Kwanjesi Ngiyamazi UZimu EngimKhulekelako

Njengombana Ilandiswa nguMarieta Manuel Bacudio

Umvangeli omKhatholiki ebekuthiwa unamandla wokuphulusa uvakatjhele indawo le. Nekangithintako, ngawela phasi ngatsirimezeka, “ngifile ngokomoya.” Nengiphaphamako, kwabonakala ngasuthi ngikufumene ebengikutlhoga—amandla wokuphulusa. Khuyini okwadosela kilokhu, begodu kwakuthinta njani ukuphila kwami? Ngaphambi kobana ngikutjele ngalokhu, akhe ngikuhlathululele imvelaphi yami.

NGABELETHELWA e-Ilocos Norte, ePhilippine, ngoDecember 10, 1968, ngimntwana wekhomba ebantwaneni abalitjhumi. Njengabantu bePhilippine abanengi, sakhuliswa njengamaKhatholiki. Ngafumana iziqu esikolweni samabanga aphakemeko ngo-1986, begodu bengifuna ukuba yinesi. Nokho, ngombana bengiphiphila, ibhudangwelo akhenge lisaphumelela. Eqinisweni, bengicabanga bona ngizokufa. Ngihlangahlangene, ngabawa uZimu bona angisize begodu ngamtjela bona nengipholako, ngizomkhonza ukuphila kwami koke.

Ngemva kwesikhathi eside ngipholile, ngakhumbula isithembiso engasenza kuZimu. Ngalokho, ngoJune 1991, ngatlolisa esikolweni seBhayibhili samaKhatholiki. Irhelo lesikolo belihlanganisa nokufumana “isipho samahala somoya ocwengileko.” Bengifuna ukuba namandla wokuphulusa. Esikolweni basifundisa bona lokho kungafunyanwa ngokuzila ukudla nokuthandaza. Ngesinye isikhathi, emzamwenami wokubukisa ngokobana “nginesiphiwo,” ngakhukhutha ngalalela omunye engifunda naye eklasini nekathandaza ngokuzwakalako ewugwini ngesikhathi sokuthandaza. Nesele azokuqeda ukuthandaza, msinyana ngabuyela lapho egade ngiguqe khona. Ngemva kwalokho, ngamtjela lokho ebekakubawa emthandazwenakhe, begodu wakholwa bona kwanjesi “nginesipho samahala”!

Njengombana ngiragela phambili neemfundo zami esikolweni, benginemibuzo eminengi. Isibonelo, uMatewu 6:9 ukhuluma ‘ngoBaba’ ‘nebizo’ lakhe. Ngabuza imibuzo enjengokuthi “ngubani uBaba uJesu akhuluma ngaye” begodu “Ngelakabani ibizo okufuze licwengiswe?” Kanengi iimpendulo zabotitjhere bami bezingazwakali kuhle begodu zinganelisi. Bakhuluma ngoZiquntathu bona yinto ongekhe uyihlathulule. Kwangirara khulu lokho. Ngaphandle kwalokho, ngaragela phambili ngibandulelwa ukuba mfundisi.

UkuHlangana naboFakazi bakaJehova

Esikolweni seBhayibhili safundiswa bona aboFakazi bakaJehova bathuthukisa ikolo yamanga embi khulu. Godu bebaqalwa njengabaphika ukrestu. Ngathoma ukuyinyenya ikole le.

Hlangana nomnyaka wami wesibili esikolweni, ngavakatjhela ababelethi bami ekhaya nekuvalwa isikolo. Udadwethu omkhulu, uCarmen, wezwa bona ngisekhaya naye weza wazokuvakatjha. Besele abhabhadisiwe, asikhonzi sesikhathi esizeleko saboFakazi bakaJehova. Nekalinga ukungifundisa ngoZimu, ngaphendula ngokusilingeka: “Sengimazi  uZimu engimkhonzako!” Ngemva kokumthuka, ngamsunduzela le begodu akhenge ngimnikele elinye ithuba lokobana akhulume nami.

Ngemva kokubuyela esikolweni seBhayibhili, uCarmen wangithumela incwajana ethi, Ingabe Kufanele Ukholelwe KuZiqu-zintathu? * Msinyana ngayitjhukatjhuka ngayilahlela emlilweni. Bengisamkwatele.

UkuThuthuka NjengomFundisi

Njengombana ngiragela phambili ngeemfundo zami esikolweni seBhayibhili, ngakghona ukwenza amatjhuguluko. Ngathaba khulu lokha umma nomnakwethu bahlanganyela nami ekolweni yamaKhatholiki.

