Iimbuzo Elitjhumi Malungana Nomseme Iyaphendulwa

1 Umseme bekusisono sokuthoma na esenziwa ngu-Adamu no-Efa esimini ye-Edeni?

▪ Ipendulo: Abantu abanengi bacabanga bona umuthi ogade uvinjelwe esimini ye-Edeni bewufanekisela ubuhlobo bomseme. Nanyana kunjalo, lokho akusikho okufundiswa yiBhayibhili.

Cabanga ngalokhu: UZimu wayala u-Adamu bona angadli isithelo “somuthi wokwazi okuhle nokumbi,” ngaphambi kobana u-Efa abunjwe. (Genesisi 2:15-18) Ngombana u-Adamu gade ayedwa, umlayo lo bewungakaqalisi ebuhlobeni bomseme. Ngaphezu kwalokho, uZimu wanikela u-Adamu no-Efa umlayo okhanyako wokobana “babelethe bande bazalise iphasi.” (Genesisi 1:28) UZimu onethando bekangalayela isibili sokuthoma bona ‘sizalise iphasi’—ekubeni lokho bekubandakanya ubuhlobo bomseme—bese ubagwebela ukufa ngokulalela iimlaywakhe?—1 KaJwanisi 4:8.

Ngaphezu kwalokho, indoda ka-Efa beyingasinaye “ngalokho wathatha isithelo sawo [esivinjelweko] wasidla. Ngemva kwalokho wanikela indodakhe nesele inaye nayo yasidla.”—Genesisi 3:6.

Ekugcineni, U-Adamu no-Efa akhenge babekwe umlandu ngokuba nobuhlobo bomseme nokubeletha abantwana. (Genesisi 4:1, 2) Kuyakhanya bona isithelo u-Adamu no-Efa abasidlako besingakajameli ukuba nobuhlobo bomseme, kodwana bekusithelo samambala esimila emthini.

2 IBhayibhili iyakulahla na ukuzithabisa ngokomseme?

▪ Ipendulo: Incwadi yokuthoma yeBhayibhili iveza bona nguZimu owabumba abantu ababili kwaba ‘ngomduna nomsikazi.’ UZimu wathi indalwakhe “yihle khulu.” (Genesisi 1:27, 31) Ngokukhamba kwesikhathi, uZimu waphefumulela umtloli weBhayibhili bona anikele iimlayo le emadodeni: “Thaba ngomfazi wobutjha bakho . . . Amabelakhe akakuthabise ngeenkhathi zoke.” (Iziyema 5:18, 19) Amezwi la azwakala kwanga iBhayibhili iyakulahla ukuzithabisa ngokomseme?

 Amaqiniso atjengisa bona ukungezelela ekwenzeni bonyana ukubeletha kukghoneke, uZimu wenza izitho zobulili ngendlela evumela abatjhadi bona batjengisane ithando ngendlela ezobathabisa bobabili. Ubuhlobo obunjalo bunganelisa iintlhogo ezingokwenyama nezingokwamazizo zendoda nomfazi abatjhideleneko nabathandanako.

3 IBhayibhili iyakuvumela bona indoda nomfazi bahlale ndawonye bangakatjhadi ngokomthetho?

▪ Ipendulo: IBhayibhili ikubeka ngokukhanyako bona ‘uZimu uzokwahlulela iimfebe.’ (KumaHebheru 13:4) Ibizo lesiGirigi elithi ubufebe, por·neiʹa, kanengi litjho ukusebenzisa kumbi izitho zobulili zomuntu ongakatjhadi naye. * Ngalokho, akukalungi emehlweni kaZimu bona isibili sihlale ndawonye—ngitjho nanyana sicabangela ukutjhada ngokukhamba kwesikhathi.

