Ukuthembela KuJehova Ngokupheleleko Kuyasiqinisa

“UJehova ngokwakhe uzongizwa nangimbizako.”—RHA. 4:3.

1, 2. (a) Ngibuphi ubujamo obuyingozi uDavidi aqalana nabo? (b) Ngimaphi amarhalani esizokucoca ngawo?

IKOSI UDAVIDI ibuse u-Israyeli isikhathi esithileko, kodwana kwanje iqalane nobujamo obuyingozi. Indodanayo u-Absalomu ngobuqili yarhuwelela bona iyikosi, uDavidi wakateleleka bona abaleke eJerusalema. Godu wakghatjhelwa mnganakhe omkhulu, kwanjesi, anabathembekileko abambalwa, ukhamba alila angakafaki neenyathelo eNtabeni Ye-Oliva. Ngaphezu kwalokho, uTjhimeyi, ongowomndeni weKosi uSawulu, uphosa uDavidi ngamatje nangethuli amthuka.—2 Sam. 15:30, 31; 16:5-14.

² Isilingwesi sizokwenza uDavidi aye eShiyoli alisizi begodu ahlazekile? Awa, bekathembele kuJehova. Lokhu kuyabonakala eRhalaneni lesithathu, elatlolwa nguDavidi malungana nokubaleka kwakhe. Godu watlola neRhalani lesine. Womabili amarhalani la agandelela ngokuqinileko bona uZimu uyayizwa begodu uyayiphendula iimthandazo. (Rha. 3:4; 4:3) Amarhalani la asiqinisekisa bona uJehova unabakhulekeli bakhe abathembekileko imini nobusuku, uyababusisa ngesekelo lakhe nangokuthula nokuvikeleka. (Rha. 3:5; 4:8) Ngalokho, akhe sicabangele amarhalani la sibone bonyana asiqinisa njani begodu athuthukise nokuthembela kuZimu.

‘Nesivukelwa Babantu Abanengi’

3. Njengombana kutjengiswe kumaRhalani 3:1, 2, bebunjani ubujamo uDavidi ebekakibo?

³ Isithunywa sathi, “Ihliziyo yabantu bakwa-Israyeli seyilandela u-Absalomu.” (2 Sam. 15:13) Ararwe kukobana u-Absalomu ukghone njani ukubuthelela abantu abanengi bona bamsekele, uDavidi wabuza: “Jehova kubayini babanengi kangaka abaphikisana nami? Kubayini abanengi bangivukela? Abanengi bathi ngomphefumulwami:  ‘Akunaphuluso azolifumana kuZimu.’” (Rha. 3:1, 2) Ama-Israyeli bekacabanga bona uJehova ngeke atjhaphulule uDavidi esizini elibangelwa ngu-Absalomu nabasekeli bakhe.

4, 5. (a) UDavidi bekaqiniseka ngani? (b) Ngikuphi ukuqakatheka kwamezwi athi “Lowo ophakamisa ihlokwami”?

⁴ UDavidi bekaqiniseka ngombana bekathembele kuZimu. Uyabhina: “Nanyana kunjalo, wena Jehova usivikelo sami, uyiphazimulo yami naloyo ophakamisa ihlokwami.” (Rha. 3:3) UDavidi uyaqiniseka bona uJehova uzomvikela njengesiviko esivikela ijoni. Kwamambala, ikosi elupheleko iyabaleka, ihlokwayo igubuzesiwe begodu ikhothamile ngebanga lokuhlazeka. Kodwana oPhakemeko uzobutjhentjha ubujamo bakaDavidi bube ngobuphazimulako. UJehova uzomenza akghone ukujama anqophe avuse ihlokwakhe njengekuthomeni godu. UDavidi ubiza uJehova anethemba lokobana uzomphendula. Uyalitjengisa ithemba elinjalo kuJehova?

⁵ Ngamezwi athi, “Lowo ophakamisa ihlokwami,” uDavidi bekazi bona irhelebho azolifumana livela kuJehova. I-Today’s English Version ithi: “Kodwana wena KOSI, uhlala usiphephelo sami engozini; ungenza ngithumbe godu ungipha amandla.” Ngokuvumelana namezwi athi “Lowo ophakamisa ihlokwami,” enye incwadi ithi: “UZimu nekaphakamisa . . . ‘ihloko’ yomuntu, uMenza abe nethemba nokuqiniseka.” Akateleleka bona ahlike esikhundleni sobukhosi sakwa-Israyeli, uDavidi bekanamabanga wokudana. Nokho ‘ukuphakamisa kwakhe ihloko’ bekuzokuvuselela isibindi, ukuqiniseka, nokuthembela kuZimu ngokupheleleko.

