Ingcoco Nomakhelwana—UJesu NguZimu Na?

ABOFAKAZI BAKAJEHOVA bayakuthabela ukucoca ngeBhayibhili nabomakhelwana babo. Ikhona na indaba ethileko eBhayibhilini okhe wazibuza yona? Ungathanda ukwazi ngezinye zeenkolelo zaboFakazi BakaJehova? Nekunjalo, ungazazi ukubabuza newuhlangana nabo ngesikhathi esilandelako. Bazokuthabela ukukhulumisana nawe ngeendaba ezinjalo.

Nasi isibonelo sengcoco omunye waboFakazi BakaJehova angaba nayo nomakhelwana. Akhe sithi uFakazi ibizo lakhe elinguLindiwe uvakatjhe emzini kaNomsa.

Kuliqiniso Bona Anikholelwa KuJesu?

UNomsa: Umfundisami uthi aboFakazi BakaJehova abakholelwa kuJesu. Uqinisile?

ULindiwe: Ngibawa ukukuqinisekisa bona siyakholelwa kuJesu. Eqinisweni, sikholelwa bona kuqakathekile ukuba nekholo kuJesu bonyana sisindiswe.

UNomsa: Nami ngiyakukholelwa lokho.

ULindiwe: Leyo yinto mina nawe esifana ngayo. Bengingakakutjeli ibizo lami, nginguLindiwe. Ngingathabela ukwazi ibizo lakho?

UNomsa: NginguNomsa. Ngithabela ukukwazi.

ULindiwe: Nami ngithabela ukukwazi Nomsa. Mhlambe uyazibuza, ‘Nengabe kwamambala aboFakazi BakaJehova bayakholelwa kuJesu, kubayini abantu batjho okuhlukileko?’

UNomsa: Iye, nami ngiyazibuza.

ULindiwe: Ngizokuba mfitjhani, Nomsa, sikholelwa ngokuqinileko kuJesu, kodwana asikholwa yoke into abantu abayitjhoko ngaye.

UNomsa: Khuyini eningayikholweliko ngoJesu?

ULindiwe: Abanye abantu bathi uJesu bekayindoda elungileko kwaphela. Kodwana asivumelani nalokho.

UNomsa: Nami angivumelani nakho.

ULindiwe: Ngenye into mina nawe esifana ngayo leyo. Isibonelo sesibili kukobana aboFakazi BakaJehova abavumelani neemfundiso eziphikisana nalokho uJesu ngokwakhe akutjhoko ngobuhlobo bakhe noYise.

UNomsa: Utjh’ ukuthini?

ULindiwe: Iinkolo ezinengi zifundisa bona uJesu nguZimu. Mhlamunye ngilokho okufundisiweko nawe.

UNomsa: Kunjalo, umfundisami uthi uZimu noJesu bayafana.

ULindiwe: Ungavuma na bona indlela engcono yokufunda iqiniso ngoJesu kuhlola lokho akukhuluma ngaye?

UNomsa: Iye, ngiyavuma.

Wathini UJesu?

ULindiwe: Akhe sihlole ivesi leBhayibhili elisisiza bona sikuzwisise lokhu. Ngibawa utjheje lokho esikufunda kuJwanisi 6:38. UJesu wathi: “Ngombana ngivela ezulwini, ingasibona ngenze intando yami kodwana ngenze intando yaloyo ongithumileko.” Nje-ke, amezwi layo bekazokurara nengabe uJesu bekanguZimu.

 UNomsa: Utjh’ ukuthini?

ULindiwe: Ngibawa utjheje bona uJesu wathi weza avela ezulwini ingasi ukuzokwenza intando yakhe.

UNomsa: Kunjalo, wathi wazela ukuzokwenza intando yaLoyo omthumileko.

ULindiwe: Kodwana nengabe uJesu nguZimu, ngubani-ke owamthumako avela ezulwini? Begodu kubayini uJesu azithoba entandweni yaLoyo?

UNomsa: Sengithoma ukuzwisisa bona uthini. Kodwana angiqiniseki bonyana ivesi elilodweli lifakazela bona uJesu akasinguZimu.

ULindiwe: Akhe uzwe okhunye uJesu akutjhoko kwesinye isehlakalo. Wakhuluma amezwi afanako esahlukweni esilandelako sakaJwanisi. Ngibawa ufunde uJwanisi 7:16.