NgoMarch 1994, ngafumana iziqu zami esikolweni seBhayibhili samaKhatholiki. Njengombana kuhlathululwe ekuthomeni, isivakatjhi esimvangeli besikhona ngesikhatheso. Soke esifumene iziqu besifuna ukuba naso ngombana besikholwa bona sinesiphiwo sokuphulusa. Sahlanganyela naso esiteji, seqayeqa naso begodu siwahlela umbhino webhende. Ngemva kwalokho, nanyana ngubani egade simthinta bekawela phasi, “afa ngokomoya.” * Nesingithintako, ngawela phasi ngatsirimezeka. Nengiphaphamako, bengithukiwe, kodwana ngezwa ngathi kwanje senginamandla wokuphulusa, ngalokho ngathaba.

Msinyana ngemva kwalokho ngasebenzisa amandla la bona ngipholise umntwana ebekaphethwe mgomani omumbi. Nengimthandazelako, msinyana umntwana loyo wajuluka umgomani waphela. Ekugcineni, ngazizwa bona ngingasizalisa isithembiso sami kuZimu. Nokho, okurarako, ngazizwa kwanga ngisatlhoga okuthileko. Ngaphakathi kimi, bengikholwa bona kunoZimu oyedwa, kodwana bengingamazi kuhle bona ungubani. Begodu bekukhona okungitshwenyako malungana neenkolelo zesondo ezinengi.

Izinto EzaTjhugulula UkuCabanga Kwami

Ngemva kwezehlakalwezo, ukuphikisa kwami aboFakazi bakaJehova kwaqina khulu. Nanyana kunini lapho ngifumana khona iincwadi zaboFakazi, bengizitjhisa. Ngalokho kwenzeka into engakalindeleki. Ngathukwa khulu nengithola bona uMma akasayifuni ikolo yamaKhatholiki. UCarmen bekafunda naye iBhayibhili! Bengimkwatele khulu udadwethu.

Ngafumana umagazini i-Phaphama! ekhaya. Ngokujayelekileko bengizomtjhisa umagazini loyo. Kodwana ngokululukela lokho uMma egade akufunda, ngamphendla. Ngahlangana nesihloko esimalungana nekholwa egade liqinile kilokho ebekufundiswa esondweni. Nokho, nelithoma ukufunda iincwadi zaboFakazi neBhayibhili, lakholwa bona ifundiso kaZiquntathu, isirhogo nokungafi komphefumulo bekungasi ngokomtlolo. Ngathinteka khulu. Lezi zizinto ebengifuna ukuzizwisisa. Kusukela mhlokho, ngakhanukela isikhathi lapho ngizokuzwisisa khona amaqiniso weBhayibhili.

Ngemva kokufunda umlando wokuphila  kumagazini we-Phaphama! malungana nesidakwa nomuntu obekasebenzisa kumbi iindakamizwa owenza amatjhuguluko bona athuthukise ukuphila kwakhe ngombana bekafunda iBhayibhili, ngathoma ukuzifunda khulu iincwadi zaboFakazi. Ngafumana incwajana ethi, IGama LaPhezulu Eliyohlala Phakade. * Ngokufunda incwajana leyo, ngafumana bona ibizo lakaZimu nguJehova. Kwangithabisa khulu ukufunda iqiniso ngoZimu wamambala!—Duteronomi 4:39; Jeremiya 10:10.

Ngaragela phambili ngifunda ngemsitheleni begodu ngafunda amaqiniso weBhayibhili amanengi. Isibonelo, esikolweni samaKhatholiki ngafundiswa bona uJesu nguZimu, kodwana eBhayibhilini ngifunde bona uJesu ‘yiNdodana kaZimu ophilako.’—Matewu 16:15, 16.

AmaTjhuguluko

Nengibona uCarmen godu, warareka khulu nengimbawa ikhophi yencwajana ethi, IGama LaPhezulu Eliyohlala Phakade nezinye iincwadi. Ngimorose isikhathi eside esikolweni seBhayibhili, kodwana akhenge ngifundiswe iqiniso lapho, bengiphophaziwe. Kwanjesi ngithaba khulu ngebanga leqiniso engalifunda eBhayibhilini. Ngawezwisisa kuhle amezwi kaJesu athi: “Nizakwazi iqiniso, iqiniso lizanitjhaphulula.” (Jwanisi 8:32) Amaqiniso layo athoma ukutjhugulula ukuphila kwami.

Isikhathi eside bengizitjela bona ngingakhulekela uJehova uZimu ngemsitheleni ngapha ngiragele phambili ngimfundisi. Msinyana ngalemuka bona angeze ngisaragela phambili ngifundisa iimfundiso ezinengi zekolo. Nanyana kunjalo, bengisaba. Ngizoziphilisa ngani nengingalisa ukuba mfundisi? Qala bona bekuswabisa kangangani esondweni nengabe omunye wabafundisi babo uba nguFakazi kaJehova! Ngalokho, ngaragela phambili ngimfundisi, kodwana bengibalekela iimfundiso zekolo ezimamanga.

