‘Maye Ukuhlakanipha KwakaZimu!’

“Maye  ukuhlakanipha nelwazi lakaZimu elingeze lalinganiswa! Ngubani ongachaza iinqumo zakhe? Ngubani ongathungatha iindlela zakhe na?”—ROM. 11:33.

1. Ngiliphi ilungelo elikhulu kinawo woke amaKrestu abhabhadisiweko analo?

NGILIPHI ilungelo elikhulu kinawo woke owakhe wanikelwa lona? Kokuthoma, ungacabanga ngesabelo esithileko owasifumanako namtjhana ukuhlonitjhwa owakufumana ngebanga lento ethileko owayenzako. Nokho, njengamaKrestu abhabhadisiweko, ilungelo elikhulu kinawo woke esinalo kuvunyelwa ukuba nobuhlobo obuseduze nokuphela kwakaZimu weqiniso, uJehova. Lokhu kusenze ‘saziwa nguye.’—1 Kor. 8:3; Gal. 4:9.

2. Kubayini ukwazi uJehova nokwaziwa nguye kulilungelo elikhulu?

² Kubayini ukwazi uJehova nokwaziwa nguye kulilungelo elikhulu? Ngombana akasimuMuntu  omkhulu kinabo boke endaweni yoke kwaphela kodwana godu uMvikeli walabo abathandako. Umporofidi uNahume waphefumulelwa bona atlole: “UJehova muhle, usiphephelo ngesikhathi sokugandeleleka. Begodu uyabazi labo abafuna isiphephelo kuye.” (Nah. 1:7; Rha. 1:6) Eqinisweni, amathemba wethu wokuphila okungapheliko asame ekwazini kwethu uZimu weqiniso neNdodanakhe, uJesu Krestu.—Jwa. 17:3.

3. Kuhlanganisani ukwazi uZimu?

³ Ukwazi uZimu kutjho okungaphezu kokwazi ibizo lakhe kwaphela. Kufuze simazi njengoMngani, sazi izinto azithandako nangazithandiko. Ukuphila kwethu ngokuvumelana nelwazi lelo kudlala indima eqakathekileko ekutjengiseni bona sesimazi ngokuseduze uZimu. (1 Jwa. 2:4) Kodwana nesifuna kwamambala ukwazi uJehova kunokhunye okutlhogekako. Kufuze sazi ingasi akwenzako kwaphela kodwana nokobana kubayini enza lokho. Nesilokhu sizwisisa iimnqopho kaJehova, kulokha sizokubabaza ‘ukudepha kokuhlakanipha kwakaZimu okurarako.’—Rom. 11:33.

UZimu Wehloso

4, 5. (a) Njengombana lisetjenziswe eBhayibhilini, liqaliselephi ibizo elithi “ihloso”? (b) Fanekisa bona ihloso ingafikelelwa njani ngendlela engaphezu kweyodwa.

⁴ UJehova nguZimu wehloso, neBhayibhili likhuluma ‘ngehloso yakhe yemathomeni.’ (Efe. 3:10, 11) Atjho ukuthini amezwi la? Njengombana lisetjenziswe eBhayibhilini ibizo elithi “ihloso” liqalisele emnqophweni okhethekileko, ongafunyanwa ngendlela engaphezu kweyodwa.

⁵ Ukufanisa: Umuntu angafisa ukuya endaweni ethileko. Ngalokho-ke, ukufika endaweni leyo kuba mnqopho namtjhana ihloso yakhe. Kungaba nezinto zokukhamba neendlela azozisebenzisa ezihlukahlukeneko angakhetha kizo. Njengombana akhamba ngendlela ayikhethileko, angahlangana nobujamo bezulu ebekangakabulindeli, isiminyaminya endleleni, neendlela ezivaliweko, okuzizinto ezingenza kutlhogeke athathe enye indlela. Nokho, kungakhathaliseki bona ngimaphi amatjhuguluko okufuze awenze, uzabe awufikelele umnqophwakhe nekafika endaweni leyo.