Ngitjho nanyana isibili sithandana kangangani, uZimu ulindele bona sitjhade ngaphambi kokuthabela ubuhlobo bomseme. NguZimu owasenza bona sikwazi ukuthanda. Ifanelo kaZimu eyihloko lithando. Ngalokho, unebanga elihle lokugandelela bona ubuhlobo bomseme buthatjelwe babantu abatjhadileko kwaphela, njengombana isihloko esilandelako sizokuhlathulula.

4 Isithembu sivumelekile?

▪ Ipendulo: Kwesikhatjhana, uZimu wavumela indoda bona ibe nabafazi abangaphezu koyedwa. (Genesisi 4:19; 16:1-4; 29:18–30:24) Kodwana uZimu akasuye umthomisi wesithembu. Wenzela u-Adamu umfazi oyedwa kwaphela.

UZimu wavumela uJesu Krestu bona abuyisele umnqopho Wakhe wekuthomeni wokobana indoda ibe nomfazi oyedwa kwaphela. (Jwanisi 8:28) Nekabuzwa ngomtjhado, uJesu wathi: ‘Loyo owabumba omduna nomsikazi ekuthomeni . . . wathi: “Ngesizathwesi indoda izakutjhiya uyise nonina ihlale nomkayo, ababilaba bazaba munye.’”—Matewu 19:4, 5.

Omunye wabafundi bakaJesu kamva waphefumulelwa nguZimu bona atlole: “Leyo naleyo indoda ibe nomfazi wayo, nomfazi abe nendoda yakhe.” (1 KwebeKorinte 7:2) Godu iBhayibhili ithi  nanyana ngiyiphi indoda etjhadileko ebandleni lobuKrestu enikelwe iimthwalo ekhethekileko kufuze ‘ibe nomfazi oyedwa.’—1 KuThimothi 3:2, 12.

5 Akukalungi na bona abantu abatjhadileko basebenzise iimvikela mbeleko?

▪ Ipendulo: UJesu akhange alayele abalandeli bakhe bona babe nabantwana. Akekho ebafundini bakaJesu owakhipha isinqophiso esinjalo. Akukho eBhayibhilini lapho kuvinjelwe khona ngokukhanyako ukusetjenziswa kweemvikela mbeleko.

Ngalokho, abantu abatjhadileko batjhuphulukile ukuzikhethela bona bayafuna ukukhulisa abantwana nofana awa. Bangazikhethela ngokwabo bona bafuna ukuba nabantwana abangaki nokobana bafuna ukuba nabo nini. Nengabe indoda nomfazi bakhetha ukusebenzisa iimvikela mbeleko ezingarhululi umbungu bona babeleke ukuzithwala, lokho kusinqunto sabo nomthwalwabo. * Akekho okufuze abahlulele.—KwebeRoma 14:4, 10-13.

6 Kulungile na ukurhulula umbungu?

▪ Ipendulo: Ukuphila kucwengile kuZimu, begodu uqala ngitjho nombungu njengento ephilako. (IRhalani 139:16) UZimu wathi umuntu uzozilandisela ngokulimaza umntwana ongakabelethwa. Ngalokho, emehlwenakhe, ukubulala umntwana ongakabelethwa, kubulala.—Eksodosi 20:13; 21:22, 23.

Kuthiwani nengabe ubujamo oburhabako ngesikhathi kubelethwa umntwana bukatelela isibili esitjhadileko sikhethe hlangana kokuvumela bona kuphile umma nofana umntwana? Ebujamweni obunjalo, isibili kufuze sikhethe bona ngikuphi ukuphila esingakuphulusa. *

7 IBhayibhili iyakuvumela ukutlhala?

▪ Ipendulo: IBhayibhili iyakuvumela ukutlhala. Nokho, uJesu watjho ibanga elilodwa kwaphela elamukelekako bona umtjhado uphele, wathi: ‘Nanyana ngiyiphi indoda etlhala umkayo angazange akhe afebe [ukuba nobuhlobo bomseme nomuntu ongakatjhadi naye], iyaphinga ngokutjhada omunye umfazi.’—Matewu 19:9.

