IBhayibhili Itjhugulula Amaphilo

KHUYINI eyenza indoda ethileko bona ibuyele ekolweni eyakhulela kiyo? Indoda ethileko eseseyitjha yamfumana njani ubaba egade imlulukela ukuphila kwayo koke? Zifundele lokho abantwaba abakutjhoko.

“Bekutlhogeka Bona Ngibuyele KuJehova.”—U-ELIE KHALIL

UMNYAKA ABELETHWA NGAWO: 1976

INARHA ABELETHELWA KIYO: CYPRUS

UMLANDO: INDODANA YELAHLEKO

UKUPHILA KWAMI KWANGAPHAMBILI: Ngabelethelwa eCyprus kodwana ngakhulela e-Australia. Ababelethi bami boFakazi BakaJehova, begodu benza koke abangakwenza ukudzimelelisa kimi ithando ngoJehova nangeLizwi lakhe iBhayibhili. Nokho, eemnyakenami yobutjha, ngathoma ukuvukela. Bengikhukhutha ekhaya ebusuku ngiyokuhlangana nabanye abatjha. Beseba iinkoloyi begodu sangena nakweminye iimraro eemnengi.

Ekuthomeni, bengenza iintwezo ngemsitheleni ngombana bengisaba ukudanisa ababelethi bami. Kodwana kancanikancani ukusabokho kwaphela. Ngenza ubungani nabantu abakhulu kimi ebebangamsabi uJehova, begodu baba nomthelela omumbi kimi. Ekugcineni, ngatjela ababelethi bami bona angisafuni ukuzwa litho ngekolwabo. Ngesineke balinga ukungisiza, kodwana ngalala isizo labo. Ababelethi bami bezwa ubuhlungu.

Ngemva kokuphuma ekhaya, ngathoma ukusebenzisa iindakamizwa, ngatjala bengathengisa isangokazi enengi. Bengiziphatha kumbi begodu bengisebenzisa isikhathi esinengi ngikhamba amaphathi ebusuku. Ngathoma ukuba nomukghwa wokusilingeka msinyana. Nekunomuntu okhulume namtjhana owenze into engingayithandiko, bengibhoka ngobukhali, kanengi bengibathuka begodu ngibabetha. Bulula nje, ngenza zoke izinto engafundiswa bona ngingazenzi njengomKrestu.

INDLELA IBHAYIBHILI EYATJHUGULULA NGAYO UKUPHILA KWAMI: Ngaba mngani omkhulu nomunye walabo esisebenzisa naye iindakamizwa owahlongakalelwa nguyise asesemncani. Besihlala bekube sebusuku khulu sicoca. Ngobunye bobusuku bekathulula isifuba sakhe aveze indlela abekamkhumbula ngayo uyise. Njengombana ngakhula ngazi ngethemba lokuvuswa kwabafileko, ngazifumana sele ngimtjela ngoJesu—bona wavusa abafileko nokobana uthembisa ukwenza njalo godu esikhathini esizako. (Jwanisi 5:28, 29) Bengijayele ukuthi, “Cabanga sele ubona ubabakho godu. Soke singaphila eParadeyisini ephasini.” Amezwi layo ayithinta ihliziyo yomnganami.

Ngezinye iinkhathi, umnganami bekakhuluma  ngezinto ezinjengemihla yokuphela nefundiso kazimu oyedwa kwabathathu. Bengithatha iBhayibhilakhe ngimtjengise imitlolo ehlukahlukeneko eveza iqiniso ngoJehova uZimu, uJesu nangemihla yokuphela. (Jwanisi 14:28; 2 KuThimothi 3:1-5) Nengikhuluma kanengi ngoJehova kumnganami, kulapho bengizifumana khona ngicabanga ngoJehova.

Kancanikancani, imbewu yeqiniso leBhayibhili ebeyifihlekile ehliziywenami—imbewu ababelethi bami abalinga ngamandla bona bayitjale—yathoma ukukhula. Isibonelo, ngezinye iinkhathi nengisephathini sisebenzisa iindakamizwa nabangani bami, bengivele ngicabange ngoJehova. Abangani bami abanengi bebathi bayamthanda uZimu, kodwana ukuziphatha kwabo bekutjho okuhlukileko. Ngingafuni ukufana nabo, ngalemuka bona khuyini okufuze ngiyenze. Bekutlhogeka bona ngibuyele kuJehova.

Liqiniso, kulula ukwazi bona yini okufuze uyenze, kodwana kubudisi khulu ukwenza. Amanye amatjhuguluko bekalula bona ngiwenze, ngalisa ukusebenzisa iindakamizwa ngaphandle kobudisi. Godu ngahlukana nabangani bami bakade, begodu ngathoma ukufunda iBhayibhili nomdala omKrestu.