‘UJehova Uzokuphendula!’

6. Kubayini uDavidi aqalisela ukuphendulwa komthandazwakhe njengokuvela entabeni ecwengekileko kaJehova?

⁶ Athembele kuJehova begodu aqiniseka, uDavidi waragela phambili wathi: “Ngephimbo lami ngizombiza uJehova, begodu uzongiphendula asentabeni yakhe ecwengileko.” (Rha. 3:4) Ngokubulunga iinlayo zakaDavidi, imbulungelo yesivumelwano, efanekisela ukuba khona kwakaZimu, ithethwe yayiswa eNtabeni yeZiyoni. (Funda u-2 Samuweli 15:23-25.) Yeke, kuyafaneleka bona uDavidi uqalisa ukuphendulwa komthandazwakhe njengokuvela entabeni ecwengekileko kaJehova.

7. Kubayini uDavidi angakhange asabe?

⁷ Eqinisweni umthandazo onjalo oya kuZimu ngeze ube lilize, uDavidi khenge asabe. Kunalokho, uyabhina: “Mina, ngizokubhambalala bona ngilale, ngokuqinisekileko ngizokuphaphama, ngombana uJehova ngokwakhe uyangisekela.” (Rha. 3:5) Ngitjho nebusuku, iingozi ezikulu ezingakalindeleki zihlasela, uDavidi akasabi ukuyokulala. Uyaqiniseka bona uzokuphaphama, ngombana uyazi bona okwakhe kwamvelela kumenze waqiniseka bona angathembela esekelweni lakaZimu elingabhalelwako. Ngalokho singakghona nesilalela “iindlela zakaJehova” begodu singamtjhiyi.—Funda u-2 Samuweli 22:21, 22.

8. IRhalani 27:1-4 atjengisa njani bona uDavidi bekathembele kuZimu?

⁸ Ukuqiniseka kwakaDavidi nokuthembela ngokupheleko kuJehova kuyabonakala kelinye lamarhalanakhe, elinamezwi aphefumulelweko naka: “USokulunga ukukhanya kwami nomphulusi wami. Akakho noyedwa engimesabako. USokulunga ungivikela eengozini zoke. Angizukwesaba. Lokha abantu nebangilalamelako balinga ukungibulala, bayakhutjwa bawe. Nanyana ipi nayingiragelelako, angizukwesaba namtjhana amanabami angilalamelako, ngizasolo ngithembe uZimu. USokulunga ngimbawe into eyodwa kwaphela; yinto eyodwa engiyifunako: Ukuhlala ngekumbeni yakaSokulunga ubuphilo bami boke, ngibone ukulunga kweKosi ngibawe isaluleko sayo.” (Rha. 27:1-4) Nengabe uhlanganyela embonweni onjalo begodu ubujamo bakho buyakuvumela, uzokuhlangana qobe nabakhulekeli bakaJehova okanye nabo.—Heb. 10:23-25.

9, 10. Naphezu kwamezwi weRhalani 3:6, 7, kubayini ungathi uDavidi bekanganamoya wokuzibuyiselela?

⁹ Nanyana uDavidi aqalana nokukghatjhelwa ngu-Absalomu nokungathembeki kwabanye  abanengi, wabhina: “Ngekhe ngizesabe iinkulungwane ezilitjhumi zabantu ezingibhodileko ezizilungiselele ukulwa nami. Vuka, Jehova! Ngiphulusa Zimami! Ngombana kuzokufuze uwabethe emhlathini woke amanabami. Amazinyo wabambi kuzofuze uwaphule.”—Rha. 3:6, 7.

