Kuyatlhogeka Na Bona Abantwana Bafunde NgoZimu?

“Ikolo esinayo yanele bona isenze sibe nehloyo, kodwana ayikaneli bona isenze sithandane.”—JONATHAN SWIFT, UMTLOLI OMNGISI.

USWIFT watjho amezwi layo ngekhulu le-18 leemnyaka, kodwana abanengi namhlanjesi bangavumelana naye. Eqinisweni, abanye bakholelwa bona ababelethi akukafuzi babe nelungelo lokufundisa abantwababo ngoZimu. Bacabanga bona abantwana abakhuliselwa ekolweni angeze bakhule kuhle.

Ucabangani wena? Ngimiphi imitjho enengqondo kwelandelako le?

● Ababelethi akukafuzi bafundise abantwababo ngoZimu.

● Ababelethi kufuze balinde abantwababo bebakhule ngaphambi kobana bacocisane nabo ngeendaba zekolo.

● Ababelethi kufuze badlulisele iinkolelo zabo ebantwaneni ngoZimu basesebancani. Kodwana njengombana bakhula, ababelethi kufuze babakhuthaze bona bazicabangele bona ngokwabo.

● Abantwana kufuze bathathe ikolo yababelethi babo ngoZimu kungakhathaliseki bona ngeyeqiniso namtjhana awa.

Ikolo Iyabalimaza Na Abantwana?

Akakho umbelethi okhathalelako ofuna ukulimaza umntwanakhe. Kodwana amaphuzu la ayakusekela lokho okutjhiwo ngilabo abakhandela abantwana bona bafunde ngoZimu? Sekuminyaka abarhubhululi bahlolisise iimphumela ikolo yababelethi eba nayo ebantwaneni. Saba yini isiphetho?

Abarhubhululi bafumene bona kunokobana ibe nomthelela olimazako, ikolo ingaba nomphumela omuhle ekukhuleni komntwana. Ngo-2008 umbiko owagadangiswa ephepheni i-Social Science Research * wathi: “Ikolo ibonakala ithuthukisa ubuhlobo bombelethi nomntwana kokubili abomma nabobaba.” Umbiko lo godu wathi: “Ikolo nengokomoya zibonakala ziqakathekile emaphilweni wabantwana abanengi, begodu iqakathekile nebuhlotjeni bomndeni.” Tjheja bona lokho kufana ngani nokwatjhiwo nguJesu Krestu: “Bayathaba abatlhogomela iintlhogo zabo zomoya.”—Matewu 5:3, NW.

Kuthiwani ngombono wokobana abantwana kufuze bakhule ngaphambi kokufunda ngoZimu nekolo? Umbono loyo utjhalazela iphuzweli: Ingqondo yomntwana ifana nethunga elinganalitho elilindele ukuzaliswa. Kwamambala, ababelethi kufuze bakhethe; bona bazalisa “ithungelo” ekhaya ngeenkambisolawulo zokuziphatha neenkolelo abacabanga bona zilungile, namtjhana babavumela bafunde nanyana yini abayizwa kwabanye abantu.

Iyini Ifihlo?

Umlando utjengisa bona abantu bangasebenzisa iimbono yekolo ukubandlulula nokuhloya abanye. Ngalokho, ababelethi bangayibalekela njani iimphumela ehlathululwe nguJonathan Swift? Bangabafundisa njani abantwababo ngekolo ebasiza bona bathande abanye?

Ifihlo isekufumaneni iimpendulo eembuzweni eemthathu le: (1) Khuyini okufuze ifundwe bantwana? (2) Ngubani okufuze abafundise? (3) Ngiziphi iindlela zokufundisa eziphumelelako?

[Umtlolo waphasi]