UJesu—Indlela Aphila Ngayo

“Ukudla kwami kukwenza intando yongithumileko, nokuqeda umsebenzi anginikele wona bona ngiwenze.”—JWANISI 4:34.

OKWENZA uJesu watjho amezwi angehla kwambula okunengi malungana nokobana ukuphila kwakhe bekudzimelelephi. UJesu nabafundi bakhe bebakhamba endaweni yeSamariya enemibundu ekuseni loke. (Jwanisi 4:6) Bacabanga bona uJesu sele alambile, abafundi bamnikela ukudla. (Jwanisi 4:31-33) Aphendula, uJesu watjho ngokurhunyeziweko umnqopho wokuphila kwakhe. Kuye, ukwenza umsebenzi kaZimu bekuqakatheke ukudlula ukudla. Kokubili ngamezwi nangezenzo, uJesu waphilela ukwenza lokho uZimu egade afuna akwenze. Lokho kwahlanganisani?

▪ Ukutjhumayela nokufundisa ngoMbuso kaZimu IBhayibhili lihlathulula umsebenzi wokuphila kwakaJesu lithi: “Waya kiyo yoke iGaleliya, afundisa . . . atjhumayela iindaba ezimnandi ngombuso kaZimu.” (Matewu 4:23) UJesu gade angatjhumayeli kwaphela, namtjhana arhuwelela uMbuso kaZimu kwabanye. Wafundisa abantu—okutjho bona, wanqophisa, wahlathulula, wakholisa abantu ngokubanikela iinzathu ezizwakalako. UMbuso bewusihloko somlayezo kaJesu.

Kiyo yoke ikonzwakhe, uJesu wafundisa iinlaleli zakhe bona uMbuso kaZimu uyini nokobana uzokwenzani. Tjheja amaqiniso alandelako malungana noMbuso, neMitlolo esivezela amezwi kaJesu ngendaba le.

▪ UMbuso kaZimu ngurhulumende wezulwini, begodu uJesu ubekwe nguJehova bona abe yiKosi.—MATEWU 4:17; JWANISI 18:36.

▪ UMbuso uzokucwengisa ibizo lakaZimu wenze bona intando yakhe yenzeke ephasini njengombana yenzeka ezulwini.—MATEWU 6:9, 10.

▪ Ngaphasi kokubusa koMbuso kaZimu, iphasi loke lizokuba yiparadeyisi.—LUKA 23:42, 43.

▪ UMbuso kaZimu uzokufika msinyana wenze bona kwenzeke intando kaZimu ngephasi. *—MATEWU 24:3, 7-12.

▪ Ukwenza Iimsebenzi Yamandla Ngokuyihloko uJesu bekaziwa ngokobana “Mfundisi.” (Jwanisi 13:13) Nokho, hlangana nekonzwakhe yeemnyaka eemthathu nesiquntu, wenza neemsebenzi yamandla eminengi. Okunganani iimsebenzi le yafeza iimnqopho emibili. Kokuthoma, yarhelebha ukufakazela bona kwamambala bekathunywe nguZimu. (Matewu 11:2-6) Kwesibili, yatjengisa lokho azokwenza ngezinga eliphakemeko njengeKosi yoMbuso kaZimu esikhathini esizako. Tjheja ezinye zeemmangaliso uJesu azenza.

▪ Wathulisa iinwuruwuru zelwandle nemimoya enamandla.—MARKOSI 4:39-41.

▪ Wapholisa abagulako, kubandakanye neemphofu, abangezwako eendlebeni, nabarholopheleko.—LUKA 7:21, 22.

▪ Wandisa ukudla, wasuthisa iinqubuthu zabantu ezilambileko.—MATEWU 14:17-21; 15:34-38.

▪ Okunganani amahlandla amathathu, wavusa umuntu ofileko.—LUKA 7:11-15; 8:41-55; JWANISI 11:38-44.

Cabanga bona kuzokuba njani ukuphila ephasini ngaphasi kokubusa kweKosi enamandla kangaka!

▪ Ukwambula ubuntu bakaJehova uZimu Nekuziwa ekufundiseni abanye ngoJehova, akakho  ofaneleka njengeNdodana kaZimu, leyo eyaziwa ngokobana nguJesu Krestu. Njengombana ‘alizibulo lakho koke okubunjiweko,’ uJesu waphila noJehova ezulwini isikhathi eside ukudlula nanyana ngisiphi isibunjwa somoya. (Kholose 1:15) Cabanga ngamathuba aba nawo wokwenza ukucabanga kwakhe kufane nokwakaYise begodu afunde intando, iimthetho, neendlela Zakhe.

UJesu gade angatjho kufanele bona: “Akakho noyedwa owaziko bona ngubani iNdodana ngaphandle koBaba, begodu akakho noyedwa owaziko bona uBaba ngubani ngaphandle kweNdodana nalabo abantu iNdodana ekhetha ukumbonakalisa kibo.” (Luka 10:22) Nekasephasini njengomuntu, uJesu ngokuzithandela—kwamambala, ngetjiseko—wembula bona uYise unjani. UJesu wakhuluma begodu wafundisa ngendlela okungekho omunye omuntu ongenza ngayo; wakhumbula okuhlangabezanwe nakho kwakhe kwendaweni yomoya ephakemeko lapha uZimu Ophakeme Khulu ahlala khona.—Jwanisi 8:28.

Lokho uJesu akwenza ekwambuleni uYise kungafaniswa nalokho okwenziwa yi-transformer yegezi. Isisetjenziswa esinjalo sitjhugulula igezi enamandla siyenze ingabi namandla khulu, ukwenzela bona umuntu ojayelekileko akwazi ukuyisebenzisa. Nekasephasini, uJesu wathatha lokho akufunda ngoYise ezulwini wakudlulisela ngeendlela abantu abathobekileko ephasini abangakuzwisisa begodu bakusebenzise ngazo bulula.

Cabangela iindlela eembili eziqakathekileko uJesu ambula ngazo uYise.

▪ UJesu nekafundisako, wenza iqiniso ngoJehova laziwa—ibizo, umnqopho, neendlela Zakhe.—JWANISI 3:16; 17:6, 26.

▪ Ngezenzo zakhe uJesu wembula iingcenye ezinengi ezihle zobuntu bakaJehova. Eqinisweni, uJesu wabonakalisa ubuntu bakaYise ngokupheleleko kangangobana bekangathi: ‘Nenifuna ukwazi bona uBaba unjani, qalani mina.’—JWANISI 5:19; 14:9.

Indlela uJesu egade aphila ngayo isitjhiya sibambe ongenzasi. Singazuza khulu nesihlolisisa bona kubayini ahlongakala begodu senze ngokuvumelana nalokho esikufundako.

[Umtlolo waphasi]