¹⁰ UDavidi akanawo umoya wokuzibuyiselela. Nengabe amanabakhe kufuze ‘abethwe emhlathini,’ nguZimu ebekazokwenza lokho. IKosi uDavidi beyizitlolele ngokwayo ikhophi yoMthetho godu beyazi bona uJehova uthi kiwo: “Ipindiselo ngeyami.” (Dut. 17:14, 15, 18; 32:35) UZimu ‘uzokuphula namazinyo wabambi.’ Ukuphula amazinyo kutjho ukuwenza angabi namandla wokulimaza. UJehova uyabazi abantu abambi ngombana “ubona lokho ihliziyo engikho.” (1 Sam. 16:7) Qala bona kusithabisa kangangani bona uZimu usipha ikholo namandla wokuqalana nekosi yobumbi, uSathana, msinyana uzokuphoselwa kwalatjha njengebhubezi elibhodlako kodwana linganamazinyo lifanelekela ukutjhatjalaliswa kwaphela!—1 Pit. 5:8, 9; ISam. 20:1, 2, 7-10.

“Ipindiselo Ivela KuJehova”

11. Kubayini kufuze sibathandazele esikholwa nabo?

¹¹ UDavidi uyazi bona nguJehova kwaphela ongamtjhaphulula kilokho ebekakutlhoga ngokurhabileko. Kodwana umrhalani akacabangi ngaye kwaphela. Kuthiwani ngabo boke abantu abathandwa nguJehova? Kuyafaneleka bona uDavidi aphethe ngerhalani eliphefumulelekweli: “Iphuluso ngeyakaJehova. Isibusiso sakho siphezu kwabantu bakho.” (Rha. 3:8) Liqiniso, uDavidi bekaneemraro emikhulu, kodwana wacabanga ngabantu bakaJehova begodu bekaqiniseka bona uZimu uzobabusisa. Nathi akukafuzi na sicabange ngesikholwa nabo? Asibakhumbuleni eemthandazweni yethu, sibawe uJehova bona abaphe umoya wakhe ocwengileko bona babe nesibindi godu barhuwelele iindaba ezihle ngokuqiniseka.—Efe. 6:17-20.

12, 13. Kwenzekani ku-Absalomu, begodu uDavidi wasabela njani kilokho?

¹² Ukuphila kwaka-Absalomu kwaphela ngokuhlazisako—okusiyeleliso kibo boke abatlhorisa abanye, khulukhulu abazesiweko bakaZimu, njengoDavidi. (Funda Iziyema 3:31-35.) Kwaba nepi, amabutho ka-Absalomu ahlulwa. U-Absalomu ngokwakhe wakhwela kudumbana iinhluthu zakhe ezihle ezimanyazelako zahageka epandeni efana neforogo yomuthi omkhulu. Walenga—aphila kodwana angakghoni ukuzirhelebha—bekwaba kulapho kufika uJowabe wambulala ngokumhlaba kathathu ehliziyweni ngomkhonto.—2 Sam. 18:6-17.

¹³ Kwamthabisa na uDavidi ukuzwa ngokwehlakalele indodananakhe? Awa. Kunalokho, waba phasi phezulu, akhihla isililo: “Ndodanami Absalomu, ndodanami, ndodanami Absalomu! Ngifisa kwanga bekufe mina, esikhundleni sakho, ndodanami Absalomu, ndodanami!” (2 Sam. 18:24-33) Mamezwi kaJowabe kwaphela enza uDavidi wadamba ebuhlungwini egade abuzwa. Qala bona kwaba siphetho esibuhlungu kangangani ngo-Absalomu, ukuba marhamaru kwakhe kwamenza walwa noyise—ozesiweko kaJehova—wazilethela ihlekelele!—2 Sam. 19:1-8; Iziy. 12:21; 24:21, 22.

UDavidi Utjengisa Ukuthembela KuZimu Godu

14. Kungathiwani ngokutlolwa kweRhalani 4?

¹⁴ IRhalani lesithathu nelesine limthandazo osuka ehliziyweni otjengisa bona uDavidi bekathembele ngokupheleleko kuJehova. (Rha. 3:4; 4:3) Mhlamunye uDavidi watlola ingoma le ukuveza itjhaphuluko nokuthokoza kwakhe uZimu ngemva kokubhalelwa kuthumba kwaka-Absalomu. Namtjhana kungenzeka wayitlola acabanga ngababhini abamaLevi. Kunanyana ngikuphi ukuzindla ngayo kungaqinisa ukuthembela kwethu kuJehova.