6. UJehova wakutjengisa njani ukuzivumelanisa nobujamo bona azalise umnqophwakhe?

⁶ UJehova naye ngokufanako wazivumelanisa namatjhuguluko amanengi bona azalise umnqophwakhe waphakade. Acabangela ikululeko yokuzikhethela ayinikele iimbunjwa zakhe ezihlakaniphileko, wenza msinyana itjhuguluko endleleni afikelela ngayo umnqopho wakhe. Ngokwesibonelo, akhe sicabangele indlela uJehova azalisa ngayo umnqopho wakhe malungana neNzalo ethenjisiweko. Ekuthomeni, uJehova wathi ebantwini ababili bokuthoma: “Belethani nande nizalise iphasi nilihlule.” (Gen. 1:28) Umnqopho okukhulunywa ngawo lo wajanyiswa kuhlubuka esimini ye-Edeni? Awa! UJehova wasabela msinyana ebujamweni obutjhobo ngokusebenzisa enye “indlela” ukufikelela ihloso yakhe. Wabikezela ukubonakala ‘kwenzalo’ engalungisa woke umonakalo owenziwe ziinhlubuki.—Gen. 3:15; Heb. 2:14-17; 1 Jwa. 3:8.

7. Khuyini esiyifunda endleleni uJehova azihlathulula ngayo ku-Eksodosi 3:14?

⁷ Ikghono lakaJehova lokuzivumelanisa nobujamo nekalwela ukuzalisa umnqophwakhe livumelana nendlela azihlathulula ngayo. UMosisi nekabuza uJehova ngeenthiyo ebezingaba khona esabelweni abekamnikela sona, uJehova wamqinisekisa: “‘Ngizokuba ngilokho engizoba ngikho.’ Godu wangezelela: ‘Ngilokhu ozokutjho kubantwana bakwa-Israyeli, “ungizokuba ngilokho engizoba ngikho ungithume kini.”’” (Eks. 3:14) Kwamambala, uJehova angaba nginanyana yini afuna ukuba ngiyo bona azalise umnqophwakhe ngokuzeleko! Lokhu umpostoli uPowula ukufanise kuhle kusahluko 11 sencwadi yamaRoma. Lapho ukhuluma ngomuthi we-oliva ongokomfanekiso. Ukuhlolisisa umfanekiso lo kuzokuthuthukisa ukubuka kwethu ukudepha kokuhlakanipha kwakaJehova, kungakhathaliseki bona ithemba lethu ngelokuya ezulwini namtjhana  lokufumana ukuphila okungapheliko lapha ephasini.

Umnqopho KaJehova Malungana NeNzalo Ethenjisiweko

8, 9. (a) Ngimaphi amaqiniso amane angasirhelepha sizwisise umfanekiso womuthi we-oliva? (b) Ipendulo yamuphi umbuzo eyembula bonyana uJehova uzivumelanisa nobujamo ukuzalisa umnqophwakhe?

⁸ Ngaphambi kobana sizwisise umfanekiso womuthi we-oliva, kufuze sazi amaqiniso amane amalungana nokuvela komnqopho kaJehova ngenzalo ethenjisiweko. Kokuthoma, uJehova wathembisa u-Abrahama bona ngenzalwakhe “zoke iintjhaba zephasini ngokuqinisekile [bezizozibusisa].” (Gen. 22:17, 18) Kwesibili, isitjhaba sakwa-Israyeli esavela ngo-Abrahama sanikelwa ithuba lokuveza “umbuso wobupristi.” (Eks. 19:5, 6) Kwesithathu, inengi lama-Israyeli wemvelo khenge limamukele uMesiya, uJehova wathatha igadango lokuveza “umbuso wobupristi.” (Mat. 21:43; Rom. 9:27-29) Emaswapheleni, nanyana uJesu ayingcenye eyihloko yenzalo ka-Abrahama, abanye banikelwe ilungelo lokuba yingcenye yenzalo leyo.—Gal. 3:16, 29.