UNomsa: Kulungile. “UJesu wabaphendula wathi: ‘Engikufundisako akusiyifundiso yami, kodwana ivela kuZimu, ongithumileko.’”

ULindiwe: Ngiyathokoza Nomsa. Ngokuya ngeveseli, uJesu wafundisa iimbonwakhe na?

UNomsa: Awa, wathi akufundisako kuvela kiLoyo omthumileko.

ULindiwe: Uqinisile. Godu lokhu kuphakamisa iimbuzo: ‘Ngubani owathuma uJesu? Begodu ngubani owamnikela amaqiniso awafundisako?’ Angekhe kwenzeka na bona Loyo abe mkhulu kunoJesu? Ngaphezu kwalokho, umuntu othumako mkhulu kunaloyo othunywako.

UNomsa: Kuyathabisa lokho. Ngiyathoma ukufunda iveseli.

ULindiwe: Godu izwa amezwi kaJesu akuJwanisi 14:28: “Ningizwile ngisithi kini: ‘Ngiyakhamba, kodwana ngizabuya.’ Ngathana beningithanda, benizothaba bona ngiya kuBaba, ngombana Yena mkhulu kunami.” Ngokusekelwe evesineli, ungathi uJesu bekabuqala njani ubuhlobo bakhe noYise?

UNomsa: Wathi uYise mkhulu kunaye. Nje-ke ngicabanga bona bekaqala uZimu njengomkhulu kunaye.

ULindiwe: Uqinisile. Nasi esinye isibonelo, tjheja lokho uJesu akutjela abafundi bakhe njengombana kutlolwe kuMatewu 28:18. Iveseli lithi: “Nginikelwe woke amandla ezulwini nephasinapha.” Manje, uJesu wathi gade asolo analo loke igunya na?

UNomsa: Awa, wathi wanikelwa lona.

ULindiwe: Kodwana nengabe uJesu nguZimu, anganikelwa njani igunya elingeziweko? Begodu ngubani owamnikela lona?

UNomsa: Ngisazokucabanga ngalokho.

Bekakhuluma Nobani?

ULindiwe: Kunokhunye okurarako nengabe kwamambala uJesu nguZimu.

UNomsa: Khuyini lokho?

ULindiwe: Ngilokho esikufunda ngokubhabhadiswa kwakaJesu. Tjheja lokho okutlolwe kuLuka 3:21, 22. Ngibawa umfunde.

UNomsa: “Kwathi ngemva kobana boke abantu sebabhabhadisiwe, noJesu naye wabhabhadiswa. Kuthe asathandaza, izulu lavuleka. Umoya ocwengileko wehlela kuye njengejamo lezuba. Ilizwi lavela ezulwini lisithi: ‘UyiNdodana yami ethandekako. Ngithabe khulu ngawe.’”

ULindiwe: Utjhejile bona uJesu bekenzani nekabhabhadiswako?

UNomsa: Bekathandaza.

ULindiwe: Kunjalo. Kungenzeka sizibuze, ‘Nengabe uJesu nguZimu, bekathandaza kubani?’

UNomsa: Mbuzo omuhle loyo. Ngizokubuza umfundisami.

ULindiwe: Esehlakalweneso, tjheja bona ngemva kobana uJesu akhuphuke ngemanzini, kunomuntu owakhuluma asezulwini. Utjhejile bona uMuntu loyo wathini?

UNomsa: Wathi uJesu bekayiNdodanakhe, bekaMthanda nokobana Uyathaba ngaye.

ULindiwe: Uqinisile. Kodwana nengabe uJesu nguZimu, ngubani owatjho iintwezo asezulwini?

UNomsa: Akhenge khengiyicabange njalo ngaphambilini.

Kubayini Babizwa ‘UBaba’ ‘NeNdodana.’

ULindiwe: Nakhu okhunye ekufuze sikutjheje: Sifunde bona uJesu ukhulume ngoZimu njengoBabakhe wezulwini. Begodu uJesu nekabhabhadiswako, ilizwi elivela ezulwini laqalisa  kuye njengeNdodanakhe. Eqinisweni, uJesu wazibiza ngokwakhe bona uyiNdodana kaZimu. Ngalokho-ke, newufuna ukungibonisa bona abantu ababili bayalingana, ngibuphi ubuhlobo bomndeni ongabusebenzisa bona ufanekise iphuzweli?