15. Kubayini singathandaza ngokuqiniseka kuJehova ngeNdodana yakhe?

¹⁵ UDavidi godu waveza ukuthembela kuZimu ngokupheleleko watjengisa nokuqiniseka bona uZimu uyayizwa begodu uyayiphendula iimthandazwakhe. Uyabhina: “Ngiphendula, nengikubizako, Zimami olungileko. Esikhathini sokugandeleleka kufuze ungenzele indawo evulekileko. Ngitjengisa umusa uzwe neemthandazo  yami.” (Rha. 4:1) Singaba nokuqiniseka okufanako nesitjengisa ukulunga. Sitjheja bona uJehova, “uZimu olungileko,” ubusisa abantu bakhe abalungileko, ngokuqiniseka singathandaza kuye ngeNdodana yakhe ngokuba nekholo emhlatjelweni kaJesu wesihlengo. (Jwa. 3:16, 36) Qala bona lokhu kusinikela ukuthula kangangani!

16. Yini okungenzeka yenza uDavidi wadana?

¹⁶ Ngezinye iinkhathi, singaqalana nobujamo obudanisako obungasiqedela ukuqiniseka. Lokhu kwenzeka kwesikhatjhana kuDavidi, kungebangelo abhina: “Nina madodana wabantu, kuzobe kubenini nihlambalaza iphazimulo yami, kukulapho niragela phambili nithanda izinto ezililize, niragela phambili nifuna ukufumana amala?” (Rha. 4:2) Amezwi athi “madodana wabantu” kubonakala aqalisele ebantwini ngomnqopho ongathandekiko. Amanaba kaDavidi ‘bekazithanda izinto ezililize.’ I-New International Version iyibeka bunjesi: “Kuzobe kubenini nithanda iimbono emamala begodu nifuna abozimu bamala?” Ngitjho nanyana sidaniswa ngebanga lalokho abanye abakwenzako, akhe siragele phambili sithandaza ngokusuka ehliziyweni begodu sitjengise nokuthembela kuZimu weqiniso kwaphela.

17. Hlathulula indlela esingenza ngayo ngokuvumelana neRhalani 4:3.

¹⁷ Ukuthembela kwakaDavidi kuZimu kuyabonakala emezwini la: “Ngalokho, yazini bona uJehova ngokuqinisekileko uzokuhlukanisa othembekileko wakhe; uJehova ngokwakhe uzongizwa nengimbizako.” (Rha. 4:3) Isibindi nokuthembela kuJehova ngokupheleleko kuziimfuneko zokuhlala sithembekile kuye. Ngokwesibonelo, iimfanelwezi ziyatlhogeka emndenini yamaKrestu isihlobo esingaphendukiko nesisuswa ekuhlanganyeleni. UZimu ubusisa labo abathembekileko kuye neendleleni zakhe. Ngale kwalokho, ukuthembeka nokuthembela kuJehova ngokupheleleko kuthuthukisa ithabo hlangana nabantu bakhe.—Rha. 84:11, 12.

18. Ngokuvumelana neRhalani 4:4, khuyini okufuze siyenze nengabe khesaqalana namezwi namtjhana izenzo ezinganamusa?

¹⁸ Kuthiwani omunye nekangatjho namtjhana enze izinto ezisikwatisako? Singahlala sithabile nesenza lokho uDavidi akutjhoko: “Kwatani, kodwana ningoni. Khulumani eenhliziyweni zenu, phezu kombhede wenu, nithule.” (Rha. 4:4) Nengabe sakhe saqalana namezwi namtjhana izenzo ezinganamusa, asingoni ngokuzibuyiselela. (Rom. 12:17-19) Singaveza amazizo wethu emthandazweni wangemsitheleni sisesembhedeni. Nesithandaza ngendaba ethileko, singayiqala ngendlela ehlukileko begodu sitjhukumiseleke bona silibalelane ngethando. (1 Pit. 4:8) Okuqakatheke khulu endabeni le siluleko sompostoli uPowula esisekelwe kuRhalani 4:4: “Nengabe nifikelwa kuthukuthela, zibambeni ningoni; ilanga lingatjhingi nisathukuthele. USathana ningamnikeli ithuba lokunihlula.”—Efe. 4:26, 27.