Nengibona udadwethu uCarmen godu, wangibawa bona ngiye emihlanganweni yaboFakazi bakaJehova. Kanengi njengombana bengijayele ukubika esondweni elikhulu elisedorobheni leLaoag, ngemsitheleni ngafuna indawo aboFakazi abahlanganyela kiyo, iHolo lomBuso lalapho. Bangithula ku-Alma Preciosa Villarin, ebebambiza “ngoPrecious” osikhonzi sesikhathi esizeleko ebandlenelo. Nanyana bengisese nombono ongasimuhle ngaboFakazi, ngamukela bona angifundise iBhayibhili.

Udadwethu bekanesineke ekuhlanganyeleni nami amaqiniso weBhayibhili. Manje ngabona isineke esifanako kuPrecious. Wangisiza khulu bona ngizwisise iBhayibhili ngitjho nanyana bengisilingeka, ngilinga ukuphikisana naye, ngezinye iinkhathi ngikhulumele phezulu ngigandelele nezinye izinto engazifunda ngaphambilini. Ikareko yakhe kimi,  ukuthobeka nesineke esatjengiswa nguPrecious nabanye aboFakazi kwangithabisa. Lokhu kwangenza ngafuna ukukhonza uJehova.

NgoJuly 1995 ngalemuka bona nengabe ngifuna ukuthabisa uJehova, kufuze ngilise isikhundla sokuba mfundisi. Kubayini bekufuze ngenze njalo? IsAmbulo 18:4 sikhuluma ngekolo yamanga engokomfanekiso sithi: “Phumani niphele, sitjhaba sami, phumani nilitjhiye, ngombana nani ningahle nehlelwe mitlhago elihlunguphazwa ngayo.” Ngizoziphilisa ngani? AmaHebheru 13:5 angifundisa bona nengabe senza intando kaZimu uthembisa uthi, “Angekhe ngakutjhiya wedwana; angekhe ngakulahla.”

Nanyana ubaba nomnakwethu bangiphikisa kabuhlungu nje, iimveke eembili ngaphambi kobana ngibhabhadiswe njengoFakazi, ngaqunga isibindi sokubuyela ekhaya bona ngitjhise yoke into egade ngiyisebenzisa ngaphambilini njengomfundisi. Ngemva kokwenza njalo, ngalemuka bona amandla akhethekileko ebenginikelwe wona ekuthomeni awasekho. Ekuthomeni, nengilalako, bengizwa ngasuthi kunento engigandelela phasi. Ukuzizwa njalo kwaphela. Isithunzi egade ngivame ukusibona efesdereni ekamurweni lami akhenge sisavela godu. Ukufunda kwami iBhayibhili kwangifundisa bona nanyana ngisiphi isipho sanamhlanjesi, njengamandla wokuphulusa, awabuyi kuZimu kodwana emimoyeni emimbi. Ngithaba khulu bona ngikghonile ukuphunyurha emtheleleni wayo njengombana kwenza umntazana uPowula noBhanabhasi abamtjhaphulula ‘ekuthukuleni.’—IzEnzo 16:16-18.

Qala bona bekuthabisa kangangani ukuba noMma nesizinikela kuJehova ngokubhabhadiswa njengaboFakazi bakaJehova ngoSeptember 1996! Ngemva kokubhabhadiswa kwami ngatlolisa njengesikhonzi sesikhathi esizeleko saboFakazi bakaJehova begodu ngathabela ukukhonza iminyaka eminengi ngendlela leyo.

Kwanje ngitjhade noSilver. Sobabili sisebenza budisi ukubandula indodakazi yethu ngamaqiniso weBhaybhili. Abanye abantwana bakwethu sebahlanganyela nathi ekukhonzeni uJehova. Nanyana ngizisola bona iminyaka eminengi bengingamazi kuhle uZimu, ngithaba khulu bona ngiyamazi kwanjesi uZimu engimkhonzako.

[Imitlolo yaphasi]

[Isithombe ekhasini 27]

Nengifumana iziqu njengomfundisi

[Umkhangiso osekhasini 27]

Ngasebenzisa amandla la ukuphulusa umntwana ebekanomgomani omumbi

[Isithombe ekhasini 28, 29]

UPrecious ufunda nami iBhayibhili

[Umkhangiso osekhasini 28]

Amaqiniso la athoma ukutjhugulula ukuphila kwami

[Isithombe ekhasini 29]

Sinomma nesibhabhadiswako

[Isithombe ekhasini 29]

Njengesikhonzi sesikhathi esizeleko saboFakazi bakaJehova

[Isithombe ekhasini 29]

Nginendodakwami, indodakazethu, neenhlobo zethu ezinengi ezahlanganyela nathi ekukhulekeleni kweqiniso

[Umkhangiso osekhasini 29]

Kwangithabisa khulu ukufunda iqiniso ngoZimu wamambala!