Kubayini UMuzwi WemiThandazo AVumela UkuTlhaga?

NANYANA bangathandaza, abanye abantu bayazaza bona uZimu ukhona. Kubayini banokuzaza? Mhlamunye kungombana babona ukutlhaga okukhulu ephasinapha. Wakhe wazibuza bona kubayini uZimu avumela ukutlhaga?

UZimu wenza abantu ngendlela abangayo nje na—banesono begodu batlhaga? Angekhe simhloniphe uZimu ofuna abantu batlhage. Kodwana akhucabange ngalokhu: Newubhodabhoda ikoloyi etja ngethabo bese ubona ibhodokile ngakelinye ihlangothi, uzokuphetha ngokuthi umuntu oyenzileko uyenze ibhodokile? Awa, angeze watjho njalo! Uzokuphetha ngokuthi umuntu oyenzileko uyenze “iphelele” bese othileko namtjhana into ethileko iyibhodozile.

Ngokufanako, nesithabela ukuhlophiseka nobuhle bemvelo bese sitjheja ukutjharagana nomonakalo isintu esiqalene nawo, kufuze sifikelele kisiphi isiphetho? IBhayibhili ithi uZimu wenza abantu bokuthoma ababili banganasono kodwana ngokukhamba kwesikhathi bazibangela bona ngokwabo umonakalo. (Duteronomi 32:4, 5) Iindaba ezimnandi kukobana uZimu uthembise ukulungisa umonakalo—ukubuyisela isintu esilalelako ekupheleleni. Nokho, kubayini athethe isikhathi eside kangaka ukuzalisa isithembiso sakhe?

Kubayini UZimu AVumele UkuTlhaga IsiKhathi Eside Kangaka?

Indaba isekutheni ngubani okufuze abuse isintu. UJehova gade angakanqophi bona abantu bazibuse. Bekufuze abe mBusi wabo. IBhayibhili ngokwayo ithi: “Akusikho ngitjho nekomuntu okhambako ukunqophisa  igadango lakhe.” (Jeremiya 10:23) Ngokudanisako, abantu bokuthoma bakhetha ukuvukela ukubusa kwakaZimu. Ukweqa kwabo umthetho kwabenza izoni. (1 KaJwanisi 3:4) Ngikho balahlekelwa kuphelela begodu bazibangela bona nesizukulwana sabo umonakalo.

Iinkulungwana zeemnyaka, uJehova wavumela abantu bona bazibuse, begodu umlando utjengisa bona abantu abanalo ikghono lokuzibusa. Utjengisa bona boke aborhulumende babantu babangela ukutlhaga. Akekho okwazileko ukuqeda ipi, ubulelesi, umonakalo namtjhana amalwelwe.

UZimu UzowuLungisa Njani Umonakalo Lo?

IBhayibhili ithembisa bona uZimu msinyana uzokuletha iphasi elitjha elinokulunga. (2 KaPitrosi 3:13) Ngilabo kwaphela abazikhethele ngokwabo ukuthandana nokuthanda uZimu abazokuvunyelwa ukuphila kilo.—Duteronomi 30:15, 16, 19, 20.

IBhayibhili godu ithi “ngesuku lokwahlulelwa” elitjhidela msinyana, uZimu uzokuqeda ukutlhaga nalabo abakubangelako. (2 KaPitrosi 3:7) Ngemva kwalokho, umBusi okhethwe nguZimu, uJesu Krestu, uzokubusa isintu esilalelako. (Danyela 7:13, 14) Khuyini okuzokufezwa kubusa kwakaJesu? IBhayibhili ithi: “Abathobekileko bazokudla ilifa lephasi, begodu bazokufumana ithabo nokuthula okukhulu.”—IRhalani 37:11.

NjengeKosi yezulwini, uJesu uzokulungisa umonakalo—ohlanganisa ukugula, ukuluphala nokufa—okwaba mphumela wokuhlubuka kwabantu kuJehova, “umthombo wokuphila.” (IRhalani 36:9) UJesu uzokulapha boke abamukela ukubusa kwakhe kwethando. Ngaphasi  kokubusa kwakhe, iinthembiso zeBhayibhilezi zizokuba yiqiniso:

▪ “Akekho ohlala khona ozokuthi: ‘Ngiyagula.’ Abantu abahlala khona bazokuba ngabalitjalelwe iimtjhaphwabo.”—Isaya 33:24.

▪ “[UZimu] uzobesula zoke iinyembezi emehlweni wabo. Ukufa angekhe kusaba khona, nokulila nobuhlungu ngekhe kusaba khona, ngombana izinto zokuthoma zidlulile.”—ISambulo 21:4.

Akuthabisi na ukwazi bona msinyana uZimu uzokuzalisa isithembiso sakhe sokuqeda koke ukutlhaga? Okwanje, akukafuzi silahle ithemba lokobana uyayizwa imithandazo yethu ngebanga lokobana okwanje usavumele ukutlhaga.

UZimu ukhona. Angakuzwa, ngitjho nokuzwa kwakho ubuhlungu namatlhuwo. Begodu ukhanuka ukukubona uphila uthabela isikhathi lapho koke ukuzaza nobuhlungu kuzobe kuphelile.