19. IRhalani 4:5 lingasirhelebha njani malungana neemnikelwethu engokomoya?

¹⁹ Agandelela itlhogeko yokuthembela kuZimu, uDavidi wabhina: “Nikela ngemnikelo yokulunga, uthembele kuJehova.” (Rha. 4:5) Iimnikelo eyanikelwa ngebakwa-Israyeli beyiba ngeqakathekileko kwaphela nengabe abantu bebaneenhloso ezihle. (Isa. 1:11-17) Bona iimnikelo yethu engokomoya yamukeleke kuZimu, nathi kufuze sibe neenhloso ezihle begodu kufuze sithembele kuye ngokupheleleko.—Funda Iziyema 3:5, 6; KumaHebheru 13:15, 16.

20. Khuyini efanekiselwa ‘kukhanya kobuso bakaJehova’?

 ²⁰ UDavidi uyaraga: “Banengi abathi: ‘Ngubani ozositjengisa okuhle?’ Phakamisela ukukhanya kobuso bakho ngakithi, Jehova.” (Rha. 4:6) Ukukhanya kobuso bakaJehova kufanekisela umusa waphezulu. (Rha. 89:15) Ngalokho, uDavidi nekathandazako athi: “Phakamisela ukukhanya kobuso bakho ngakithi,” bekatjho bona ‘sitjengisa umusa.’ Ngombana sithembele kuJehova, sifumana umusakhe nethabo elikhulu njengombana senza intando yakhe ngokuqiniseka.

21. Njengombana sihlanganyela ngokuzeleko emsebenzini wanamhlanjesi wokuvuna ngokomoya, khuyini esiqiniseka ngayo?

²¹ Siqale phambili ethabweni esiliphiwe nguZimu elibhedere kunelesikhathi sokuvuna, uDavidi wabhinela uJehova wathi: “Kwamambala uzokunikela ithabo elikhulu ehliziywenami kuneyangesikhathi lapho iinthoro zabo newayini labo elitjha kukunengi khona.” (Rha. 4:7) Singaqiniseka ngokufumana ithabo elikhulu nesihlanganyela ngokuzeleko emsebenzini wokutjhumayela. (Luka 10:2) ‘Ngesitjhaba esikhulu’ sabazesiweko esidosa phambili, kwanjesi sithaba njengenani ‘leemberegi zokuvuna’ eziragela phambili zanda. (Isa. 9:3) Ufumana ingcenye yokwaneliseka kwamambala ekuvuneni okuthabisakokhu?

Ngokuqiniseka Ragela Phambili Ngokuthembela KuJehova Ngokupheleleko

22. Ngokuvumelana neRhalani 4:8, bakwa-Israyeli bazuza ini nebabulunga uMthetho kaZimu?

²² UDavidi waphetha IRhalaneli ngamezwi naka: “Ngokuthula ngizokubhambalala phasi ngilale, wena ngokwakho, Jehova, ngenze ngihlale ngokuphepha.” (Rha. 4:8) Lokha bakwa-Israyeli nebagcina uMthetho kaJehova, bebanokuthula naye begodu bebazizwa baphephile. Ngokwesibonelo, ‘uJuda no-Israyeli bahlala ngokuphepha’ ngeenkathi zokubusa kwakaSolomoni. (1 Kho. 4:25) Labo abathembela kuZimu bathabela ukuthula ngitjho nanyana iintjhaba ezibomakhelwana zinganamusa. NjengoDavidi, silala ngokuthula ngobanyana uZimu usenza sizizwe siphephile.

23. Yini esizokuyibona nesithembela kuZimu ngokupheleleko?

²³ Ngokuqiniseka asirageleni phambili ekonzweni kaJehova. Godu singathandaza ngekholo begodu ngalokho sizokubona “ukuthula kwakaZimu okudlula loke ilwazi.” (Fil. 4:6, 7) Qala bona lokho kusilethela ithabo elingangani! Singaqalana nengomuso ngokuqiniseka nesibulunga ukuthembela kuJehova ngokupheleko.

Ungaphendula Njani?

• Ngimiphi iimraro uDavidi aqalana nayo ngebanga laka-Absalomu?

• IRhalani 3 likunikela njani ukuqiniseka?

• Kungaziphi iindlela IRhalani 4 liqinisa ukuthembela kwethu kuJehova?

• Singazuza njani ekuthembeleni kwethu kuZimu ngokupheleleko?

[Iimbuzo Yesifundo]

[Umkhangiso osekhasini 32]

Umthemba ngokupheleleko uJehova?