Ingcoco Nomakhelwana​—BokeAbantu AbaLungileko Baya Ezulwini Na?

ABOFAKAZI BAKAJEHOVA bayakuthabela ukucoca ngeBhayibhili nabomakhelwana babo. Ikhona na indaba ethileko eBhayibhilini okhe wazibuza yona? Ungathanda ukwazi okungeziweko ngezinye zeenkolelo zaboFakazi bakaJehova? Nengabe kunjalo, ungazazi ukubabuza newuhlangana nabo ngesikhathi esilandelako. Bazokuthabela ukucoca nawe ngeendaba ezinjalo.

Nasi isibonelo sengcoco omunye waboFakazi bakaJehova angaba nayo nomakhelwana. Akhe sithi uFakazi ibizo lakhe elinguSolani uvakatjhe emzini wendoda ebizwa bona nguZakhele.

Labo Abaya Ezulwini Bayokwenzani Lapho?

USolani: Newucabangela ikusasa, ucabanga bona izinto zizokuba ngcono, zizokuba zimbi khulu namtjhana zizokuhlala zinje?

UZakhele: Ngicabanga bona zizokuba ngcono. Ngiqale phambili ekuyeni ezulwini ngiyokuhlala neKosi.

USolani: Lithemba elihle lelo. IBhayibhili ikhuluma khulu ngokuthi izulu linjani nelungelo lokuya lapho. Ukhe wacabangisisa mara bona abaya ezulwini bayokwenzani lapho?

UZakhele: Sizokuba noZimu simdumise phakade.

USolani: Lithemba elikarisako lelo. Okuthabisako, iBhayibhili ayikhulumi ngamalungelo azokutholwa ngilabo abaya ezulwini kwaphela, kodwana ikhuluma nangomthwalo abazokuba nawo.

UZakhele: Mthwalo onjani loyo?

USolani: Mthwalo okukhulunywa ngawo ku-sAmbulo 5:10. Iveselo lithi, “Wabenza [uJesu] umbuso, baba bapristi bokulotjha uZimu wethu, bayolibusa iphasi.” Uyabona-ke Zakhele bona labo abaya ezulwini ngiwuphi umthwalo abayokuba nawo lapho?

UZakhele: Iveseli lithi bayokubusa iphasi.

USolani: Mbono omuhle, akusinjalo?

Bayokubusa Abobani?

USolani: Manje awuvumi bona nengabe labo abaya ezulwini bazokubusa njengamakhosi, kufuze kube nabantu abababusako? Alo kusizani bona kube norhulumende nengabe abekho abantu obabusako?

UZakhele: Ngiyayibona int’ oyitjhoko.

USolani: Umbuzo onengqondo esingazibuza wona ngilo, Bazokubusa abobani?

UZakhele: Ngicabanga bona bazokubusa abantu abasephasini abangakafi baye ezulwini.

USolani: Lokhu bekungaba nengqondo—nengabe boke abantu abalungileko baya ezulwini. Kodwana nasi enye into okufuze siyicabangele. Kungenzeka bona abanye abantu—abanye abantu abalungileko—bazokuya ezulwini na?

UZakhele: Azangkhe khengizwe ngananyana ngimaphi amaKrestu akholelwa kilokho.

 USolani: Ngibuza umbuzo lo ngebanga lalokho esikufunda kuRhalani 37:29. Ngibawa ufunde iveseli.

UZakhele: Kulungile. Lithi: “Abalungileko bazokudla ilifa lephasi bahlale kilo ngokungapheliko.”

USolani: Ngiyathokoza. Uyabona bonyana abantu abanengi abalungileko bayokuphila kuphi?

UZakhele: Iveseli lithi, bazokudla ilifa lephasi.

Solani: Unembile—ene ingasi okwesikhatjhana kwaphela. Tjheja bona iveseli lithi: “ bahlale kilo ngokungapheliko.”

UZakhele: Mhlambe lokho kumane kutjho bona kuzokuhlala kunabantu abalungileko ephasinapha. Nesihlongakalako siya ezulwini, sijanyiselelwa ngabanye abantu abalungileko ababelethwako.

USolani: Kungenzeka abanengi balihlathulula njalo iveseli. Kodwana kuyakghoneka na bona iveseli litjho into ehluke ngokupheleleko kilokho elikutjhoko? Belingathi abantu abalungileko bazokuphila ngokungapheliko ephasini?

UZakhele: Angazi bona ngiyayizwisisa into oyitjhoko na.

IParadeyisi LaNgomuso EPhasini

USolani: Akhucabangele lokho elinye ivesi leBhayibhili elikutjhoko ngokuphila ephasini esikhathini esizako. Akhe sifunde IsAmbulo 21:4. Malungana nabantu abazokuphila esikhathini esizakweso, iveseli lithi, “Uzobesula [uZimu] zoke iinyembezi emehlweni wabo. Ukufa angekhe kusaba khona, nokulila nobuhlungu ngekhe kusaba khona, ngombana izinto zokuthoma zidlulile. Kghani leli akusilo ithemba elithabisako?

UZakhele: Lona ngilo. Kodwana ngicabanga bona likhuluma ngendlela ukuphila okuyokuba ngayo ezulwini.

USolani: Mbala kunjalo, liqiniso bona labo abaya ezulwini bazokufumana iimbusiso ezifanako. Kodwana akhuqale iveseli godu. Lithi kuzokwenziwani ekufeni?

UZakhele: Lithi “ukufa angekhe kusaba khona.”

USolani: Uyibambe ngesbhukwini. Manje ngiyathemba uzokuvuma bonyana into bona ingasabi khona, kufuze ukuba beyikhona ekuthomeni.

UZakhele: Iye kunjalo.