Nokho, amanye amatjhuguluko bekabudisi khulu. Bekubudisi khulu bona ngilawule ubukhali bami. Ngezinye iinkhathi bengenza kuhle isikhatjhana bese ngithoma phasi godu. Bengizizwa kumbi ngemva kwalokho, ngicabanga bona ngiyabhalelwa. Ngidanile, ngaya kumdala obekangifundela iBhayibhili. Abekezela begodu anomusa, waba mthombo wesikhuthazo seqiniso. Ngesinye isikhathi, wangifundisa isihloko se-Sithalasokulinda egade sikhuluma ngokuqakatheka kokungapheli amandla. * Sacoca ngamagadango okufuze ngiwathathe nengikwatileko. Ngicabanga ngesihlokweso begodu ngithandaza khulu kuJehova, kancanikancani ngakghona ukulawula ubukhali bami. Ekugcineni, ngo-Apreli 2000, ngabhabhadiswa njengomunye waboFakazi BakaJehova. Ingasaphathwa-ke yokobana ababelethi bami bebathabe kangangani.

INDLELA ENGAZUZA NGAYO: Nje nginokuthula kwengqondo nesazelo esihlwengileko, ngazi bona angisawusilaphazi umzimbami ngeendakamizwa namtjhana ukuziphatha kumbi. Kungakhathaliseki bona ngenzani, ngiyasebenza, ngiya emihlanganweni yobuKrestu, nofana ngithabela ihlobo elithileko lokuzithabisa, ngithabile. Nginombono omuhle ngokuphila.

Ngiyamthokoza uJehova ngababelethi bami, abangakhange bangikhohlwe. Godu ngicabanga ngamezwi kaJesu afumaneka kuJwanisi 6:44: “Akakho noyedwa ongeza kimi, lokha uBaba ongithumileko nangamdoseli kimi.” Kuyangithinta ukucabanga ngokobana ngikghonile ukubuyela kuJehova ngombana wangidosa.

 “Bengilulukela Ukuba Nobaba.”—UMARCO ANTONIO ALVAREZ SOTO

UMNYAKA ABELETHWA NGAWO: 1977

INARHA ABELETHELWA KIYO: CHILE

UMLANDO: ILUNGA LESIQHEMA SOMBHINO WE-DEATH-METAL

UKUPHILA KWAMI KWANGAPHAMBILI: Ngakhuliswa ngumma ePunta Arenas, idorobha elihle eliseStrait of Magellan eduze nemaphethelweni wesewula yeSewula Amerikha. Ababelethi bami bahlukana nengineemnyaka emihlanu, okwangenza ngazizwa ngilahliwe. Bengilulukela ukuba nobaba.

Umma bekafunda iBhayibhili naboFakazi BakaJehova, begodu bekakhamba nami emihlanganweni yobuKrestu eWolweni LoMbuso. Nanyana kunjalo, bengikuhloya ukuya eemfundweni, begodu kanengi bengisilingeka ngirhuwelele nesiyako. Nengineemnyaka eli-13, ngalisa ukuhlanganyela ngokupheleleko.

Ngesikhatheso, besele nginethando ngombhino, begodu ngalemuka bona nginekghono lawo. Nengineemnyaka eli-15, bengidlala umbhino we-heavy-metal (rock) ne-death-metal (umbhino okhuthaza inturhu) kumafestivali, emabhareni neembuthanweni eba semakhaya. Ukuzihlanganisa nabantu egade banekghono lokuvuma kwabangela bona ngithande umbhino we-classic. Ngathoma ukufundela umbhino esikolweni sendawo. Nengineemnyaka ema-20, ngafudukela ehloko dorobha ye-Santiago, bona ngiragele phambili neemfundo zami. Godu ngaragela phambili nokudlala umbhino namabhende we-heavy-metal ne-death-metal.

Soke isikhathesi, bengikholwa sizungu. Bona ngilwe namazizo anjalo, bengisela utjwala ngokweqileko begodu ngisebenzisa iindakamizwa nabangani bami bebhende egade ngibaqala njengomndenami. Benginobujamo bomkhumbulo bokuvukela, lokho bekubonakala endleleni engibonakala ngayo ngaphandle. Bengimbatha izambatho ezinzima, ngakhulisa iindevu, begodu ngakhulisa iinhluthu zami pheze bezifika edinini.

Eenkhathini ezinengi, ukuziphatha kwami bekungenza bona ngilwe begodu kwangifaka eemrarweni nomthetho. Langelinye, ngisele utjwala ngokweqileko, ngasahlela isiqhema sabathegisa iindakamizwa egade sitshwenya abangani bami nami. Sangidula bengaphuka umhlathi.

Nokho, ubuhlungu obukhulu engabuzwako bavela kilabo engitjhidelene nabo. Langelinye, ngafumana bona intombami gade ithandana nomunye umnganami omkhulu iimnyaka, begodu boke abangani bami bangifihlela. Kwangilimaza khulu lokho.

