakazi BakaJehova.