⁹ Ukwakhela emaqinisweni amathathu la, encwadini yeSambulo sifunda bona linani laba-144 000 elizokubusa noJesu njengamakhosi nabapristi ezulwini. (ISam. 14:1-4) Labo kukhulunywa ngabo ‘njengamadodana wakwa-Israyeli.’ (ISam. 7:4-8) Alo-ke, boke aba-144 000 bama-Israyeli nofana bamaJuda wemvelo? Ipendulo yombuzo loyo yembula bona uJehova uzivumelanisa nobujamo bona azalise umnqophwakhe. Akhe siqale bona incwadi kampostoli uPowula ayitlolela beRoma isirhelebha njani sifumane ipendulo.

‘UMbuso Wobupristi’

10. Ngiliphi ilungelo elikhulu isitjhaba sakwa-Israyeli ebesinalo?

¹⁰ Njengombana kukhulunywe ngaphambilini, sitjhaba sakwa-Israyeli ngokukhethekileko ebesinikelwe ithuba lokuveza amalungu akha “umbuso wabapristi nesitjhaba esicwengileko.” (Funda ISambulo 7:4-8.) Kodwana kuzokwenzekani nekufika iNzalo ethenjisiweko? Isitjhaba sakwa-Israyeli wemvelo besizokukghona ukuveza inani elizeleko lama-Israyeli angokomoya laba-144 000 abekazokuba yingcenye yesibili yenzalo ka-Abrahama?

11, 12. (a) Kwathoma nini ukukhethwa kwalabo abazokwakha uMbuso wezulwini, begodu lasabela njani inengi lamaJuda egade liphila ngesikhatheso? (b)  UJehova bekazokwenza njani bona ‘inani elizeleko’ lalabo ebebazokuba yinzalo ka-Abrahama liphelele?

¹¹ Funda KwebeRoma 11:7-10. Njengesitjhaba, amaJuda wangekhulu lokuthoma ala uJesu. Ngalokho-ke, ithuba lokuveza inzalo ka-Abrahama khenge lisaba ngelawo. Nokho, ukukhethwa kwalabo abazokwakha “umbuso wobupristi” kwathoma ngePentekoste laka-33 C.E., kunamaJuda aneenhliziyo ezilungileko asamukela isimemo. Njengombana bekaziinkulungwana ezimbalwa, ‘bekanjengebinzana eliseleko’ nekamadaniswa nesitjhaba soke samaJuda.—Rom. 11:5.

¹² Nokho, uJehova bekazokwenza njani bona ‘inani elipheleleko’ lalabo ebebazokuba yinzalo ka-Abrahama liphelele? (Rom. 11:12, 25) Yelela ipendulo eyanikelwa mpostoli uPowula: “Angitjho bona isithembiso sakaZimu sibhalelwe. Ngombana ayisi boke abantu bako-Israyeli [wemvelo] abama-Israyeli. Begodu ayisizo zoke iinzukulwani zaka-Abrahama ezibantwana [bengcenye yenzalo ka-Abrahama] . . . Lokhu kutjho bonyana abantwana ababelethwe ngemvelo yabantu ayisibo bakaZimu; kodwana labo ababelethwe ngesithembiso sakaZimu babizwa bona baziinzukulwani zaka-Abrahama isibili.” (Rom. 9:6-9) Ngalokho-ke, bekungakakateleleki bona umuntu kufuze abe ngewenzalo ka-Abrahama bona kuzaliseke umnqopho kaJehova omalungana nenzalo.

Umuthi We-Oliva Ongokomfanekiso

13. Khuyini ejamele (a) umuthi we-oliva, (b) umrabho wawo, (c) isiqu sawo, (d) neempande zawo?

¹³ Umpostoli uPowula uragela phambili amadanisa labo ababa yingcenye yenzalo  ka-Abrahama neempande zomuthi we-oliva ongokomfanekiso. * (Rom. 11:21) Umuthi we-oliva ohlawulelweko lo ujamele ukuzaliseka komnqopho kaZimu malungana nesivumelwano asenza no-Abrahama. Umrabho womuthi ucwengile begodu ujamele uJehova njengaloyo onikela ukuphila kuma-Israyeli angokomoya. (Isa. 10:20; Rom. 11:16) Isiqu sawo sijamele uJesu njengengcenye eyihloko yenzalo ka-Abrahama. Iimpande zijamele “inani elizeleko” lalabo abahlanganiswe engcenyeni yesibili yenzalo ka-Abrahama.

