Tjhidela KuZimu

“Sibawa Ukubuyela Ekhaya”

Khe wakhonza uJehova? Khe wacabanga ngokumkhonza godu kodwana wazibuza bona uzokwamukela na? Sibawa ufunde isihlokwesi nesilandelako ngokutjhejisisa. Zilungiselelwe kucatjangwa ngawe ngokukhethekileko.

“NGATHANDAZA kuJehova ngimbawa bona angivumele ngibuyele ekhaya begodu angilibalele ngokumzwisa ubuhlungu.” Kwatjho enye ikosazana eyaphambuka endleleni yobuKrestu eyakhuliswa ngayo. Uzizwa njengayo? Uyazibuza na bona: ‘UZimu uzizwa njani ngalabo ekhe bamkhonza? Uyabakhumbula? Uyafuna bona “babuyele ekhaya”?’ Ukuphendula iimbuzo leyo, akhe sihlole amezwi atlolwa nguJeremiya. Akunakuzaza bona iimpendulo zizoyithinta ihliziywakho.—Funda uJeremiya 31:18-20.

Cabanga ngesizinda samezwi kaJeremiya. Eemnyakeni eminengi ngaphambi kwesikhathi sakaJeremiya, ngo-740 B.C.E., uJehova wavumela iintjhaba ezilitjhumi zombuso wakwa-Israyeli bona zithunjwe ma-Asiriya. * UZimu wavumela ihlekelele le njengesijeziso ngombana abantu bakhe besele bathome ukwenza izono ezikulu, akhenge bazitjheje iinyeleliso zabaporofidi bakhe. (2 AmaKhosi 17:5-18) Abantu bakutjhentjha na ukuziphatha kwabo ngebanga lobudisi egade baqalene nabo ekuthunjweni, lapho bebahlukaniswe noZimabo begodu bakude nenarha yekhabo? UJehova wakhohlwa ngabo? Bekazobavumela na bona babuyele ekhaya?

“Ngazisola”

Abantu bazisola ngesikhathi basekuthunjweni begodu batjhukumiseleka bona batjhuguluke. UJehova wakubona ukutjhuguluka kwabo kweqiniso. Lalela njengombana uJehova ahlathulula ubujamo bomkhumbulo namazizo wama-Israyeli athunjiweko, akhuluma ngawo ngokubumbeneko njengo-Efrayimi.

“Kwamambala ngimzwile u-Efrayimi azililela,” kutjho uJehova. (iVesi 18) Wawezwa ama-Israyeli njengombana gade alila ngebanga lemiphumela yokona kwawo. Esinye isazi sithi, amezwi athi “azililela” angatjho “ukuhlengezela namtjhana ukudengezela.” Bebanjengendodana eyonileko ethintitha ihloko ngebanga lokudana khulu njengombana icabanga ngobudisi ezifake kibo begodu ifisa ipilo egade iyiphila ekhaya. (Luka 15:11-17) Bebathini abantu?

“Ungilungisile . . . njengekonyana elingakabandulwa.” (iVesi 18) Abantu bavuma bona besibafanele isijeziso. Ngombana bebafana nekonyana elingakabandulwa. Enye incwadi ithi, isifaniswesi singatjho bona bebanjengekonyana “ebelingekhe libuzwe ubuhlungu besigodo esitsutsungwana nengabe azange khelivukele.”

“Ngibuyisa, begodu ngizokubuya ngokurhabako, ngombana unguJehova uZimami.” (iVesi 18) Abantu babiza uZimu njengombana iinhliziyo zabo besele zithobekile. Bebalahlekele endleleni yesono, kodwana kwanjesi babawa isizo bona bafumane indlela yokubuyela emusenakhe.  Enye itjhugululo ithi: “UnguZimethu—sibawa ukubuyela ekhaya.”—Contemporary English Version.

“Ngazisola. . . . Ngaba neenhloni, begodu ngazizwa ngihlazekile.” (iVesi 19) Abantu bazisola ngombana gade bonile. Bakuvuma ukusolwa begodu bakuvuma nokuba mlandu kwabo. Bazizwa banehlazo begodu balahliwe.—Luka 15:18, 19, 21.

