Bewazi?

Bekatjho ukuthini uJesu nekathi khamba naye amakhilomitha amabili?

▪ ETjumayelwenakhe yeNtabeni edumileko, uJesu wathi: ‘Naloyo okukatelelako bona ukhambe naye ikhilomitha elilodwa, khamba naye amakhilomitha amabili.’ (Matewu 5:41) Iinlaleli zakaJesu kungenzeka beziyelela bona bekakhuluma ngokwenza umsebenzi wokukatelelwa, obewungafunwa siphathimandla ngekani ezakhamuzini.

Ngekhulu lokuthoma C.E., u-Israyeli bekabuswa maRoma. Bewanganamraro wokukatelela abantu namtjhana iinlwana bona babasebenzele nokulawula nanyana yini enye ebewayiqala njengeqakathekileko bonyana enze umsebenzi webukhosini urhabe. Isibonelo, amasotja wamaRoma akatelela uSimoni weSirene bona athwale isigodo sakaJesu sokuhlunguphazwa ukuya lapho ayokubulawelwa khona. (Matewu 27:32) Izenzo ezinjalo bezigandelela, zingathandeki nakancani, begodu amaJuda gade azihloya.

Bona izakhamuzi bezikatelelwa ukuthwala umthwalo ibanga elingangani, akwaziwa. Kodwana kubonakala kubudisi bona bezingazimisela ukukhamba loke ibanga ebezikatelelwa bona zilikhambe. Ngalokho lapho uJesu abawa iinlaleli zakhe bona zikhambe amakhilomitha amabili, bekazitjela bonyana zenze iimsebenzi egade ifunwa ziimphathimandlezo ngaphandle kokusilingeka.—Markosi 12:17.

Bekungubani u-Anasi okukhulunywa ngaye ekulandiseni kwamaVangeli?

▪ Ngesikhathi secala lakaJesu, u-Anasi wahlathululwa ‘njengompristi omkhulu.’ (Luka 3:2; Jwanisi 18:13; IZenzo 4:6) Eqinisweni, bekangufadere wompristi omkhulu wakwa-Israyeli uKhayifasi, begodu naye ngokwakhe khe wakhonza njengompristi omkhulu kusukela ngo-6 namtjhana ngo-7 C.E. bekwafika ku-15 C.E., lapho asuswa khona esikhundleni mbusi weRoma uValerius Gratus. Nanyana sele angasuye umpristi omkhulu, u-Anasi waragela phambili anegunya elinamandla kwa-Israyeli. Amadodanakhe amahlanu nomkhwenyanakhe baba bapristi abakhulu.

U-Israyeli nekasaragela phambili anjengesitjhaba esizijameleko, umpristi omkhulu bekakhonza esikhundleni sakhe ukuphila kwakhe koke. (Numeri 35:25) Nokho, ngaphasi kokubuswa kwaka-Israyeli maRoma, umpristi omkhulu bekakhonza ngokuthanda kwababusi bamaRoma namakhosi abekwe yiRoma, begodu bakangasuswa ngiwo. Isazimlando uFlavius Josephus ubika bona uQuirinius, umbusi weRoma eSiriya, wasusa uJoazar othileko ekubeni mpristi omkhulu ngo-6 namtjhana ngo-7 C.E. wabeka u-Anasi esikhundleneso. Kodwana kubonakala kwanga ababusi ababarhedenaba ngibo ebebakhetha abajameli abatjha phakathi kwabapristi.

Umndeni ka-Anasi bewudume kumbi, ngokuba marhamaru begodu bewurege khulu. Kubonakala kwanga uburego bawo bewubufumana ngokuthengisa izinto zokwenza imihlatjelo etempeleni, njengamazuba, izimvu, amafutha newayini. UJosephus uthi u-Ananiyasi indodana ka-Anasi “bekaneensebenzi ezingakathembeki [ebezithatha] kwetjhumi kwabapristi ngekani; bezibethe labo abangafuni ukuzinikela.”