14, 15. Bobani ‘ebabasikwe’ emthini otjaliweko we-oliva, begodu bobani abahlunyelelwa kiwo?

¹⁴ Emfanekisweni womuthi we-oliva, amaJuda wemvelo alandula uJesu afaniswa neempande ze-oliva egade ‘zisikiwe.’ (Rom. 11:17) Ngalokho alahlekelwa lithuba lokuba yinzalo ka-Abrahama. Kodwana bobani ebebazowajamiselela? Ngokombono wamaJuda wemvelo, abekazikhakhazisa ngokuba yinzalo yenyama ka-Abrahama, ipendulo yombuzo lo beyingaba ngengacabangekiko. Kodwana uJwanisi uMbhabhadisi wawayelelisa kusesengaphambili bona uJehova nekafuna ukwenza njalo, angavusela u-Abrahama abantwana ematjeni la.—Luka 3:8.

¹⁵ Yeke, khuyini uJehova ayenzako ukuzalisa umnqophwakhe? UPowula wahlathulula bona iimpande zomuthi we-oliva yemangweni zihlunyelelwe emthini we-oliva otjaliweko ukwenzela bona zithathe indawo yalezo eziphuliweko. (Funda KwebeRoma 11:17, 18.) Ngebanga lalokho, amaKrestu weentjhaba azeswe ngomoya, njengalayo egade akhona ebandleni leRoma, ahlunyelelwa emthini  lo we-oliva ongokomfanekiso. Ngendlela leyo, babe yingcenye yenzalo ka-Abrahama. Ekuthomeni, bebanjengeempande zomuthi we-oliva yemangweni, banganathuba lokobana babe yingcenye yesivumelwano esikhethekilekwesi. Kodwana uJehova wabavulela indlela yokuba maJuda angokomoya.—Rom. 2:28, 29.

16. Umpostoli uPitrosi wakuhlathulula njani ukwakheka kwesitjhaba esitjha esingokomoya?

¹⁶ Umpostoli uPitrosi wahlathulula ubujamobu nganasi ndlela: “Ilitjeli liligugu kini [ma-Israyeli angokomoya, kuhlanganise namaKrestu angasimaJuda], enikholwako; kodwana kilabo abangakholwako umtlolo ocwengileko uthi: ‘[UJesu Krestu] ilitje abakhi abalininako bona alinamsebenzi laphenduka laba ngeliqakathekileko kinawo woke.’ Omunye umtlolo ocwengileko uthi: ‘Ilitjeli lizakwenza abantu bona bakhutjwe, lilidwala elabakhubekisa bawe.’ . . . Kodwana nina nisitjhaba esikhethiweko, nibapristi beKosi uZimu, nisitjhaba esicwengileko, nibabantu bakaZimu abakhethelwa ukwazisa imisebenzi emihle yakaZimu. Nguye owanikhupha ebumnyameni waningenisa ekukhanyeni kwakhe okumangazako. Benigade ningasiso isitjhaba, kodwana gadesi nje senisitjhaba sakaZimu. Nakhe natlhoga umusa, kodwana kwanjesi seniwamukele.”—1 Pit. 2:7-10.

17. Okwenziwa nguJehova kwaba njani ‘yinto engakavami’?

¹⁷ UJehova wenza into abanengi abebangayiqala njengengakalindeleki nakancani. UPowula wahlathulula bona okwenzekako ‘kuyinto engakavami.’ (Rom. 11:24) Kwenzeka njani lokhu? Eqinisweni kungabonakala kungajayeleki, begodu kungasingokwemvelo, ukuhlumelelisa ipande yomuthi womango emthini otjaliweko, nokho, ngilokho kanye abanye abalimi ebebakwenza ekhulwini lokuthoma. * Ngendlela efanako, uJehova wenza into engaphezu kwejayelekileko. Ngokombono wamaJuda, abangasimaJuda bebangekhe bakghone ukuveza iinthelo ezamukelekako. Nokho, uJehova wenza bona labo ‘babasitjhaba’ esizokuveza iinthelo zoMbuso. (Matt. 21:43, NW.) Wathoma ngokuzesa uKorneliyasi—umuntu wokuthoma ongasimJuda ongakasoki owaphendukako—ngo-36 C.E., abangasimaJuda abangakasoki bavulekelwa lithuba lokuhlunyelelwa emthini we-oliva ongokomfanekiso lo.—IZe. 10:44-48. *