Ama-Israyeli atjhuguluka. Bekatlhuwe kwamambala, azivuma izono zawo kuZimu begodu azilisa atjhuguluka eendleleni zawo ezimbi. Ukutjhuguluka kwawo bekuzoyithambisa ihliziyo kaZimu? Bekazobavumela bona babuyele ekhaya?

“Nakanjani Ngizomrhawukela”

UJehova bekatjhidelene ngokukhekileko nama-Israyeli. Wathi: “Ngibe nguBaba ku-Israyeli; begodu u-Efrayimi, ulizibulo lami.” (Jeremiya 31:9) Ubaba onethando angala njani ukuvumela indodana ezisola ngokusuka ehliziyweni bona ibuyele ekhaya? Tjheja indlela uJehova aveza ngayo amazizwakhe kaBaba ngabantu bakhe.

“U-Efrayimi yindodana eligugu kimi, namtjhana umntwana ophathwa ngethando na? Ngombana ngezinga engikhulume ngokujamelene ngalo naye ngizomkhumbula ngalo nakanjani.” (iVesi 20) Qala bona anethando kangangani amezwi layo! Njengobaba oqinileko kodwana onethando, uZimu bekakatelelekile bona akhulume “ngokujamelene” nabantwabakhe, abayelelisa ngokubuyelelweko ngeendlela zabo zesono. Ngekani nebangafuni ukulalela, wabavumela ukuya ekuthunjweni—eqinisweni, abenze batjhiye ikhaya. Namtjhana bekufuze abajezise, akhenge abakhohlwe. Bengekhe akwenze lokho. Ubaba onethando akabakhohlwa abantwabakhe. Nokho, uJehova wazizwa njani nekabona abantwabakhe batjhuguluka kwamambala?

“Amathumbami aguruzele ngebanga lakhe. * Nakanjani ngizomrhawukela.” (iVesi 20) UJehova waba nesifiso esikhulu ngabantwabakhe. Ukutjhuguluka kwabo okusuka ehliziyweni kwamthinta ihliziyo, begodu bekanesifiso esinamandla sokobana babuyele kuye. Njengobaba osemfanekisweni kaJesu wendodana yelahleko, uJehova ‘wazala isirhawu’ nesifiso sokwamukela abantwabakhe godu ekhaya.—Luka 15:20.

“Jehova Ngibawa Ukubuyela Ekhaya!”

Amezwi akuJeremiya 31:18-20 la asinikela ilemuko ngesirhawu nomusa kaJehova. UZimu akabakhohlwa labo ekhe bamkhonza. Kuthiwani nengabe abanjalo bafuna ukubuyela kuye? UZimu ‘ukulungele ukulibalela.’ (IRhalani 86:5) Angekhe abajikise labo abeza kuye baneenhliziyo ezitjhentjhileko. (IRhalani 51:17) Ngokuhlukileko, uyakuthabela ukubemukela ekhaya.—Luka 15:22-24.

Ikosazana ekukhulunywe ngaye esithulweni yathatha igadango lokubuyela kuJehova begodu yavakatjhela ibandla langekhabo laboFakazi BakaJehova. Ekuthomeni, bekufuze ihlule amazizwayo angasimahle. Iyakhumbula, “Bengizizwa ngingafaneleki.” Kodwana abadala bebandla bayinikela isikhuthazo begodu bayisiza bona iqine godu ngokomoya. Inehliziyo ezele ukuthokoza ithi, “Kuyathabisa bona uJehova ungivumele ngabuyela ekhaya!”

Nengabe khe wakhonza uJehova begodu ucabanga ukubuyela godu umkhonze, sikumema bona uvakatjhele ibandla langekhenu laboFakazi BakaJehova. Khumbula bona uJehova usabela ngesirhawu nangomusa lapho abatjhugulukileko bambawa, “Sibawa ukubuyela ekhaya.”

[Imitlolo yaphasi]