Ukhona OLalela ImiThandazo Na?

“Bengiba nokuzaza bona uZimu ukhona.” Nanyana kunjalo, ngezinye iinkhathi bengimane ngithandaze. Bengingaqiniseki bona kunomuntu olaleleko, kodwana ngiyavuma bona benginethemba lokobana bekunomuntu olaleleko. Bengingakathabi begodu nginganawo umnqopho ekuphileni. Bengisaba ukukholelwa kuZimu ngombana bengicabanga bona babantu abangazithembiko abakholelwa kuZimu.”—UPATRICIA, * WE-IRELAND.

WAKHE wazizwa njengoPatricia? Uyathandaza na nanyana uzaza bona uZimu ukhona? Banengi abanye abakhe bazaza bona uZimu ukhona. Cabangela okulandelako.

▪ Abantu beBrithani abayi-2 200 abenza ukuhlolisisa batjengisa bona maphesende ama-22 kwaphela akholelwa bona kunoZimu obumbe iphasi begodu olalela nemithandazo. Nokho, ekuhlolisisenokho, amaphesende ama-55 okunganani ayathandaza ngeenkhathi ezithileko.

▪ Ebantwini abayi-10 000 eenarheni ezine ababuzwako, abamaphesende ama-30 kilabo abathi abakholelwa kuZimu, nokho bayathandaza.

Kubayini BanokuZaza?

Indoda emngisi u-Allan ithi: “Bengivame ukuthi angikholelwa kuZimu ngombana bengicabanga bona ikolo beyenzelwe ukulawula abantu nokwenza imali. Ngacabanga, nengabe gade akhona uZimu, kutjho bona bengekhe kube nobumbi obungakangaka. Nanyana kunjalo, ngezinye iinkhathi bengihlala ngithule du ngikhulume ‘nokuthize.’ Godu bengizibuza, ‘Ngibe khona njani la?’”

Woke umuntu ozizwa ngendlela efanako unamabangakhe wokuzaza bona imithandazo iyaphendulwa. Esikhathini esinengi, ukuzaza kubangelwa mibuzo engaphendulwako, enjengelandelako:

▪ Ukhona na umBumbi?

▪ Kubayini kanengi ikolo ibangela umonakalo?

▪ Kubayini uZimu avumela ukutlhaga?

Newungafumana iimpendulo eembuzweni le, ungazizwa unesibindi sokuthandaza?

[Umtlolo waphasi]