Tjhidela Hlanu Komuzwi WemiThandazo

ABANENGI abathi bakholelwa kuZimu abakwazi ukuhlathulula bona kubayini bakholwa. Abakwazi nokuhlathulula bona kubayini ikolo kanengi inomthelela eentweni ezimbi namtjhana bona kubayini uZimu avumela ukutlhaga. Nokho, into abayenzako kuthandaza kwaphela.

Nanyana kunjalo, ungatjhidela khulu kuZimu kunalokho. Ungakha ikholo lakho ekwazini uZimu okukubangela bona umthande begodu umthathe njengegugu. Ikholo lamambala lisekelwe ebufakazini. (Heb 11:1) Newufunda iqiniso ngoZimu, ungamazi begodu ukhulume naye njengomngani. Cabangela okuhlangabezanwe nakho kwabanye ebebathandaza nanyana banokuzaza bona uZimu ukhona.

▪ UPatricia, okukhulunywe ngaye esihlokweni sokuthoma. “Langelinye benginesiqhema sabangani abangaba litjhumi nebathoma ukukhuluma ngekolo. Ngabatjela bona ngisukile ekhaya ngibalekela ingcoco ebeyiphakathi kwakababa ongakholelwa kuZimu nomunye waboFakazi bakaJehova, ebekavakatjhe ekhaya. ‘Mhlamunye aboFakazi bakaJehova baqinisile,’ kutjho omunye wabangani bami.

Omunye wathi: “‘Kubayini singayi emihlanganwenabo siyozizwela?’ Senza njalo. Nanyana besinokuzaza, abanye bethu baragela phambili baya ngombana aboFakazi banomusa.

“Nokho, ngomunye uSondarha ngezwa into eyatjhentjha umbonwami. Isikhulumi sahlathulula bona kubayini abantu batlhaga. Ngaphambilini akhenge khe ngazi indaba yokobana ekuthomeni abantu babunjwa baphelele begodu isono nokufa kwathoma ngomuntu oyedwa bese sarhatjhekela kibo boke abantu. Godu isikhulumi sahlathulula bona kubayini ukufa kwakaJesu bekutlhogeka ukubuyisela isintu kilokho okwalahlwa mumuntu wokuthoma. * (Roma 5:12, 18, 19) Msinyana, yoke into yaba nengqondo kimi. Ngacabanga, ‘Kwamambala ukhona uZimu onendaba nathi.’ Ngaragela phambili ngifunda iBhayibhili begodu msinyana, kokuthoma ekuphileni ngifumana bona ngingathandaza emntwini wamambala.”

▪ U-Allan, naye okukhulunywe ngaye esihlokweni sokuthoma. “Langelinye aboFakazi bakaJehova bavakatjhela kwami, umkami wabangenisa  ngombana gade anekareko kilokho abakutjhoko ngokuphila okungapheliko ephasini.” Ngasilingeka. Ngatjhiya imvakatjhezo ekamurweni engaphambili, ngabizela umkami ngekhwitjhini ngathi kuye, ‘Khulis’ ukuba sidlhayela. Ungazikholwa njani mara izinto ezifana nalezi!’

Waphendula, “‘Ungaya kibo ubatjele bona banamala.

“Nokho, ayikho into engayizwa imamala. Kodwana bebanomusa khulu begodu bangitjhiyela incwadi ethi ukuphila kwadalwa namtjhana kwazivelela. Engakufumana lapho bekuzwakala kuhle begodu kusekelwe ngokuzwakalako okwangenza ngafuna ukwazi okungeziweko ngoZimu. Ngathoma ukufunda iBhayibhili naboFakazi, begodu msinyana ngabona bonyana lokho ekutjhoko kuhluke khulu kikho koke ebengikucabanga ngekolo. Njengombana ngifunda ngoJehova, ngathoma ukuthandaza kuye ngokunqophileko. Bengineminye imikghwana engasimihle, ngalokho ngathandazela isizo. Ngaqiniseka bona uJehova uyayiphendula imithandazwami.”

▪ U-Andrew, ohlala eNgilandi. “Nanyana bengineembono eqinileko nekareko ekulu kwezesayensi, bengimane ngikholelwa endabeni yokuzitjhugulukela kwemvelo ngombana abanye  bathi iyiqiniso. Bengingafuni ukukholelwa kuZimu ngebanga lazo zoke izinto ezimbi ezenzekako.

“Nokho, ngezinye iinkhathi bengicabanga: ‘Nengabe uZimu ukhona, ngifuna ukwazi bona kutjho ukuthini koke lokhu. Kubayini kunobulelesi obungaka nepi?’ Nengisebudisini, ngezinye iinkhathi ngithandazela isizo, kodwana akhenge khengazi bona ngikhuluma nobani.