UNomsa: Ngingasebenzisa umuntu nomnakwabo.

ULindiwe: Kunjalo—mhlamunye ungasebenzisa amawele afana patsi. Kodwana uJesu uqalise kuZimu njengoBaba bese waqalisa kuye njengeNdodana. Nje-ke, ucabanga bona ngimuphi umlayezo uJesu ebekalinga ukuwudlulisa?

UNomsa: Ngiyakubona okutjhoko. UJesu uhlathulula omunye njengomkhulu kunomunye nonegunya elikhulu kunomunye.

ULindiwe: Uqinisile. Cabanga ngalokhu: Uze nomfanekiso ofanelekako ohlathulula ukulingana, womuntu nomnakwabo namtjhana amawele. Nengabe uJesu kwamambala bekanguZimu, awucabangi bona yena, njengoMfundisi Omkhulu bekazokucabanga ngomfanekiso ofanako—namtjhana omunye umfanekiso ongcono wabantu abalinganako?

UNomsa: Kunjalo.

ULindiwe: Kodwana kunalokho, wasebenzisa amagama ‘uBaba’ ‘neNdodana’ ukuhlathulula ubuhlobo bakhe noZimu.

UNomsa: Uveze iphuzu elihle.

Abalandeli BakaJesu Bokuthoma Bathini?

ULindiwe: Ngaphambi kobana ngikhambe, ngithanda ukucoca ngelinye iphuzu elilodwa lesihlokwesi nawe, nengabe unesikhatjhana.

UNomsa: Akunakinga, nginayo iimzuzwana singakhuluma.

ULindiwe: Nengabe uJesu kwamambala bekanguZimu, bengekhe ulindele bona abafundi bakhe bakutjho ngokukhanyako lokho?

UNomsa: Bengizokulindela lokho.

ULindiwe: Nanyana kunjalo, akukho eMitlolweni la sifunda khona bafundisa into enjalo. Ngokuphambene nalokho, tjheja lokho okwatlolwa ngomunye wabalandeli bakaJesu bokuthoma, umpostoli uPowula. KwebeFilipi 2:9, uhlathulula lokho okwenziwa nguZimu ngemva kokufa nokuvuswa kwakaJesu: “UZimu wamphakamisa [uJesu], wambeka esikhundleni esingaphezulu. Wamthiya ibizo elikhulu kunawo woke.” Ngokweveseli, khuyini uZimu ayenzela uJesu?

UNomsa: Lithi uZimu wamphakamisela esikhundleni esiphezulu.

ULindiwe: Kunjalo. Kodwana nengabe uJesu bekalingana noZimu ngaphambi kokufa kwakhe bese kwathi kamva uZimu wamphakamisela esikhundleni esiphezulu, lokho bengekhe kwenze uJesu abe ngaphezu kwakaZimu? Kungenzeka njani bona kube nomuntu ongaphezu kwakaZimu?

UNomsa: Bengekhe kwenzeke alingane naye. Ikomo ingazala umuntu.

ULindiwe: Ngiyavuma. Ngokusekelwe kibo boke ubufakazobu, ungatjho na bona iBhayibhili ifundisa bona uJesu nguZimu?

UNomsa: Awa, akusinjalo. IBhayibhili ithi uyiNdodana kaZimu.

ULindiwe: Ubethe khona. Nokho, ngibawa ukukuqinisekisa Nomsa bona aboFakazi BakaJehova bamhlonipha khulu uJesu. Sikholelwa bona ukufa kwakhe njengoMesiya othenjisiweko kuvulele boke abantu abathembekileko indlela eya ekuphulusweni.

UNomsa: Nami ngiyakukholelwa lokho.

ULindiwe: Kungenzeka uyazibuza, ‘Singamtjengisa njani uJesu bona siyathokoza ngokunikela ngokuphila kwakhe ngebanga lethu?’ *

UNomsa: Bengizibuza ngalokho.

ULindiwe: Mhlamunye ngingabuya ngizohlanganyela nawe ipendulo yeBhayibhili. Uzab’ ukhona ekhaya iveke ezako ngesikhathesi?

UNomsa: Iye, ngizabe ngikhona.

ULindiwe: Usale kuhle, ngizakubona iveke ezako.

[Umtlolo waphasi]