UZimu uyakuhloya ukutlhala ngokukhohlisa nangobuqili. Uzobenza balandise labo abatjhiya abalingani babo bomtjhado ngeenzathu ezingazwakaliko, khulukhulu nengabe bakwenza ngomnqopho wokuthatha omunye umlingani.—Malaki 2:13-16; Markosi 10:9.

8 UZimu uyakuvumela ukuthandana kwabantu bobulili obufanako?

 ▪ Ipendulo: IBhayibhili ibulahla ngokukhanyako ubufebe, okuhlanganisa ukuthandana kwabantu bobulili obufanako. (KwebeRoma 1:26, 27; KwebeGalatiya 5:19-21) Njengombana iBhayibhili ikukhanyisa kuhle ukulahla kwakaZimu umukghwa onjalo, thina siyazi bona “uZimu walithanda kangako iphasi, wabe wanikela ngeNdodana yakhe ekukuphela kwayo, khona kuzakuthi kiloyo okholwa ngiyo angabhubhi, kodwana abe nobuphilo obungapheliko.”—Jwanisi 3:16.

Ngitjho nanyana angakwamukeli ukuthandana kwabantu bobulili obufanako, amaKrestu weqiniso atjengisa umusa kibo boke abantu. (Matewu 7:12) UZimu ufuna ‘sihloniphe woke umuntu.’ Ngalokho, amaKrestu weqiniso akahloyi abantu bobulili obufanako abathandanako ngokwabo.—1 KaPitrosi 2:17.

9 Kukhona okungakalungi na ngephone sex, “i-sexting,” nofana i-cybersex?

▪ Ipendulo: I-phone sex ibandakanya ukukhuluma kumbi ngomseme nofana ukulalela iimlayezo evusa ikanuko emtatweni. “I-sexting” libizo elitjho ukusebenzisa umaliledinini ukuthumela iinthombe ezivusa ikanuko nokuthumela iimlayezo yomseme tjhatjhalazi kwabanye. I-cybersex ibandakanya ukuthumelana iimlayezo evusa ikanuko yomseme ku-Internet.

IBhayibhili ayikhulumi ngokunqophileko ngemikghwa yanamhlanje enjenga le. Kodwana ithi: “[Ubufebe], ukusilaphala, nomona, akungaphathwa nakanye hlangana nani. Abekukanifaneli ukusebenzisa amezwi ahlabako, aphaphalazako, nayiphi ihlamba.” (Kwebe-Efesu 5:3, 4) Izinto ezinjengokhuluma ngomseme emtatweni, “ukuthumelana iimlayezo” neenthombe zomseme nokucoca ngomseme ku-internet kuthuthukisa umbono ophambeneko ngomseme begodu kukhuthaza abantu bona bathabele ubuhlobo bomseme ngaphandle kwelungiselelo lomtjhado. Kunokobana isize abantu balawule iimfiso zomseme, imikghwa le ithuthukisa ukuzanelisa ngomseme okumarhamaru.

10 Uyini umbono weBhayibhili ngokuskomora?

▪ Ipendulo: IBhayibhili ayikhulumi ngokunqophileko ngokuskomora—ukuzibambabamba izitho zobulili ngehloso yokuvusa ikanuko nokufikelela ezingeni lokwaneliseka ngokomseme. Nokho, iLizwi lakaZimu liyala amaKrestu bona: ‘Alise iinkanuko zoke zawo ezimbi zomzimba: . . . Ukuhlobonga [ubufebe], nokusilaphala, nokukhanukela [okungakalungi].’—KwebeKholose 3:5.

Ukuskomora kuthuthukisa umbono ophambeneko nokuzicabangela wena kwaphela ngokomseme. IBhayibhili iyasiqinisekisa bona uZimu angabapha “amandla amakhulu” labo abenza umzamo wamambala wokulisa umukghwa lo.—2 KwebeKorinte 4:7; KwebeFilipi 4:13.

[Imitlolo yaphasi]