18. Ngiliphi ithuba amaJuda wemvelo egade analo ngemva kwaka-36 C.E.?

¹⁸ Lokhu kutjho bona ngemva kwaka-36 C.E., bekungasanathuba ngamaJuda wemvelo ukuba yingcenye yenzalo ka-Abrahama? Awa. UPowula wahlathulula: “NamaJuda natjhugulukako akholwe, ayohlunyeleliswa njengeempande, ngombana uZimu unamandla wokukwenza lokho. Nina abatjhile, naquntwa emthini we-oliva yommango ebeniziimpande zawo ngokwemvelo, nahlunyeleliswa emthini we-oliva yekhaya, okuyinto engakavami. Nengabe kunjalo, kulula kangangani bona kuhlunyeleliswe iimpande emthini we-oliva yekhaya emthini loyo egade ziquntwe kiwo.” *—Rom. 11:23, 24.

 “Woke Ama-Israyeli Azokuphuluswa”

19, 20. Yini uJehova ayizalisileko njengombana kufanekiswe emthini we-oliva ongokomfanekiso?

¹⁹ Kwamambala, umnqopho kaJehova omalungana “no-Israyeli kaZimu” uzaliseka ngendlela erarako. (Gal. 6:16) Njengombana kwatjho uPowula, ‘boke bakwa-Israyeli bayophuluswa.’ (Rom. 11:26) Ngesikhathi sakaJehova, ‘woke u-Israyeli’—okulinani elipheleleko lama-Israyeli angokomoya—azokubusa njengamakhosi nabapristi ezulwini. Ayikho into engabangela umnqopho kaJehova ubhalelwe!

²⁰ Njengombana kwabikezelwa, inzalo ka-Abrahama—uJesu Krestu naba-144 000—izokuletha iimbusiso ‘ebantwini abatjhili.’ (Rom. 11:12; Gen. 22:18) Ngendlela le, boke abantu bakaZimu bayazuza elungiselelweneli. Eqinisweni, nesicabangela indlela uJehova azalise ngayo umnqopho wakhe wobuphakade, singararwa “kuhlakanipha nelwazi lakaZimu.”—Rom. 11:33.

[Imitlolo yaphasi]

Uyakhumbula?

• Sifundani ngoJehova ngendlela azalisa ngayo iinhloso zakhe?

• KwebeRoma isahluko 11, yini ejanyelwe . . .

mumuthi we-oliva?

mrabho wawo?

sisiqu sawo?

ziimpande zawo?

• Kubayini ikambiso yokuhlunyelelwa ‘iyinto engakavami’?

[Iimbuzo Yesifundo]

[Ibhoksi/Isithombe ekhasini 26]

 Kubayini Kuhlunyeleliswa Iimpande Zomuthi We-Oliva Wemangweni?

▪ ULucius Junius Moderatus Columella gade alijoni elimRoma nomlimi owaphila ekhulwini lokuthoma-C.E. Waziwa khulu ngeencwadi ezi-12 azitlolako ngepilo yemakhaya nokulima.

Encwadinakhe yesihlanu, wadzubhula isaga sekadeni esithi: “Umuntu otjala imithi ye-oliva, vane afuna ithele; loyo ovundisako, uyibawa bona ithele; godu loyo oyithenako, uyitjela ngekani bona ithele.”

Ngemva kokuhlathulula imithi ekhulako kodwana ebhalelwa kuthela, wakhuthaza ikambiso elandelako: “Kuyinto ehle ukuwemba ngethulusu lokusebenza bese uhlumelela ngokuqinileko embobeni leyo ipande ehlaza ethethwe emthini we-oliva wemangweni; umphumela uba kukobana umuthi loyo ube uyathela, njengombana sewuvundiswe ngepande ethelako.”