USolani: Kodwana azangkhe khekube nokufa ezulwini, kghani nginamala? Abantu bafa ephasinapha kwaphela.

UZakhele: Hmm. Ngisazoyicabangela indaba le.

USolani: Uyabona-ke Zakhele, iBhayibhili ithi abanye abantu abalungileko bazokuya ezulwini, kodwana ithi abanengi abalungileko bazokuhlala ephasinapha ngokungapheliko. Ngiyaqiniseka bona wakhe wawezwa amezwi ajayelekileko la: “Babusisiwe abathobekileko: ngombana bazokudla ilifa lephasi.”—Matthew 5:5, King James Version.

UZakhele: Iye, ngakhe ngalizwa kanengi iveselo lifundwa esondweni.

USolani: Nengabe abalungileko bazokudla ilifa lephasi, lokho akutjho bona abantu bazokuphila ephasini na? Labo abaphila ephasini bazokuthabela iinzuzo ezibikezelwe encwadini yesAmbulo le. Bazokubona iphasi litjhentjha ngokupheleleko ngombana uZimu uzokususa boke ubumbi ephasinapha—ngitjho nokufa ngokwakho.

UZakhele: Ngiyayibona int’ oyitjhoko, kodwana angiqiniseki bona ivesi elilodwa namtjhana amabili aqinisekisa iphuzu lakho.

USolani: Uqinisile. Eqinisweni, kunemitlolo embalwa ekhuluma ngendlela ukuphila okuyokuba ngayo ephasinapha esikhathini esizako. Mhlambe ngingakukhombisa eminye yemitlolo engiyithanda khulu, nengabe unesikhathi.

UZakhele: Iye, imizuzwana yona nginayo.

“Omumbi angekhe asaba khona”

USolani: Ekuthomeni sifunde ivesi 29 leRhalani 37. Akhe sihlole irhalanelo godu. Nje sizokufunda ivesi 10 no-11. Ngibawa uwafunde.

 UZakhele: Kulungile. “Kusele isikhatjhana omumbi angekhe asaba khona; ngokuqinisekileko uyoyihlola indawakhe, begodu angekhe asafumaneka. Abathobekileko bazokudla ilifa lephasi, begodu bazokufumana ithabo nokuthula okukhulu.”

USolani: Ngiyathokoza. Ngokwevesi 11, bazokuba kuphi “abathobekileko,” namtjhana abantu abalungileko?

UZakhele: Lithi “bazokudla ilifa lephasi.” Nanyana kunjalo, ngicabanga bona iveseli lisebenza njenganje; angitjho bakhona abantu abalungileko ephasinapha namhlanje.

USolani: Uqinisile. Nokho, tjheja bona iveseli godu lithi bazokuba “nokuthula okukhulu.” Asikuboni ukuthula okungako ephasinapha namhlanje, kghani kukhona?

UZakhele: Awa, akukho.

USolani: Manje sizokuzaliseka njani isithembiswesi? Mhlambe ngingenza ukumadanisa naku: Akhe sithi unendawo eqatjhiswako. Abanye abantu abaqatjhe lapho balungile—bayayitlhogomela indawo abaqatjhe kiyo begodu balinga ukuba bomakhelwana abahle. Uyakuthabela ukubaqatjhisa. Kodwana abanye babaqatjhi abambi; bamotjha izinto ene benza ukuphila kwabantu abababhodileko kube budisi. Manje nengabe abaqatjhaba bayabhala ukutjhentjha ukuphila kwabo, ungenzani?

UZakhele: Ngingabaqotjha.

USolani: Ngilokho uZimu azokwenza ebantwini abambi abasibhodileko namhlanje. Godu qala ivesi 10. Lithi: “Omumbi angekhe asaba khona.” Ngamanye amezwi, uZimu “uzokususa” abantu ababangela abanye imiraro. Ngemva kwalokho abantu abalungileko bazokwazi ukuthabela ukuphila ngokuthula ephasini. Ngiyabona bona umbono wokobana abantu abalungileko bazokuphila phakade ephasini ungaba ngohlukileko kunalokho owakufundiswa esikhathini esidlulileko.

UZakhele: Uqinisile, azangkhe ngikuzwe lokho esondweni lami.

USolani: Njengombana utjhwile, ukucabangela ivesi elilodwa namtjhana amabili ngendaba le akukaneli. Kwamambala, kufuze sicabangele okutjhiwo yiBhayibhili iyoke ngekusasa labantu abalungileko. Kodwana ngokusekelwe emitlolweni esiyifunde namhlanje, ucabanga bona kuyakghoneka ngabanye abantu abalungileko bona baye ezulwini, kungilapho abanye abantu abalungileko bazokuphila ngokungapheliko ephasinapha?

UZakhele: Angiqiniseki. Kodwana kufuze ngivume bona ngokuya ngokwemitlolo esiyifundileko kubonakala kunjalo. Kufuze ngiyidlele amathamb’ engqondo indaba le.

USolani: Njengombana ucabangisisa ngendaba le, kungaba neminye imibuzo ozibuza yona. Isibonelo, kuthiwani ngabantu abalungileko abaphila ngaphambi kwesikhathi sethu? Boke baya ezulwini? Nengabe akusinjalo, bakuphi njenganje?

UZakhele: Mibuzo emihle leyo.

USolani: Mhlambe kunezinto ezimbili engingazenza. Kokuthoma, ithi ngikubhalele imitlolo embalwa ehlobene nesihlokwesi. * Kwesibili, ngingathanda ukubuya sizokucoca ngemitlolo le ngemva kobana uyifundile bewacabangisisa ngayo. Kulungile lokho?

UZakhele: Iye, kungaba yintwehle leyo. Ngiyathokoza.

[Umtlolo waphasi]