“Omunye wanikela umkami iphetjhana eligadangiswa boFakazi bakaJehova elinesihloko esithi, Ingabe Lelizwe Liyosinda? Kanengi bengizibuza umbuzo ofanako. Iphetjhaneli langenza ngazibuza ngeBhayibhili, ‘Kungaba kuhlakanipha ukucabangela iimpendulo zayo?’ Ngokukhamba kwesikhathi, nengiseholideyini omunye wanginikela incwadi ethi, IBhayibheli-Izwi LikaNkulunkulu Noma Elomuntu? Nengibona bonyana iBhayibhili iyavumelana nesayensi yamambala, ngabona ukuthi kufuze ngifunde okunengi ngeBhayibhili. Ngalokho omunye waboFakazi bakaJehova nekabawa ukufunda nami, ngakwamukela lokho. Njengombana ngiragela phambili ngifunda ngomnqopho kaJehova, ngazizwa ngimazi njengomuntu wamambala, umuntu engingakhuluma naye ngokutjhaphulukileko emthandazweni.”

▪ UJan, owakhuliswa njengomphrothestani eLandani. “Ukuzenzisa okusekolweni nokurhagala komtlhago kwangenza nganghala isondo. Godu ngalisa ukufunda ekholiji ngathoma ukubhina nokudlala igatara bona ngenze imali. Kulapho ngahlangana khona noPat. Wakhuliswa njengomKhatholiki begodu walisa ukukholwa njengami.

“Besihlala endlini engasahlali muntu nabanye abambalwa abalise ekholiji kodwana abanekareko eenkolweni zePumalanga. Besihlala bekube sebusuku khulu sineengcoco ezitjhisako ngomnqopho wokuphila. Nanyana mina noPat besingakholelwa kuZimu, besicabanga bona kukhona ‘owenze bona kube nokuphila.’

“Ngemva kokufudukela etlhagwini yeNgilandi ngiyokufuna umsebenzi wokuba mbhini, sathola indodana. Ngobunye ubusuku yagula, ngazifumana ngithandaza kuZimu egade ngingamkholelwa. Msinyana ngemva kwalokho, mina noPat sathoma ukurarana, ngathatha umntwanethu samtjhiya. Godu ngathandazela isizo, ngimane ngenzela bona nengabe kukhona olaleleko. Ngingazi, uPat naye gade enza okufanako.

“Ngokukhamba kwesikhathi khona mhlokho, aboFakazi bakaJehova ababili bakokoda kwaPat bamtjengisa ezinye zeenluleko zeBhayibhili ezisebenzako. UPat wangifonela wangibuza bona ngingathanda bona sifunde iBhayibhili naboFakazi bakaJehova na. Msinyana safumana bona bonyana sithabise uZimu, kufuze sitjhade ngokomthetho. Kwabonakala kuyinto ebudisi khulu ngebanga lobuhlobo bethu obungakanzinzi.

“Besifuna ukwazi okungeziweko ngokuzaliseka kweemporofido zeBhayibhili, bona kubayini sitlhaga nalokho okutjhiwo Mbuso kaZimu. Kancanikancani satjheja bona uZimu uyasikhathalela, begodu safuna ukwenza lokho akutjhoko. Satjhada. Ukuhlakanipha kweLizwi lakaZimu kwasisiza ekukhuliseni abantwabethu abathathu. Saqiniseka bona uJehova uyayilalela imithandazwethu.”

Zihlolele Ngokwakho AmaQiniso

Njengeengidi zabanye, laba abadzubhulwe esihlokwenesi akhenge badukiswe yikolo yamanga kodwana bazitholela ngokwabo bona kubayini uZimu avumela ukutlhaga. Utjhejile na bona endabeni ngayinye lilwazi elinembileko leBhayibhili elenza abantwaba bakholwa bona kwamambala uJehova uyayizwa imithandazo?

Uyathanda ukuhlola ubufakazi bokobana uZimu ukhona? AboFakazi bakaJehova bazokuthabela ukukusiza bona ufunde iqiniso ngoJehova nokobana ungatjhidela njani hlanu ‘koMuzwi womthandazo.’—IRhalani 65:2.

[Umtlolo waphasi]

[Umkhangiso osekhasini 10]

“Njengombana ngiragela phambili nokwazi umnqopho kaJehova, ngabona bona ngimazi njengomuntu wamambala, umuntu engingakhuluma naye ngokutjhaphulukileko ngomthandazo”

[Isithombe ekhasini 9]

Ikholo lamambala lisekelwe ebufakazini nesifisweni sokwazi iqiniso ngoZimu