Ngabuyela ePunta Arenas, lapho ngafundela umbhino begodu ngaba mdlali we-cello (isililiswa esifana ne-violin kodwa sikhulu kunayo). Godu ngaragela phambili ngidlala begodu ngirikhoda namabhende adlala i-heavy-metal ne-death-metal. Ngahlangana nomntazana omuhle uSussan, sahlala soke. Ngokukhamba kwesikhathi, uSussan wafumana bona ummakhe ukholelwa efundisweni kazimu oyedwa kwabathathu kodwana mina bengingakholelwa kiyo. Wangibuza bona, “Liyini iqiniso-ke?” Ngathi ngiyazi bona ifundiso kazimu oyedwa kwabathathu imamala kodwana angikwazi ukuyifakazela ngeBhayibhili. Nokho, gade ngazi bona bobani abangamsiza. Ngamtjela bona aboFakazi BakaJehova bangambonisa iqiniso eBhayibhilini. Ngenza into egade sele ngingasayenzi iimnyaka eemnengi—ngathandaza kuZimu ngabawa isizo lakhe.

Ngemva kwamalanga ambalwa, ngabona indoda engiyijayeleko, ngayibuza bona ingomunye waboFakazi BakaJehova na. Nanyana bekubonakala  bona beyithukiwe ngebanga lendlela ebengiqaleka ngayo, yayiphendula ngomusa iimbuzwami emalungana nemihlangano eWolweni LoMbuso. Ngaqiniseka bona indlela asabela ngayo bekuyipendulo yomthandazwami. Ngaya eWolweni LoMbuso ngahlala emva ukwenzela bona kungabi nomuntu ozongikhumbula. Nokho, abanengi bangibona bakhumbula isikhathi nengiseza nomma ngisesemncani. Bangamukela bangihaga ngethando ngezwa ukuthula okukarisako. Kwaba sengathi ngibuyele ekhaya. Nengibona indoda egade ingifundela iBhayibhili nengisesemncani, ngayibawa bona ifunde nami iBhayibhili godu.

INDLELA IBHAYIBHILI EYATJHUGULULA NGAYO UKUPHILA KWAMI: Langelinye ngafunda IZiyema 27:11, ezithi: “Hlakanipha ndodanami, yenza ihliziyo yami ithabe.” Ngakareka ukwazi bona umuntu ofako angakwazi ukuthabisa uMbumbi wayo yoke into. Ngalemuka bona uJehova unguBaba ebengimfuna ukuphila kwami koke!

Gade ngifuna ukuthabisa uBabami wezulwini ngenze intandwakhe, kodwana bengilikghoba leendakamizwa notjwala iimnyaka eemnengi. Ngayizwisisa ifundiso kaJesu etlolwe kuMatewu 6:24 ethi, “Akakho umuntu ongaba sigqili samakhosi amabili.” Njengombana ngilwela ukwenza amatjhuguluko, ikambisolawulo etlolwe ku-1 KwebeKorinte 15:33 ethi, “Ukujayelana nabantu bemikhuba emimbi kusilaphaza isimilo esihle,” yangithinta khulu. Ngatjheja bona angekhe ngikwazi ukulisa imikghwami elimazako nengabe ngiragela phambili ngiya eendaweni ezifana nalezo begodu ngizihlanganisa nabantwabo. Isiluleko seBhayibhili besikhanya: Bekufuze ngithathe amagadango ancamileko bona ngitjhaphuluke ezintweni egade zingenza ngikhubeke.—Matewu 5:30.

Ithando lami ngombhino lenza bona ukulisa i-heavy-metal kube siqunto esibudisi engakhe ngasenza. Kodwana ngesizo labangani bami ebandleni, ekugcineni ngakghona ukulisa. Ngalisa ukusela khulu nokusebenzisa iindakamizwa. Ngakera iinhluthu zami, ngasusa neendevu begodu ngalisa nokumbatha izambatho ezinzima kwaphela. Nengitjela uSussan bona ngifuna ukukera iinhluthu zami, lokho kwamenza waba nerhuluphelo lokwazi. Wathi, “Ngikhamba nawe eWolweni LoMbuso ukuyokubona bona kwenzekani!” Wakuthanda akubona lapho, msinyana naye wathoma ukufunda iBhayibhili. Ekugcineni, sinoSussan satjhada. Ngo-2008, sabhabhadiswa njengaboFakazi BakaJehova. Kuyasithabisa ukuba ndawonye nomma ekukhonzeni uJehova.

INDLELA ENGAZUZA NGAYO: Ngilibalekele iphasi elinganalo ithabo lamambala nabangani abangakathembeki. Ngisawuthanda umbhino, kodwana sengiyakhetha. Ngisebenzisa okuhlangabezanwe nakho kwami ukuzuzisa amalunga womndeni nabanye, khulukhulu abantu abatjha. Ngifuna ukubasiza babone bona okunengi okukhuthazwa yiphaseli kungabonakala kukarisa, kodwana ekugcineni ‘ziinzibi.’—KwebeFilipi 3:8.

Ngifumene abangani abathembekileko ebandleni lobuKrestu, lapho kunethando leqiniso nokuthula. Ngaphezu kwakho koke, ngokutjhidela kuJehova, ekugcineni ngimfumene uBabami.

[Umtlolo waphasi]

[Umkhangiso osekhasini 13]

“Ngikghonile ukubuyela kuJehova ngombana wangidosa”