Funda ELizwini LakaZimu

Likhona Ithemba Ngabahlongakeleko?

Isihlokwesi siphakamisa iimbuzo okungenzeka wazibuza yona, bese sikutjengisa bona ungazifumanaphi iimpendulo eBhayibhilinakho. AboFakazi BakaJehova bangakuthabela ukucoca nawe ngeempendulwezi.

1. Abahlongakeleko Banaliphi Ithemba?

UJesu nekafika eBhethaniya hlanu kweJerusalema, umnganakhe uLazaru besekanamalanga amane ahlongakele. UJesu waya emazindleni anoMarta noMariya, abodadwabo likamufi. Msinyana, kwabuthana isiqubuthu. Ungalicabanga ithabo uMarta noMariya ababanalo uJesu nekavusa uLazaru?—Funda uJwanisi 11:20-24, 38-44.

UMarta bekakholelwa bona abahlongakeleko bazokuvuka. Iinceku zakaJehova ezithembekileko besele kunesikhathi zazi bona esikhathini esizako, uZimu uzokuvusa abahlongakeleko baphile ephasini godu.—Funda uJobhi 14:14, 15.

2. Buyini Ubujamo Babahlongakeleko?

Nanyana amandla wokuphila, namtjhana ‘umoya,’ wenza abantu neenlwana baphile, asisimimoya ehlala emzimbeni yenyama. (UMtjhumayeli 3:19; Genesisi 7:21, 22) Siziimbunjwa zenyama ezenziwe ngehlabathi. (Genesisi 2:7; 3:19) Iingqondo zethu nezifako, nemicabango yethu iyatjhabalala. Ngalokho, ngemva kobana avusiwe, uLazaru khenge atjho litho ngokwenzeke ekufeni ngombana abafileko abezwa litho.—Funda IRhalani 146:4; UMtjhumayeli 9:5, 10.

Kuyakhanya bona abahlongakeleko ngekhe batlhaga. Ngalokho ifundiso yokobana uZimu utlhagisa abantu ngemva kokufa imamala. Irhwayela uZimu. Umbono wokutlhagisa abantu emlilweni uyamyenyisa.—Funda uJeremiya 7:31.

  3. Singakhuluma nabahlongakeleko?

Abahlongakeleko abakwazi ukukhuluma. (IRhalani 115:17) Kodwana iingilozi ezimbi nezikhuluma nabantu, ngokukhohlisa zingazenza umoya womuntu ohlongakeleko. (2 Pitrosi 2:4) UJehova uyakwalela ukulinga ukukhuluma nabahlongakeleko.—Funda uDuteronomi 18:10, 11.

4. Bobani abazokuvuswa?

Ephasini elitjha elizako, iingidi zabantu ezisemathuneni zizokuvuswa. Ngitjho nabanye egade benza izinto ezimbi ngombana banganalwazi ngoJehova bazokuvuswa.—Funda uLuka 23:43; IZenzo 24:15.

Abavusiweko bazokufumana ithuba lokufunda iqiniso ngoZimu nelokutjengisa ikholo labo kuJesu ngokumlalela. (ISambulo 20:11-13) Labo abavusiweko begodu benza izinto ezihle bazokuthabela ukuphila okungapheliko ephasini. Nokho, abanye abavusiweko bazokuragela phambili benza izinto ezimbi. Ivuko labo lizokuba ‘livuko lokulahlwa.’—Funda uJwanisi 5:28, 29.

5. Ivuko lisitjelani ngoJehova?

Ivuko lingenzeka ngombana uZimu wathumela iNdodanakhe bona inikele ngokuphila kwayo ngebanga lethu. Ngalokho liyindlela uJehova atjengisa ngayo ithando nomusakhe omkhulu.—Funda uJwanisi 3:16; KwebeRoma 6:23.

Ukufumana ilwazi elingeziweko, qala isahluko-6 no-7 sencwadi le, Khuyini Kwamambala Okufundiswa YiBhayibhili?, egadangiswe boFakazi BakaJehova.

[Isithombe ekhasini 22]

U-Adamu wabunjwa ngehlabathi